თავი 25
სატანის წუთისოფლის მომხრე ხარ თუ ღმერთის ახალი სისტემის?
1. სინამდვილეში რა არის დამამტკიცებელი, რომ ღმერთის ახალი სისტემის მომხრე ხარ?
ხარ თუ არა ღმერთის ახალი სისტემის მომხრე და თუ გსურს, რომ ის დამყარდეს? ხარ თუ არა სატანის წინააღმდეგი და თუ გსურს, რომ განადგურდეს მისი ქვეყნიერება? შენ, ალბათ, ორივე კითხვაზე დადებითად უპასუხებ. მაგრამ არის კი ეს საკმარისი? ძველი ანდაზა ამბობს: „კაცი საქმით იცნობა და არა სიტყვით“. თუ გწამს, რომ დადგება ღმერთის ახალი სისტემა, შენი ცხოვრება, რასაკვირველია, დაამტკიცებს ამას (მათე 7:21–23; 15:7, 8).
2. ა) ვინ არის ორი ბატონი, რომლებსაც შესაძლოა ვემსახურებით? ბ) რა ნათელყოფს, თუ ვისი მორჩილები, ანუ მსახურები ვართ?
2 ფაქტია, რომ შენი ცხოვრების წესი ორი ბატონიდან შეიძლება მოსწონდეს მხოლოდ ერთს. შენ ემსახურები ან იეჰოვა ღმერთს, ან სატანა ეშმაკს. ბიბლიაში მოცემული პრინციპი გვეხმარება ამის გაგებაში: „ნუთუ არ იცით, რომ ვისაც თქვენს თავს მისცემთ მონებად მორჩილებისათვის, მისი მონები ხართ, ვისაც დაემორჩილებით“ (რომაელთა 6:16). შენ ვის ემორჩილები? ვის ნება-სურვილს ასრულებ? როგორიც არ უნდა იყოს შენი პასუხი ამ კითხვებზე, ვერ შეძლებ ემსახურო ჭეშმარიტ ღმერთს იეჰოვას, თუ მიჰყვები წუთისოფლის უმართლო გზებს.
რა არის სატანის წუთისოფელი?
3. ა) ბიბლიის თანახმად, ვინ არის წუთისოფლის მმართველი? ბ) როგორ უჩვენა იესომ წუთისოფელსა და თავის მოწაფეებს შორის სხვაობა ლოცვაში?
3 იესომ სატანას „ამ წუთისოფლის მთავარი“ უწოდა. იოანე მოციქულმა კი თქვა, რომ „მთელი წუთისოფელი ბოროტებაში [ბოროტის ძალაუფლებაში, აქ] ძევს“ (იოანე 12:31; 1 იოანე 5:19). ყურადღება მიაქციე, რომ იესომ ლოცვაში თავის მოწაფეებს არ უწოდა სატანის წუთისოფლის ნაწილი. მან თქვა: „მათთვის [მოწაფეებისათვის] გევედრები [ღმერთო]; წუთისოფლისთვის კი არ გევედრები. . . ისინი წუთისოფლისანი არ არიან, როგორც მე არა ვარ წუთისოფლისა“ (იოანე 17:9, 16; 15:18, 19). აქედან გამომდინარე ცხადია, რომ ჭეშმარიტი ქრისტიანები განცალკევებით უნდა იდგნენ წუთისოფლისგან.
4. ა) ვის ეხება იოანეს 3:16-ში მოცემული გამოთქმა „წუთისოფელი“? ბ) რა არის „წუთისოფელი“, რომლისგანაც ცალკე უნდა იდგნენ ქრისტეს მიმდევრები?
