სასწავლო პროგრამა

რადგანაც ისინი დიდ მნიშვნელობას ანიჭებენ ბიბლიურ საგანმანათლებლო საქმიანობას, ზოგმა შეიძლება იფიქროს, რომ მათ არ აინტერესებთ საერო განათლება. მაგრამ ეს ასე არ არის. სხვას რომ ასწავლოს, მასწავლებელმა ჯერ თვითონ უნდა ისწავლოს, ხოლო ეს სათანადო მომზადებასა და სწავლას მოითხოვს. ასე რომ, საერო განათლების სრულ გამოყენებასთან ერთად იეჰოვას მოწმეებისთვის წლების მანძილზე სარგებლობა მოაქვს მრავალგვარ სასწავლო პროგრამასა და სკოლას, რომლებსაც საზოგადოება „საგუშაგო კოშკი“ ხელმძღვანელობს. ეს ეხმარება მოწმეებსა და სხვებს გონებრივი, მორალური და სულიერი მდგომარეობის გაუმჯობესებაში.

მაგალითად, მრავალ ქვეყანაში იეჰოვას მოწმეები განსაკუთრებულ სიძნელეს შეხვდნენ — როგორ ესწავლებინათ მათთვის, ვისაც მცირე ან საერთოდ არ ჰქონდათ სათანადო განათლების მიღების შესაძლებლობა, რის შედეგადაც წერა-კითხვა არ იციან. ამ პრობლემის გადასაწყვეტად საზოგადოება „საგუშაგო კოშკმა“ შეიმუშავა წერა-კითხვის სწავლების პროგრამები.

მაგალითისთვის: ნიგერიაში წერა-კითხვის შემსწავლელ კურსებს იეჰოვას მოწმეები 1949 წლიდან ატარებენ. ამგვარად 1961 წლისთვის ამ კურსების საშუალებით ათასობით ნიგერიელმა ისწავლა კითხვა და ანგარიშები გვიჩვენებს, რომ 1962—1994 წლებში, საერთო ჯამში, წერა-კითხვას 25 599 სრულასაკოვანი ადამიანი დაეუფლა. უკანასკნელმა შემოწმებამ აჩვენა, რომ, თუ ნიგერიაში წერა-კითხვის მცოდნე მოსახლეობა 50-ზე ნაკლებ პროცენტს შეადგენს, იეჰოვას მოწმეთა შორის ასეთი ადამიანების რიცხვი 90-ზე მეტ პროცენტს ითვლის. მექსიკაში საზოგადოება „საგუშაგო კოშკი“ ასეთ კურსებს 1946 წლიდან ატარებს. 1994 წელს წერა-კითხვა 6 500-ზე მეტმა პიროვნებამ ისწავლა. 1946—1994 წლებში ამ საკითხში დახმარება 127 000-ზე მეტმა ადამიანმა მიიღო. წერა-კითხვის შემსწავლელი კლასები აგრეთვე სხვა მრავალ ქვეყანაშიც ჩამოყალიბდა, როგორიცაა: ბოლივია, კამერუნი, ჰონდურასი და ზამბია.

წერა-კითხვისთვის განკუთვნილი ასეთი პროგრამები ხშირად მოსწონთ იმ ქვეყნების საგანმანათლებლო დაწესებულებებს, სადაც ისინი ტარდება. მაგალითად, მექსიკაში სახელმწიფო მოსამსახურემ დაწერა: „დიდად მადლიერი ვარ თქვენი თანამშრომლობისთვის და ქვეყნის მთავრობის სახელით გადმოგცემთ უდიდეს გულწრფელ მოლოცვას ხალხის სასარგებლოდ კეთილშობილური პროგრესული საქმისთვის, უწიგნურთათვის ცოდნის სინათლის მიცემისთვის. . . წარმატებას გისურვებთ თქვენს საგანმანათლებლო საქმიანობაში“.

თეოკრატიული სამსახურის სკოლა

რადგანაც ბიბლიურ საგანმანათლებლო საქმიანობას დიდ მნიშვნელობას ანიჭებენ, იეჰოვას მოწმეები ცდილობენ გაიუმჯობესონ მასწავლებლობის უნარი სხვებისთვის ბიბლიის სწავლებების ასახსნელად. მაგალითად, მსოფლიოში 119 000-ზე მეტ კრებაში ისინი, ვინც თეოკარტული მსახურების სკოლაში არიან ჩაწერილი, სწავლობენ საჯარო კითხვისა და საუბრის ხელოვნებას. წერა-კითხვის მცოდნე პატარებსაც კი შეუძლიათ სკოლაში ჩაწერა, რაც სხვა სფეროებში, მათ შორის, საერო განათლებაშიც დაეხმარება. ბევრი პედაგოგი აღნიშნავს, რომ მოსწავლეები იეჰოვას მოწმეთა ოჯახებიდან ძალიან კარგად აყალიბებენ აზრებს.

გარდა ამისა, იეჰოვას მოწმეები ცდილობენ, რომ ყველა კრების შეკრების ადგილზე, ანუ სამეფო დარბაზში, ჰქონდეთ ბიბლიოთეკა, სადაც ბიბლიის შესწავლისთვის დამხმარე პუბლიკაციები, ლექსიკონები და ცნობარები ინახება. ეს ბიბლიოთეკა ხელმისაწვდომია ყველასთვის, ვინც ესწრება შეხვედრებს სამეფო დარბაზში. კრებებში ყველას გულთბილად ამხნევებენ კითხვისთვის, ოჯახებს კი ახალისებენ ჰქონდეთ ფართო მოცულობის საოჯახო ბიბლიოთეკა, რომელიც ბავშვების და მოზრდილთა მოთხოვნილებებს დააკმაყოფილებდა.

კვალიფიკაციის ამაღლება

ამასთანავე, საზოგადოება „საგუშაგო კოშკი“ ატარებს სკოლებს მისიონერების მოსამზადებლად, რომლებსაც მამაკაცები და ქალები ესწრებიან და აგრეთვე სკოლებს ადგილობრივ კრებებში სამსახურებრივი მოვალეობების შესრულებისთვის მამაკაცების მოსამზადებლად. ეს სკოლები იმის დამატებითი მტკიცებაა, რომ იეჰოვას მოწმეები განათლებას დიდ მნიშვნელობას ანიჭებენ.