ახალი ქვეყნიერება ღვთის დაპირებისამებრ

ბიბლია, ღვთის სიტყვა, იმედს გვისახავს: „ჩვენ კი, მისი დაპირებისამებრ, ველით ახალ ცასა და ახალ დედამიწას, რომლებზეც დამკვიდრებული იქნება სიმართლე“ (2 პეტრე 3:13).

რა არის „ახალი ცა“? ბიბლია ცას ანუ ზეცას მმართველობას უკავშირებს (საქმეები 7:49). „ახალი ცა“ ახალი მთავრობაა, რომელიც დედამიწას უხელმძღვანელებს. ეს მთავრობა ახალია იმიტომ, რომ ის შეცვლის მმართველობის დღევანდელ სისტემას; მისი ამოქმედება ღვთის განზრახვის განხორციელების ახალი ეტაპია. იესო ქრისტე სწორედ ამ სამეფოს შესახებ გვასწავლიდა ლოცვას (მათე 6:10). მას „ზეციერი სამეფო“ ეწოდება, რადგან ღმერთია მისი დამფუძნებელი, ის კი ზეცაში ცხოვრობს (მათე 7:21).

რა არის „ახალი დედამიწა“? ამაში არ იგულისხმება ახალი პლანეტა, რადგან ბიბლია ნათლად ამბობს, რომ დედამიწა მარადიულად იქნება დასახლებული. „ახალი დედამიწა“ ახალი საზოგადოებაა. ეს საზოგადოება ახალი იქნება იმიტომ, რომ მასში აღარ იქნებიან ბოროტი ადამიანები (იგავები 2:21, 22). ყველა, ვინც მაშინ იცხოვრებს, პატივს მიაგებს შემოქმედს და მისი მორჩილი იქნება. ისინი ყოველთვის მისი მოთხოვნების თანახმად მოიქცევიან (ფსალმუნები 21:28). ყველა ეროვნების ადამიანებს შეუძლიათ გაიგონ ამ მოთხოვნების შესახებ და საკუთარი ცხოვრება მათ შეუსაბამონ. აკეთებთ ამას?

ახალ ქვეყნიერებაში ყველა სცემს პატივს ღვთის მმართველობას. იწვევს თქვენში ღვთის სიყვარული მისდამი მორჩილების სურვილს? (1 იოანე 5:3). ემორჩილებით ღმერთს ოჯახში, სამსახურში, სასწავლებელში? ირეკლავს თქვენი ცხოვრება, რომ მისი მორჩილი ხართ?

ამ ახალ ქვეყნიერებაში ყველა ერთსულოვნად სცემს თაყვანს ჭეშმარიტ ღმერთს. ხართ ცისა და დედამიწის შემოქმედის თაყვანისმცემელი? ნამდვილად გაერთიანებთ თქვენი თაყვანისმცემლობა ყველა ეროვნების, რასისა და ეთნიკური ჯგუფის წარმომადგენელ სხვა თაყვანისმცემლებთან? (ფსალმუნები 85:9, 10; ესაია 2:2—4; სოფონია 3:9).

[ჩარჩო 17 გვერდზე]

ღმერთი, რომელიც ამ ყოველივეს აღგვითქვამს

ის ცისა და დედამიწის შემოქმედია. იესო ქრისტემ მას „ერთადერთი ჭეშმარიტი ღმერთი“ უწოდა (იოანე 17:3).

კაცობრიობის უმეტესი ნაწილი გამოგონილ ღმერთებს სცემს თაყვანს. მილიონები უსიცოცხლო გამოსახულებებს ემსახურებიან. სხვები განადიდებენ ადამიანის შექმნილ ორგანიზაციებს, მატერიალისტურ–ფილოსოფიურ იდეებს ან საკუთარ გულისთქმებს. მათი უმეტესობაც კი, ვინც ამბობს, რომ ბიბლიის სწამს, სინამდვილეში არ განადიდებს იმ პიროვნების სახელს, რომელსაც მისი სიტყვა „ჭეშმარიტ ღმერთს“ უწოდებს (მეორე რჯული 4:35).

საკუთარ თავზე შემოქმედი ამბობს: „მე იეჰოვა ვარ. ეს არის ჩემი სახელი“ (ესაია 42:5, 8, აქ). ბიბლიის ორიგინალში ეს სახელი დაახლოებით 7 000–ჯერ გვხვდება. იესო ქრისტე თავის მოწაფეებს ასწავლიდა, ელოცათ: „ჩვენო ზეციერო მამა, განიწმინდოს შენი სახელი“ (მათე 6:9).

როგორი პიროვნებაა ჭეშმარიტი ღმერთი? ის საკუთარ თავს აღგვიწერს, როგორც „შემბრალეს და მოწყალეს, სულგრძელს და დიდად მოწყალეს, და ჭეშმარიტს“. მეორე მხრივ კი გვეუბნება, რომ მისი მცნებების განზრახ დამრღვევს სასჯელი არ ასცდება (გამოსვლა 34:6, 7). კაცობრიობასთან მისი ურთიერთობის ისტორია ამტკიცებს ამ სიტყვების ჭეშმარიტებას.

მნიშვნელოვანია, წმინდად ვყოთ როგორც ღვთის სახელი, ასევე თავად ღმერთი. ის შემოქმედი და უზენაესი ხელისუფალია, ამიტომ იმსახურებს ჩვენს მორჩილებასა და თაყვანისცემას. პირადად თქვენ აკეთებთ ამას?

[ჩარჩო⁄სურათი 18 გვერდზე]

რას მოგვიტანს „ახალი ცა“ და „ახალი დედამიწა“?

დედამიწა სამოთხედ გადაიქცევა ლუკა 23:43.

[ჩარჩო⁄სურათები 19 გვერდზე]

იქნებით იქ?

შეუძლებელია ღმერთმა ტყუილი თქვას! (ტიტე 1:2).

იეჰოვამ განაცხადა: „ჩემი სიტყვა . . . არ დამიბრუნდება ცარიელი, რადგან მოიმოქმედებს იმას, რაც მე მწადდა და წარმატება ექნება იმაში, რისთვისაც მე მივავლინე“ (ესაია 55:11).

იეჰოვა უკვე ქმნის „ახალ ცასა და ახალ დედამიწას“. ზეციერი მთავრობა უკვე მოქმედებს. „ახალ დედამიწას“ კი საფუძველი ჩაეყარა.

ბიბლიის წიგნი „გამოცხადება“ აღგვიწერს შესანიშნავ პირობებს, რომელსაც „ახალი ცა და ახალი დედამიწა“ მოუტანს კაცობრიობას, შემდეგ კი გვამცნობს თავად ღვთის, უზენაესი ხელისუფლის, სიტყვებს: „აი, ვქმნი ყველაფერს ახალს . . . დაწერე, რადგან ეს სიტყვები სარწმუნო და ჭეშმარიტია“ (გამოცხადება 21:1, 5).

მნიშვნელოვანია ვკითხოთ საკუთარ თავს: ვახდენ თუ არა საჭირო ცვლილებებს, რომ „ახალი ცის“ მმართველობის დროს „ახალ დედამიწაზე“ ცხოვრების ღირსად ჩავითვალო?