თავი მეჩვიდმეტე
გამოავლინე ღვთისადმი ერთგულება ოჯახში
1. რა გავლენას ახდენს ქორწინებაზე ღვთის სიტყვაში მოცემული ხელმძღვანელობით სარგებლობა?
იეჰოვა ქორწინების დამფუძნებელია და მის სიტყვაში ოჯახებს საუკეთესო ხელმძღვანელობა ეძლევათ. ამ ხელმძღვანელობის მიყოლით ბევრმა ბედნიერ ქორწინებას ჩაუყარა საფუძველი. საქებარია, რომ ზოგმა წყვილმა, რომლებიც უბრალოდ ერთად ცხოვრობდნენ, თავიანთი ქორწინება რეგისტრაციაში გაატარეს. სხვებმა კი სქესობრივი კავშირი გაწყვიტეს იმ ადამიანთან, რომელიც არ იყო მათი კანონიერი მეუღლე. ძალადობის მოყვარულმა მამაკაცებმა, რომლებიც სიტყვიერად თუ ფიზიკურად შეურაცხყოფდნენ თავიანთ მეუღლეებსა და შვილებს, სითბოსა და სინაზის გამოვლენა ისწავლეს.
2. რას მოიცავს ქრისტიანული ოჯახური ცხოვრება?
2 ქრისტიანული ოჯახური ცხოვრება ბევრს მოიცავს; მაგალითად, მნიშვნელოვანია, თუ როგორი თვალსაზრისი გვაქვს მყარ ქორწინებაზე, როგორ ვასრულებთ ოჯახურ მოვალეობებს და როგორ ვეპყრობით ოჯახის წევრებს (ეფესელთა 5:33—6:4). ერთია, ვიცოდეთ, რა არის ნათქვამი ბიბლიაში ოჯახურ ცხოვრებაზე, მაგრამ სულ სხვაა, ბიბლიური რჩევის თანახმად ცხოვრება. არც ერთი ჩვენგანი არ ისურვებდა, დამსგავსებოდა იმ ადამიანებს, რომლებიც იესომ ღვთის მცნებების დარღვევის გამო განსაჯა. ისინი არასწორად ფიქრობდნენ, რომ მხოლოდ რელიგიისადმი ერთგულებით ამოიწურებოდა ყველაფერი (მათე 15:4—9). ჩვენ არ გვსურს, ღვთისადმი ერთგულებად წარმოვაჩინოთ თავი, ხოლო საკუთარ ოჯახში კი თავი ავარიდოთ ასეთი ერთგულების გამოვლენას. ნაცვლად ამისა, ჩვენი სურვილია ღვთისადმი ნამდვილი ერთგულების გამოვლენა, რაც „დიადი შენაძენია“ (1 ტიმოთე 5:4; 6:6; 2 ტიმოთე 3:5).
რამდენ ხანს გასტანს ქორწინება?
3. ა) რა მოსდის ბევრ ქორწინებას, მაგრამ პირადად ჩვენ რა გადაწყვეტილების მიღება გვმართებს? ბ) ბიბლიის გამოყენებით უპასუხე ამ აბზაცში დასმულ კითხვებს.
3 სულ უფრო და უფრო იმატა განქორწინების შემთხვევებმა. წლების მანძილზე ზოგი დაქორწინებული წყვილი გაყრასა და სხვაზე დაქორწინებას არჩევს. გაკვირვებას აღარც იმის გაგება იწვევს, რომ ახალგაზრდა წყვილი დაქორწინებიდან მცირე ხნის შემდეგ დაშორდა ერთმანეთს. ჩვენ სურვილი უნდა გვქონდეს, იეჰოვას ვასიამოვნოთ იმისდა მიუხედავად, თუ როგორ იქცევიან სხვები. მოდი განვიხილოთ ქვემოთ დასმული შეკითხვები და საღვთო წერილიდან მოყვანილი ადგილები, რომლებიც დაგვანახვებს, თუ რა არის ნათქვამი ღვთის სიტყვაში ქორწინების ხანგრძლივობაზე.
