ᲛᲡᲝᲤᲚᲘᲝ ᲥᲐᲝᲡᲨᲘᲐ

3 | გაამყარეთ ურთიერთობები

ᲠᲐᲢᲝᲛ ᲐᲠᲘᲡ ᲛᲜᲘᲨᲕᲜᲔᲚᲝᲕᲐᲜᲘ:

რაც დრო გადის, მსოფლიოში მდგომარეობა უფრო და უფრო მძიმდება, რასაც ხშირად ადამიანური ურთიერთობები ეწირება.

ზოგი მეგობრებს ერიყება და საკუთარ თავში იკეტება.
მეუღლეები უხეშად ექცევიან ერთმანეთს.
მშობლებს უყურადღებოდ რჩებათ შვილების გრძნობები თუ განცდები.

რა უნდა იცოდეთ:

მეგობრების მხარში დგომა ემოციურ სტაბილურობას გვინარჩუნებს, რაც თავის მხრივ, კარგად აისახება ფიზიკურ ჯანმრთელობაზე.
დღევანდელ ქაოსურ მსოფლიოში ოჯახები ახალ-ახალი გამოწვევების წინაშე დგებიან.
ახალი ამბებიდან გამუდმებით ნეგატიური ინფორმაციის მოსმენა ბავშვებზე იმაზე ცუდად აისახება, ვიდრე წარმოგიდგენიათ.

რა უნდა გააკეთოთ:

ბიბლიაში ნათქვამია: „ნამდვილ მეგობარს ყოველთვის ეყვარები; ის გასაჭირისთვის დაბადებული ძმაა“ (იგავები 17:17).

მეგობრები გასაჭირში გვეხიდებიან და პრაქტიკულ რჩევებს გვაძლევენ. იმის ცოდნა, რომ ვიღაცას უყვარხართ და აღელვებს თქვენი მდგომარეობა, დაგეხმარებათ, თავი გაართვათ ყოველდღიურ სირთულეებს.

პრაქტიკული რჩევები

გაამყარეთ ურთიერთობები და გაითვალისწინეთ შემდეგი რჩევები . . .

ᲒᲐᲜᲐᲛᲢᲙᲘᲪᲔᲗ ᲥᲝᲠᲬᲘᲜᲔᲑᲐ

განამტკიცეთ ქორწინება

ბიბლიაში ნათქვამია: „ორის ერთად ყოფნა სჯობს მარტო ყოფნას . . . თუ ერთი დაეცემა, მეორე წამოაყენებს“ (ეკლესიასტე 4:9, 10). მეუღლეები ერთ თვითმფრინავში მსხდომ პილოტებს უნდა ჰგავდნენ, რომლებსაც ერთი მიმართულებით აქვთ გეზი აღებული, და არა ერთმანეთთან დაპირისპირებული საბრძოლო თვითმფრინავების პილოტებს.

არ მისცეთ სტრესულ სიტუაციებს საშუალება, რომ ჯავრი მეუღლეზე იყაროთ და უხეშად მოექცეთ მას. მოთმინება და თავშეკავება გამოავლინეთ.
კვირაში ერთხელ მაინც ესაუბრეთ მეუღლეს თქვენს პრობლემებზე. ებრძოლეთ პრობლემას და არა ერთმანეთს.
ერთად აკეთეთ ის საქმეები, რაც ორივეს მოგწონთ.
გააცოცხლეთ სასიამოვნო მოგონებები, რომლებიც ერთმანეთთან გაკავშირებთ. მაგალითად, ქორწილის ფოტოების დათვალიერება კარგ მომენტებს გაგახსენებთ.

„შეიძლება ცოლ-ქმარი ყველაფერში ერთმანეთს არ ეთანხმებოდეს, მაგრამ ეს იმას არ ნიშნავს, რომ ისინი შეხმატკბილებული წყვილი ვერ იქნებიან. ცოლ-ქმარმა ერთად უნდა მიიღოს გადაწყვეტილება და ერთად უნდა იშრომოს ამ გადაწყვეტილების სისრულეში მოსაყვანად“ (დეივიდი).

ᲨᲔᲘᲜᲐᲠᲩᲣᲜᲔᲗ ᲛᲔᲒᲝᲑᲠᲔᲑᲗᲐᲜ ᲐᲮᲚᲝ ᲣᲠᲗᲘᲔᲠᲗᲝᲑᲐ

შეინარჩუნეთ მეგობრებთან ახლო ურთიერთობა

კარგია, როცა მეგობრების მხარდაჭერას გრძნობთ, მაგრამ იმაზეც იფიქრეთ, რომ მათაც სჭირდებათ თქვენი მხარში დგომა. სხვების გამხნევება თავადაც გაგამხნევებთ.
დღის განმავლობაში შეეხმიანეთ რამდენიმე მეგობარს და დაინტერესდით მათი ამბებით.
ჰკითხეთ მეგობრებს, როგორ გაართვეს თავი იმ პრობლემებს, რომელთა წინაშეც ახლა თქვენ დგახართ.

„როცა პრობლემები ქარიშხალივით გვატყდება, მეგობრები წონასწორობის შენარჩუნებასა და გზის გაკვლევაში გვეხმარებიან. მათ შეიძლება უბრალოდ შეგვახსენონ ის, რაც უკვე კარგად ვიცით. მეგობრები ზრუნავენ ჩვენზე და მოელიან, რომ ჩვენც ვიზრუნებთ მათზე“ (ნიკოლი).

ᲘᲧᲐᲕᲘᲗ ᲧᲣᲠᲐᲓᲦᲔᲑᲘᲐᲜᲘ ᲛᲨᲝᲑᲔᲚᲘ

იყავით ყურადღებიანი მშობელი

ბიბლიაში ნათქვამია: „თითოეული მზად იყოს მოსასმენად და ნუ იჩქარებს რამის თქმას“ (იაკობი 1:19). ბავშვებს შეიძლება არ ეხალისებოდეთ გრძნობების გამოხატვა, მაგრამ თუ მოთმინებით და ყურადღებით მოუსმენთ, აუცილებლად გადაგიშლიან გულს.

ბავშვს ოფიციალურად კი ნუ დასვამთ სასაუბროდ, არამედ შეუქმენით ისეთი გარემო, სადაც ადვილად გამოხატავს გრძნობებს. როგორც წესი, მათ თავისუფალ გარემოში უფრო უადვილდებათ საუბარი, მაგალითად, სეირნობისას ან მანქანით მგზავრობისას.
ხშირად ნუ აყურებინებთ ბავშვებს ახალ ამბებს.
აუხსენით შვილებს, რას აკეთებთ ოჯახის უსაფრთხოებისთვის.
მოემზადეთ საგანგებო სიტუაციებისთვის და ბავშვებთან ერთად გაითამაშეთ, როგორ მოიქცევით ასეთ დროს.

„ესაუბრეთ შვილებს და მიეცით საშუალება, თავიანთი გულისნადები გაგიზიარონ. ისინი შეიძლება ხმამაღლა არ ამბობდნენ, რა აწუხებთ, რისი ეშინიათ ან რა აღიზიანებთ. დაანახვეთ, რომ თქვენც გეუფლებათ მსგავსი გრძნობები და აუხსენით, როგორ უმკლავდებით მათ“ (ბეთანი).