მეხსიერების გაუმჯობესება შესაძლებელია

ადამიანის ტვინი იეჰოვა ღმერთმა მეხსიერების საოცარი უნარით შექმნა. ის განძის ულევი წყარო უნდა ყოფილიყო. ეს უნარი მეტყველებს იმაზე, რომ ღვთის განზრახვით ადამიანს მარადიულად უნდა ეცოცხლა (ფსალმ. 139:14; იოან. 17:3).

მიუხედავად ამისა, ალბათ, ამჩნევ, რომ მიღებული ინფორმაციის დიდი ნაწილი გავიწყდება; ვერ იხსენებ, როდესაც გჭირდება. როგორ უნდა გაიუმჯობესო მეხსიერება?

დაინტერესდი

მეხსიერების გასაუმჯობესებლად მნიშვნელოვანია ინტერესი. თუ დაკვირვებული ვიქნებით და დავინტერესდებით ხალხით, აგრეთვე იმით, თუ რა ხდება ირგვლივ, გონება გაგვივარჯიშდება. ეს დაგვეხმარება, ინტერესი მაშინაც გამოვავლინოთ, როდესაც მნიშვნელოვან ინფორმაციას ვკითხულობთ ან ვისმენთ.

ბევრს უჭირს სახელების დამახსოვრება, მაგრამ ქრისტიანებს გვესმის, რამდენად საჭიროა, ვაფასებდეთ თანამორწმუნეებს და აგრეთვე მათ, ვისაც ვუქადაგებთ ან ვისთანაც ურთიერთობა გვიწევს. როგორ დავიმახსოვროთ ის სახელები, რომლებიც აუცილებლად უნდა გვახსოვდეს? პავლე მოციქულმა ერთ-ერთი კრებისთვის მიწერილ წერილში სახელით მოიხსენია კრების 26 წევრი. მათდამი პავლეს ინტერესი იქიდანაც ჩანს, რომ სახელების გარდა მან სხვადასხვა რამ მოიხსენია ბევრი მათგანის შესახებ (რომ. 16:3—16). დღეს იეჰოვას მოწმეთა ზოგი მიმომსვლელი ზედამხედველი შესანიშნავად იმახსოვრებს სახელებს მიუხედავად იმისა, რომ ყოველკვირა სხვადასხვა კრებას ინახულებს. როგორ ახერხებენ ამას? ბევრი მათგანი, როდესაც ვინმეს პირველად ელაპარაკება, რამდენიმეჯერ მიმართავს სახელით. ისინი ცდილობენ, ადამიანის სახელთან ერთად მისი სახეც დაიმახსოვრონ. დამახსოვრებაში მათ ეხმარება ურთიერთობაც სამქადაგებლო მსახურებისა და ერთად სადილობის დროს. დაიმახსოვრებ სახელს, როდესაც ვინმეს გაიცნობ? უპირველესად, ეცადე მოძებნო იმის მიზეზი, თუ რატომ გსურს მისი სახელის დამახსოვრება; შემდეგ კი ზემოხსენებული ზოგიერთი რჩევის გამოყენებას შეეცადე.

წაკითხულის დამახსოვრებაც მნიშვნელოვანია. რა დაგეხმარება ამ მხრივ გაუმჯობესებაში? როგორც ინტერესი, ისე წაკითხულის გაგება. ყურადღებით რომ იკითხო, უნდა გაინტერესებდეს მასალა. ვერ დაიმახსოვრებ ინფორმაციას, თუ კითხვისას გონებით სხვაგან იქნები. წაკითხულს უკეთ გაიგებ, თუ მას დაუკავშირებ წარსულში მიღებულ ინფორმაციას — იმას, რაც უკვე იცი. დაფიქრდი: „სად და როდის შემიძლია ამ მასალის გამოყენება? როგორ გამოვიყენებდი მას სხვების დასახმარებლად?“ უკეთ აღქმაში ისიც დაგეხმარება, თუ ცალკეულ სიტყვებს კი არა, მთელ ფრაზებს წაიკითხავ. ასე უფრო ადვილად გაიგებ მასალას, ჩასწვდები ძირითად აზრებს და დამახსოვრებაც გაგიადვილდება.

გამოყავი დრო გასამეორებლად

განათლების დარგში მომუშავე სპეციალისტები განსაკუთრებულ მნიშვნელობას ანიჭებენ გამეორებას. თავის გამოკვლევაში ერთ-ერთი უნივერსიტეტის პროფესორმა აღნიშნა, რომ გამეორებისთვის ერთი წუთის დათმობითაც კი ორჯერ მეტს იმახსოვრებ. ამიტომაც, როდესაც მთელი მასალის ან გარკვეული მონაკვეთის კითხვას დაამთავრებ, მაშინვე გაიმეორე ძირითადი აზრები, რათა გონებაში ჩაგებეჭდოს. დაფიქრდი, შენი სიტყვებით როგორ გადმოსცემდი ამა თუ იმ აზრს შესწავლილი მასალიდან. კითხვის შემდეგ მეხსიერების ამგვარი გავარჯიშების საშუალებით ინფორმაცია უფრო დიდხანს დაგრჩება გონებაში.

