ემსახურეთ იეჰოვას და დაიცავით მისი მაღალი ნორმები

1. როგორ უყურებდნენ იერუსალიმელები იეჰოვას ნორმებს სოფონიას დროს?

„იეჰოვა არც კარგს გააკეთებს და არც ცუდსო“, — ასე ფიქრობდნენ იერუსალიმელები სოფონიას დროს. მათი აზრით იეჰოვა არც კი მოელოდა მათგან განსაზღვრული ნორმების დაცვას. სოფონიამ ისინი ღვინის ჭურჭელში „დალექილ თხლეს“ შეადარა. ის იმას გულისხმობდა, რომ ხალხი უზრუნველი ცხოვრებით ტკბებოდა და ღვთის ხელმძღვანელობას არად აგდებდა. მაგრამ ღმერთმა გამოუცხადა იუდეველებს, რომ მოათვალიერებდა ლამპრებით იერუსალიმს და განიკითხავდა მათ, ვინც უგულებელყოფდა მის ნორმებს. იეჰოვამ დაადგინა ნორმები და მისთვის არ არის სულერთი, დაიცავს თუ არა მათ ხალხი (სოფონია 1:12).

2. რას ფიქრობს ხალხი თქვენს მხარეში გარკვეული ნორმების დაცვაზე?

² ბევრს განსაზღვრული ნორმების დაცვას თავის ნებაზე ცხოვრება ურჩევნია. შეიძლება გსმენიათ: „ის გააკეთე, რასაც გული გკარნახობს“. ზოგიერთი ამბობს: „ფული არ მყოფნის და ვერ ვყიდულობ იმას, რაც მინდა, ამიტომ ყველაფერს გავაკეთებ, რომ მოვიწყო ცხოვრება“. მათთვის სულერთია, ღმერთი რას ფიქრობს ან რას ითხოვს. თქვენ რას იტყოდით? კმაყოფილი ხართ იმით, რომ ღმერთმა თავისი ნორმები დაგვიდგინა?

3, 4. რატომ უნდა იყოთ მადლიერი დადგენილი ნორმებისთვის?

³ ვისაც ღვთის ნორმებით ცხოვრება არ სურს, ადამიანური ნორმებით ცხოვრობს. ეს შეიძლება წყლის გამოყენებას შევადაროთ. ბევრ ქვეყანაში სასმელი წყლის სისუფთავის განმსაზღვრელი ნორმებია დადგენილი. რა მოხდებოდა, თუ ეს ნორმები მეტისმეტად დაბალი იქნებოდა? ეს ალბათ დიარეას ან სხვა რომელიმე დაავადებას გამოიწვევდა, განსაკუთრებით კი ბავშვებში. ალბათ მადლიერნი ხართ, რომ სასმელი წყლის სისუფთავის უზრუნველსაყოფად მაღალი ნორმებია დადგენილი. სტანდარტიზაციის საერთაშორისო ორგანიზაციის ანგარიშში ნათქვამი იყო: „ნორმები რომ არ ყოფილიყო დადგენილი, შედეგებს უცბად დავინახავდით. ზოგჯერ არც კი ვუფიქრდებით, რა როლს ასრულებს ნორმების დადგენა ხარისხის, უსაფრთხოების, საიმედოობისა და ეფექტურობის დონის ამაღლებაში. გარდა ამისა, ეს ხელს უწყობს დანახარჯების დაზოგვას“.

⁴ თუ ვხედავთ, რომ ნორმების დადგენა ცხოვრების სხვადასხვა სფეროში სასარგებლოა, გონივრული იქნებოდა, დაგვესკვნა, რომ ღმერთსაც უნდა ჰქონდეს დადგენილი ნორმები მისი სახელით წოდებული ხალხისთვის (საქმეები 15:14).

რამდენად შესაძლებელია ღვთის ნორმების დაცვა?

5. ამოსის თვალით როგორ დაგვანახვა იეჰოვამ მისი ნორმების დაცვის მნიშვნელობა?

