მთავრობა, რომელიც დაამყარებს სამოთხეს
დედამიწაზე ყოფნისას იესო თავის მიმდევრებს ეუბნებოდა, ღვთის სამეფოსთვის ელოცათ: „მოვიდეს სუფევა შენი, და იყოს ნება შენი, ვითარცა ცათა შინა, ეგრეცა ქვეყანასა ზედა“ (მათე 6:9, 10). აგრეთვე ის ყოველთვის ქადაგებდა „სასუფევლის სახარებას“ (მათე 4:23). ფაქტიურად, ყველაზე მეტად ის სამეფოს შესახებ საუბრობდა. რატომ? რადგანაც სამეფო არის ის საშუალება, რომელსაც ღმერთი გამოიყენებს იმ პრობლემების გადასაჭრელად, რომლებიც ასე ართულებენ დღევანდელ ცხოვრებას. სამეფოს მეშვეობით ღმერთი მალე მოსპობს ომებს, აგრეთვე შიმშილს, ავადმყოფობას, დამნაშავეობას და დაამყარებს ერთიანობასა და მშვიდობას.
ისურვებდით ასეთ ქვეყნიერებაში ცხოვრებას? თუ დიახ, მაშინ უნდა წაიკითხოთ ეს ბროშურა. ამ ბროშურის საშუალებით გაიგებთ, რომ სამეფო არის მთავრობა, მაგრამ ის კაცობრიობის ისტორიაში ოდესმე არსებულ მთავრობებზე საუკეთესოა. აგრეთვე დაინახავთ, რომ აღმაფრთოვანებლად განუმარტა ღმერთმა თანდათანობით თავის მსახურებს სამეფოსთან დაკავშირებული განზრახვები. ამასთანავე, დაინახავთ თუ როგორ შეუძლია სამეფოს, დაგეხმაროთ დღესაც.
ფაქტიურად, ახლავე შეგიძლიათ ღვთის სამეფოს ქვეშევრდომი გახდეთ. მაგრამ, სანამ ამ არჩევანს გააკეთებდეთ, უფრო მეტი უნდა გაიგოთ ამის შესახებ. ასე რომ, მოგიწოდებთ შეისწავლოთ ეს ბროშურა. ყველაფერი, რასაც გაიგებთ სამეფოს შესახებ, ბიბლიიდანაა აღებული.
უპირველეს ყოვლისა, მოდი ვნახოთ, რატომ გვჭირდება ღვთის სამეფო ასე ძალიან.
კაცობრიობის ისტორიის დასაწყისში ღმერთმა სრულყოფილი ადამიანი შექმნა და სამოთხეში დაასახლა. იმ დროს სამეფო საჭირო არ იყო.
მაგრამ ადამმა და ევამ, ჩვენმა პირველმა წინაპრებმა, სატანას, მეამბოხე ანგელოზს, მოუსმინეს. მან ცილი დასწამა ღმერთს და ისინი მის წინააღმდეგ ააჯანყა. ამის გამო მათ სიკვდილი დაიმსახურეს, ვინაიდან „ცოდვის საზღაური სიკვდილია“ (რომაელთა 6:23).
არასრულყოფილ, ცოდვილ ადამიანს არ შეუძლია სრულყოფილი ბავშვები ჰყავდეს. ამგვარად, ადამის ყველა ბავშვი არასრულყოფილი, ცოდვილი და მოკვდავი დაიბადა (რომაელთა 5:12).
იმ დროიდან ადამიანებს ესაჭიროებათ ღვთის სამეფო, რათა გათავისუფლდნენ ცოდვისა და სიკვდილის წყევლისგან. აგრეთვე სამეფო განწმენდს ღვთის სახელს სატანის ცილისწამებისგან.
იეჰოვა ღმერთმა აღთქმა დადო, რომ კაცობრიობის ცოდვისგან გამოსახსნელად „თესლი“ (ანუ შთამომავალი) დაიბადებოდა (დაბადება 3:15). ეს „თესლი“ ღვთის სამეფოს მეფე იქნებოდა.
ვინ უნდა ყოფილიყო ის?
ადამის შეცოდებიდან დაახლოებით 2000 წლის შემდეგ ცხოვრობდა ძლიერ ერთგული კაცი, სახელად აბრაამი. იეჰოვამ უთხრა აბრაამს, დაეტოვებინა საკუთარი სახლი და პალესტინის მიწაზე კარვებში ეცხოვრა.
აბრაამმა ყველაფერი ისე გააკეთა, როგორც იეჰოვამ უთხრა, ძალიან ძნელი დავალების ჩათვლით. იეჰოვამ აბრაამს უთხრა, თავისი ვაჟი, ისაკი, სამსხვერპლოზე შეეწირა.
