თავი 3
ნამდვილად მნიშვნელოვანია, თუ როგორია შენი რელიგია
1. როგორი თვალსაზრისი აქვს ზოგიერთ ადამიანს რელიგიაზე?
„ყველა რელიგია კარგია, — ამბობს მრავალი ადამიანი. — ისინი, უბრალოდ, ერთი მიზნისკენ მიმავალი სხვადასხვა გზაა“. ეს რომ ჭეშმარიტება იყოს, მაშინ არ ექნება მნიშვნელობა, თუ როგორია შენი რელიგია, რადგან ყველა რელიგია მისაღები იქნება ღმერთისთვის. მაგრამ არის კი ეს ასე?
2. ა) როგორ ეპყრობოდნენ ფარისევლები იესოს? ბ) ვის თვლიდნენ ფარისევლები თავიანთ მამად?
2 იესო ქრისტეს დედამიწაზე ცხოვრების დროს, არსებობდა ფარისევლების ცნობილი რელიგიური ჯგუფი. მათ ჩამოაყალიბეს თაყვანისმცემლობის სისტემა და სწამდათ, რომ ის იმსახურებდა ღმერთის მოწონებას. მაგრამ, ამავე დროს, ფარისევლები ცდილობდნენ იესოს მოკვლას! ამიტომ იესომ უთხრა მათ: „თქვენ მამათქვენის საქმეებს აკეთებთ“. მათ კი მიუგეს: „ჩვენ გვყავს ერთი მამა — ღმერთი“ (იოანე 8:41).
3. რა თქვა იესომ ფარისეველთა მამის შესახებ?
3 იყო ღმერთი ნამდვილად მათი მამა? აღიარებდა თუ არა ის მათი რელიგიის ფორმას? — სრულიადაც არა! თუმცა ფარისევლებს ჰქონდათ წმინდა წერილები და ფიქრობდნენ, რომ მისდევდნენ მას, ისინი ეშმაკის მიერ იყვნენ შეცდომაში შეყვანილი. იესომ ეს შემდეგი სიტყვებით უთხრა მათ: „თქვენი მამა არის ეშმაკი და მამათქვენის გულისთქმის შესრულება გწადიათ. ის კაცის მკვლელი იყო თავიდან და ჭეშმარიტებაში ვერ დადგა, . . .რადგან ცრუა იგი და სიცრუის მამაა“ (იოანე 8:44).
4. როგორ შეაფასა იესომ ფარისეველთა რელიგია?
4 ნათელია, ფარისევლების რელიგია იყო ცრუ. ის ეშმაკის ინტერესებს ემსახურებოდა და არა — ღმერთის. ამიტომ, იმის ნაცვლად, რომ მათი რელიგიისთვის კარგი შეფასება მიეცა, იესო განსჯიდა მას. მან ფარისევლებს უთხრა: „ცათა სასუფეველს კეტავთ ადამიანთა წინაშე, რადგან არც თქვენ შედიხართ და არც შემავალთ უშვებთ“ (მათე 23:13). ცრუ თაყვანისმცემლობის გამო, იესომ მათ თვალთმაქცები და შხამიანი გველები უწოდა და ეუბნებოდა, რომ თავიანთი ცუდი მოქმედების გამო დაღუპვის გზაზე იმყოფებოდნენ (მათე 23:25–33).
5. როგორ გვიჩვენა იესომ, რომ ყველა რელიგია არ არის ერთი მიზნისკენ მიმავალი სხვადასხვა გზა?