⁵ მშენებლობაში აუცილებელია დადგენილი ნორმების დაცვა. თუ რომელიმე კედელი არ არის ვერტიკალურად აგებული, შეიძლება მთლიანი შენობა გადაიხაროს. და თუ კედლები დაბზარულია, სახლი საცხოვრებლად შეიძლება არ გამოდგეს. ძვ. წ. IX საუკუნეში ამოსმა ხილვაში ისრაელის ათტომიანი სამეფოს მდგომარეობა იხილა. მან იხილა კედელზე მდგომი იეჰოვა, რომელსაც „შვეული ეჭირა ხელში“. ღმერთმა თქვა: „აი, შვეულს ჩავუშვებ ჩემს ხალხში, ისრაელში, მეტად აღარ ვაპატიებ მათ“ (ამოსი 7:7, 8). შვეული არის ზონარზე დაკიდებული სიმძიმე რისამე ვერტიკალური მდგომარეობის შესამოწმებლად. ამოსის ნანახი კედელი შვეულით სწორად იყო ამოყვანილი, მაგრამ ამოსის დღეებში მცხოვრები ისრაელი სწორად აღარ იქცეოდა. ისინი გადახრილ კედელს ჰგავდნენ, რომელიც მანამ უნდა დანგრეულიყო, სანამ თავისით წაიქცეოდა.

6. ა) რა მთავარი აზრია ხაზგასმული თორმეტ წინასწარმეტყველურ წიგნში? ბ) რის საფუძველზე შეგვიძლია ვთქვათ, რომ ღვთის ნორმების დაცვა შეუძლებელი არ არის?

⁶ თორმეტ წინასწარმეტყველურ წიგნში არაერთხელ მეორდება ის აზრი, რომ მნიშვნელოვანია ღვთის ნორმების დაცვა. თუმცა ამ წიგნებში მხოლოდ იმ ხალხის საყურადღებოდ წარმოთქმული განსასჯელი სიტყვები როდია ჩაწერილი, რომელიც არღვევდა ღვთის მაღალ ნორმებს. იეჰოვა ხედავდა, რომ ზოგჯერ მისი ხალხი იცავდა მის ნორმებს, რაც იმაზე მეტყველებს, რომ მისი ნორმების დაცვა ჩვენნაირი არასრულყოფილი ადამიანებისთვის შეუძლებელი არ არის. ვნახოთ ერთი მაგალითი.

7. როგორ დაგვანახვა ზაქარიამ, რომ არასრულყოფილ ადამიანებს შეუძლიათ იეჰოვას ნორმების დაცვა?

⁷ ტყვეობიდან დაბრუნებულმა იუდეველებმა ტაძრის საძირკვლის ჩაყრა დაიწყეს, მაგრამ აღდგენითი სამუშაოები მალევე შეჩერდა. ამიტომ ღმერთმა წინასწარმეტყველები ანგია და ზაქარია გაგზავნა ხალხის გასამხნევებლად, რომ მშენებლობა გაეგრძელებინათ. ერთ ხილვაში იეჰოვამ ზაქარიას იუდას გამგებელი ზერუბაბელი ახილვინა შვეულით ხელში. ის ქვას დებდა კუთხის თავში, რაც ტაძრის მშენებლობის დასრულებაზე მიუთითებდა. ტაძარი ღვთის ნორმების დაცვით აშენდა (ზაქარია 4:10). მაგრამ ახლა დავუკვირდეთ ტაძრის მშენებლობის დასრულებასთან დაკავშირებულ ერთ საინტერესო დეტალს: „ის შვიდი თვალი იეჰოვას თვალებია; ისინი აკვირდებიან მთელ დედამიწას“. ღმერთი უყურებდა, როგორ დადო ზერუბაბელმა ქვა კუთხის თავში. ის თავისი ყოვლისმხედველი თვალით აკვირდებოდა და დაინახა, რომ ტაძრის მშენებლობა მისი ნორმების დაცვით დასრულდა. აქედან ვსწავლობთ, რომ, მართალია, იეჰოვას ნორმები მაღალია, მაგრამ ადამიანებს მაინც შეუძლიათ მათი დაცვა. ანგიასა და ზაქარიას მიერ გამხნევებულმა ზერუბაბელმა და მისმა ხალხმა დაიცვეს ღვთის ნორმები. ზერუბაბელის მსგავსად თქვენც შეგიძლიათ გაამართლოთ ღვთის მოლოდინი. რა გამამხნევებელია!