იეჰოვას, სინამდვილეში, არ უნდოდა ადამიანის მსხვერპლად შეწირვა. მას მხოლოდ სურდა გაეგო, რამდენად დიდი იყო მისადმი აბრაამის სიყვარული. აბრაამს ისაკი ეს-ესაა უნდა მოეკლა, რომ იეჰოვამ შეაჩერა.
აბრაამის დიდი რწმენის გამო იეჰოვამ აღუთქვა, რომ მის შთამომავლობას მისცემდა პალესტინის მიწას და რომ აღთქმული თესლი მისი და მისი ძის, ისაკის, საგვარეულო ხაზიდან მოვიდოდა (დაბადება 22:17, 18; 26:4, 5).
ისაკს ტყუპი ვაჟები ჰყავდა: ესავი და იაკობი. იეჰოვამ თქვა, რომ აღთქმული თესლი იაკობის შთამომავლობით მოვიდოდა (დაბადება 28:13–15).
იაკობს, რომელსაც იეჰოვამ აგრეთვე ისრაელი დაარქვა, 12 ვაჟი ჰყავდა, რომლებსაც მოგვიანებით შვილები ეყოლათ. ასე რომ, აბრაამის შვილებმა გამრავლება იწყეს (დაბადება 46:8–27).
როდესაც მათ მხარეში საშინელი შიმშილობა ჩამოვარდა, იაკობი და მისი ოჯახი ფარაონის, ეგვიპტის მმართველის, მიწვევით ეგვიპტეში გადასახლდნენ (დაბადება 45:16–20).
ეგვიპტეში გამოვლინდა, რომ აღთქმული თესლი იაკობის ძის, იუდას, შთამომავალი იქნებოდა (დაბადება 49:10).
იაკობის სიკვდილის შემდეგ მისი მოდგმა რიცხობრივად ისე გაიზარდა, რომ ერად იქცა. მაშინ ეგვიპტელებს შეეშინდათ მათი და მონებად აქციეს (გამოსვლა 1:7–14).
გარკვეული დროის შემდეგ იეჰოვამ გაგზავნა მოსე, ძალზე ერთგული კაცი, ფარაონთან მოთხოვნით, რომ ისრაელები გაეთავისუფლებინა (გამოსვლა 6:10, 11).
ფარაონმა უარი განაცხადა, რის გამოც იეჰოვამ ათი სასჯელი მოუვლინა ეგვიპტელებს. ბოლო სასჯელის შესასრულებლად მან სიკვდილის ანგელოზი გაგზავნა ეგვიპტელთა პირმშოების დასახოცად (გამოსვლა 7—12 თავები).
ღმერთმა ისრაელებს უთხრა, რომ, თუ ისინი დაკლავდნენ ბატკანს და თავიანთი სახლების წირთხლებზე სისხლს წაუსვამდნენ, სიკვდილის ანგელოზი გვერდს აუვლიდა მათ სახლებს. ასე რომ, ისრაელის პირმშოები გადარჩნენ (გამოსვლა 12:1–35).
შედეგად, ფარაონმა ისრაელებს უბრძანა, ეგვიპტიდან გასულიყვნენ. მაგრამ შემდეგ გადაიფიქრა და დასაბრუნებლად დაედევნა.
იეჰოვამ ისრაელებს გზა გაუხსნა, რომ წითელი ზღვით გაქცეულიყვნენ. და, როდესაც ფარაონმა და მისმა ჯარმა სცადეს მიჰყოლოდნენ მათ, დაიხრჩვნენ (გამოსვლა 15:5–21).
იეჰოვამ ისრაელის ძეები უდაბნოში, სინაის მთასთან მიიყვანა. იქ მან ისრაელს რჯული მისცა და უთხრა, რომ, თუ დაიცავდნენ მას, გახდებოდნენ მღვდელთა სამეფო და წმინდა ერი. ამიტომ, დროთა განმავლობაში ისრაელს შესაძლებლობა ჰქონდა, მნიშვნელოვანი ადგილი დაეკავებინა ღვთის სამეფოში (გამოსვლა 19:6; 24:3–8).
სინაის მთასთან ერთი წლის ყოფნის შემდეგ, იეჰოვამ ისრაელი პალესტინისკენ წაიყვანა — მიწისკენ, რომელიც აბრაამს, მათ წინაპარს, აღუთქვა.
მოგვიანებით, პალესტინაში ღმერთმა დაუშვა, რომ ისრაელებს მეფეები ჰყოლოდათ. ასეთი სახით ღმერთს დედამიწაზე ჰქონდა სამეფო.
ისრაელის მეორე მეფე, დავითი, იუდას შთამომავალი იყო. დავითმა ისრაელის ყველა მტერი დაიპყრო და ქვეყნის დედაქალაქად იერუსალიმი აქცია.
