მსოფლიოში ყველაზე გავრცელებული წიგნი

„ბიბლია ისტორიაში ყველაზე ფართოდ გავრცელებული წიგნია, რომელსაც კითხულობენ. . . სხვა ნებისმიერ წიგნთან შედარებით, ყველაზე მეტად ბიბლიის ეგზემპლარებია გავრცელებული. ბიბლია აგრეთვე ყველაზე ბევრჯერ და ყველაზე მეტ ენაზე ითარგმნა, ვიდრე სხვა ნებისმიერი წიგნი“ („მსოფლიო ენციკლოპედია“)¹.

გარკვეული გაგებით მრავალი წიგნი ადამიანების მსგავსია. ისინი ჩნდებიან, იზრდებიან პოპულარობაში და — ერთი მუჭა კლასიკური ნაწარმოებების გამოკლებით — ბერდებიან და იხოცებიან. წიგნებისთვის, რომლებიც დრომოჭმულია, აღარავინ კითხულობს და სინამდვილეში მკვდარია, ხშირად ბიბლიოთეკები „სასაფლაოებად“ იქცევა ხოლმე.

მაგრამ თვით კლასიკურ ნაწარმოებებს შორის ბიბლია განსაკუთრებულია. თუმცა მისი ჩაწერა 3500 წლის წინ დაიწყო, ის ისევ ცოცხალია. ის ყველაზე გავრცელებული წიგნია დედამიწაზეa. ყოველწლიურად მთლიანი ბიბლიის ან ბიბლიის ნაწილების დაახლოებით 60 მილიონი ეგზემპლარი ვრცელდება. პირველი გამოცემა, რომელიც დაიბეჭდა საბეჭდ დაზგაზე, გამოვიდა გერმანელი გამომგონებლის იოჰან გუტენბერგის სტამბიდან დაახლოებით 1455 წელს. ვარაუდობენ, რომ იმ დროიდან დაიბეჭდა ბიბლიის (მთლიანად ან ნაწილობრივ) ოთხი მილიარდი ეგზემპლარი. თავისი ტირაჟით ვერც ერთი სხვა წიგნი — რელიგიური თუ სხვა — ვერ უახლოვდება ამ ციფრს.

აგრეთვე ისტორიის განმავლობაში ბიბლიაა ის წიგნი, რომელიც ძალიან მრავალ ენაზეა თარგმნილი. მთლიანი ბიბლია თუ მისი ნაწილები ნათარგმნია 2100-ზე მეტ ენასა და დიალექტზეb. კაცობრიობის 90 პროცენტზე მეტს შეუძლია ბიბლიის წაკითხვა საკუთარ ენაზე, თუ მთლიანად არა, მისი რომელიმე ნაწილის მაინც². ასე რომ, ამ წიგნმა გადაკვეთა სახელმწიფოების საზღვრები და გადალახა რასობრივი და ეთნიკური ბარიერები.

შესაძლოა, მხოლოდ რიცხვებმა ვერ აღგძრას ბიბლიის გამოსაკვლევად. და მაინც, ტირაჟი და ენების რაოდენობის მონაცემები შთამბეჭდავია, რაც იმის დამადასტურებელია, რომ ბიბლიამ საყოველთაო მოწონება დაიმსახურა. უეჭველია, წიგნი, რომელიც კაცობრიობის ისტორიაში ასეთი პოპულარობით სარგებლობდა და ამდენ ენაზე ითარგმნა, თქვენს ყურადღებასაც იმსახურებს.

[სქოლიოები]

[სურათი 6 გვერდზე]

გუტენბერგის ბიბლია — საბეჭდ დაზგაზე დაბეჭდილი პირველი სრული წიგნი.