რატომ უნდა დავიცვათ იეჰოვას ნორმები?

8, 9. ა) რატომ აქვს იეჰოვას სრული უფლება, ადამიანებს განსაზღვრული ნორმები დაუდგინოს? ბ) რის საფუძველზე მოითხოვდა იეჰოვა ისრაელისგან თავისი ნორმების დაცვას?

⁸ ღმერთი ჩვენი შემოქმედია და აქვს უფლება, დაგვიდგინოს განსაზღვრული ნორმები და მოგვთხოვოს მათი დაცვა (გამოცხადება 4:11). იეჰოვა ყველაფერს დაწვრილებით ვერ ჩამოგვიწერდა. მან მოგვცა სინდისი, რითაც უნდა ვიხელმძღვანელოთ (რომაელები 2:14, 15). მაგალითად, ღმერთმა ადამი და ევა გააფრთხილა, რომ არ ეჭამათ „სიკეთისა და ბოროტების შეცნობის ხიდან“, რაც იმის სიმბოლო იყო, რომ ღმერთს ჰქონდა უფლება, დაედგინა, რა იყო სიკეთე და რა ბოროტება. ჩვენ გვახსოვს, რაც მოხდა შემდეგ (დაბადება 2:17; 3:1—19). ოსიას ადამის არასწორი არჩევანი ჰქონდა მხედველობაში, როდესაც წერდა: „ისინი [ისრაელები] კი ადამიანის მსგავსად არღვევენ შეთანხმებას“ (ოსია 6:7). ამ სიტყვებით ოსიამ ხაზი გაუსვა იმას, რომ ისრაელი ერი განზრახ სცოდავდა.

⁹ რა ცოდვას სჩადიოდა ისრაელი? მათ შეთანხმება დაარღვიეს. როდესაც იეჰოვამ თავისი ხალხი ეგვიპტიდან გამოიყვანა, ისრაელი მისი საკუთრება გახდა, რაც იმას ნიშნავდა, რომ ღმერთს სრული უფლება ჰქონდა, მათთვის განსაზღვრული ნორმები დაედგინა. ისრაელს უარი არ უთქვამს შეთანხმების დაცვაზე. ეს იმის მაჩვენებელი იყო, რომ ისინი თანახმანი იყვნენ, ღვთის ნორმების შესაბამისად ეცხოვრათ (გამოსვლა 24:3; ესაია 54:5). მიუხედავად ამისა, ბევრმა ვერ დაიცვა კანონი, რადგან სისხლისღვრაში, მკვლელობასა და გარყვნილებაში დაედოთ ბრალი (ოსია 6:8—10).

10. რას აკეთებდა ღმერთი მათ დასახმარებლად, ვინც არ იცავდა მის ნორმებს?

¹⁰ იეჰოვა თავის მიძღვნილ ხალხს დასახმარებლად წინასწარმეტყველებს უგზავნიდა. ერთ-ერთი მათგანი იყო ოსია. თავისი წინასწარმეტყველური წიგნის დასასრულს ოსიამ განაცხადა: „ვინაა ბრძენი, რომ გაიგოს ეს? ვინ არის გონიერი, რომ იცოდეს ეს? სწორია იეჰოვას გზა და მართლები ივლიან მასზე, შემცოდველები კი წაიბორძიკებენ მასზე“ (ოსია 14:9). ოსია მეთოთხმეტე თავის დასაწყისში იეჰოვასთან დაბრუნების აუცილებლობაზე საუბრობდა. ბრძენი ადამიანი უნდა მიმხვდარიყო, რომ იეჰოვას თავისი ხალხისთვის სწორი გზა ჰქონდა დადგენილი. როგორც ღვთის მიძღვნილ მსახურებს, თქვენც გულწრფელად გენდომებათ, სწორად მოიქცეთ და იეჰოვას გზით იაროთ.