დავითის მეფობის დროინდელი შემთხვევები აჩვენებს, რომ ვერც ერთი მიწიერი მმართველი ვერ სძლევს მეფეს, როცა მისი მხარდამჭერი იეჰოვაა.
იეჰოვამ თქვა, რომ აღთქმული თესლი დავითის შთამომავალთაგანი იქნებოდა (პირველი ნეშტთა 17:7, 11, 14).
დავითის შემდეგ მისი ძე, სოლომონი, მეფობდა. ის ბრძენი მეფე იყო და მისი მეფობისას ისრაელი ყვაოდა.
სოლომონმა აგრეთვე იერუსალიმში შესანიშნავი ტაძარი აუგო იეჰოვას. ისრაელში სოლომონის მეფობისას არსებული მდგომარეობა იმ კურთხევების მხოლოდ ნაწილს გვიჩვენებს, რომლებსაც ღვთის სამეფო მოუტანს კაცობრიობას (მესამე მეფეთა 4:24, 25).
მაგრამ სოლომონის შემდეგ მრავალი მეფე ორგული იყო.
მიუხედავად ამისა, ჯერ კიდევ დავითის შთამომავლების მეფობისას იერუსალიმში, იეჰოვამ წინასწარმეტყველ ესაიას მეშვეობით თქვა დავითის მომავალ ძეზე, რომელიც სამართლიანად იმმართველებდა მთელ დედამიწაზე. სწორედ ეს იქნებოდა აღთქმული თესლი (ესაია 9:5, 6).
წინასწარმეტყველმა ესაიამ იწინასწარმეტყველა, რომ მისი მმართველობა სოლომონის მმართველობაზე ბევრად უფრო დიდებული იქნებოდა (ესაია, მე-11 და 65-ე თავები).
ამ დროს ღვთის მსახურებს განსაკუთრებით აინტერესებდათ, ვინ იქნებოდა თესლი.
მაგრამ თესლის მოსვლამდე ისრაელის მეფეები ისე გაირყვნენ, რომ ძვ. წ. 607 წელს იეჰოვამ დაუშვა, ბაბილონელებს დაეპყროთ ისინი და უმრავლესობა ბაბილონში გადაესახლებინათ. მაგრამ ღმერთმა არ დაივიწყა თავისი აღთქმა. თესლი კვლავაც დავითის საგვარეულოდან მოვიდოდა (ეზეკიელი 21:30–32).
ისრაელის შემთხვევამ აჩვენა, რომ, თუმცა ბრძენ და ერთგულ მიწიერ მეფეს შეეძლო სარგებლობის მოტანა, ეს სარგებლობა შეზღუდული იყო. ერთგული ადამიანები კვდებიან, ხოლო მათი მემკვიდრეები შეიძლება ერთგულები არ იყვნენ. რა იყო გამოსავალი? აღთქმული თესლი.
ბოლოს და ბოლოს, ათასობით წლის შემდეგ აღთქმული თესლი გამოჩნდა. ვინ იყო ის?
ღვთის ანგელოზმა ამ კითხვაზე პასუხი ებრაელ გასათხოვარ მარიას გასცა. მან უთხრა, რომ ეყოლებოდა ვაჟი, რომელსაც იესოს დაარქმევდა. აი, რა თქვა ანგელოზმა:
„დიდი იქნება ის და უზენაესის ძედ იწოდება. მისცემს მას უფალი ღმერთი მისი მამის, დავითის ტახტს. და უკუნისამდე იმეფებს“ (ლუკა 1:32, 33).
ასე რომ, იესო იქნებოდა აღთქმული თესლი და საბოლოოდ ღვთის სამეფოს მეფე. მაგრამ, რატომ განსხვავდებოდა იესო მანამდე მცხოვრები ერთგული ადამიანებისგან?
იესო სასწაულით იყო დაბადებული. დედამისი ქალწული იყო, ხორციელი მამა კი არ ჰყავდა. იესო მანამდე ზეცაში ცხოვრობდა და ღვთის სულიწმიდამ, ანუ მოქმედმა ძალამ, იესოს სიცოცხლე ზეციდან მარიამის საშვილოსნოში გადაიტანა. აქედან გამომდინარე, მას მემკვიდრეობით არ მიუღია ადამის ცოდვები. იესოს სიცოცხლის მანძილზე ერთი ცოდვაც არ ჩაუდენია (1 პეტრე 2:22).
იესო ოცდაათი წლის ასაკში მოინათლა.
ის ხალხს ღვთის სამეფოს შესახებ მოუთხრობდა და ბოლოს თავი ამ სამეფოს მეფედ წარუდგინა (მათე 4:23; 21:4–11).
აგრეთვე ის მრავალ სასწაულებს ახდენდა.