5 როგორც ვხედავთ, იესო ქრისტე არ ასწავლიდა, რომ ყველა რელიგია გადარჩენისკენ მიმავალი სხვადასხვა გზაა. მთაზე წარმოთქმული ცნობილი ქადაგების დროს იესომ თქვა: „შედით ვიწრო კარიბჭით, ვინაიდან ფართოა კარიბჭე და განიერია გზა, რომელსაც დაღუპვისაკენ მიჰყავს, და მრავალნი დადიან მასზე. ვინაიდან ვიწროა კარიბჭე და ვიწროა გზა, რომელსაც სიცოცხლისაკენ მიჰყავს, და მცირედნი ჰპოვებენ მას“ (მათე 7:13, 14). რამდენადაც ადამიანთა უმრავლესობა არასწორად სცემს თაყვანს ღმერთს, დაღუპვის გზაზე იმყოფებიან. მხოლოდ მცირედნი იმყოფებიან სიცოცხლის გზაზე.
6. რა შეგვიძლია ვისწავლოთ ისრაელი ხალხის თაყვანისმცემლობის განხილვით?
6 იმის განხილვა, თუ როგორ ეპყრობოდა ღმერთი ისრაელ ერს, ნათელს გახდის, რამდენად მნიშვნელოვანია, ღმერთს თაყვანი ვცეთ ისე, როგორც მას სურს. ღმერთი აფრთხილებდა ისრაელ ხალხს, რომ შორს დაეჭირა თავი გარშემო მცხოვრები ერების ცრუ რელიგიებისგან (მეორე რჯული 7:25). ისინი საკუთარ ღმერთებს მსხვერპლად სწირავდნენ შვილებს და აღვირახსნილ სქესობრივ ცხოვრებას ეწეოდნენ, მათ შორის ჰომოსექსუალიზმს (ლევიანნი 18:20–30). ღმერთმა უბრძანა ისრაელებს, მორიდებოდნენ ამ საზიზღარ მოქმედებებს. როდესაც ისინი არ დაემორჩილნენ და თაყვანი სცეს სხვა ღმერთებს, მან დასაჯა ისინი (იესო ნავეს ძე 24:20; ესაია 63:10). მაშასადამე, ნამდვილად ჰქონდა მნიშვნელობა, თუ როგორი იყო მათი რელიგია.
ცრუ რელიგია დღეს?
7, 8. ა) როგორი პოზიცია ეკავა რელიგიას მსოფლიო ომების დროს? ბ) როგორ ფიქრობ, როგორია ღმერთის თვალსაზრისი იმის შესახებ, რასაც რელიგიები აკეთებდნენ ომების დროს?
7 რა შეიძლება ითქვას ასობით თანამედროვე რელიგიის შესახებ? ალბათ, დაეთანხმები, რომ რელიგიის სახელით მრავალი რამ კეთდება, რაც ღმერთს არ მოსწონს. ამ საუკუნეში მომხდარი მსოფლიო ომების დროს, რომლებიც მილიონობით ჩვენმა თანამედროვემ გადაიტანა, რელიგიები ორივე მხრიდან აქეზებდნენ თავიანთ მიმდევრებს, დაეხოცათ ადამიანები. „დახოცეთ გერმანელები — დახოცეთ ისინი“, — განაცხადა ლონდონის ეპისკოპოსმა. სხვა მხრივ, ქალაქ კელნის მთავარეპისკოპოსი ეუბნებოდა გერმანელებს: „გიბრძანებთ სახელითა ღვთისათა, იბრძოლოთ სისხლის უკანასკნელ წვეთამდე ქვეყნის ღირსებისა და დიდებისათვის“.
8 კათოლიკეები ხოცავდნენ კათოლიკეებს, თავიანთი რელიგიური ხელმძღვანელების მოწონებით და ამასვე აკეთებდნენ პროტესტანტებიც. მღვდელმა ჰარი ემერსონ ფოსდიკმა აღიარა: „ჩვენს ეკლესიებშიც კი აღვმართავდით საომარ ბაირაღებს. . . ბაგეების ერთი კუთხით მშვიდობის მთავარს ვადიდებდით, მეორეთი კი — ომს“. შენი აზრით, რას ფიქრობს ღმერთი იმ რელიგიის შესახებ, რომელიც ამტკიცებს, რომ ასრულებს ღმერთის ნებას, ამავე დროს კი განადიდებს ომს?