როდესაც მამაკაცი და ქალი ქორწინდება, რამდენ ხანს უნდა იცხოვრონ ერთად? (მარკოზი 10:6—9; რომაელთა 7:2, 3).
რა არის განქორწინების ერთადერთი, ღვთის მიერ გამართლებული მიზეზი, რომელიც ხელმეორედ დაქორწინების უფლებას იძლევა? (მათე 5:31, 32; 19:3—9).
როგორ უყურებს იეჰოვა გაყრას, რომელიც მის სიტყვას არ ეთანხმება? (მალაქია 2:13—16).
ემხრობა ბიბლია იმ აზრს, რომ განცალკევებული ცხოვრებით დაქორწინებულთა პრობლემები წყდება? (1 კორინთელთა 7:10—13).
რა ვითარებებში შეიძლება გამართლებული იყოს განცალკევებით ცხოვრება? (ფსალმუნი 10:5; ლუკა 4:8; 1 ტიმოთე 5:8).
4. რატომ რჩება ზოგი დაქორწინებული წყვილი სიცოცხლის ბოლომდე ერთად?
4 ზოგი დაქორწინებული წყვილი სიცოცხლის ბოლომდე ერთად რჩება. რა განაპირობებს ამას? მნიშვნელოვანია, რომ როგორც მამაკაცმა, ისე ქალმა მოწიფულობის ასაკამდე არ იჩქაროს დაქორწინება; არანაკლებ მნიშვნელოვანია ისიც, რომ ისეთმა ადამიანებმა გადაწყვიტონ შეუღლება, რომლებსაც ერთნაირი ინტერესები აქვთ და გულახდილად შეუძლიათ გარკვეულ საკითხებზე ერთად მსჯელობა. მაგრამ ყველაზე მნიშვნელოვანი მაინც ისეთი ცხოვრების თანამგზავრის პოვნაა, რომელსაც იეჰოვა უყვარს და პატივს სცემს მის სიტყვას, როგორც პრობლემების გადამჭრელ ძირითად საშუალებას (ფსალმუნი 118:97, 104; 2 ტიმოთე 3:16, 17). ასეთი ადამიანი არ ფიქრობს, რომ, თუ ვერ გაუგებს მეუღლეს, ყოველთვის შეძლებს მასთან გაყრას ან ცალკე ცხოვრებას. ის მეუღლის შეცდომების გამო უარს არ იტყვის საკუთარი ვალდებულებების შესრულებაზე. ნაცვლად ამისა, მზად იქნება, რეალურად შეხედოს პრობლემებს და მათი გადასაჭრელი საშუალებები მოძებნოს.
5. ა) რა როლს ასრულებს იეჰოვასადმი ერთგულება ქორწინებაში? ბ) რა სარგებლობის მომტანია იეჰოვას ნორმების დაცვა მაშინაც კი, თუ წინააღმდეგობას ვხვდებით?
5 სატანა ამტკიცებს, რომ, თუ პრობლემები შეგვექმნება, აღარ დავიცავთ იეჰოვას პრინციპებს (იობი 2:4, 5; იგავნი 27:11). მაგრამ იეჰოვას მოწმეების უმრავლესობა, რომლებიც მოწინააღმდეგე მეუღლეების გამო პრობლემებს ხვდებიან, არ არღვევენ თავიანთ საქორწინო აღთქმას. ისინი კვლავაც იეჰოვასა და მისი მცნებების ერთგული რჩებიან (მათე 5:37). ზოგმა მათგანმა წლების გასვლის შემდეგ განიცადა სიხარული, როდესაც მათი, ერთ დროს მოწინააღმდეგე, მეუღლეები იეჰოვასთვის მსახურებაში შეუერთდნენ (1 პეტრე 3:1, 2). ხოლო იმ ქრისტიანებმა, რომელთა მეუღლეებიც არ იცვლებიან უკეთესობისკენ ან რომლებსაც იეჰოვასთვის მსახურების გამო ეყრებიან, იციან, რომ იეჰოვა აკურთხებს მათ ოჯახში ღვთისადმი გამოვლენილი ერთგულებისთვის (ფსალმუნი 54:23; 144:16).
