თავი 20

როგორ მოვიქცე, თუ ჩემს ოჯახს მატერიალურად უჭირს?

გრეგორი აღმოსავლეთ ევროპაში ცხოვრობს და იმდენი ფული არა აქვს, რომ ძვირად ღირებული ტანსაცმელი და ტექნიკა იყიდოს. ის იმდენად უკმაყოფილოა თავისი პირობებით, რომ ავსტრიაში აპირებს წასვლას. შენი აზრით, უჭირს გრეგორის მატერიალურად?

□ დიახ □ არა

გრეგორისგან ათასობით კილომეტრის მოშორებით აფრიკის სამხრეთ ნაწილში, ერთ სოფელში ცხოვრობს ლოისო. მის ოჯახს ერთი პატარა ქოხი აქვს. ის შენატრის ქალაქელ ახალგაზრდებს, რომლებიც „ფუფუნებაში“ ცხოვრობენ — მათ სახლში წყალიც აქვთ და ელექტროენერგიაც. როგორ ფიქრობ, უჭირს ლოისოს მატერიალურად?

□ დიახ □ არა

„მატერიალურ გაჭირვებას“ სხვადასხვა ქვეყანაში სხვადასხვა რამეს არქმევენ. მაგალითად, ლოისოსთან შედარებით გრეგორი მეფესავით ცხოვრობს, მაგრამ ის შეიძლება მაინც გაჭირვებულად თვლიდეს თავს. უნდა გახსოვდეს, რომ რაც არ უნდა გიჭირდეთ ოჯახში ეკონომიკურად, ბევრი თქვენზე უარეს მდგომარეობაშია. თუმცა ამან შეიძლება დიდად ვერ განუგეშოს, როცა სკოლაში წასასვლელად წესიერი ტანსაცმელი არა გაქვს ან ისიც კი სანატრელად გექცა, რომ სახლში წყალი მოდიოდეს.

ბევრ ახალგაზრდას გაჭირვების გამო არასრულფასოვნების გრძნობა აქვს. ზოგი მათგანი პრობლემის დასავიწყებლად სმას იწყებს ან ნარკოტიკებს იყენებს. მაგრამ ამით რეალობას ისინი მაინც ვერსად გაურბიან და კიდევ უფრო იუარესებენ მდგომარეობას. ვინც სმას იწყებს, მალე ხვდება, რომ სასმელი „ბოლოს გველივით კბენს და გველგესლასავით გესლავს“ (იგავები 23:32). მარია სამხრეთ აფრიკაში ცხოვრობს. მიუხედავად იმისა, რომ მის ოჯახს უჭირს, ის ამბობს: „თუ რეალობისგან გაქცევას შეეცდები, უფრო მეტ პრობლემას შეიქმნი“.

შეიძლება სმისგან და ნარკოტიკებისგან შორს იყო, მაგრამ უიმედობის გრძნობას ვერ გაექცე. რა უნდა იღონო? ბიბლიის რჩევები დაგეხმარება გულგატეხილობის დაძლევაში და ჯანსაღი დამოკიდებულების განვითარებაში. მოდი, ვიმსჯელოთ ამ საკითხზე.

დააფასე ის, რაც გაქვს

პირველ რიგში შეეცადე, ნაკლებად იფიქრო იმაზე, რაც არა გაქვს. ყურადღება იმაზე გადაიტანე, რაც გაქვს. თავშესაფარი და თბილი ოჯახი უკვე ბევრს ნიშნავს. ბიბლიაში ნათქვამია: „ბოსტნეულის კერძი და სიყვარული სჯობია ნასუქ ხარსა და სიძულვილს“ (იგავები 15:17). გარდა ამისა, სხვებისგან განსხვავებით ქრისტიანი ახალგაზრდების გვერდით „მთელი საძმოა“ (1 პეტრე 2:17).

ეცადე, სხვა თვალით შეხედო შენს მატერიალურ მდგომარეობასაც. შეიძლება ძალიან უბრალო სახლი და არასახარბიელო პირობები გქონდეს, ძველი ან დაკერებული ტანსაცმლით გიწევდეს სიარული და ნაირ-ნაირი საჭმელებით არ იყო განებივრებული. მაგრამ განა ვერ ასიამოვნებ ღმერთს მოდური ტანსაცმლისა და მდიდრული სახლის გარეშე? განა ვერ იცოცხლებ და ჯანმრთელობას ვერ შეინარჩუნებ, თუ მაინცდამაინც დელიკატესები არ ჭამე? მოციქულ პავლეს გამოცდილებამ ამ მხრივ ბევრი რამ ასწავლა. მან სიმდიდრეც ნახა და სიღარიბეც (ფილიპელები 4:12). ბოლოს კი ასეთ დასკვნამდე მივიდა: „თუ გვაქვს საჭმელი, ტანსაცმელი და თავშესაფარი, ამით დავკმაყოფილდეთ“ (1 ტიმოთე 6:8).