9. ა) რას ფიქრობს მრავალი ადამიანი სხვადასხვა რელიგიის წევრების მიერ ჩადენილ დანაშაულობათა შესახებ? ბ) რა დასკვნამდე უნდა მივიდეთ, თუ რომელიმე რელიგია ქვეყნიერების ნაწილია?
9 ისტორიის განმავლობაში სხვადასხვა რელიგიების წევრების მიერ ღმერთის სახელით ჩადენილი საშინელი დანაშაულობების გამო, მილიონობით ადამიანმა ზურგი შეაქცია ღმერთსა და ქრისტეს. ისინი ღმერთს ადანაშაულებენ კათოლიკეებსა და მუსულმანებს შორის გაჩაღებული საშინელი რელიგიური ბრძოლების, ეგრეთ წოდებული „ჯვაროსნული ლაშქრობების“ გამო და ასევე, მუსულმანებსა და ინდუსებს, კათოლიკეებსა და პროტესტანტებს შორის გამართული ომების გამო. ისინი აგრეთვე მიუთითებენ ქრისტეს სახელით იუდეველთა დახოცვასა და ულმობელ კათოლიკურ ინკვიზიციაზე. ამ საზარელ დანაშაულობებზე პასუხისმგებელი რელიგიური ხელმძღვანელები ირწმუნებოდნენ, რომ ღმერთი იყო მათი მამა. მაგრამ განა ისინიც ეშმაკის ისეთივე შვილები არ იყვნენ, როგორც ფარისევლები, რომლებსაც იესო განსჯიდა? რამდენადაც სატანა არის წუთისოფლის ღმერთი, ნუთუ არ უნდა მოველოდეთ, რომ ის მართავს ქვეყნიური ხალხის შექმნილ რელიგიებსაც? (2 კორინთელთა 4:4; გამოცხადება 12:9).
10. რა ხდება რელიგიის სახელით, რაც შენ არ მოგწონს?
10 ეჭვგარეშეა, რომ დღეს ბევრი რამ კეთდება რელიგიის სახელით, რასაც არ იწონებ. ხშირად გესმის იმ ადამიანების შესახებ, რომლებიც ეწევიან ძალიან ამორალურ ცხოვრებას, მაგრამ წარმოადგენენ ეკლესიების საპატიო წევრებს. ან ცნობილია, რომ რელიგიური წინამძღოლები ეწევიან აღვირახსნილ ცხოვრებას, მაგრამ ისინი თავიანთ ეკლესიებში აღიარებული არიან, როგორც კარგი რელიგიური ბელადები. ზოგიერთი რელიგიური ხელმძღვანელი ცოდვად არ მიიჩნევს ჰომოსექსუალიზმსა და ქორწინების გარეშე სქესობრივ კავშირს. მაგრამ შენთვის ალბათ ცნობილია, რომ ბიბლია არ ეთანხმება ამ აზრს. სწორედ ასეთი საქციელის გამო ბრძანა ღმერთმა ისრაელი ხალხის სიკვდილით დასჯა. ამავე მიზეზით გაანადგურა სოდომი და გომორი (იუდა 7). სულ მალე იგივე მოელის თანამედროვე ყველა ცრუ რელიგიას. ‘დედამიწის მეფეებთან’ დამყარებული ამორალური ურთიერთობის გამო, ასეთი რელიგია ბიბლიაში წარმოდგენილია, როგორც მეძავი (გამოცხადება 17:1, 2, 16).
ღმერთის მოსაწონი თაყვანისმცემლობა
11. რა არის აუცილებელი, რომ ჩვენი თაყვანისმცემლობა მოსაწონი იყოს ღმერთისთვის?