თითოეული ასრულებს თავის მოვალეობას
6. რომელი პრინციპის დაცვა უყრის საფუძველს ბედნიერ ქორწინებას?
6 რასაკვირველია, ბედნიერი ქორწინებისთვის უფრო მეტი მოითხოვება, ვიდრე მხოლოდ ერთად დარჩენა. ძირითადად, როგორც ქმარს, ისე ცოლს მოეთხოვება, რომ დააფასოს და დაიცვას იეჰოვას მიერ დადგენილი მეთაურობის პრინციპი. ეს ხელს შეუწყობს ოჯახში წესრიგისა და კეთილდღეობის დამყარებას. 1 კორინთელთა 11:3-ში ვკითხულობთ: „ყოველი მამაკაცის თავი ქრისტეა, ცოლის თავი — ქმარი და ქრისტეს თავი — ღმერთი“.
7. როგორ უნდა გაეწიოს ოჯახს მეთაურობა?
7 შენიშნე, ზემოთ მოყვანილ მუხლში პირველად რა არის ნახსენები? მუხლიდან ვგებულობთ, რომ ყველა მამაკაცს ჰყავს თავი; ეს არის ქრისტე, რომელსაც უნდა დაემორჩილოს. აქედან გამომდინარე, ქმარმა ისე უნდა გასწიოს მეთაურობა, რომ იესოს თვისებები აირეკლოს. ქრისტე იეჰოვას ემორჩილება, ძალიან უყვარს კრება და ზრუნავს მასზე (1 ტიმოთე 3:15). მან ‘თავიც კი გასწირა’ კრებისთვის. იესო ამაყი და თვითდაჯერებული კი არ არის, არამედ „მშვიდი და თავმდაბალია“. ისინი, ვინც მას ემორჩილებიან, „სულის სიმშვიდეს“ პოულობენ. როდესაც ქმარი ამგვარად ეპყრობა თავის ოჯახს, ცხადყოფს, რომ იესოს ემორჩილება. ამ შემთხვევაში ქრისტიანმა ცოლმა უნდა დაინახოს, თუ რა კეთილსასურველი შედეგების მომტანი და გამომაცოცხლებელია ქმრის შემავსებლად ყოფნა და მისადმი მორჩილების გამოვლენა (ეფესელთა 5:25—33; მათე 11:28, 29; იგავნი 31:10, 28).
8. ა) რატომ შეიძლება ვინმე ფიქრობდეს, რომ ზოგ ოჯახში ქრისტიანული პრინციპებით მოქმედება არ მოიტანს სასურველ შედეგებს? ბ) რის გაკეთება გვმართებს, თუ ოჯახში დაძაბული მდგომარეობაა?
8 მაგრამ პრობლემები, ალბათ, მაინც წამოიჭრება. შესაძლოა, ოჯახის რომელიმე წევრს ახასიათებდა სხვა წევრების მითითებების გამუდმებით უგულებელყოფა, სანამ მის ოჯახში ვინმე ბიბლიური პრინციპებით ხელმძღვანელობას დაიწყებდა. ზოგთან შეიძლება არც თავაზიანი თხოვნა და არც სიყვარულით მოპყრობა ჭრიდეს. ბიბლიაში ნათქვამია, რომ განვიშოროთ „მძვინვარება, რისხვა, ყვირილი და გმობა“, რაც ჩვენთვის კარგად არის ცნობილი (ეფესელთა 4:31). მაგრამ როგორ უნდა მოვიქცეთ, თუ ოჯახის წევრებს სხვაგვარად არ ესმით? იესოს მათთვის კი არ მიუბაძავს, ვინც იმუქრებოდა და ილანძღებოდა, არამედ თავის მამას მიენდო (1 პეტრე 2:22, 23). ამიტომ, როცა ოჯახში მდგომარეობა იძაბება, ღვთისადმი ერთგულება გამოავლინე და ნაცვლად იმისა, რომ ამ ქვეყნიერებაში მიღებული ნორმების თანახმად მოიქცე, ლოცვით მიმართე იეჰოვას დახმარებისთვის (იგავნი 3:5—7).