კურნავდა ავადმყოფებს (მათე 9:35).
სასწაულით აპურებდა მშივრებს (მათე 14:14–22).
მან მკვდარიც კი აღადგინა (იოანე 11:38–44).
ეს სასწაულები აჩვენებს, თუ რას გააკეთებს იესო კაცობრიობისთვის, როგორც ღვთის სამეფოს მეფე.
გახსოვს მეფე დავითმა როგორ გახადა იერუსალიმი თავისი სამეფოს დედაქალაქად? იესომ ახსნა, რომ ღვთის სამეფო არ იქნებოდა დედამიწაზე, არამედ ზეცაში (იოანე 18:36). სწორედ ამიტომ ეწოდება სამეფოს ‘ზეციური იერუსალიმი’ (ებრაელთა 12:22, 28).
იესომ აღნიშნა კანონები, რომლებსაც ღვთის სამეფოს ქვეშევრდომები უნდა დამორჩილებოდნენ. ეს კანონები ახლა მოცემულია ბიბლიაში. აქედან ყველაზე მნიშვნელოვანი კანონები ის იყო, რომ ადამიანებს ჰყვარებოდათ ღმერთი და ერთმანეთი (მათე 22:37–39).
იესომ აგრეთვე აჩვენა, რომ მარტო არ იმეფებდა. ზეცაში მასთან ერთად მმართველობისთვის ადამიანები იქნებოდნენ არჩეულნი (ლუკა 12:32; იოანე 14:3). რამდენი იქნებოდნენ ისინი? გამოცხადების 14:1-ლი (აფ) გვპასუხობს: 144000.
თუ მხოლოდ 144000 მიდის ზეცაში, რომ მართოს იესოსთან ერთად, რა იმედი აქვთ დანარჩენ ადამიანებს?
ბიბლია ამბობს: „მართალნი დაიმკვიდრებენ ქვეყანას და იარსებებენ მასზე უკუნისამდე“ (ფსალმუნი 36:29).
მათ, ვინც მარადიულად იცხოვრებენ დედამიწაზე, ‘სხვა ცხვრები’ ეწოდებათ (იოანე 10:16).
ასე რომ, არსებობს ორი იმედი. ერთი — 144000-თვის, რომლებიც იეჰოვა ღმერთმა ზეცაში იესოსთან მმართველობისთვის მიიწვია. მეორე — მილიონობით სხვა ადამიანებისთვის, რომლებსაც ღვთის სამეფოს ქვეშევრდომებად მარადიული ცხოვრების ნამდვილი იმედი აქვთ დედამიწაზე (გამოცხადება 5:10).
სატანას სძულდა იესო და ეწინააღმდეგებოდა მას. იესოს მიერ სამ წელიწად-ნახევრის ქადაგების შემდეგ სატანის გავლენით იესო შეიპყრეს და ძელზე გაკვრით მოკლეს. რატომ დაუშვა ღმერთმა ეს?
გავიხსენოთ, რომ, რადგანაც ადამის შთამომავლები ვართ, ყველა ვცოდავთ და ვიმსახურებთ სიკვდილს (რომაელთა 6:23).
აგრეთვე გავიხსენოთ ისიც, რომ სასწაულებრივი დაბადების გამო იესო სრულყოფილი იყო და არ იმსახურებდა სიკვდილს. მიუხედავად ამისა, იეჰოვამ ნება დართო სატანას, სასიკვდილოდ ‘დაეგესლა იესოსთვის ქუსლი’. მაგრამ ღმერთმა აღადგინა ის, როგორც უკვდავი სულიერი ქმნილება. რადგანაც მას კვლავ ჰქონდა უფლება, სრულყოფილი ადამიანი ყოფილიყო, მან გამოიყენა ის კაცობრიობის ცოდვისგან გამოსასყიდად (დაბადება 3:15; რომაელთა 5:12, 21; მათე 20:28).
სრულად რომ გავიგოთ იესოს მსხვერპლის მნიშვნელობა, ბიბლია წინასწარმეტყველური მაგალითებით გვეხმარება.
მაგალითად, გახსოვთ, რომ სიყვარულის გამოსაცდელად იეჰოვამ უთხრა აბრაამს, ვაჟი შეეწირა?
ეს იესოს შეწირვის წინასწარმეტყველური მაგალითი იყო. ამან აჩვენა, რომ იეჰოვას სიყვარული ადამიანთა მიმართ იმდენად დიდია, რომ მან ჩვენთვის გასწირა თავისი ძე, იესო, რათა გვეცხოვრა (იოანე 3:16).
გახსოვთ, როგორ იხსნა იეჰოვამ ისრაელები ეგვიპტიდან და გადაარჩინა მათი პირმშოები, როცა სიკვდილის ანგელოზმა გვერდი აუარა მათ? (გამოსვლა 12:12, 13).
