სულის შესახებ ჭეშმარიტების ცოდნა მნიშვნელოვანია
„შეიცნობთ ჭეშმარიტებას და ჭეშმარიტება გაგათავისუფლებთ თქვენ“. იოანე 8:32.
1. რატომ არის მნიშვნელოვანი, რომ სულისა და სიკვდილის შესახებ ჩვენი შეხედულებები შევამოწმოთ?
სიკვდილისა და საიქიო ცხოვრების შესახებ შეხედულებები ძირითადად პიროვნების რელიგიურ და კულტურულ წარმომავლობაზეა დამოკიდებული. როგორც დავინახეთ, ეს შეხედულებები მრავალგვარია, დაწყებული იმით, რომ სული თავის საბოლოო მიზანს მხოლოდ მრავალჯერ დაბადებით აღწევს, და დამთავრებული იმ წარმოდგენით, რომ ერთხელ ცხოვრებით განისაზღვრება პიროვნების ხვედრი. შესაბამისად, შესაძლებელია, ერთი პიროვნება დარწმუნებული იყოს, რომ სიკვდილის შემდეგ საბოლოო რეალობას შეერწყმება, სხვა ფიქრობდეს, რომ ნირვანას მიაღწევს, ზოგი კი ზეციერ ჯილდოს ელოდეს. სად არის ჭეშმარიტება? რამდენადაც ჩვენი შეხედულებები ზეგავლენას ახდენს ჩვენს გონება-განწყობილებაზე, მოქმედებებსა და გადაწყვეტილებებზე, განა არ უნდა ვიყოთ ამ კითხვაზე პასუხის პოვნით დაინტერესებული?
2, 3. ა) რატომ შეგვიძლია ვირწმუნოთ სულის შესახებ ბიბლიაში ნათქვამი? ბ) როგორ გვიხსნის ბიბლია სულის შესახებ ჭეშმარიტებას?
2 უძველესი წიგნი, ბიბლია, კაცობრიობის ისტორიას პირველი ადამიანის, ადამის, შექმნიდან მოგვითხრობს. მის სწავლებებს არაფერი აქვს საერთო ფილოსოფიებთან და გადმოცემებთან. ბიბლია ნათლად გვიხსნის სულის შესახებ ჭეშმარიტებას: სული თვითონ ადამიანია, მკვდრები არარსებობის მდგომარეობაში არიან და ისინი, რომლებიც ღმერთს ჰყავს დამახსოვრებული, თავის დროზე აღდგენილები იქნებიან. რას შეიძლება ნიშნავდეს თქვენთვის ამ ყოველივეს ცოდნა?
3 „შეიცნობთ ჭეშმარიტებას და ჭეშმარიტება გაგათავისუფლებთ თქვენ“, — უთხრა იესომ თავის მიმდევრებს (იოანე 8:32). დიახ, ჭეშმარიტება ათავისუფლებს. მაგრამ რისგან შეიძლება გაგვათავისუფლოს სულის შესახებ ჭეშმარიტებამ?
შიშისა და სასოწარკვეთილებისგან თავისუფლება
4, 5. ა) რისი შიშისგან გვათავისუფლებს სულის შესახებ ჭეშმარიტება? ბ) როგორ შემატა გამბედაობა აღდგომის იმედმა სიკვდილის პირას მყოფ მძიმედ ავადმყოფ გოგონას?
4 „მრავალ ადამიანს ეშინია სიკვდილის და ცდილობს, არ იფიქროს მასზე“, — ნათქვამია „მსოფლიო ენციკლოპედიაში“. «სიტყვა „სიკვდილი“ დასავლეთის ქვეყნებში ხმარებიდან თითქმის ამოიღეს», — აღნიშნავს ერთი ისტორიკოსი. ზოგ კულტურაში კი, როდესაც სურთ თქვან, რომ პიროვნება მოკვდა, ჩვეულებრივ, ევფიმიზმს იყენებენ და ამბობენ, რომ ის „ამ ქვეყნიდან წავიდა“. ფაქტობრივად, სიკვდილის ამგვარი შიში რაღაც უცნობის შიშია, რადგანაც ადამიანების უმრავლესობისთვის სიკვდილი საიდუმლოებითაა მოცული. ჭეშმარიტება იმის შესახებ, თუ რა ხდება სიკვდილის შემდეგ, ამგვარი შიშისგან გვათავისუფლებს.