9. რა სწავლობს ბევრი ქრისტიანი ქმარი ნაცვლად იმისა, რომ ოჯახის წევრები დაადანაშაულოს?
9 ცვლილებები ყოველთვის უცაბედად არ ხდება, მაგრამ ბიბლიური რჩევა ნამდვილად მოქმედია, როცა მთელი გულით განაგრძობენ მის გამოყენებას. ბევრმა მამაკაცმა დაინახა, რომ მათ ოჯახში მდგომარეობა მაშინ გამოსწორდა, როცა თავად დააფასეს კრებისადმი ქრისტეს დამოკიდებულება. კრება არ შედგება სრულყოფილი ადამიანებისგან, მაგრამ იესოს უყვარს ის, სწორ მაგალითს უჩვენებს და საღვთო წერილის გამოყენებით გამოსწორებაში ეხმარება. მან სიცოცხლეც კი გასწირა კრებისთვის (1 პეტრე 2:21). მისმა მაგალითმა ბევრ ქრისტიან ქმარს უბიძგა, კარგი მეთაურობა გაეწია თავისი ოჯახის წევრებისთვის და სიყვარულით დახმარებოდა მათ გამოსწორებაში. ეს გაცილებით უფრო კარგი შედეგების მომტანია, ვიდრე ვინმეს დადანაშაულება ან ოჯახის რომელიმე წევრთან დალაპარაკებისგან თავის შეკავება.
10. ა) როგორ შეიძლება, რომ ქმარი ან ცოლი, რომლებიც თავს ქრისტიანებად თვლიან, სირთულეებს უქმნიდნენ საკუთარი ოჯახის წევრებს? ბ) როგორ შეიძლება მდგომარეობის გამოსწორება?
10 რა შეიძლება ითქვას, როცა ოჯახის თავი არ აკმაყოფილებს ოჯახის წევრების ემოციურ მოთხოვნილებებს, ან, როცა არ ავლენს ინიციატივას, ოჯახთან ერთად იმსჯელოს ბიბლიაზე, ან მათთან ერთად სხვა საქმიანობით დაკავდეს? ან, როდესაც ცოლი არ ეხმარება ქმარს და არ ავლენს ღვთის მოსაწონ მორჩილებას? ზოგ ოჯახში პრობლემებზე ტაქტიანად საუბარმა კარგი შედეგები გამოიღო (დაბადება 21:10—12; იგავნი 15:22). მაგრამ მაშინაც კი, თუ ჩვენს მცდელობას სასურველი შედეგები არ მოჰყვება, თითოეულ ჩვენგანს შეუძლია თავისი წვლილი შეიტანოს ოჯახური მდგომარეობის გაუმჯობესებაში — ცხოვრების ყველა სფეროში ღვთის სულის ნაყოფები გამოავლინოს და სიყვარულით იზრუნოს ოჯახის სხვა წევრებზე (გალატელთა 5:22, 23). შედეგი მაშინ კი არ არის სახეზე, როცა სხვისგან მოველით რაღაცას, არამედ, როცა თავად ვასრულებთ დაკისრებულ ვალდებულებას და ამით ღვთისადმი ერთგულებას ვავლენთ (კოლასელთა 3:18—21).
სად შეიძლება პასუხების მოძებნა
11, 12 რის საშუალებით გვეხმარება იეჰოვა, რომ ბედნიერ ოჯახურ ცხოვრებას ჩავუყაროთ საფუძველი?