4 მაგრამ რა ჰქონდა იესოს მხედველობაში, როცა „წუთისოფლის“ შესახებ ლაპარაკობდა? სიტყვა „წუთისოფელი“ ბიბლიაში ზოგჯერ კაცობრიობას ნიშნავს. ღმერთმა გამოგზავნა თავისი ძე, რომ მას კაცობრიობის გამოსასყიდად შეეწირა თავისი სიცოცხლე (იოანე 3:16). სატანამ კი ადამიანთა უმეტესი ნაწილი ღმერთის წინააღმდეგ განაწყო. მაშასადამე, სატანის წუთისოფელი — ეს არის ადამიანთა ორგანიზებული საზოგადოება, რომელიც არსებობს ღმერთის ხილული ორგანიზაციისაგან განცალკევებით. ქრისტიანები ცალკე უნდა იდგნენ წუთისოფლისგან (იაკობი 1:27).
5. რა არის წუთისოფლის მნიშვნელოვანი შემადგენელი ნაწილი და როგორ არის ის წარმოდგენილი ბიბლიაში?
5 სატანის წუთისოფელი — მისი ადამიანთა ორგანიზებული საზოგადოება — შედგება ერთმანეთთან მჭიდროდ დაკავშირებული სხვადასხვა შემადგენელი ნაწილისგან. ერთ-ერთი მნიშვნელოვანი ნაწილი არის ცრუ რელიგია. ბიბლიაში ცრუ რელიგია წარმოდგენილია, როგორც ‘დიდი მეძავი’, ანუ როსკიპი — ‘დიდი ბაბილონის’ სახელწოდებით. ის არის მსოფლიო მპყრობელი, რაც იქიდან ჩანს, რომ მას „აქვს მეფობა დედამიწის მეფეებზე“ (გამოცხადება 17:1, 5, 18). მაგრამ რა ამტკიცებს, რომ დიდი ბაბილონი არის რელიგიური მსოფლიო მპყრობელი?
6, 7. ა) რით მტკიცდება, რომ დიდი ბაბილონი რელიგიური მპყრობელია? ბ) როგორ დამოკიდებულებაშია ცრუ რელიგია პოლიტიკასთან?
6 რამდენადაც ‘დედამიწის მეფეებზე’ ნათქვამია, რომ ისინი მეძაობდნენ მასთან, შეუძლებელია, დიდი ბაბილონი იყოს პოლიტიკური მსოფლიო მპყრობელი. ის არც მსოფლიო კომერციული მპყრობელია, რადგან „დედამიწის ვაჭრები“ შორს დგანან და დასტირიან მის განადგურებას (გამოცხადება 17:2; 18:15). დიდი ბაბილონი რომ ნამდვილად რელიგიური მპყრობელია, გამომდინარეობს შემდეგი ბიბლიური მტკიცებიდან, რომ მისი „გრძნეულება [სპირიტული ადათ-წესები, აქ] აცდუნებდა ხალხს“ (გამოცხადება 18:23).
7 შემდგომი მტკიცება, რომ დიდი ბაბილონი რელიგიური მპყრობელია, არის მისი კავშირი „მხეცთან“. ბიბლიაში ასეთი მხეცები პოლიტიკურ ხელისუფლებებს ასიმბოლოებენ (დანიელი 8:20, 21). დიდი ბაბილონი წარმოდგენილია, როგორც „შვიდი თავის და ათი რქის მქონე მუქი წითელი ფერის მხეცზე მჯდომარე“. ამრიგად, ის ცდილობს ზეგავლენა მოახდინოს ამ „მხეცზე“, ანუ მსოფლიო მპყრობელზე (გამოცხადება 17:3, „ახალი აღთქმა და ფსალმუნი“, 1990 წლის გამოცემა). ფაქტია, რომ კაცობრიობის ისტორიის მანძილზე, რელიგია ერეოდა პოლიტიკაში და ხშირად ურჩევდა მთავრობებს, თუ რა უნდა ეკეთებინათ. მას ნამდვილად „აქვს მეფობა დედამიწის მეფეებზე“ (გამოცხადება 17:18).
8. რა არის სატანის წუთისოფლის შემდგომი მნიშვნელოვანი შემადგენელი ნაწილი და როგორ არის ის აღწერილი ბიბლიაში?