სამხრეთ აფრიკელი ელდრედი ღარიბ ოჯახში გაიზარდა. ის ამბობს: „ჩვენ შეგუებული ვიყავით იმ აზრს, რომ ოჯახს მეტი საშუალება არ ჰქონდა და ზოგ რამეზე უარი უნდა გვეთქვა“. ელდრედს ახსოვს, რომ დედამ მის გაცვეთილ სკოლის შარვალს არაერთხელ დაადო საკერებელი. „ცოტას კი დამცინოდნენ, მაგრამ მთავარი ის იყო, რომ შიშველი არ დავდიოდი და სუფთად მეცვა“, — ამბობს ელდრედი.

იცოდე საკუთარი თავის ფასი

უსახლკარობის გამო 11 წლის ჯეიმზი დასთან და დედასთან ერთად იოჰანესბურგის (სამხრეთ აფრიკის რესპუბლიკა) მახლობლად ერთ ადგილს აფარებდა თავს. მათ თითქმის არაფერი გააჩნდათ. ასეთი მდგომარეობის მიუხედავად, ჯეიმზი სიამოვნებით იყენებდა საკუთარ დროსა და ენერგიას სხვების დასახმარებლად. ყოველ შაბათ-კვირას ის თავისი სურვილით იეჰოვას მოწმეების ადგილობრივი სამეფო დარბაზის მშენებლობაში იღებდა მონაწილეობას. გარდა იმისა, რომ დროს ტყუილად არ კარგავდა, ეს ჯეიმზს საკუთარ შესაძლებლობებში არწმუნებდა და ღირსების გრძნობას მატებდა. ყოველი დღის ბოლოს ის ძალიან გახარებული და ბედნიერი იყო.

კიდევ ერთი ღირებული საქმე კარდაკარ მსახურებაა იმ მიზნით, რომ სხვებს ბიბლიური განათლების მიღებაში დაეხმარო (მათე 24:14). ახალგაზრდები, რომლებიც იეჰოვას მოწმეები არიან, რეგულარულად აკეთებენ ამას და მომავლის იმედს აძლევენ ხალხს. ეს საქმე მათ თვითრწმენასა და ღირსების გრძნობას უნერგავს. მართალია, მათ ამაში ფულს არავინ უხდის, მაგრამ არ უნდა დაგვავიწყდეს, რა უთხრა იესომ ძველ ქალაქ სმირნაში მცხოვრებ ქრისტიანებს. მიუხედავად იმისა, რომ საკმაოდ უჭირდათ მატერიალურად, ისინი ღვთის ერთგულები იყვნენ. მათ კრებას იესომ ასეთი სიტყვებით მიმართა: „ვიცი შენი გასაჭირი და სიღარიბე, თუმცა მდიდარი ხარ“. იესოსადმი რწმენის გამო ისინი უდიდეს სიმდიდრეს — უკვდავებას — მიიღებდნენ (გამოცხადება 2:9, 10).

მომავლის იმედით

შენ შეგიძლია იეჰოვასთან დაახლოება იმისდა მიუხედავად, ცოტა გაქვს თუ ბევრი. ბიბლიაში ნათქვამია: „მდიდარი და ღარიბი ერთმანეთს შეხვდნენ; ორივეს შემოქმედი იეჰოვაა“ (იგავები 22:2). ათასობით ახალგაზრდას სიხარულს ვერ ართმევს ეკონომიკური გაჭირვება. მათ ესმით, რომ ბედნიერება ქონებაზე არ არის დამოკიდებული და მთავარი იეჰოვა ღმერთთან სიახლოვეა. ის უახლოვდება ყველას, ვისაც სურს მისი მსახურება. ღმერთი გვპირდება, რომ მომავალ ახალ ქვეყნიერებაში აღარ იარსებებს სიღარიბე (2 პეტრე 3:13; გამოცხადება 21:3, 4).

ვიდრე ეს დრო დადგება, გონივრულად გამოიყენე ის, რაც გაქვს. იფიქრე მომავალზე. მოაგროვე სულიერი განძი (მათე 6:19—21). მატერიალური გაჭირვება ადვილი ასატანი არ არის, მაგრამ შენ არ ხარ გამოუვალ მდგომარეობაში!