11 რადგან ღმერთი არ იწონებს ყველა რელიგიას, გვმართებს შევეკითხოთ საკუთარ თავს: „თაყვანს ვცემ თუ არა ღმერთს მისთვის მოსაწონი სახით?“ საიდან შეგვიძლია ვიცოდეთ ეს? ადამიანი კი არა, ღმერთი წყვეტს, თუ რა არის ჭეშმარიტი თაყვანისმცემლობა. ამგვარად, ღმერთისთვის მოსაწონი რომ იყოს ჩვენი თაყვანისმცემლობა, ის ღრმად უნდა იყოს ფესვგადგმული მის ჭეშმარიტ სიტყვაში — ბიბლიაში. ჩვენ უნდა ვიფიქროთ ბიბლიის მწერლის მსგავსად, რომელმაც თქვა: „ღმერთია ჭეშმარიტი და ყოველი ადამიანი — ცრუ“ (რომაელთა 3:3, 4).
12. რატომ თქვა იესომ, რომ ფარისეველთა თაყვანისმცემლობა არ იყო ღმერთისთვის მოსაწონი?
12 პირველ საუკუნეში მცხოვრები ფარისევლები არ იყვნენ ამ აზრის. მათ დაადგინეს საკუთარი სწავლებები და ადათ-წესები, რომლებსაც უფრო მეტად იცავდნენ, ვიდრე ღმერთის სიტყვას. რა მოჰყვა ამას? იესომ უთხრა მათ: „თქვენ გააუქმეთ ღვთის მცნება თქვენი ჩვეულებით. თვალთმაქცნო, კარგად წინასწარმეტყველებდა ესაია თქვენზე, როცა ამბობდა: ‘ეს ხალხი პატივს მცემს ბაგეებით, მათი გული კი შორს არის ჩემგან.’ ამაოდ მცემენ თაყვანს, რაკი ადამიანთა განკარგულებებს მოძღვრების მსგავსად ასწავლიან“ (მათე 15:1–9; ესაია 29:13). ამიტომ, თუ გვსურს ვიყოთ ღმერთისთვის მოსაწონი, აუცილებელია დავრწმუნდეთ, რომ, რაც გვწამს, ეთანხმება ბიბლიის სწავლებებს.
13. რა უნდა ვაკეთოთ, იესოს სიტყვების თანახმად, რომ ვიყოთ ღმერთისთვის მოსაწონი?
13 საკმარისი არ არის ვილაპარაკოთ, რომ გვწამს ქრისტე, შემდეგ კი ვაკეთოთ ის, რაც ჩვენი აზრითაა სწორი. აბსოლუტურად აუცილებელია შევიცნოთ, თუ მოცემულ შემთხვევაში რა არის ღმერთის ნება. მთაზე ქადაგების დროს იესომ ყურადღება გაამახვილა ამაზე: „ვინც მეუბნება: ‘უფალო, უფალო!’ ყველა როდი შევა ცათა სასუფეველში, არამედ ის, ვინც შეასრულებს ჩემი ზეციერი მამის ნება-სურვილს“ (მათე 7:21).
14. რატომ ჩაგვთვლიდა იესო ‘ურჯულოების მოქმედებად’, მაშინაც კი, თუ „კეთილ საქმეებს“ გავაკეთებდით?
14 ქრისტეს სახელით შეგვეძლო გაგვეკეთებინა ეგრეთ წოდებული „კეთილი საქმეები“. მაგრამ ყოველივე ეს უსარგებლო იქნებოდა, თუ არ შევასრულებდით ღმერთის ნებას. ჩვენც ისეთივე მდგომარეობაში აღმოვჩნდებოდით, როგორც ისინი, რომელთა შესახებაც იესომ თქვა: „ბევრი მეტყვის იმ დღეს: ‘უფალო, უფალო! განა შენი სახელით არ ვწინასწარმეტყველებდით? განა შენი სახელით არ ვდევნიდით ეშმაკებს და განა შენი სახელით არ ვახდენდითო მრავალ სასწაულს?’ მაშინ მე განვუცხადებ მათ: ‘მე არასოდეს არ გიცნობდით თქვენ, გამშორდით, მოქმედნო ურჯულოებისა“ (მათე 7:22, 23). დიახ, ჩვენ შეგვიძლია ვაკეთოთ ის, რაც ჩვენი აზრით არის კარგი და რის გამოც სხვა ადამიანები შეიძლება გვემადლიერებიან და გვაქებენ კიდეც. მაგრამ, თუ არ ვაკეთებთ იმას, რასაც ღმერთი უწოდებს სიმართლეს, მაშინ იესოს თვალში ვიქნებით ‘ურჯულოების მოქმედნი’.