8 სატანის წუთისოფლის შემდგომი მნიშვნელოვანი შემადგენელი ნაწილი არის პოლიტიკური ხელისუფლებები. როგორც უკვე გავიგეთ, ისინი ბიბლიაში წარმოდგენილი არიან მხეცებად (დანიელი 7:1–8, 17, 23). მხეცებთან შედარებული მთავრობები თავიანთ ძალაუფლებას სატანისგან რომ იღებენ, ჩანს იოანე მოციქულის მიერ აღწერილი ხილვიდან: „დავინახე ზღვიდან ამომავალი მხეცი, რომელსაც შვიდი თავი და ათი რქა ჰქონდა. . . მისცა მას გველეშაპმა თავისი ძალა“ (გამოცხადება 13:1, 2; 12:9). შემდგომი მტკიცება, რომ ეს სამეფოები, ანუ მთავრობები სატანის ქვეყნიერების ნაწილია, არის ის ფაქტი, რომ ეშმაკი სთავაზობდა იესოს ყველა ამ სამეფოს, რათა ეცდუნებინა ის. სატანა ვერ შეძლებდა ამის გაკეთებას, მათი მფლობელი რომ არ ყოფილიყო (მათე 4:8, 9).
9. ა) გამოცხადების 18:11-ში როგორ არის აღწერილი სატანის წუთისოფლის სხვა მნიშვნელოვანი შემადგენელი ნაწილი? ბ) რას აკეთებს ის და რას უწყობს ხელს, რაც ნათელს ხდის სატანის ზეგავლენას?
9 სატანის წუთისოფლის სხვა მნიშვნელოვანი ნაწილია ანგარი და მჩაგვრელი კომერციული სისტემა, რომელსაც გამოცხადების 18:11-ში „დედამიწის ვაჭრები“ ეწოდება. ეს კომერციული სისტემა ადამიანებში აღვივებს ეგოისტურ სურვილს, რომ შეიძინონ მის მიერ წარმოებული ისეთი საგნები, რომელიც, შესაძლოა, არც კი სჭირდებათ და რომელთა გარეშეც შეიძლება მათთვის უკეთესიც იყოს. ამავე დროს, ეს გაუმაძღარი კომერციული სისტემა საწყობებში აგროვებს საკვებს, მილიონობით ადამიანი კი შიმშილისგან კვდება, რადგან არა აქვთ საშუალება, შეიძინონ საკვები. სხვა მხრივ, მზადდება და მოგების მიზნით იყიდება იარაღი, რომელსაც შეუძლია მთელი კაცობრიობის განადგურება. ამგვარად, ეშმაკის კომერციული სისტემა, ცრუ რელიგიასა და პოლიტიკურ ხელისუფლებებთან ერთად, ხელს უწყობს ეგოიზმს, დამნაშავეობასა და საშინელ ომებს.
10, 11. ა) როგორია სატანის წუთისოფლის შემდგომი თავისებურება? ბ) რა გაფრთხილებას გვაძლევს ბიბლია, რომ არ ჩავებათ ამგვარ საქმიანობაში?
10 ადამიანთა ორგანიზებული საზოგადოება, სატანა ეშმაკის ხელმძღვანელობით, ნამდვილად ბოროტი და გახრწნილია. ეს საზოგადოება ეწინააღმდეგება ღმერთის სამართლიან კანონებს და მისდევს ყველანაირად თავაშვებულ ამორალურ ცხოვრებას, რაც სატანის წუთისოფლის შემდგომი დამახასიათებელი ნიშანია. ამის გამო პავლე და პეტრე მოციქულები შეაგონებდნენ ქრისტიანებს, მორიდებოდნენ წუთისოფლის ხალხის ცუდ ჩვევებს (ეფესელთა 2:1–3; 4:17–19; 1 პეტრე 4:3, 4).