ეს იყო წინასწარმეტყველური მაგალითი. როგორც ბატკნის სისხლი სიცოცხლეს ნიშნავდა ისრაელი პირმშოებისთვის, ასევე იესოს დაღვრილი სისხლი სიცოცხლეს ნიშნავს მისი მორწმუნეებისთვის. და როგორც იმ ღამის მოვლენები ისრაელებისთვის თავისუფლებას ნიშნავდა, ასევე იესოს სიკვდილი ათავისუფლებს კაცობრიობას სიკვდილისა და ცოდვისგან.
აი, რატომ ეწოდება იესოს „ღვთის კრავი, რომელიც იღებს წუთისოფლის ცოდვას“ (იოანე 1:29).
მაგრამ დედამიწაზე ყოფნისას იესო აგრეთვე კრებდა თავის მოწაფეებს და ასწავლიდა სამეფოს შესახებ კეთილი ცნობის ქადაგებას, რასაც ის სიკვდილის შემდეგაც კი აკეთებდა (მათე 10:5; ლუკა 10:1).
ესენი პირველი ადამიანები იყვნენ, რომლებიც ღმერთმა თავის სამეფოში იესოს თანამმართველებად აირჩია (ლუკა 12:32).
გახსოვთ, ღმერთი ებრაელებს დაჰპირდა, რომ, თუ მის რჯულს დაიცავდნენ, იქნებოდნენ ‘მღვდელთა სამეფო’? იესოს თუ მიიღებდნენ, მათ შესაძლებლობა ექნებოდათ, ყოფილიყვნენ ღვთის სამეფოს ნაწილი და ზეციერ მღვდლებად ემსახურათ. მაგრამ უმეტესობამ უარყო იესო.
ასე რომ, ამ დროიდან ებრაელები მეტად აღარ იყვნენ ღვთის რჩეული ხალხი, ხოლო პალესტინა — აღთქმული მიწა (მათე 21:43; 23:37, 38).
იესოს დღეებიდან დღემდე იეჰოვა კრებს მათ, ვინც იმეფებს იესოსთან ზეცაში. დღეს დედამიწაზე მათგან რამდენიმე ათასი ჯერ კიდევ ცხოვრობს. ჩვენ მათ ცხებულთა დარჩენილ ნაწილს ვუწოდებთ (გამოცხადება 12:17, აფ).
ახლა გავიგებთ, თუ რა არის ღვთის სამეფო. ეს ზეციერი მთავრობაა, მისი მეფე იესო ქრისტეა, და მასთან ერთად — რჩეული 144000 ადამიანი დედამიწიდან. სამეფო უხელმძღვანელებს დედამიწაზე მცხოვრებ ერთგულ ადამიანებს და მშვიდობას დაამყარებს.
სიკვდილის შემდეგ იესო აღდგენილ და აღზევებულ იქნა ზეცაში. ის იქ ელოდა ღვთის ბრძანებას, რომ დადგებოდა დრო ღვთის სამეფოში მეფობისთვის (ფსალმუნი 109:1). როდის დადგებოდა ეს დრო?
ზოგჯერ იეჰოვა ადამიანებს სიზმრის მეშვეობით აწვდიდა ცნობას თავისი სამეფოს შესახებ.
დანიელის დღეებში ასეთი სიზმარი იეჰოვამ ნაბუქოდონოსორს, ბაბილონის მეფეს, დაასიზმრა. სიზმარში მეფემ უზარმაზარი ხე იხილა (დანიელი 4:7–34).
ხე მოჭრილი იყო და შვიდი წლით ხუნდები ჰქონდა დადებული.
ხე ნაბუქოდონოსორს წარმოადგენდა. ისევე, როგორც კუნძს შვიდი წლით ჰქონდა ხუნდები დადებული, ნაბუქოდონოსორსაც შვიდი წელი ჰქონდა დაკარგული საღი აზროვნება. მოგვიანებით კი გამოჯანმრთელდა.
ყველაფერი ეს წინასწარმეტყველური მაგალითი იყო. ნაბუქოდონოსორი ასიმბოლოებდა იეჰოვას მსოფლიო მმართველობას. თავდაპირველად კი იეჰოვას მსოფლიო მმართველობის წარმომადგენლები იერუსალიმში მეფე დავითის შთამომავლები იყვნენ. როდესაც ბაბილონმა ძვ. წ. 607 წელს იერუსალიმი დაიპყრო, ეს სამეფო ხაზი გაწყდა. იმ დროიდან ვერავინ გამეფდებოდა დავითის ხაზიდან, ‘სანამ არ მოვიდოდა ის, ვისაც კანონიერი უფლება ექნებოდა’ (ეზეკიელი 21:32, აქ).
