განივითარეთ კმაყოფილების გრძნობა

ᲠᲐᲢᲝᲛ ᲣᲜᲓᲐ ᲒᲐᲜᲕᲘᲕᲘᲗᲐᲠᲝᲗ ᲙᲛᲐᲧᲝᲤᲘᲚᲔᲑᲘᲡ ᲒᲠᲫᲜᲝᲑᲐ

როგორც ფსიქოლოგი ჯესიკა კელერი აღნიშნავს, კმაყოფილი ადამიანები უფრო პოზიტიურები არიან და სხვებისაც ნაკლებად შურთ. ამიტომ, რა გასაკვირია, რომ ისინი ბედნიერებიც არიან და ნაკლები სტრესიც აქვთ. საინტერესოა, რომ ზოგ უბედნიერეს ადამიანს ბევრი არაფერი აბადია. ამის მიზეზი კი ის არის, რომ მათთვის ფასეული უფრო ისაა, რასაც ფულით ვერ იყიდი, მაგალითად, ოჯახის წევრებისთვის და მეგობრებისთვის დროის დათმობა.

ᲠᲘᲡᲘ ᲒᲐᲙᲔᲗᲔᲑᲐ ᲨᲔᲒᲘᲫᲚᲘᲐᲗ

სხვებს ნუ შეადარებთ თავს. თუ თქვენს ცხოვრებას მათსას შეადარებთ, ვინც თქვენზე შეძლებულია, შეიძლება უკმაყოფილების გრძნობამ მოგიცვათ და შეგშურდეთ კიდეც მათი. თანაც ის, რაც ჩანს, ყოველთვის არ ასახავს რეალობას. სინამდვილეში ზოგს შეიძლება დიდი ვალებიც ჰქონდეს დადებული. ნიკოლი, რომელიც სენეგალში ცხოვრობს, აღნიშნავს: „ბედნიერებისთვის სულ არ მჭირდება ბევრი ნივთი. კმაყოფილების გრძნობა მეხმარება, ბედნიერი ვიყო და თავი სხვებს არ შევადარო“.

ეცადეთ, ასე მოიქცეთ: ნუ გაეცნობით ისეთ პოსტებსა თუ ვიდეომასალას, რომლებიც სხვების მდიდრულ ცხოვრებას არეკლამებს.

იყავით მადლიერი ადამიანი. მადლიერ ადამიანს არ უჭირს, დაკმაყოფილდეს იმას, რაც აქვს და ნაკლებად ფიქრობს, რომ რაღაც აკლია ან მეტს იმსახურებს. ერთი მამაკაცი რობერტონი, რომელიც ჰაიტიზე ცხოვრობს, ამბობს: „ჩემთვის სულერთი არ არის, რასაც სხვები ჩემთვის და ჩემი ოჯახისთვის აკეთებენ და ვფიქრობ ხოლმე ამაზე. მადლიერებას სიტყვებითაც გამოვხატავ. რვა წლის ბიჭი მყავს და მასაც ვასწავლი, რომ თუ რაიმეს აჩუქებენ, ყოველთვის თქვას მადლობა“.

ეცადეთ, ასე მოიქცეთ: ყოველდღე ჩამოწერეთ, რისთვის ხართ მადლიერი. ეს შეიძლება იყოს ჯანმრთელობის კარგი მდგომარეობა, ოჯახში თბილი ურთიერთობები, ნამდვილი მეგობრები და ლამაზი მზის ჩასვლაც კი.

და მაინც, ზოგჯერ შეიძლება გაგვიჭირდეს, დავკმაყოფილდეთ იმას, რაც გვაქვს. თუმცა, თუ გავაგრძელებთ საკუთარ თავზე მუშაობას, ძალისხმევა დაგვიფასდება. კმაყოფილების გრძნობა ხომ პირდაპირ კავშირშია ბედნიერებასთან, რასაც ფულით ნამდვილად ვერ ვიყიდით.