11 მოციქული იოანეც ამახვილებდა ყურადღებას, რომ ქრისტიანები უნდა მორიდებოდნენ უგუნურ სურვილებსა და ქვეყნიერების ამორალურ მოქმედებებს. ის წერდა: „ნუ შეიყვარებთ წუთისოფელს, ნურც იმას, რაც წუთისოფელშია. ვისაც წუთისოფელი უყვარს, მასში არ არის მამის სიყვარული. ვინაიდან ყოველივე, რაც წუთისოფელშია: ხორციელი გულისთქმა, თვალთა გულისთქმა და სიამაყე ცხოვრებისა, მამისგან კი არა, წუთისოფლისაგან არის“ (1 იოანე 2:15, 16). მოწაფე იაკობი ამბობდა, რომ „ვისაც წუთისოფლის მეგობრობა უნდა, იგი ღვთის მტერი ხდება“ (იაკობი 4:4).
რა უნდა ვაკეთოთ, რომ არ ვიყოთ წუთისოფლის ნაწილი
12, 13. ა) როგორ უჩვენა იესომ, რომ ქრისტიანები უნდა იყვნენ წუთისოფელში? ბ) როგორ არის შესაძლებელი იყო წუთისოფელში, მაგრამ არ იყო მისი ნაწილი?
12 სანამ სატანის წუთისოფელი არსებობს, ქრისტიანებს უწევთ მასში ცხოვრება. იესომ ეს გამოხატა ლოცვისას, როცა ევედრებოდა თავის მამას: „არ გევედრები, რომ წუთისოფლიდან წაიყვანო ისინი“. მაგრამ მოწაფეების შესახებ იესომ შემდეგ დაუმატა: „ისინი წუთისოფლისანი არ არიან“ (იოანე 17:15, 16). როგორღა არის შესაძლებელი ცხოვრობდე სატანის წუთისოფელში და არ იყო მისი ნაწილი?
13 შენ ცხოვრობ იმ პიროვნებებს შორის, რომლებიც წარმოადგენენ ადამიანთა დღევანდელ ორგანიზებულ საზოგადოებას. ამ ადამიანებს მიეკუთვნებიან მრუშები, ანგარები და სხვადასხვა სახის ბოროტმოქმედები. შენ, შესაძლოა, მათთან ერთად დადიხარ სკოლაში, სადილობ, მუშაობ და მონაწილეობ სხვადასხვა საქმეებში (1 კორინთელთა 5:9, 10). შენ ისინი უნდა გიყვარდეს კიდეც, როგორც ამას აკეთებს ღმერთი (იოანე 3:16). მაგრამ ჭეშმარიტ ქრისტიანს არ უყვარს ბოროტება, რომელსაც ეს ადამიანები სჩადიან. ის არ იზიარებს მათ შეხედულებებს, მოქმედებებსა და მიზნებს; არ მონაწილეობს მათ გაუკუღმართებულ რელიგიასა და პოლიტიკაში. თუმცა, ხშირად, ჭეშმარიტ ქრისტიანს საარსებო სახსრების გამოსამუშავებლად, მუშაობა უწევს კომერციულ სამყაროში, ის მაინც არ ღებულობს მონაწილეობას უპატიოსნო სავაჭრო გარიგებებში; მატერიალური საგნების შეძენა არ არის მისი ცხოვრების უმნიშვნელოვანესი მიზანი. რამდენადაც ღმერთის ახალი სისტემის მომხრეა, ის ერიდება მავნე ურთიერთობას სატანის წუთისოფლისთვის მცხოვრებ ადამიანებთან (1 კორინთელთა 15:33; ფსალმუნი 1:1; 25:3–6, 9, 10). ასე რომ, ის სატანის წუთისოფელშია, მაგრამ არ არის მისი ნაწილი.
14. რომელ ბიბლიურ მცნებას უნდა დაემორჩილო, თუ ღმერთის ახალი სისტემის მომხრე ხარ?
