ნაწილი 6
რატომ არის ამდენი ტანჯვა და უსამართლობა?
1, 2. რა კითხვები შეიძლება წამოიჭრას იმის გათვალისწინებით, რაც გადაიტანა კაცობრიობამ?
1 მაგრამ, თუ უზენაესმა განიზრახა, რომ სრულყოფილ ადამიანებს მარადიულად ეცხოვრათ დედამიწაზე სამოთხის პირობებში და თუ ეს განზრახვა არ შეცვლილა, რატომ არ არის დღეს სამოთხე? ამის ნაცვლად, რატომ განიცდის კაცობრიობა ტანჯვასა და უსამართლობას მრავალი საუკუნის მანძილზე?
2 უეჭველია, კაცობრიობის ისტორია აღსავსეა მრავალი უბედურებით, რომელიც გამოწვეულია ომებით, იმპერიალისტური დაპყრობებით, ექსპლუატაციით, უსამართლობით, სიღარიბით, კატასტროფებით, ავადმყოფობითა და სიკვდილით. რატომ დაატყდა თავს ამდენი უბედურება მრავალ უდანაშაულო ადამიანს? თუ ღმერთი ძლევამოსილია, რატომ დაუშვა ურიცხვი ტანჯვა ათასწლეულების მანძილზე? თუ ღმერთმა ასე კარგად შექმნა და მოაწესრიგა სამყარო, რატომ უნდა დაეშვა დედამიწაზე უწესრიგობა და განადგურება?
მაგალითი
3-5. ა) რომელი მაგალითი დაგვეხმარება, გავიგოთ, თუ რატომ დაუშვა წესრიგის ღმერთმა უწესრიგობა დედამიწაზე? ბ) რამდენიმე ვარაუდიდან რომელი შეესაბამება დედამიწასთან დაკავშირებულ მდგომარეობას?
3 მოდი, განვიხილოთ ერთი მაგალითი, რომ ნათლად დავინახოთ, თუ წესრიგის ღმერთს რატომ უნდა დაეშვა დედამიწაზე უწესრიგობა. წარმოიდგინე, რომ ტყეში სეირნობისას მიადექი სახლს. მისი დათვალიერების შემდეგ ხედავ, რომ ის მოუწესრიგებელია. ფანჯრის მინები ჩამსხვრეულია, სახურავი სერიოზულადაა დაზიანებული, ხის აივანი ნაჩვრეტებით არის სავსე, კარი ერთ ანჯამაზე ჰკიდია და წყალსადენის სისტემა არ მუშაობს.
4 ყველა ამ დაზიანების დანახვისას, ნუთუ დაასკვნიდი, რომ გონიერ კონსტრუქტორს არ დაუპროექტებია ეს სახლი? ნუთუ უწესრიგობა დაგარწმუნებდა იმაში, რომ სახლი წარმოიშვა შემთხვევით? თუკი დაასკვნიდი, რომ ვიღაცამ დააპროექტა და ააშენა ის, ნუთუ იფიქრებდი, რომ ის პიროვნება არ იყო დახელოვნებული და მზრუნველი?
5 როდესაც უფრო ყურადღებით დაათვალიერებ შენობას, დაინახავ, რომ თავდაპირველად ის კარგად იყო აგებული და მოწმობს ძალიან ყურადღებიან მზრუნველობაზე. მაგრამ ახლა ის, უბრალოდ, მიტოვებულია და ინგრევა. რა შეუძლია გვიჩვენოს დაზიანებებმა და პრობლემებმა? ამას შეუძლია რამდენიმე ვარაუდი გამოიწვიოს: 1) პატრონი მოკვდა; 2) ის ძალიან ნიჭიერი მშენებელია, მაგრამ მეტად აღარ აინტერესებს ეს სახლი; ან 3) მან დროებით ქირით მისცა თავისი საკუთრება უმადურ მდგმურებს. ბოლო ვარაუდი დედამიწის მდგომარეობის მსგავსია.