11. რატომ უნდა დავიცვათ ღვთის მცნებები?

¹¹ ოსიას 14:9 იმაზეც ამახვილებს ყურადღებას, რა დადებითი შედეგები მოჰყვება სწორად მოქმედებას. ღვთის მოთხოვნების შესრულებას კურთხევები მოაქვს. ღმერთმა, როგორც შემოქმედმა, იცის, როგორა ვართ შექმნილი, ამიტომ ყველაფერი, რასაც მოითხოვს, ჩვენივე სასიკეთოდაა. ჩვენსა და ღმერთს შორის ურთიერთობა ნათლად რომ წარმოვიდგინოთ, ავტომობილისა და მისი მწარმოებლის მაგალითი მოვიყვანოთ. მწარმოებელმა კარგად იცის, როგორ არის მანქანა აწყობილი. იცის, რომ დროდადრო მანქანას ზეთის გამოცვლა სჭირდება. რა მოხდებოდა, თუ არად ჩააგდებდით ამ მოთხოვნას და იფიქრებდით, რომ მანქანა ისედაც კარგად მუშაობს? ძრავა დროზე ადრე გამოვიდოდა მწყობრიდან. იგივე შეიძლება ითქვას ადამიანებზეც. შემოქმედმა ჩვენ მცნებები დაგვიდო, რომელთა დაცვაც ჩვენ სასიკეთოდ მოქმედებს (ესაია 48:17, 18). ეს თუ გვესმის, უფრო მეტი გულმოდგინებით დავიცავთ ღვთის ნორმებსა და მცნებებს (ფსალმუნები 112:1).

12. როგორ გვაახლოებს ღმერთთან მისი სახელით სიარული?

¹² ყველაზე ძვირფასი ჯილდო, რასაც ღვთის მცნებების დაცვა მოგვიტანს, ღმერთთან დაახლოებაა. ღვთის სიყვარული უფრო გვიღრმავდება, როცა მისი ნორმებით ვცხოვრობთ და ვხედავთ, რომ მათი შესრულება შესაძლებელია და ამავე დროს სასიკეთოა. წინასწარმეტყველმა მიქამ კარგად აღწერა, რას ნიშნავს ღმერთთან ახლო ურთიერთობა: „ყველა ხალხი თავისი ღვთის სახელით ივლის, ჩვენ კი იეჰოვას, ჩვენი ღვთის სახელით ვივლით მარადიულად, სამარადისოდ“ (მიქა 4:5). მართლაც უდიდესი პატივია, იეჰოვას სახელით ვიაროთ, არ შევლახოთ მისი სახელი და ყოველთვის დავემორჩილოთ! ჩვენ გვინდა, რომ ისეთი თვისებები განვავითაროთ, როგორიც მას აქვს. ამიტომ თითოეული ჩვენგანი უნდა ეცადოს, რომ უფრო დაუახლოვდეს ღმერთს (ფსალმუნები 9:10).

13. რატომ არ არის ღვთის სახელისადმი შიში არც უარყოფითი და არც შემაწუხებელი გრძნობა?

¹³ ვინც ღვთის ნორმებს იცავს და მისი სახელით დადის, მას ღვთის სახელის შიში აქვს. ეს არ არის უარყოფითი, შემაწუხებელი გრძნობა. იეჰოვა ღვთისმოშიშ ხალხს არწმუნებს: „თქვენ კი, ჩემი სახელის მოშიშნო, ამოგიბრწყინდებათ სიმართლის მზე, რომლის ფრთებიდანაც იქნება განკურნება. თქვენც გამოხვალთ და ნასუქი ხბოებივით აკუნტრუშდებით“ (მალაქია 4:2). წინასწარმეტყველების მიხედვით „სიმართლის მზე“ იესო ქრისტეა (გამოცხადება 1:16). ის ბრწყინავს და ხალხს სულიერად კურნავს, საბოლოოდ კი ფიზიკურადაც განკურნავს კაცობრიობას. მალაქია განკურნებულთა სიხარულს მოკუნტრუშე, გაშვებული ნასუქი ხბოების სიხარულს ადარებს. ალბათ თქვენც ასეთივე თავისუფლებას გრძნობთ (იოანე 8:32).