14 რა შეიძლება ითქვას შენზე? გსურს იყო სატანის წუთისოფლის ნაწილი? თუ ღმერთის ახალი სისტემის მომხრე ხარ? თუ შენ ღმერთის ახალი სისტემის მომხრე ხარ, მაშინ თავს შორს დაიჭერ წუთისოფლისგან, მისი ცრუ რელიგიის ჩათვლით და დაემორჩილები ბიბლიურ მცნებას: „გამოერიდე მას [დიდ ბაბილონს], ჩემო ხალხო“ (გამოცხადება 18:4). მაგრამ დიდი ბაბილონისგან, ცრუ რელიგიური მსოფლიო მპყრობელისგან გამორიდება ნიშნავს უფრო მეტს, ვიდრე მხოლოდ კავშირის გაწყვეტას ცრუ რელიგიურ ორგანიზაციებთან. ეს ასევე ნიშნავს რელიგიურ დღესასწაულებსა და ქვეყნიურ ზეიმებში ყოველგვარი მონაწილეობისგან თავშეკავებას (2 კორინთელთა 6:14–18).
15. ა) რა უნდა დაიცვან ქრისტიანებმა ქრისტეს შობის ნაცვლად? ბ) რატომ არ შეიძლება, რომ იესო დაბადებულიყო ცივ, წვიმიან ზამთარში? გ) იესოს შობის აღსანიშნავად, რატომ ამოირჩიეს 25 დეკემბერი?
15 შობა — დღეს მნიშვნელოვან რელიგიურ დღესასწაულად ითვლება. მაგრამ ისტორია გვიჩვენებს, რომ მას არ ზეიმობდნენ ადრინდელი ქრისტიანები. იესომ მცნებად დაუდო თავის მიმდევრებს დაეცვათ მისი სიკვდილის გახსენება და არა შობა (1 კორინთელთა 11:24–26). ფაქტია, რომ 25 დეკემბერი (ძველი სტილით 7 იანვარი) არ არის იესოს დაბადების დღე. ეს არც შეიძლება ასე ყოფილიყო, ვინაიდან ბიბლია გვიჩვენებს, რომ იმ დროს, როცა იესო დაიბადა, მწყემსები ღამით ჯერ კიდევ მინდორში იყვნენ. ცივ, წვიმიან ზამთარში კი ისინი იქ არ იქნებოდნენ (ლუკა 2:8–12). როგორც ამას „მსოფლიო ენციკლოპედია“ (The World Book Encyclopedia) განმარტავს, სინამდვილეში 25 დეკემბერი იესოს დაბადების დღედ იმიტომ იყო არჩეული, რომ „რომაელები ამ დღეს აღნიშნავდნენ სატურნალიებს, როდესაც ზეიმობდნენ მზის დაბადების დღეს“.
16. ა) კიდევ რომელ მნიშვნელოვან რელიგიურ დღესასწაულს აქვს არაქრისტიანული საწყისი? ბ) რომელი საფუძვლიანი მიზეზების გამო არ ზეიმობენ შობასა და აღდგომას ჭეშმარიტი ქრისტიანები?
16 აღდგომა — ესეც ერთ-ერთი მნიშვნელოვანი რელიგიური დღესასწაულია. ის ლათინური ამერიკის ზოგიერთ ქვეყანაში წმინდა კვირასაც მიეკუთვნება. მაგრამ ფაქტია, რომ არც აღდგომას ზეიმობდნენ ადრინდელი ქრისტიანები. თავისი საწყისი ამ დღესასწაულმაც არაქრისტიანული დღესასწაულებიდან აიღო. ენციკლოპედია „ბრიტანიკა“ (The Encyclopædia Britannica) გვიხსნის: „ახალ აღთქმაში არ არის მითითება აღდგომის საზეიმოდ აღნიშვნაზე“. მაგრამ აქვს კი ნამდვილად მნიშვნელობა, რომ შობა და აღდგომა არ არის ქრისტიანული დღესასწაულები და რომ მათ თავდაპირველად ცრუ ღმერთების თაყვანისმცემლები ზეიმობდნენ? მოციქული პავლე აფრთხილებდა თანაქრისტიანებს, რომ ერთმანეთში არ აერიათ ჭეშმარიტება და სიცრუე. ის ამბობდა: „მცირე საფუარი მთელ ცომს გააფუებს“ (გალატელთა 5:9). პავლე სწერდა მათ, რომ არასწორი იყო მოსეს რჯულით გათვალისწინებული დღეების დაცვა, რომელიც ღმერთმა ქრისტიანებისთვის გააუქმა (გალატელთა 4:10, 11). რამდენად უფრო მნიშვნელოვანია ჩვენს დროში საერთო არაფერი ვიქონიოთ იმ დღესასწაულებთან, რომელთა დაცვაც არასოდეს უბრძანებია ღმერთს და რომელთა დასაბამიც ცრუ რელიგიაშია!