რა იყო არასწორი
6, 7. რა დაემართათ ადამსა და ევას, როდესაც ღმერთის კანონი დაარღვიეს?
6 ადრინდელი ბიბლიური ჩანაწერებიდან გავიგეთ: ღმერთს არ განუზრახავს, რომ ადამიანები დატანჯულიყვნენ ან მომკვდარიყვნენ. ჩვენი პირველი მშობლები, ადამი და ევა, მოკვდნენ მხოლოდ ღმერთისადმი დაუმორჩილებლობის გამო (დაბადება მე-2 და მე-3 თავები). დაუმორჩილებლობის შემდეგ ისინი მეტად აღარ ასრულებდნენ ღმერთის ნებას. ღმერთი აღარ ზრუნავდა მათზე. სინამდვილეში, მათ საკუთარი თავი ჩამოაშორეს ღმერთს — ‘სიცოცხლის წყაროს’ (ფსალმუნი 35:10).
7 მათმა სხეულებმა და გონებამ გადაგვარება იწყო იმ მექანიზმის მსგავსად, რომელიც სვლას ანელებს და ჩერდება ენერგიის წყაროდან გამორთვის შემდეგ. შედეგად, ადამისა და ევას მდგომარეობა გაუარესდა, ისინი მოხუცდნენ და მოკვდნენ. რა მოხდა შემდეგ? ისინი დაუბრუნდნენ იმას, რისგანაც შექმნილი იყვნენ: „მტვერი ხარ და მტვრადვე მიიქცევი“. ღმერთმა გააფრთხილა ისინი, რომ მისი კანონებისადმი დაუმორჩილებლობის შედეგი იქნებოდა სიკვდილი. მან უთხრა: ‘მოკვდებით’ (დაბადება 2:17; 3:19).
8. როგორი ზემოქმედება მოახდინა ჩვენი პირველი მშობლების ცოდვამ მთელ კაცობრიობაზე?
8 არა მარტო ჩვენი პირველი მშობლები მოკვდნენ, არამედ ყველა მათი შთამომავალი — მთელი კაცობრიობა — დაექვემდებარა სიკვდილს. რატომ? იმიტომ რომ, გენეტიკური კანონების თანახმად, ბავშვები მემკვიდრეობით იღებენ მშობლების დამახასიათებელ თვისებებს. ის, რაც ჩვენი პირველი მშობლების ყველა შვილმა დაიმკვიდრა, იყო არასრულყოფილება და სიკვდილი. რომაელთა 5:12 გვეუბნება: „ერთი ადამიანის [ადამის, კაცობრიობის წინაპრის] მიერ ცოდვა შემოვიდა ქვეყნიერებაზე, ხოლო ცოდვის მიერ — სიკვდილი, ასევე სიკვდილი გადავიდა ყველა ადამიანში, იმიტომ, რომ ყველამ შესცოდა ამაში [რადგან დაიმკვიდრეს არასრულყოფილება, რაც ცოდვილი მიდრეკილებებია]“. რამდენადაც ადამიანებისთვის ცნობილია მხოლოდ ცოდვა, არასრულყოფილება და სიკვდილი ზოგიერთი ამ მოვლენებს მიიჩნევს, როგორც ბუნებრივსა და გარდაუვალს. მაგრამ პირველი ადამიანები შექმნილი იყვნენ მარადიული სიცოცხლის უნარითა და სურვილით. ამიტომ, მრავალი ადამიანი იმედგაცრუებულად შეჰყურებს მომავალს იმის ფიქრით, რომ მათი სიცოცხლე დასრულდება სიკვდილით.
რატომ ასე დიდხანს?
9. რატომ დაუშვა ღმერთმა, რომ ტანჯვა-წამება ასე დიდხანს გაგრძელებულიყო?