შემდეგ, რამდენიმე დღის განმავლობაში, ეცადე გამეორების მიზნით ვინმეს მოუყვე, რაც წაიკითხე. მიღებული ცოდნა შეგიძლია გაუზიარო ოჯახის ან კრების წევრს, თანამშრომელს, თანაკლასელს, მეზობელს ან მათ, ვისაც სამქადაგებლო მსახურებისას ხვდები. ეცადე, გაიმეორო არა მხოლოდ ძირითადი ფაქტები, არამედ ისიც, თუ როგორ იხსნება ისინი ბიბლიის საფუძველზე. ამით საკუთარ თავსაც დაეხმარები მნიშვნელოვანი ინფორმაციის დამახსოვრებაში და სხვების დახმარებასაც შეძლებ.

იფიქრე მნიშვნელოვან საკითხებზე

წაკითხულის გამეორებისა და სხვებისთვის გადაცემის გარდა, სასარგებლოა ნასწავლი მასალიდან მნიშვნელოვან საკითხებზე ფიქრიც. ასაფი და დავითი, რომლებმაც ბიბლიის დაწერაში მიიღეს მონაწილეობა, ასე იქცეოდნენ. ასაფმა თქვა: „მემახსოვრება იაჰის საქმეები, მემახსოვრება შენ მიერ დიდი ხნის წინათ მოხდენილი საოცრებები. ყველა შენს ნამოქმედარზე ვიფიქრებ და შენს საქმეებს ჩავუკვირდები“ (ფსალმ. 77:11, 12). დავითმაც მის მსგავსად დაწერა: „ღამის გუშაგობის დროს ვფიქრობ შენზე“; „ვიხსენებ ადრინდელ დღეებს. ვფიქრობ ყველა შენს ნამოქმედარზე“ (ფსალმ. 63:6; 143:5). იქცევი შენც მათ მსგავსად?

იეჰოვას ნამოქმედარზე, თვისებებსა და ნებაზე სერიოზული ფიქრი მხოლოდ ფაქტების დამახსოვრებაში როდი დაგეხმარება. რეგულარული ფიქრი გულში ჩაგიბეჭდავს მნიშვნელოვან საკითხებს და ჩამოაყალიბებს შენს შინაგან პიროვნებას. შემდეგ კი ის, რაც ფიქრის დროს იგრძენი და განიცადე, მოგონებებად დაგრჩება და შენი აზროვნების ნაწილად იქცევა (ფსალმ. 119:16).

ღვთის სულის დახმარება

იესო ქრისტეს სიტყვებისა და ღვთის საქმეების გახსენებაში კიდევ ერთი რამ დაგვეხმარება. სიკვდილის წინაღამეს იესომ თავის მოწაფეებს უთხრა: „ეს გითხარით თქვენთან ყოფნისას, მაგრამ დამხმარე, წმინდა სული, რომელსაც მამა გამოგზავნის ჩემი სახელით, ყველაფერს გასწავლით და ყველაფერს გაგახსენებთ, რაც კი თქვენთვის მითქვამს“ (იოან. 14:25, 26). ამ დროს იესოსთან მყოფთა შორის მათე და იოანეც იყვნენ. გახდა მათთვის წმინდა სული ამგვარი დამხმარე? დიახ! დაახლოებით რვა წლის შემდეგ მათემ სახარების წერა დაამთავრა. მათე პირველი იყო, ვინც დაწვრილებით აღწერა იესო ქრისტეს ცხოვრება, მათ შორის მთაზე ქადაგება და ქვეყნიერების აღსასრულისა და იმ დროის ნიშანი, როცა იესო ქრისტე მოსული იქნებოდა. იესოს სიკვდილიდან 65 წლის შემდეგ მოციქულმა იოანემ დაწერა თავისი სახარება, სადაც დაწვრილებით გადმოსცა, თუ რა უთხრა იესომ თავის მოციქულებს მათთან ყოფნის უკანასკნელ ღამეს, ვიდრე სიცოცხლეს გაწირავდა. მათესა და იოანეს, უეჭველია, შესანიშნავად ახსოვდათ ის, რასაც იესო ამბობდა და აკეთებდა მათთან ყოფნის დროს, მაგრამ წმინდა სულმა მთავარი როლი შეასრულა იმაში, რომ არ დავიწყებოდათ ის მნიშვნელოვანი ინფორმაცია, რომელიც იეჰოვას ნებით ბიბლიაში უნდა ჩაწერილიყო.