17. ა) რა არის არასწორი იმ დღესასწაულებში, რომლებიც გამოჩენილ ადამიანებსა და ერებს განადიდებს? ბ) ბიბლიის თანახმად, როგორ უნდა მოიქცნენ ქრისტიანები?
17 მსოფლიოში ასევე დაწესებულია დღესასწაულები გამოჩენილი ადამიანების პატივსაცემად. სხვა დღესასწაულები კი განკუთვნილია ერებისა და ქვეყნიური ორგანიზაციების განსადიდებლად, მაგრამ ბიბლია გვაფრთხილებს, რომ არ ვცეთ თაყვანი ადამიანებს და არ მივენდოთ ადამიანთა ორგანიზაციებს იმ იმედით, რომ ისინი გააკეთებენ იმას, რისი გაკეთებაც მხოლოდ ერთადერთ ღმერთს შეუძლია (საქმეები 10:25, 26; 12:21–23; გამოცხადება 19:10; იერემია 17:5–7). მაშასადამე, დღესასწაულები, რომლებსაც ადამიანებისა და მათი ორგანიზაციების განდიდების ტენდენცია აქვს, ღმერთის ნების საწინააღმდეგოა და ჭეშმარიტი ქრისტიანები არ მიიღებენ მათში მონაწილეობას (რომაელთა 12:2).
18. ა) როგორი საგნები შექმნა ადამიანმა თაყვანისმცემლობისთვის? ბ) რას ამბობს ღმერთის კანონი საგნების გაღმერთების შესახებ?
18 ადამიანებმა შექმნეს მრავალი საგანი, რომ ხალხს განედიდებინა ან თაყვანი ეცა ამ საგნებისთვის. ზოგიერთი მათგანი დამზადებულია ხის ან ლითონისგან; სხვები კი — ქსოვილისგან, რომლებზეც, შესაძლოა, ამოქარგული ან დახატულია ზეციერ ან მიწიერ ქმნილებათა გამოსახულებები. რომელიმე ქვეყანაში შეიძლება კანონიც კი იყოს, რომ ყველა ადამიანმა თაყვანი უნდა სცეს ამ საგანს, როგორც წმინდას. მაგრამ ღმერთის კანონი იუწყება, რომ მისმა მსახურებმა არ უნდა გააკეთონ მსგავსი რამ (გამოსვლა 20:4, 5; მათე 4:10). როგორ იქცეოდნენ ასეთ შემთხვევებში ღმერთის მსახურები?
19. ა) რა უბრძანა ბაბილონის მეფემ ყველას? ბ) ვის მაგალითს ბაძავენ ქრისტიანები?
19 ძველ ბაბილონში მეფე ნაბუქოდონოსორმა აღმართა ოქროს უზარმაზარი კერპი და ბრძანა, რომ ყველას თაყვანი ეცა მისთვის. „ვინც არ დაემხობა და თაყვანს არა სცემს, — თქვა მან, — იმწამსვე ცეცხლით გახურებულ ღუმელში იქნება ჩაგდებული“. ბიბლია მოგვითხრობს, რომ სამმა ახალგაზრდა ებრაელმა — შადრაქმა, მეშაქმა და ყაბედ-ნეგომ — უარყო მეფის ბრძანების შესრულება. რატომ? იმიტომ რომ, ეს იყო თაყვანისმცემლობა. მათ კი სურდათ, რომ თაყვანი ეცათ მხოლოდ იეჰოვასთვის. ღმერთმა მოიწონა მათი მოქმედება და იხსნა მეფის რისხვისგან. თვით ნაბუქოდონოსორიც დარწმუნდა, რომ იეჰოვას მსახურები არ იყვნენ სახელმწიფოსთვის საშიშნი და ამიტომ გამოსცა კანონი მათი თავისუფლების დასაცავად (დანიელი 3:1–23, 91–97). ნუთუ არ აღგაფრთოვანებს შენ ამ ახალგაზრდების ერთგულება? ღმერთის ყველა კანონის დაცვით დაამტკიცებ თუ არა, რომ ნამდვილად მისი ახალი სისტემის მომხრე ხარ? (საქმეები 5:29).