15. რატომ არის ბრძნული, რომ ძველ ბერეას მცხოვრებთა მსგავსად მოვიქცეთ?
15 რამდენადაც დღეს მრავალი რელიგია არ ასრულებს ღმერთის ნებას, ჩვენ არ შეგვიძლია, უბრალოდ ვივარაუდოთ, რომ იმ ეკლესიის ან რელიგიური ორგანიზაციის მოძღვრება, რომელსაც მივეკუთვნებით, შეთანხმებულია ღმერთის სიტყვასთან. მხოლოდ ის ფაქტი, რომ რომელიმე რელიგია სარგებლობს ბიბლიით, არ ამტკიცებს, რომ ყოველივე, რასაც ის ასწავლის ან პრაქტიკულად ახორციელებს, შეთანხმებულია ბიბლიასთან. მნიშვნელოვანია თავად დავრწმუნდეთ ამაში. მოციქული პავლე აქებდა ქალაქ ბერეის მცხოვრებლებს იმის გამო, რომ ისინი ქადაგების მოსმენის შემდეგ საღვთო წერილით ამოწმებდნენ, იყო თუ არა პავლეს ნათქვამი ჭეშმარიტება (საქმეები 17:10, 11). ღმერთის მოსაწონი რელიგია ყოველმხრივ უნდა იყოს შეთანხმებული ბიბლიასთან; ის უნდა აღიარებდეს მთელ ბიბლიას და არა მხოლოდ მის ცალკეულ ნაწილებს (2 ტიმოთე 3:16).
მხოლოდ გულწრფელობა არ არის საკმარისი
16. როგორ მიუთითა იესომ, რომ ღმერთის კეთილგანწყობილების მისაღწევად, მხოლოდ გულწრფელობა არ არის საკმარისი?
16 მაგრამ, შეიძლება, ვინმემ იკითხოს: „ნუთუ ღმერთი არ მოიწონებს ადამიანს, რომელიც გულწრფელია თავის რწმენაში, მიუხედავად იმისა, რომ მისი რელიგია მცდარია?“ იესომ თქვა, რომ არ მოიწონებს ‘ურჯულოების მოქმედთ’, მაშინაც კი, თუ ისინი დარწმუნებული არიან, რომ სწორად იქცევიან (მათე 7:22, 23). მაშასადამე, მხოლოდ გულწრფელობა არ მოსწონს ღმერთს. ერთხელ იესომ თავის მიმდევრებს უთხრა: „მოდის ჟამიც, როცა თქვენს ყველა მკვლელს ეგონება, რომ ამით ღმერთს ემსახურება“ (იოანე 16:2). ქრისტიანთა ასეთ მკვლელებს, შესაძლოა, გულწრფელად სწამდათ, რომ ამით ღმერთს ემსახურებოდნენ, მაგრამ ცხადია, ეს ასე არ იყო. ღმერთი არ იწონებდა მათ საქმეებს.
17. მიუხედავად იმისა, რომ პავლე გულწრფელი იყო, რას აკეთებდა სანამ ქრისტიანი გახდებოდა?