დღესაც ეხმარება წმინდა სული ღვთის მსახურებს? უეჭველად! ცხადია, წმინდა სული გონებაში არ ჩაგვიდებს იმას, რაც არასოდეს გვისწავლია. მაგრამ ის წარსულში ნასწავლის გახსენებაში გვეხმარება (ლუკ. 11:13; 1 იოან. 5:14). მისი დახმარებით, როდესაც საჭიროება მოითხოვს, ‘იღვიძებს ჩვენი საღი აზროვნების უნარი’, რათა გვახსოვდეს „წმიდა წინასწარმეტყველთა მიერ ადრე ნათქვამი სიტყვები და უფლისა და მხსნელის მცნება“ (2 პეტ. 3:1, 2).

„არ დაგავიწყდეთ“

იეჰოვა ხშირად უმეორებდა ისრაელებს გამაფრთხილებელ სიტყვებს: „არ დაგავიწყდეთ“, „არ დაივიწყოთ“. ეს იმას არ ნიშნავს, რომ ის მათგან ყველაფრის ზედმიწევნით დამახსოვრებას მოითხოვდა. უბრალოდ, ხალხი იმდენად არ უნდა ყოფილიყო დაკავებული პირადი საქმეებით, რომ იეჰოვას საქმეები აღარც კი გახსენებოდათ. მათ უნდა ხსომებოდათ, როგორ იხსნა ისინი იეჰოვამ, როდესაც ანგელოზმა ეგვიპტელთა პირმშოები გაწყვიტა; აგრეთვე, როდესაც იეჰოვას ნებით წითელი ზღვა შუაზე გაიპო და ფარაონი თავის ლაშქართან ერთად დაიხრჩო. ისრაელებს უნდა ხსომებოდათ, რომ ღმერთმა მათ კანონი მისცა სინას მთასთან და უდაბნოს გავლით აღთქმულ ქვეყანაში შეიყვანა. მათ არ უნდა დაევიწყებინათ ეს ყოველივე — ამ ფაქტების ცოდნას კვლავაც მნიშვნელოვანი ზეგავლენა უნდა მოეხდინა მათ ყოველდღიურ ცხოვრებაზე (კან. 4:9, 10; 8:10—18; გამ. 12:24—27; ფსალმ. 136:15).

ჩვენც უნდა მივაქციოთ ყურადღება გამაფრთხილებელ სიტყვებს: „არ დაგავიწყდეთ“. ცხოვრებისეულმა სირთულეებმა არ უნდა დაგვავიწყოს იეჰოვა. უნდა გვახსოვდეს, როგორი ღმერთია ის და რა დიდი სიყვარული გამოავლინა, როდესაც საკუთარი ძე გაიღო მსხვერპლად, რათა ცოდვების პატიებისა და მარადიული სიცოცხლის შესაძლებლობა მოგვცემოდა (ფსალმ. 103:2, 8; 106:7, 13; იოან. 3:16; რომ. 6:23). თუ რეგულარულად ვიკითხავთ ბიბლიას და აქტიურ მონაწილეობას მივიღებთ კრების შეხვედრებსა და სამქადაგებლო მსახურებაში, არასოდეს დაგვავიწყდება ეს ძვირფასი ჭეშმარიტება.

მნიშვნელოვანი თუ უმნიშვნელო გადაწყვეტილებების მიღებისას არ დაგავიწყდეს ეს ჭეშმარიტება, რათა მან გავლენა მოახდინოს შენს აზროვნებაზე. იეჰოვასთან ეძიე ხელმძღვანელობა. იმის მაგივრად, რომ საკითხებს ადამიანური თვალსაზრისით უყურო ან არასრულყოფილ გულს დაენდო, დაფიქრდი, ღვთის სიტყვის რომელი რჩევები ან პრინციპები უნდა გამოიყენო გადაწყვეტილების მიღებისას (იგავ. 3:5—7; 28:26). ვერ გაიხსენებ იმას, რაც არასოდეს წაგიკითხავს ან გაგიგია. მაგრამ რაც უფრო მეტად შეიძენ საფუძვლიან ცოდნას და მეტად შეიყვარებ იეჰოვას, მით უფრო გაიმდიდრებ ცოდნის მარაგს, რომლის შენარჩუნებაშიც იეჰოვას წმინდა სული დაგეხმარება; იეჰოვასადმი ძლიერი სიყვარული ამ ცოდნის შესაბამისად მოქმედებისკენაც აღგძრავს.