9 რატომ დაუშვა ღმერთმა, რომ ადამიანებს ასე დიდხანს ევლოთ საკუთარი გზით? რატომ დაუშვა, რომ ტანჯვა-წამებას ეარსება მრავალი საუკუნე? ერთ-ერთი ძირითადი მიზეზი არის ის, რომ წამოიჭრა მნიშვნელოვანი საკამათო საკითხი: ვის აქვს მმართველობის უფლება? ღმერთი უნდა იყოს კაცობრიობის მმართველი, თუ ადამიანებს შეუძლიათ ღმერთისგან დამოუკიდებლად წარმატებით მართონ საკუთარი თავი?
10. რომელი უნარით დაჯილდოვდნენ ადამიანები, მაგრამ რა პასუხისმგებლობასთან ერთად?
10 ადამიანები შექმნილი იყვნენ ნების თავისუფლებით, რაც ნიშნავს არჩევნის უნარს. ისინი არ იყვნენ შექმნილი რობოტების ან ცხოველების მსგავსად, რომლებსაც ძირითადად ინსტინქტები მართავს. ასე რომ, ადამიანებს შეუძლიათ აირჩიონ, თუ ვის ემსახურონ (მეორე რჯული 30:19; 2 კორინთელთა 3:17). ამიტომ, ღმერთის სიტყვა გვირჩევს: „იცხოვრეთ როგორც თავისუფლებმა, ოღონდ ბოროტების საფარად თავისუფლებას ნუ გამოიყენებთ; არამედ იცხოვრეთ როგორც ღვთის მონებმა“ (1 პეტრე 2:16, „ახალი აღთქმა და ფსალმუნები“, კიკნაძისა და სონღულაშვილის თარგმანი). მაგრამ იმ დროს, როცა ადამიანებს აქვთ შესანიშნავი ძღვენი, თავისუფალი არჩევანი, ისინი უნდა შეურიგდნენ არჩეული მოქმედების შედეგებსაც.
11. რომელი ერთადერთი შესაძლებლობა არსებობდა იმის გასაგებად, წარმატებული იქნებოდა თუ არა ღმერთისგან დამოუკიდებელი კურსი?
11 ჩვენმა პირველმა მშობლებმა გააკეთეს მცდარი არჩევანი. მათ აირჩიეს ღმერთისგან დამოუკიდებლობის კურსი. მართალია, ღმერთს შეეძლო პირველი მოჯანყეები მაშინვე დაესაჯა სიკვდილით, როდესაც მათ თავიანთი ნების თავისუფლება ბოროტად გამოიყენეს. მაგრამ ეს არ გადაწყვეტდა კაცობრიობაზე ღმერთის მმართველობის უფლებასთან დაკავშირებულ საკითხებს. რადგანაც პირველ წყვილს სურდა ღმერთისგან დამოუკიდებლობა, პასუხი უნდა გაცემულიყო კითხვაზე: შეეძლო თუ არა ასეთ გზას ბედნიერი და წარმატებული ცხოვრების მოტანა? ერთადერთი შესაძლებლობა ამის გასაგებად იქნებოდა ის, რომ პირველი წყვილისა და მათი შთამომავლობისთვის ნება დაერთო, ევლოთ თავიანთი გზით, რადგანაც ეს იყო მათი არჩევანი. დრო გამოააშკარავებდა იმას, იყვნენ თუ არა ადამიანები შექმნილი ისე, რომ წარმატებით ემართათ საკუთარი თავი შემოქმედისგან დამოუკიდებლად.
12. როგორ შეაფასა იერემიამ ადამიანთა მმართველობა და რატომ არის ეს ასე?