ეს იესო ქრისტე იყო.
ძვ. წ. 607 წლიდან რამდენი ხნის შემდეგ უნდა დაეწყო იესოს მეფობა? შვიდი წინასწარმეტყველური წლის შემდეგ. ეს უდრის 2520 წელს (გამოცხადება 12:6, 14). და, თუ ძვ. წ. 607 წლიდან გადმოვთვლით 2520 წელს, მივიღებთ ახ. წ. 1914 წელს.
ასე რომ, იესომ 1914 წელს დაიწყო მმართველობა ზეცაში. რას ნიშნავდა ეს?
ბიბლია გვატყობინებს ამას იოანე მოციქულის ხილვის საშუალებით.
მან იხილა ქალი ზეცაში, რომელმაც შვა ყრმა (გამოცხადება 12:1–12).
ქალი წარმოადგენს ღვთის ზეციერი მსახურებისგან, ანგელოზებისგან, შემდგარ ორგანიზაციას. ყრმა წარმოადგენს ღვთის სამეფოს. ის „დაიბადა“ 1914 წელს.
რა მოხდა შემდეგ? პირველი, რაც იესომ გააკეთა როგორც მეფემ, იყო ის, რომ სატანა და მასთან ერთად მეამბოხე ანგელოზები გადმოყარა ზეციდან დედამიწაზე (გამოცხადება 12:9).
ბიბლია შედეგს გვიყვება: „იმხიარულეთ, ცანო და თქვენ, ვინც მათში მკვიდრობთ! ვაი, მიწასა და ზღვას, ვინაიდან თქვენთან ჩამოვიდა ეშმაკი დიდი მძვინვარებით, რადგან იცის, რომ დრო მცირეღა დარჩა“ (გამოცხადება 12:12).
ასე რომ, როდესაც იესომ ზეცაში მმართველობა დაიწყო, მისი მტრები დედამიწაზე გააქტიურდნენ. როგორც ბიბლიამ იწინასწარმეტყველა, მან თავის მტრებს შორის დაიწყო მმართველობა (ფსალმუნი 109:1, 2).
რას ნიშნავდა ეს კაცობრიობისთვის?
იესოს სიტყვების თანახმად, ეს ნიშნავდა ომებს, საკვების უკმარისობას, ავადმყოფობებს და მიწისძვრებს (მათე 24:7, 8; ლუკა 21:10, 11).
ყოველივე ამას 1914 წლიდან ვხედავთ, რაც კიდევ ერთხელ ამტკიცებს, რომ სამეფომ მაშინ დაიწყო მართვა.
გამოცხადების წიგნი გვეუბნება, რომ ადამიანები ‘მოსპობდნენ დედამიწას’ (გამოცხადება 11:18). ამასაც განსაკუთრებით 1914 წლიდან ვხედავთ.
მოციქულმა პავლემ დაამატა, რომ ადამიანები იქნებოდნენ „თავმოყვარენი, ვერცხლის მოყვარენი. . . მშობლების ურჩნი. . . შეურიგებელნი, ცილისმწამებელნი, შეუკავებელნი“ (2 ტიმოთე 3:1–5).
ახლა იცი, თუ რატომ არის ცხოვრება ასე რთული. სატანა ძალზე აქტიურია. მაგრამ ღვთის სამეფოც აქტიურად მოქმედებს.
1914 წლიდან ცოტა ხანში, იესოსთან ზეცაში მართვის იმედის მქონე დარჩენილმა ნაწილმა დაიწყო კეთილი ცნობის ქადაგება სამეფოს დამყარების შესახებ. როგორც იესომ თქვა, ეს საქმიანობა დღეს მთელ მსოფლიოშია გავრცელებული (მათე 24:14).
რა არის ამ ქადაგების მიზანი?
პირველი ის არის, რომ მოვუთხროთ ადამიანებს ღვთის სამეფოს შესახებ.
მეორე ის არის, რომ დავეხმაროთ ადამიანებს, გადაწყვიტონ, სურთ თუ არა იყვნენ სამეფოს ქვეშევრდომები.
იესომ თქვა, რომ ჩვენს დღეებში კაცობრიობა დაიყოფოდა და თავის დროზე გამოჩნდებოდნენ ცხვრისმაგვარი და თხისმაგვარი ადამიანები (მათე 25:31–46).
‘ცხვრები’ ისინი იქნებოდნენ, ვისაც ეყვარებოდა იესო და მისი ძმები, ‘თხები’ კი — ისინი, ვისაც არ ეყვარებოდა.
‘ცხვრები’ დაიმკვიდრებენ მარადიულ სიცოცხლეს, ‘თხები’ კი — არა.
სამეფოს შესახებ კეთილი ცნობის ქადაგება ადამიანებს ეხმარება, გამოავლინონ, ცხვრის მსგავსები არიან თუ თხის.