17 სანამ ქრისტიანი გახდებოდა, მოციქული პავლე მონაწილეობდა სტეფანეს ჩაქოლვაში. მოგვიანებით ის ეძებდა შესაძლებლობას, მოეკლა უფრო მეტი ქრისტიანი (საქმეები 8:1; 9:1, 2). პავლემ განმარტა: „მე სასტიკად ვდევნიდი ღვთის ეკლესიას [კრებას, აქ] და ვარბევდი მას. ვუსწრებდი იუდეველობაში მრავალ ჩემი ასაკის ხალხს ჩემს ტომში, ვინაიდან ჩემი მამების გადმოცემების მოშურნე ვიყავი მეტისმეტად“ (გალატელთა 1:13, 14). დიახ, პავლე გულწრფელი იყო, მაგრამ ეს არ ხდიდა მის რელიგიას ჭეშმარიტს.
18. ა) რომელ რელიგიას მიეკუთვნებოდა პავლე, როდესაც ქრისტიანებს დევნიდა? ბ) რატომ უნდა შეეცვალათ პავლესა და მის თანამედროვეებს თავიანთი რელიგია?
18 იმ დროს პავლე ეკუთვნოდა იუდეველთა იმ რელიგიურ სისტემას, რომელმაც უარყო იესო ქრისტე და ამის გამო, თავადაც უარყოფილი იყო ღმერთის მიერ (საქმეები 2:36, 40; იგავნი 14:12). ამიტომ, ღმერთის მოწონება რომ დაემსახურებინა, პავლეს უნდა შეეცვალა თავისი რელიგია. ის სხვების შესახებაც წერდა, რომლებსაც ჰქონდათ „გულმოდგინება ღვთისადმი“, რომლებიც იყვნენ გულწრფელნი, მაგრამ ვერ მიაღწიეს ღმერთის კეთილგანწყობილებას, ვინაიდან მათი რელიგია არ იყო დაფუძნებული ღმერთის განზრახვების ზუსტ შემეცნებაზე (რომაელთა 10:2, 3).
19. რატომ არის შეუძლებელი, რომ სხვადასხვა რელიგიური მოძღვრება ჭეშმარიტი იყოს?
19 შეუძლებელია, რომ მსოფლიოში არსებული ყველა რელიგია ჭეშმარიტი იყოს. მაგალითად, ადამიანებს ან აქვთ სული, რომელიც ცოცხლობს სხეულის სიკვდილის შემდეგ, ან — არა. დედამიწა ან იარსებებს მარადიულად, ან — არა. ღმერთი ან ბოლოს მოუღებს ბოროტებას, ან — არა. ეს და მრავალი სხვა მოძღვრება ან ჭეშმარიტია, ან — მცდარი. თუ ერთი არ ეთანხმება მეორეს, შეუძლებელია რომ ორივე ჭეშმარიტი იყოს. ჭეშმარიტია ან ერთი, ან მეორე, მაგრამ არა ორივე. რაღაცის მიმართ გულწრფელი რწმენა და ამ მრწამსის თანახმად მოქმედება თვით რწმენას არ ხდის ჭეშმარიტს, თუ ის სინამდვილეში მცდარია.
20. როგორ შეგვიძლია რელიგიის მხრივ მივყვეთ სწორ „საგზაო რუკას“?
20 როგორ უნდა მოიქცე, თუ გიმტკიცებენ, რომ, რაც გწამს, მცდარია? მაგალითად, მანქანით მიემგზავრები უცხო ადგილას. თან გაქვს საგზაო რუკა, მაგრამ მისი გულდასმით დათვალიერებისთვის დრო არ გქონდა. ვიღაცამ გითხრა, თუ რომელი გზით უნდა იარო. შენ ენდობი მას და გულწრფელად გწამს, რომ ის გზა, რომელიც მიგითითა სწორია. მაგრამ დავუშვათ, რომ ეს ასე არ არის? როგორ მოიქცევი თუ სხვა მიგითითებს შეცდომაზე? რას გააკეთებ, თუ შენივე რუკის მეშვეობით გიხსნის, რომ მცდარ გზაზე იმყოფები? ნუთუ სიამაყე ან სიჯიუტე შეგიშლის ხელს აღიარო, რომ მცდარ გზაზე დგახარ? მზად იყავი შესაცვლელად, თუ ბიბლიიდან გაიგებ, რომ რელიგიის მხრივ მცდარ გზას მიჰყვები. ერიდე დაღუპვისკენ მიმავალ ფართო გზას და დაადექი სიცოცხლის ვიწრო გზას.