20. რომელ სხვადასხვა საშუალებებს იყენებს სატანა, რომ დაგვარღვევინოს ღმერთის კანონები სქესობრივ მორალთან დაკავშირებით?
20 რასაკვირველია, სატანის სურვილია, რომ ვემსახუროთ მას და არა იეჰოვას. ამიტომ ის ცდილობს, გვაიძულოს ვაკეთოთ ის, რაც მას სურს, რადგან იცის, რომ ვისაც დავემორჩილებით მისი მონები, ანუ მსახურები ვხდებით (რომაელთა 6:16). სხვადასხვა საშუალებების, მაგალითად, ფილმების, ტელევიზიის, ზოგიერთი ცეკვისა და ამორალური ლიტერატურის მეშვეობით სატანა, როგორც დაუქორწინებელ, ასევე დაქორწინებულ ადამიანებში აღძრავს სურვილს, იქონიონ უკანონო სქესობრივი კავშირი. ქვეყნიერებას მიაჩნია, რომ ასეთი მოქმედება არის მისაღები და მართებულიც კი. მაგრამ ყოველივე ეს ეწინააღმდეგება ღმერთის კანონებს (ებრაელთა 13:4; ეფესელთა 5:3–5). ადამიანი, რომელიც ასე იქცევა, სინამდვილეში უჩვენებს, რომ სატანის წუთისოფლის მომხრეა.
21. სხვა რომელი მოქმედებებით აჩვენებენ ადამიანები, რომ ისინი სატანის ქვეყნიერების მომხრენი არიან?
21 არის კიდევ სხვა მოქმედებები, რომლებიც სატანის წუთისოფელმა პოპულარული გახადა, მაგრამ ისინი ეწინააღმდეგება ღმერთის კანონებს. ერთ-ერთი მათგანია — სმა დათრობამდე (1 კორინთელთა 6:9, 10). შემდეგი არასწორი მოქმედებაა — სიამოვნებისთვის ნარკოტიკების გამოყენება. მაგალითად, მარიხუანის, ჰეროინისა და თამბაქოსი. ყოველივე ეს უწმინდურია და ჯანმრთელობისთვის მავნებელი. მათი გამოყენება აშკარად არღვევს ღმერთის მცნებას: „განვიწმიდოთ ხორცისა და სულის ყოველგვარი სიბილწისაგან“ (2 კორინთელთა 7:1). თამბაქოს მოწევა ასევე საზიანოა მათი ჯანმრთელობისთვის, ვინც იმყოფება მწეველის ახლოს და უწევს ბოლის შესუნთქვა. ამიტომ მწეველი არღვევს ღმერთის მცნებას, რომელიც მოითხოვს ქრისტიანისგან, უყვარდეს თავისი მოყვასი (მათე 22:39).
22. ა) რას ამბობს ბიბლია სისხლის შესახებ? ბ) ფაქტიურად, რატომ არ არის სხვაობა სისხლის გადასხმასა და მის საკვებად გამოყენებას შორის? გ) საიდან გამომდინარეობს, რომ ‘თავი შევიკავოთ სისხლისაგან’ ნიშნავს, საერთოდ არ მივიღოთ ის ჩვენს სხეულში?