აი, რა იწინასწარმეტყველა ესაიამ:
„უკანასკნელ დღეებში იქნება, რომ უფლის სახლის მთა მთათა სათავეში დადგინდება, აღიმართება მწვერვალებზე მაღლა და ყოველი ერი მისკენ დაიწყებს დენას“ (ესაია 2:2).
კაცობრიობა ახლა „უკანასკნელ დღეებში“ ცხოვრობს.
იეჰოვას თაყვანისცემის ‘სახლი აღიმართა’ ცრუ რელიგიებზე მაღლა.
„და დაიძრება უთვალავი ხალხი და იტყვის: მოდი, ავიდეთ უფლის მთაზე, იაკობის სახლში; გვასწავლოს თავისი გზები და მისი ბილიკებით ვიაროთ“ (ესაია 2:3).
ასე რომ, ბევრი მოდის ყველა ერიდან იეჰოვასთვის თაყვანისსაცემად და სხვებსაც იწვევენ, რათა მათ შეუერთდნენ. ისინი სწავლობენ იეჰოვას მოსაწონად მოქცევას.
„მახვილებისგან სახნისებს გამოჭედავენ და შუბებისგან — ნამგლებს, ერი ერზე აღარ აღმართავს მახვილს და აღარავინ ისწავლის ომს“ (ესაია 2:4).
იეჰოვას თაყვანისმცემლები გაერთიანებულნი და მშვიდობისმოყვარენი არიან.
ღვთის სამეფოს მოქმედების შედეგად, დღეს მილიონობით ადამიანია მთელ დედამიწაზე ღვთის სამეფოს ქვეშევრდომი.
ისინი იმ ადამიანთა დარჩენილი ნაწილის გარშემო იკრიბებიან, რომლებსაც ზეცაში აღზევებისა და იესოსთან მმართველობის იმედი აქვთ.
ისინი სულიერ საზრდოს ღვთის ორგანიზაციისგან იღებენ (მათე 24:45–47).
ისინი იმ საერთაშორისო ქრისტიანული ძმობის ნაწილი არიან, რომლებსაც ნამდვილად უყვართ ერთმანეთი (იოანე 13:35).
მათ სულიერი სიმშვიდე აქვთ — მომავლის იმედი (ფილიპელთა 4:7).
მალე დასრულდება კეთილი ცნობის ქადაგება. ‘ცხვრები’ ამოცნობილი იქნებიან. რას გააკეთებს მაშინ სამეფო?
გახსოვთ, ერთგულმა მეფე დავითმა რომ დაიპყრო ღვთის ხალხის ყველა მტერი? მეფე იესოც იგივეს გააკეთებს.
მეფე ნაბუქოდონოსორმა ერთხელ სიზმარში იხილა უზარმაზარი კერპი, რომელიც იმ დროიდან მოყოლებული მსოფლიოს მპყრობელებს ასიმბოლოებდა.
შემდეგ მან იხილა, როგორ მოსწყდა მთიდან ქვა, რომელმაც ნამსხვრევებად აქცია კერპი. ქვა ასიმბოლოებდა ღვთის სამეფოს.
ეს ახლანდელი ბოროტი სისტემის განადგურებას ნიშნავს (დანიელი 2:44).
აი, რას გაანადგურებს სამეფო.
ზღვაში ჩაგდებული დოლაბის ქვის მსგავსად გაქრება ცრუ რელიგია (გამოცხადება 18:21).
ამიტომ ღვთის მოყვარულ ხალხს მოუწოდებენ, დაუყოვნებლივ გამოვიდნენ ცრუ რელიგიიდან (გამოცხადება 18:4).
შემდეგ მეფე იესო „შემუსრავს ერებს, და იგი დამწყემსავს მათ რკინის კვერთხით“ (გამოცხადება 19:15).
ამიტომ იეჰოვას მოწმეები, თუმცა გადასახადებს იხდიან და ემორჩილებიან თავიანთი ქვეყნების კანონებს, პოლიტიკაში არ ერევიან.
ბოლოს თვით სატანა, დიდი „დრაკონი“ ჩაგდებული იქნება უფსკრულში (გამოცხადება 20:2, 3, აფ).
მხოლოდ ‘ცხვრები’, რომლებიც იესოს ემორჩილებიან როგორც მეფეს, გადაურჩებიან ამ გასაჭირს (მათე 25:31–34, 41, 46).
მოციქულმა იოანემ ხილვაში იხილა ‘ცხვრები’, ვინც ამ გასაჭირს გადაურჩა.