აუცილებელია ღმერთის ნების შესრულება
21. ა) ჭეშმარიტების შემეცნების გარდა, კიდევ რა არის აუცილებელი? ბ) რას გააკეთებ, როცა გაიგებ, რომ ღმერთს არ მოსწონს შენი ზოგიერთი მოქმედება?
21 ბიბლიური ჭეშმარიტების ცოდნა მნიშვნელოვანია. ამავე დროს, ეს შემეცნება უსარგებლოა, თუ შენ ჭეშმარიტებით არ სცემ თაყვანს ღმერთს (იოანე 4:24). მოვიქცეთ ჭეშმარიტების თანახმად, ვქმნათ ღმერთის ნება — აი, რა არის ღმერთისთვის მოსაწონი. ‘რწმენა მკვდარია საქმეთა გარეშე’ — ამბობს ბიბლია (იაკობი 2:26). მაშასადამე, რომ იყო ღმერთისთვის მოსაწონი, არა მარტო შენი რელიგია უნდა იყოს ბიბლიასთან სრულ თანხმობაში, არამედ ცხოვრების ყველა სფეროში უნდა იყენებდე მას. იქნები მზად შესაცვლელად, თუ გაიგებ, რომ აკეთებ იმას, რასაც ღმერთი არასწორად მიიჩნევს?
22. რა დადებითი შედეგებით შეიძლება დავტკბეთ ახლაც და მომავალშიც, თუ მივყვებით ჭეშმარიტ რელიგიას?
22 დიდებული კურთხევები გელის, თუ ასრულებ ღმერთის ნებას. დღესვე გექნება სარგებელი. ჭეშმარიტი რელიგიის მიყოლით, შენ გახდები უკეთესი პიროვნება — უკეთესი მამაკაცი, ქმარი ან მამა, უკეთესი ქალი, ცოლი ან დედა, ან უკეთესი შვილი. ეს შენში განავითარებს ღმერთისთვის მოსაწონ თვისებებს, რისი წყალობითაც სხვებისგან გამორჩეული იქნები, რადგან ასრულებ იმას, რაც სწორია. უფრო მეტიც, ეს იმის მომასწავებელია, რომ შესაძლებლობა გექნება, ღმერთისგან მიიღო კურთხევა — მარადიული სიცოცხლე ბედნიერებითა და სრულყოფილი ჯანმრთელობით სამოთხეში ახალ დედამიწაზე (2 პეტრე 3:13). ეჭვგარეშეა, ნამდვილად მნიშვნელოვანია, თუ როგორია შენი რელიგია!
[სურათი 25-ე გვერდზე]
რელიგიური ბელადები, რომლებიც იესოს მოკვლას ცდილობდნენ, ნამდვილად იყვნენ თუ არა ღმერთის მსახურები?
[სურათი 26, 27-ე გვერდზე]
იესოს სიტყვების თანახმად, ადამიანთა უმრავლესობა არის დაღუპვისკენ მიმავალ ფართო გზაზე. მხოლოდ მცირედნი იმყოფებიან სიცოცხლის ვიწრო გზაზე.
[სურათი 28, 29 გვერდზე]
„ისინი სიტყვით აღიარებენ ღმერთს, საქმეებით კი უარყოფენ“ (ტიტე 1:16).
სიტყვით
საქმით
[სურათი 30-ე გვერდზე]
რამდენადაც პავლე სხვა რელიგიის მიმდევარი იყო, ის მონაწილეობდა ქრისტეს მოწაფის, სტეფანეს, ჩაქოლვაში.
[სურათი 33-ე გვერდზე]
თუ მცდარ გზას ადგახარ, სიჯიუტე ან სიამაყე ხომ არ შეგიშლიდა ხელს ამის აღიარებაში?