14, 15. როგორ მოქმედებს იეჰოვას ნორმების დაცვა ჩვენ სასიკეთოდ?

¹⁴ ღვთის ნორმების დაცვა ადამიანებთანაც გვაახლოებს. აბაკუმმა ხუთჯერ უთხრა „ვაი“ გამომძალველ, უპატიოსნო მოგებას დახარბებულ, სისხლისმღვრელ, გარყვნილ და კერპთაყვანისმცემელ ხალხს (აბაკუმი 2:6—19). იეჰოვას გამოცხადებული სასჯელი, ხუთი „ვაი“, იმაზე მიუთითებს, რომ მას დადგენილი აქვს ნორმები, თუ როგორ უნდა ვიცხოვროთ. აქედან ოთხი „ვაი“ ადამიანების ურთიერთობას ეხება. თუ ღვთის თვალსაზრისს გავითვალისწინებთ, არაფერს დავუშავებთ მოყვასს და უმეტესობასთან კარგი დამოკიდებულება გვექნება.

¹⁵ ღვთის ნორმების დაცვა ოჯახურ ბედნიერებასაც უწყობს ხელს. ხშირად ოჯახური პრობლემების მოსაგვარებელ ერთადერთ საშუალებად გაყრა მიაჩნიათ. თუმცა წინასწარმეტყველ მალაქიას პირით იეჰოვა ამბობს: „მძულს გაყრა“ (მალაქია 2:16). მალაქიას 2:16-ს მოგვიანებით კიდევ დავუბრუნდებით, ახლა კი იმის თქმა შეგვიძლია, რომ ოჯახის ყველა წევრისთვის ღმერთს გონივრული ნორმები აქვს დადგენილი. რაც უფრო კარგად დაიცავენ დადგენილ ნორმებს, მით მეტი მშვიდობა ექნებათ ოჯახებს (ეფესოელები 5:28, 33; 6:1—4). ჩვენ არასრულყოფილები ვართ და პრობლემებს ვერსად გავექცევით. ამიტომ ის, „ვისაც ყოველი ოჯახი ზეცაში და დედამიწაზე უნდა უმადლოდეს თავისი სახელისთვის“, ოსიას წიგნიდან გვასწავლის, როგორ მოვაგვაროთ ოჯახში წამოჭრილი უკიდურესად რთული პრობლემებიც კი. ამ საკითხს ერთ-ერთ თავში ისევ დავუბრუნდებით (ეფესოელები 3:15). ახლა კი ვნახოთ, კიდევ რა შედის ღვთის ნორმების დაცვაში.

„შეიძულეთ ის, რაც ცუდია და შეიყვარეთ ის, რაც კარგია“

16. რა არის ნათქვამი ამოსის 5:15-ში ღვთის ნორმებზე?

¹⁶ პირველი ადამიანი უგუნურად მოიქცა. ის არ დაემორჩილა მას, ვინც საუკეთესოდ ადგენს, რა არის კარგი და რა — ცუდი. ჩვენ თუ მოვიქცევით გონივრულად? ამოსი მოგვიწოდებს, რომ ამ კითხვას სრული სერიოზულობით მოვეკიდოთ: „შეიძულეთ ის, რაც ცუდია და შეიყვარეთ ის, რაც კარგია“ (ამოსი 5:15). უილიამ რეინი ჰარპერმა, ჩიკაგოს უნივერსიტეტის პროფესორმა, სემიტური ენებისა და ლიტერატურის მცოდნემ, ამ მუხლზე ასეთი კომენტარი გააკეთა: „როდესაც კარგსა და ცუდს ახსენებს, ამოსს მხედველობაში აქვს იაჰვეს ნებისადმი მორჩილება“. სწორედ ეს არის ყველაზე მთავარი, რასაც თორმეტი წინასწარმეტყველისგან ვსწავლობთ. მზად ვართ, დავემორჩილოთ იეჰოვას ნორმებს, რომლებიც კარგსა და ცუდს განსაზღვრავს? ჩვენ ბიბლიიდან ვიგებთ ამ მაღალ ნორმებს, რომელთაც გვაცნობს მოწიფულ და გამოცდილ ქრისტიანთა ჯგუფი — „ერთგული და გონიერი მონა“ (მათე 24:45—47).