22 მსოფლიოს სხვადასხვა ნაწილში გავრცელებულია ჩვევა — სისხლის საკვებად გამოყენება. ადამიანები ჭამენ ცხოველების ხორცს, საიდანაც სისხლი სათანადოდ არ არის გამოდენილი, ხოლო გამოდენილ სისხლს საკვებად იყენებენ. ღმერთის სიტყვა კი კრძალავს სისხლის ჭამას (დაბადება 9:3, 4; ლევიანნი 17:10). მაგრამ რა შეიძლება ითქვას სისხლის გადასხმის შესახებ? ზოგიერთ ადამიანს, შესაძლოა, მოჰყავს არგუმენტები, რომ სისხლის გადასხმა სინამდვილეში არ არის სისხლის „ჭამა“. მაგრამ პაციენტს, რომელსაც არ შეუძლია საჭმლის მიღება პირიდან, ხომ ურჩევს ექიმი რომ იკვებოს იმავე მეთოდით, როგორც ეს ხდება სისხლის გადასხმის დროს? ბიბლია გვიბრძანებს: „თავი შეიკავეთ. . . სისხლისაგან“ (საქმეები 15:20, 29). რას ნიშნავს ეს? დავუშვათ, ექიმმა გირჩია თავი შეიკავო ალკოჰოლისგან; ნუთუ ეს იმას ნიშნავს, რომ ალკოჰოლი მხოლოდ პირით არ უნდა მიიღო, მაგრამ შეგიძლია მისი ვენაში შეყვანა? რასაკვირველია, არა. მაშასადამე, ‘თავი შევიკავოთ სისხლისაგან ’ ნიშნავს, საერთოდ არ მივიღოთ ის ჩვენს სხეულში.
23. ა) როგორი გადაწყვეტილება უნდა მიიღო შენ? ბ) რით აჩვენებ, თუ როგორი გადაწყვეტილება მიიღე?
23 შენ უნდა დაუმტკიცო იეჰოვა ღმერთს, რომ მისი ახალი სისტემის მომხრე ხარ და არ წარმოადგენ წუთისოფლის ნაწილს. ამისთვის საჭიროა, მიიღო გადაწყვეტილება, ემსახურო იეჰოვას და შეასრულო მისი ნება. არ უნდა იყო ისეთი მერყევი, როგორც ისრაელი ერის ზოგიერთი წარმომადგენელი იყო ძველ დროში (მესამე მეფეთა 18:21). გახსოვდეს, თუ იეჰოვას არ ემსახურები, ემსახურები სატანას. შესაძლოა, შენ ამბობ, რომ ღმერთის ახალი სისტემის მომხრე ხარ, მაგრამ რას აჩვენებს შენი საქმეები? იყო ღმერთის ახალი სისტემის მომხრე ნიშნავს, მოერიდო ყველა იმ საქმეს, რასაც განსჯის იეჰოვა ღმერთი და რაც არ იარსებებს მის ახალ სამართლიან სისტემაში.
[სურათი 209 გვერდზე]
რა იგულისხმება წუთისოფელში, რომლის შესახებაც არ ლოცულობდა იესო და რომლის ნაწილიც არ იყვნენ მისი მოწაფეები?
[სურათები 211 გვერდზე]
ბიბლიაში ცრუ რელიგია წარმოდგენილია როგორც მთვრალი მეძავი, ხოლო მსოფლიო მმართველობა, რომელზეც ის ზის, როგორც მხეცი.
სატანის წუთისოფლის განმასხვავებელი ნიშანია თავაშვებული ცხოვრება. ხარბი კომერციული სისტემაც, ასევე მისი მნიშვნელოვანი შემადგენელი ნაწილია.
[სურათი 213 გვერდზე]
რამდენადაც იესოს დაბადების დროს მწყემსები ფარასთან ერთად ღამით იმყოფებოდნენ მინდორში, შეუძლებელია იესო დაბადებულიყო 25 დეკემბერს.
[სურათი 214 გვერდზე]
ღმერთის მსახურებმა უარყვეს, თაყვანი ეცათ მეფის მიერ აღმართული გამოსახულებისთვის. რას გააკეთებდი შენ მსგავსი შემთხვევისას?