საკვანძო ბიბლიური მუხლი

„ადამიანს უხვადაც რომ ჰქონდეს ყველაფერი, მისი სიცოცხლე მის ქონებაზე არ არის დამოკიდებული“ (ლუკა 12:15).

რჩევა

მოერიდე აზარტულ თამაშებს, სიგარეტის მოწევას და სმას. თუ ოჯახში ვინმეს აქვს ასეთი ჩვევა, შენ მიეცი მას კარგი მაგალითი.

იცოდი, რომ . . . ?

თუ ბიბლიური პრინციპებით იცხოვრებ, კმაყოფილი იქნები იმისდა მიუხედავად, ბევრი გექნება თუ ცოტა (ფილიპელები 4:12, 13; 1 ტიმოთე 6:8; ებრაელები 13:5).

რა უნდა გავაკეთო

ჩემი „სიმდიდრეა“ ․․․․․

ეს სხვების დასახმარებლად რომ გამოვიყენო ․․․․․

რა ვკითხო მშობლებს ამ საკითხზე? ․․․․․

როგორ ფიქრობ?

● რატომ ესმით „მატერიალური გაჭირვება“ სხვადასხვა ქვეყანაში სხვადასხვანაირად?

● რატომ ვერ გაექცევი რეალობას ნარკოტიკების მიღებითა და სმით?

● რა პრაქტიკული ნაბიჯების გადადგმა შეიძლება შენს შემთხვევაში?

[ჩანართი 168 გვერდზე]

„სიღარიბიდან თავის დაღწევის გზას ვერ ვხედავდი, თუმცა ისიც მესმოდა, რომ ხულიგნობა და ქურდობა უარეს დღეში ჩამაგდებდა. ჩემი ტოლებიდან ბევრი აკეთებდა ამას, მაგრამ დღეს ყველაფერზე ხელი აქვთ ჩაქნეული — ზოგი ლოთობს ან ნარკოტიკებს იყენებს, ზოგი კი ციხეშია“ (ჯორჯი).

[ჩარჩო⁄სურათები 164 გვერდზე]

სამუშაო გვერდი

წავიდე საზღვარგარეთ?

ზოგი ახალგაზრდა საზღვარგარეთ წასვლაზე ფიქრობს ოჯახის დასახმარებლად ან საკუთარი მატერიალური მდგომარეობის გასაუმჯობესებლად. ზოგი იმ მიზნით მიდის საზღვარგარეთ, რომ უცხო ენა ისწავლოს, სწავლა გააგრძელოს ან ოჯახურ პრობლემებს გაექცეს. ბევრი ახალგაზრდა ქრისტიანი სხვა ქვეყანაში იმიტომ გადადის, რომ იქაურ მქადაგებლებს ქადაგებაში დაეხმაროს. უცხო ქვეყანაში წასვლა სერიოზული საკითხია და ნაჩქარევად არ ღირს გადაწყვეტილების მიღება. თუ შენც გაქვს საზღვარგარეთ წასვლის სურვილი, წაიკითხე ქვემოთ მოცემული მუხლები და იფიქრე მათზე. დაფიქრდი კითხვებზეც და პასუხები ფურცელზე ჩამოწერე. გადაწყვეტილების მიღებამდე ილოცე.

◻ რა არის საჭირო იმისათვის, რომ კანონი არ დავარღვიო? (რომაელები 13:1).

◻ რა დამიჯდება საზღვარგარეთ წასვლა? (ლუკა 14:28).

◻ დღეს რით ვაჩვენებ, რომ საზღვარგარეთ ნამდვილად შევძლებ საკუთარ თავზე ზრუნვას? (იგავები 13:4).

◻ რას მირჩევენ მოწიფული ადამიანები, რომლებსაც აქვთ საზღვარგარეთ ცხოვრების გამოცდილება? (იგავები 1:5).

◻ რას მეუბნებიან მშობლები? (იგავები 23:22).

◻ რატომ მინდა წასვლა? (გალატელები 6:7, 8).

◻ თუ სხვებთან ერთად ვიცხოვრებ, შემიწყობენ ისინი ხელს ღვთის თაყვანისცემაში? (იგავები 13:20).

◻ რა საფრთხეში შეიძლება ჩავიგდო თავი ფიზიკურად, ზნეობრივად ან სულიერად? (იგავები 5:3, 4; 27:12; 1 ტიმოთე 6:9, 10).

◻ რეალურად რას მომიტანს საზღვარგარეთ ცხოვრება? (იგავები 14:15).

[სურათი 167 გვერდზე]

ბიბლიის რჩევები დაგიხსნის გულგატეხილობის ბორკილებისგან.