5 მაგალითად, განვიხილოთ, თუ რას ფიქრობდა 15 წლის მაიკილენი. მას სისხლის გათეთრება ჰქონდა და ნაადრევად დაიღუპა. დედამისი, პოლა, იხსენებს: „მაიკილენი ამბობდა, რომ სიკვდილის არ ეშინოდა, რადგანაც იცოდა, რომ ის მხოლოდ დროებითი იყო. ჩვენ ბევრს ვსაუბრობდით ღვთის ახალ ქვეყნიერებაზე და მათზე, ვინც იქ იქნება აღდგენილი. მაიკილენს ძლიერი რწმენა ჰქონდა იეჰოვა ღმერთისა და ყოველგვარი ეჭვის გარეშე სწამდა აღდგომის“. აღდგომის იმედმა ამ გაბედულ გოგონას სიკვდილის შიში დააძლევინა.
6, 7. რა სასოწარკვეთილებისგან გვათავისუფლებს სულის შესახებ ჭეშმარიტება? მოიყვანეთ მაგალითი.
6 რა ზეგავლენა მოახდინა ჭეშმარიტებამ მაიკილენის მშობლებზე? „ჩვენი პატარა გოგონას სიკვდილმა ცხოვრებაში ყველაზე დიდი ტკივილი მოგვაყენა, — ამბობს ჯეფი, გოგონას მამა. — მაგრამ მთლიანად მინდობილი ვართ აღდგომის შესახებ იეჰოვას დანაპირებზე და ველით იმ დღეს, როდესაც კვლავ მოვეხვევით ჩვენს საყვარელ მაიკილენს. რა სასიხარულო იქნება მასთან შეხვედრა!“
7 დიახ, სულის შესახებ ჭეშმარიტება პიროვნებას ათავისუფლებს იმ სასოწარკვეთილებისგან, რომელმაც შესაძლებელია საყვარელი ადამიანის სიკვდილის შემდეგ მოიცვას. რასაკვირველია, სავსებით ვერაფერი გააქარვებს საყვარელი პიროვნების სიკვდილით გამოწვეულ გულისტკივილსა და დარდს. აღდგომის იმედს კი გლოვისას მწუხარების ატანაში დახმარება შეუძლია.
8, 9. რისი შიშისგან გვათავისუფლებს მკვდრების მდგომარეობის შესახებ ჭეშმარიტება?
8 მკვდრების მდგომარეობის შესახებ ბიბლიური ჭეშმარიტება მკვდრების შიშისგანაც გვათავისუფლებს. ჭეშმარიტების გაგების შემდეგ მრავალს, ვინც ადრე მკვდრებისთვის ცრურწმენით რიტუალებს ასრულებდა, აღარ აქვს მკვდრებისგან დაწყევლის შიში, აღარ ადარდებს ავის მომასწავებელი ნიშნები, აღარ იყენებს ამულეტებსა და ფეტიშებს, აღარც ძვირად ღირებულ შესაწირავებს სწირავს, რომ წინაპართა სულებს ასიამოვნოს და ისინი მას აღარ გამოეცხადონ. მართლაც, ვინაიდან ‘მკვდრებმა არაფერი იციან’, ეს ყოველივე სრულიად ამაოა (ეკლესიასტე 9:5).
9 სულის შესახებ ბიბლიური ჭეშმარიტება ნამდვილად გვათავისუფლებს და ის სრულიად სანდოა. მაგრამ მოდით ასევე განვიხილოთ, თუ რა შესანიშნავ იმედს გაძლევთ ბიბლია თქვენ.
[ჩანართი 29 გვერდზე]
სულის შესახებ ჭეშმარიტება ადამიანებს, როგორც სიკვდილისა და მკვდრების შიშისგან, ისე საყვარელი პიროვნების სიკვდილით გამოწვეული სასოწარკვეთილებისგან ათავისუფლებს.