17, 18. ა) რატომ უნდა შევიძულოთ ის, რაც ცუდია? ბ) ახსენით, რა დაგვეხმარება ცუდის შეძულებაში?

¹⁷ თუკი შევიძულებთ იმას, რაც ცუდია, შედეგად ღვთისთვის საძულველს არაფერს გავაკეთებთ. მაგალითად, შეიძლება გესმით, რამდენად საშიშია ინტერნეტით პორნოგრაფიის ყურება და ცდილობთ კიდეც, რომ არ უყუროთ, მაგრამ „შინაგანი ადამიანი“ რას გკარნახობთ? (ეფესოელები 3:16) თუ ამოსის 5:15-ში ჩაწერილი მოწოდების თანახმად იქცევით, გაცილებით ადვილად შეიძულებთ იმას, რაც ცუდია, და სულიერ ბრძოლაშიც გაიმარჯვებთ.

¹⁸ წარმოიდგინეთ ასეთი სურათი: რა საზიზღრობა იქნებოდა ისეთი კერპების წინაშე გართხმულიყავით, რომელთა თაყვანისცემაც სქესობრივი აღვირახსნილობით გამოიხატება? ოსიას მსგავსი რამ ჰქონდა მხედველობაში, როცა ისრაელთა მამა-პაპის მიერ ფეორის ბაალის წინაშე ჩადენილ გარყვნილებას განსჯიდა (რიცხვები 25:1—3; ოსია 9:10). როგორც ჩანს, ოსიამ ეს შემთხვევა იმიტომ გაიხსენა, რომ ბაალის თაყვანისმცემლობას ისრაელის ათტომიან სამეფოში ღრმად ჰქონდა ფესვი გადგმული (2 მეფეები 17:16—18; ოსია 2:8, 13). ერთი წუთით წარმოიდგინეთ ეს ამაზრზენი სურათი: ისრაელები აღვირახსნილი ორგიების დროს კერპების წინაშე ემხობიან. ჩვენ ვიცით, როგორ განსჯიდა ამას ღმერთი და ეს გვეხმარება, არ გავებათ სატანის მახეში, რომელსაც ის ინტერნეტის მეშვეობით გვიგებს. ამასთანავე, დღეს ბევრი აკერპებს პოპულარულ, ლამაზ ქალებსა და ათლეტური აღნაგობის მამაკაცებს. რამდენად განსხვავებული აზროვნება უნდა გვქონდეს ჩვენ, რომლებმაც წინასწარმეტყველთაგან გაფრთხილება მივიღეთ, რომ შორს ვმდგარიყავით კერპთაყვანისმცემლობისგან!

გახსოვდეთ ღვთის სიტყვა

19. როგორ მოიქცა იონა დიდი თევზის მუცელში და ჩვენ რას ვსწავლობთ აქედან?

¹⁹ როდესაც ცდილობთ ღვთის მაღალი ნორმების დაცვას, მაგრამ გზადაგზა სირთულეებს ხვდებით, შეიძლება ისეთი გრძნობა დაგეუფლოთ, თითქოს გიჭირთ მიჰყვეთ ღვთის ნორმებს ან არ იცით, როგორ მოიქცეთ. თუ გონებრივად გადაიღლებით ან ემოციურად გამოიფიტებით, როგორღა გაართმევთ თავს კრიტიკულ სიტუაციას? (იგავები 24:10) მოდი დავფიქრდეთ იონას მაგალითზე, რომელიც არასრულყოფილი კაცი იყო და შეცდომებს უშვებდა. მან დიდი თევზის მუცლიდან ლოცვით მიმართა იეჰოვას. როგორ ილოცა მან?