11 დღესდღეობით უამრავი წყარო არსებობს, რომლებითაც ადამიანები ხელმძღვანელობენ ოჯახური საქმეების მოსაგვარებლად. მაგრამ ჩვენთვის ცნობილია, რომ ყველაზე საუკეთესო რჩევები ღვთის სიტყვაშია მოცემული და მადლიერი ვართ, რომ ღმერთი თავისი ხილული ორგანიზაციის საშუალებით გვეხმარება მათ გამოყენებაში. ცდილობ, მაქსიმალურად ისარგებლო ამ დახმარებით? (ფსალმუნი 118:129, 130; მიქა 4:2).
12 კრების შეხვედრებზე დასწრების გარდა, უთმობ რეგულარულად დროს ბიბლიის ოჯახურ შესწავლას? ის ოჯახები, რომლებიც ამგვარად იქცევიან, ცდილობენ, რომ გაერთიანებული იყვნენ თაყვანისმცემლობაში. მათი ოჯახური ცხოვრება უმჯობესდება, რადგან თავიანთი მდგომარეობის გათვალისწინებით იყენებენ ღვთის სიტყვას (მეორე რჯული 11:18—21).
13. ა) თუ ოჯახურ ცხოვრებასთან დაკავშირებით კითხვები გვიჩნდება, ხშირ შემთხვევაში სად შეგვიძლია საჭირო დახმარების მიღება? ბ) რა უნდა აჩვენოს ჩვენ მიერ მიღებულმა თითოეულმა გადაწყვეტილებამ?
13 შესაძლოა, ოჯახურ ცხოვრებასთან დაკავშირებით კითხვები დაგებადოს. მაგალითად, ჩასახვის საწინააღმდეგო რა საშუალებები შეუძლია გამოიყენოს ქრისტიანმა წყვილმა? არის თუ არა როდისმე გამართლებული აბორტის გაკეთება? რამდენად უნდა მოსთხოვონ მშობლებმა სულიერი საკითხებით ნაკლებად დაინტერესებულ ბავშვს, ოჯახის სხვა წევრებთან ერთად მიიღოს მონაწილეობა თაყვანისმცემლობაში? ბევრი ასეთი კითხვა იეჰოვას მოწმეთა მიერ გამოცემულ ლიტერატურაში განიხილება. ისწავლე ბიბლიის შესწავლაში დამხმარე საშუალებების, მათ შორის ინდექსების, გამოყენება, რათა წამოჭრილ კითხვებზე პასუხები იპოვო. თუ არ გაქვს ინდექსში მითითებული პუბლიკაციები, სამეფო დარბაზის ბიბლიოთეკაში მოძებნე ისინი; ან შეიძლება კომპიუტერში შეძლო მათი პოვნა. აგრეთვე შეგიძლია წამოჭრილი კითხვები მოწიფულ ძმებთან და დებთან განიხილო. მაგრამ იმის იმედი ნუ გექნება, რომ ყოველთვის კონკრეტულ პასუხს მიიღებ. ხშირად უშუალოდ შენ ან თქვენ, დაქორწინებულმა წყვილმა, უნდა მიიღოთ გადაწყვეტილება. დაე თქვენმა არჩევანმა ცხადყოს, რომ არა მხოლოდ სახალხოდ ავლენთ ღვთისადმი ერთგულებას, არამედ ოჯახშიც! (რომაელთა 14:19; ეფესელთა 5:10).
გამეორება
• რა კავშირია იეჰოვასადმი ერთგულებასა და ცხოვრების თანამგზავრისადმი გამოვლენილ ერთგულებას შორის?
• რა დაგვეხმარება, რომ ღვთის ნების შესაბამისად მოვიქცეთ, როცა ოჯახური პრობლემებით ვართ დამძიმებული?
• როგორ შეგვიძლია სიტუაციის გამოსწორება მაშინაც კი, თუ სხვები სათანადოდ არ ასრულებენ თავიანთ მოვალეობას ოჯახში?
[სურთაი 155 გვერდზე]
ოჯახის თავმა ქრისტეს თვისებები უნდა აირეკლოს.
[სურთაი 157 გვერდზე]
ოჯახის წევრებთან ერთად ბიბლიის რეგულარულად შესწავლა ხელს უწყობს ოჯახის გაერთიანებას.