„ვიხილე: აჰა, უამრავი ხალხი, რომლის დათვლა არავის შეეძლო, ყოველი ერიდან და ტომიდან, ხალხებიდან და ენებიდან. იდგნენ ტახტის წინ და კრავის წინ სპეტაკი სამოსელით შემოსილნი და პალმებით ხელში“ (გამოცხადება 7:9).
‘უამრავ ხალხს’ შეადგენენ ისინი, ვინც კეთილი ცნობის ქადაგებას ეხმაურება.
ისინი „არიან დიდი გასაჭირიდან მოსულები“ (გამოცხადება 7:14).
‘პალმის ტოტები’ აჩვენებს, რომ ისინი სიხარულით ესალმებიან იესოს, როგორც თავიანთ მეფეს.
მათი ‘სპეტაკი სამოსელი’ იესოს შესაწირავისადმი რწმენას გამოხატავს.
‘კრავი’ იესო ქრისტეა.
რა კურთხევებით გაიხარებენ შემდგომში ისინი? გახსოვს, რა ბედნიერები იყვნენ ისრაელში, როდესაც ერთგული მეფე სოლომონი მეფობდა? ის მხოლოდ მცირე ზომით გვიჩვენებდა იმ ბედნიერებას, რომელიც დედამიწაზე იესოს მმართველობის დროს იქნება.
ნამდვილი მშვიდობა იქნება ადამიანებს შორის და ადამიანსა და ცხოველებს შორის, სწორედ ისეთი, როგორც ესაიამ იწინასწარმეტყველა (ფსალმუნი 45:10; ესაია 11:6–9).
როგორც დედამიწაზე ყოფნისას კურნავდა იესო ავადმყოფებს, მომავალში სწორედ ასევე მთელ კაცობრიობას მოაშორებს ავადმყოფობას (ესაია 33:24).
როგორც მან უამრავი ხალხი დააპურა, ასევე დააკმაყოფილებს კაცობრიობას, რომელსაც არა აქვს საკმარისი საკვები (ფსალმუნი 71:16).
როგორც წარსულში აღადგენდა მკვდრებს, ასევე აღადგენს მათ, ვისაც არ ჰქონდა შესაძლებლობა, დამორჩილებოდა ღვთის სამეფოს (იოანე 5:28, 29).
თანდათანობით ის კაცობრიობას მოუტანს სრულყოფილებას, რომელიც ადამმა დაკარგა.
შესანიშნავი მომავალია არა? გსურთ თუ არა იხილოთ ის? თუ დიახ, მოიქეცით ისე, რომ ახლა დაემორჩილოთ ღვთის სამეფოს და გახდეთ ერთი ‘ცხვართაგანი’.
შეისწავლეთ ბიბლია და მიიღეთ ცოდნა იეჰოვა ღმერთისა და იესო ქრისტეს შესახებ (იოანე 17:3).
ურთიერთობა გქონდეთ მათთან, ვინც ღვთის სამეფოს ქვეშევრდომია (ებრაელთა 10:25).
ისწავლეთ სამეფოს კანონები და დაემორჩილეთ მათ (ესაია 2:3, 4).
მიუძღვენით სიცოცხლე იეჰოვას და მოინათლეთ (მათე 28:19, 20).
მოერიდეთ ისეთ ცუდ საქმეებს, რომლებიც არ მოსწონს იეჰოვას: ქურდობას, სიცრუეს, უზნეობასა და ლოთობას (1 კორინთელთა 6:9–11).
მონაწილეობა მიიღეთ სამეფოს შესახებ კეთილი ცნობის ქადაგებაში (მათე 24:14).
მაშინ ღვთის დახმარებით თქვენ იხილავთ აღდგენილ სამოთხეს, რომელიც თავის შთამომავლებს დაუკარგა ადამმა და ნახავთ, თუ როგორ შესრულდება წინასწარმეტყველება: «გავიგონე ტახტიდან დიდი ხმა, რომელიც ამბობდა: „აჰა, კარავი ღვთისა კაცთა შორის! და ის დამკვიდრდება მათ შორის, ისინი იქნებიან მისი ერი და თვით ღმერთი იქნება მათთან. მოსწმენდს ყველა ცრემლს მათი თვალებიდან და აღარ იქნება სიკვდილი. გლოვა, გოდება და ტკივილიც აღარ იქნება, რადგან წინანდელნი გარდახდნენ“» (გამოცხადება 21:3, 4).
[ცხრილი 20 გვერდზე]
[სრულად გაფორმებული ტექსტი იხილეთ პუბლიკაციაში]
ძვ. წ. 607 წელი ახ. წ. 1914 წელი
ძვ. წ. ახ. წ.
500 1000 1500 2000 2500
[სურათები 11 გვერდზე]
აბრაამი
ისააკი
იაკობი
იუდა
დავითი
[სურათი 14 გვერდზე]
144000
[სურათი 16 გვერდზე]
ადამი
იესო