20. რა დაგვეხმარება, რომ იონას მსგავსად მოვიქცეთ?

²⁰ იონა ღმერთს „სამარის მუცლიდან“ ფსალმუნებიდან აღებული სიტყვებით მიმართავდა (იონა 2:2). ის უკიდურესად დამწუხრებული იყო და წყალობას სთხოვდა იეჰოვას. ამ დროს გაახსენდა მას დავითის სიტყვები. შევადაროთ იონას 2:3, 5 ფსალმუნების 69:1, 2-სa. ცხადია, რომ წინასწარმეტყველმა იონამ იცოდა დავითის ფსალმუნები და ამიტომაც მოაგონდა ღვთისგან შთაგონებული სიტყვები. იონას შეეძლო ეთქვა, ღვთის შთაგონებული სიტყვა ჩემშიაო (ფსალმუნები 40:8). თუ თქვენც დაითრგუნებით, შეძლებთ გაიხსენოთ შესაფერისი სიტყვები ღვთის სიტყვიდან? თუ ახლავე საფუძვლიანად შეისწავლით ღვთის სიტყვას, მომავალში უფრო იოლად მიიღებთ გადაწყვეტილებებს და შედარებით ადვილად გაუმკლავდებით პრობლემებს ღვთის ნორმების დაცვით.

გქონდეთ ღვთისადმი ჯანსაღი შიში

21. რა უნდა განივითაროთ, ღვთის ნორმებს რომ შეესაბამებოდეთ?

²¹ მხოლოდ ღვთის სიტყვის ცოდნა არ არის საკმარისი, იეჰოვას ნორმებს რომ შევესაბამებოდეთ. წინასწარმეტყველი მიქა ხაზს უსვამს იმას, თუ კიდევ რა მოითხოვება ღვთის სიტყვის თანახმად მოქმედებისთვის: „ბრძენს შეეშინდება შენი სახელის“ (მიქა 6:9). ბრძენი რომ იყო, ანუ ცხოვრებაში იყენებდე ნასწავლს, ღვთის შიში უნდა განივითარო.

22, 23. ა) რატომ გაუგზავნა იეჰოვამ ანგია გადასახლებიდან დაბრუნებულ იუდეველებს? ბ) რატომ უნდა იყოთ დარწმუნებული, რომ შეძლებთ ღვთის ნორმების შესაბამისად ცხოვრებას?

²² როგორ უნდა განვივითაროთ ღვთის სახელის შიში? მოდი, რჩევისთვის მივმართოთ გადასახლებიდან დაბრუნებულ წინასწარმეტყველ ანგიას. თავის პატარა წიგნში, რომელიც მხოლოდ ოცდათვრამეტი მუხლისგან შედგება, ის ოცდათხუთმეტჯერ იხსენიებს იეჰოვას სახელს. ძვ. წ. 520 წლისთვის, როდესაც იეჰოვამ ანგიას წინასწარმეტყველება დაავალა, იერუსალიმის ტაძრის აღდგენითი სამუშაოების დაწყებიდან თექვსმეტი წელი იყო გასული, მაგრამ საქმე წინ ნელა მიიწევდა, რადგან მტრის შიშით ღვთის ხალხს მხნეობა ჰქონდა დაკარგული (ეზრა 4:4, 5). ხალხი ფიქრობდა, რომ ტაძრის აღდგენის დრო ჯერ არ იყო დამდგარი. სწორედ მაშინ მოუწოდა მათ იეჰოვამ: „გულით დაუკვირდით თქვენს გზებს. . . ააშენეთ ჩემი მოსაწონი სახლი ჩემ განსადიდებლად“ (ანგია 1:2—8).