12 ბიბლიის მწერალმა, იერემიამ, იცოდა, თუ რა იქნებოდა შედეგი. მან, ღმერთის ძლიერი სულიწმიდით, ანუ მოქმედი ძალით აღძრულმა, ჭეშმარიტებით დაწერა: „ვიცი, უფალო, რომ ადამიანის ნებაზე არ არის მისი გზა, რომ მიმავალი კაცი ვერ წარმართავს თავის ნაბიჯებს. დამსაჯე [გამომასწორე, აქ], უფალო“ (იერემია 10:23, 24). მან იცოდა, რომ ადამიანებს უნდა ჰქონოდათ ღმერთის ზეციური სიბრძნის ხელმძღვანელობა. რატომ? უბრალოდ, იმიტომ, რომ ღმერთს ადამიანები ისე არ შეუქმნია, რომ მისი ხელმძღვანელობის გარეშე ყოფილიყვნენ წარმატებულები.
13. ყოველგვარი ეჭვის გარეშე, რა ცხადყო კაცობრიობის მმართველობის შედეგებმა ათასწლეულების მანძილზე?
13 კაცობრიობის მმართველობის შედეგებმა ათასწლეულების მანძილზე ყოველგვარი ეჭვის გარეშე ცხადყო, რომ ადამიანს არ შესწევს ძალა, შემოქმედისგან დამოუკიდებლად წარმართოს თავისი საქმეები. რადგან თვითონ სცადეს ამის გაკეთება, მათ მხოლოდ საკუთარი თავი უნდა დაადანაშაულონ კატასტროფული შედეგების გამო. ბიბლია ნათელს ხდის ამას, როცა ამბობს: „კლდეა [ღმერთი], სრულყოფილია მისი ქმნილება, რადგან სამართლიანია მისი ყოველი გზა. ჭეშმარიტებაა ღმერთი, არა სიცრუე; მართალი და წრფელია იგი. გაერყვნენ მას, აღარ არიან მისი შვილები, რადგან შეიგინენ“ (მეორე რჯული 32:4, 5).
ღმერთი მალე ჩაერევა
14. მეტად რატომ აღარ დააყოვნებს ღმერთი თავის ჩარევას ადამიანების საქმეებში?
14 იმის შემდეგ, რაც ღმერთმა მრავალი საუკუნის მანძილზე დაუშვა ადამიანების მმართველობის წარუმატებლობის საკმარისი დემონსტრირება, ახლა შეუძლია კაცობრიობის საქმეებში ჩარევა და ტანჯვა-წამების, მწუხარების, ავადმყოფობისა და სიკვდილის შეჩერება. იმის შემდეგ, რაც მან დაუშვა, რომ ადამიანებს უმაღლესი წერტილისთვის მიეღწიათ მეცნიერებაში, ინდუსტრიაში, მედიცინასა და სხვა დარგებში, აღარ არსებობს აუცილებლობა, რომ ღმერთმა გამოყოს უფრო მეტი საუკუნეები, რათა ადამიანებმა თავიანთი შემოქმედისგან დამოუკიდებლად აჩვენონ, შეძლებენ თუ არა მშვიდობიანი, სამოთხის მსგავსი ქვეყნიერების დამყარებას. მათ ეს ვერ შეძლეს და ვერც შეძლებენ. ღმერთისგან დამოუკიდებლობის შედეგია ქვეყნიერება, რომელიც ძალიან საშიში, მოძულე და სიკვდილის მომტანია.
15. რომელი ბიბლიური რჩევა უნდა გავითვალისწინოთ?
15 მიუხედავად იმისა, რომ არსებობდნენ გულწრფელი მმართველები, რომლებსაც სურდათ დახმარებოდნენ კაცობრიობას, მათმა ძალისხმევამ წარუმატებლობა განიცადა. დღეს ყველგან არის ადამიანის მმართველობის წარუმატებლობის მტკიცებები. ამიტომ, ბიბლია გვირჩევს: „იმედს ნუ დაამყარებთ თავადებზე, ადამიანის ძეზე, რომელსაც არ შეუძლია შველა“ (ფსალმუნი 145:3, აფ).
[სურათი 24, 25 გვერდებზე]
გულწრფელ მსოფლიო მმართველებსაც კი არ ჰქონდათ უნარი, დაემყარებინათ მშვიდობიანი, სამოთხის მსგავსი ქვეყნიერება.