²³ გამგებელმა ზერუბაბელმა, მღვდელმთავარმა იეჰოშუამ და „მთელმა დარჩენილმა ხალხმა მოუსმინეს თავიანთი ღვთის, იეჰოვას ხმას. . . და შეეშინდა ხალხს იეჰოვასი“. ღმერთმა მოიწონა ეს და უთხრა მათ: „თქვენთანა ვარ!“ რა გამამხნევებელია! ღვთის სულის დახმარებით ხალხი „შევიდა და იეჰოვას სახლში დაიწყო მუშაობა“ (ანგია 1:12—14). მათ ჯანსაღი შიში ჰქონდათ, რომ არ გაენაწყენებინათ ღმერთი, რამაც მტრის წინააღმდეგობის მიუხედავად მოქმედებისკენ აღძრა გულგატეხილი ხალხი.

24, 25. მოიყვანეთ მაგალითები და ახსენით, როგორ შეიძლება ამ თავში განხილული პრინციპების გამოყენება.

²⁴ თქვენ როგორ მოიქცევით? თუ გესმით, როგორ მოიქცეთ ამა თუ იმ ვითარებაში ღვთის ნორმების შესაბამისად, მოიკრებთ მხნეობას, რომ იეჰოვასი გეშინოდეთ და არა ადამიანისა? დავუშვათ, ახალგაზრდა ქალი ხართ და მუშაობთ მამაკაცთან ერთად, რომელიც არ იზიარებს ღვთის ნორმებს, მაგრამ თავაზიანად გექცევათ და ყურადღებას იჩენს თქვენ მიმართ. რომელი ბიბლიური მუხლი გაგახსენებთ იეჰოვას ნორმებს და იმ საშიშროებას, რომელიც მათ უგულებელყოფას მოჰყვება? ოსიას 4:11 ხომ არა? „გარყვნილება, ღვინო და მაჭარი კაცში კეთილ ზრახვებს ახშობს“ (ოსია 4:11). აღგძრავთ ღვთის შიში, დაიცვათ მისი ნორმები და იმ მამაკაცს, რომელიც წვეულებაზე გეპატიჟებათ, უარი უთხრათ? თუ გეარშიყებათ, ღვთის შიში დაგეხმარებათ, რომ არ გაანაწყენოთ თქვენი მოსიყვარულე ღმერთი, და, ასე ვთქვათ, „გარეთ გავარდეთ“ (დაბადება 39:12; იერემია 17:9).

²⁵ ახლა დავუბრუნდეთ იმ შემთხვევას, როცა ებრძვით ინტერნეტში პორნოგრაფიის ყურების ცდუნებას. გაგახსენდებათ ფსალმუნების 119:37-ში ჩაწერილი ლოცვის სიტყვები? „თვალი ამარიდებინე არარაობას“. გაიხსენებთ იესოს სიტყვებს, რომლებიც მან მთაზე ქადაგებისას წარმოთქვა? „ვინც ქალს უყურებს და ვნება აღეძვრება, უკვე იმრუშა მასთან თავის გულში“ (მათე 5:28). იეჰოვას შიშმა და მისი ნორმების დაცვის სურვილმა უნდა აღძრას ქრისტიანი, რომ მოერიდოს ყველაფერს, რაც გამხრწნელ ზემოქმედებას ახდენს. თუ ატყობთ, რომ ფიქრით ან საქმით შეიძლება ღვთის ნორმები დაარღვიოთ, ღვთის მიმართ უფრო მეტი შიში უნდა განივითაროთ. ნუ დაგავიწყდებათ, რას გეუბნებათ იეჰოვა ანგიას პირით: „თქვენთანა ვარ“.

26. კიდევ რას განვიხილავთ?

²⁶ არაფერია შეუძლებელი იმაში, რომ დავიცვათ იეჰოვას მაღალი ნორმები და ვემსახუროთ მას. თუ ასე მოვიქცევით, კურთხევებიც არ დააყოვნებს. თორმეტი წინასწარმეტყველური წიგნის შემდგომი განხილვა უკეთესად გაგვაცნობს ღვთის ნორმებსა და მოთხოვნებს. წიგნის მომდევნო ნაწილში განხილული იქნება სამი მნიშვნელოვანი მხარე, რაც დაგვანახვებს, თუ რა შესანიშნავ ნორმებს გვიდგენს იეჰოვა. ეს მხარეებია: ჩვენი საქციელი, სხვებთან ურთიერთობა და ოჯახური ცხოვრება.