თავი 17

რატომ მაშინებს ჩემს რწმენაზე საუბარი?

„სკოლაში რამდენჯერმე მომეცა ჩემს რწმენაზე საუბრის შანსი, მაგრამ ხელიდან გავუშვი“ (პიტერი).

„მასწავლებელმა კლასს გვკითხა, რას ვფიქრობდით ევოლუციაზე. ქადაგების შესანიშნავი შესაძლებლობა მომეცა, მაგრამ ენა ჩამივარდა და ამის გამო ძალიან ცუდ გუნებაზე დავდექი“ (ლიზი).

თუ ქრისტიანი ხარ, შესაძლოა შენც შეგმთხვევია ის, რაც პიტერსა და ლიზის შეემთხვათ. ალბათ, შენც გიყვარს ბიბლიური ჭეშმარიტება და სხვებისთვის მისი გაზიარების სურვილიც გაქვს. თუმცა შეიძლება იმის გაფიქრებაც კი გაშინებს, რომ უნდა იქადაგო. მაგრამ თუ ქვემოთ მოცემულ პუნქტებს გაითვალისწინებ, ეს გამბედაობას შეგმატებს.

1. გაარკვიე, კონკრეტულად რისი გეშინია. როდესაც ფიქრობ, ვინმეს შენი მრწამსის შესახებ დაელაპარაკო, ამ დროს შეიძლება წარმოიდგინო ყველაზე უარესი, რაც შეიძლება მოხდეს. შიშმა მეტისმეტად რომ არ შეგიპყროს, ამაში შეიძლება დაგეხმაროს შენი განცდების ფურცელზე გადატანა.

დაწერე, რისიც გეშინია:

● რა შეიძლება მოხდეს, თუ სკოლაში ჩემი მრწამსის შესახებ საუბარს წამოვიწყებ? ․․․․․

შეიძლება დაგამშვიდოს იმის გაგებამ, რომ სხვა ქრისტიან ახალგაზრდებსაც შენნაირი განცდები აქვთ. მაგალითად, 14 წლის კრისტოფერი ამბობს: „მეშინია, ბავშვებმა არ დამცინონ და ყველას არ უთხრან, ძაან უცნაური ვინმეაო“. ზემოთ მოხსენიებული პიტერი გვიზიარებს: „ვნერვიულობდი, ვინმეს ჩემთვის ისეთი კითხვა არ დაესვა, რაზეც პასუხი არ მეცოდინებოდა“.

2. ნუ შეგაშინებს წინააღმდეგობა. ალბათ შენი შიში ყოველთვის უსაფუძვლო არ არის. 20 წლის ეშლი იხსენებს: „ზოგმა კლასელმა თავი მომაჩვენა, თითქოს აინტერესებდათ ჩემი მრწამსი, მაგრამ მერე ჩემს ნათქვამს კუდი გამოაბეს და დაცინვა დამიწყეს“. 17 წლის ნიკოლს ასეთი რამ შეემთხვა: „ერთმა ბიჭმა ერთი ბიბლიური მუხლი ჯერ თავის ბიბლიაში ნახა და მერე ჩემს ბიბლიაში. აღმოჩნდა, რომ ჩემს ბიბლიაში აზრი სხვა სიტყვებით ეწერა. მერე მითხრა, რომ შენ ბიბლიაში ეს აზრი შეცვლილიაო. დავიბენი, არ ვიცოდი, რა მეპასუხა“a.

ასეთ სიტუაციებში შეიძლება დაიბნე და შეგეშინდეს. მაგრამ ნაცვლად იმისა, რომ გაექცე მსგავს სიტუაციებს, შეეგუე იმას, რომ წინააღმდეგობა ქრისტიანის ცხოვრების განუყოფელი ნაწილია (2 ტიმოთე 3:12). აი, რას ამბობს 13 წლის მეთიუ: „იესომ თავის მიმდევრებს უთხრა, რომ დევნილნი იქნებოდნენ, ამიტომ არ უნდა მოველოდეთ, რომ ყველას მოვეწონებით ჩვენი მრწამსის გამო“ (იოანე 15:20).

3. კარგზე იფიქრე. შესაძლებელია, ერთი შეხედვით, ცუდ სიტუაციაში კარგის დანახვა? 21 წლის ამბერი ფიქრობს, რომ შესაძლებელია: „ადვილი არ არის შენს მრწამსზე საუბარი მათთან, ვინც ბიბლიას არ აფასებს, სამაგიეროდ, ეს თავადვე გეხმარება, უკეთესად ჩასწვდე შენს მრწამსს“ (რომაელები 12:2).

დავუბრუნდეთ იმ სიტუაციას, რომელიც პირველ პუნქტში აღწერე. დაფიქრდი, სულ მცირე, რა ორი დადებითი მხარე შეგიძლია დაინახო ამ სიტუაციაში და დაწერე.

1 ․․․․․

2 ․․․․․

მინიშნება: თუ შენს თანატოლებს შენი მრწამსის შესახებ ეცოდინებათ, შეამცირებს თუ არა ეს შენზე მათ გავლენას? შეგმატებს თუ არა შენს მრწამსზე საუბარი საკუთარი თავისადმი რწმენას? რას იგრძნობ ამ დროს იეჰოვას მიმართ და იეჰოვა რას იგრძნობს შენ მიმართ? (იგავები 23:15)

4. მზად იყავი. „მართლის გული პასუხის გაცემამდე ფიქრობს“, — ნათქვამია იგავების 15:28-ში. მხოლოდ იმაზე ნუ იფიქრებ, შენ რას ეტყვი მოსაუბრეს, იმაზეც იფიქრე, რა კითხვები შეიძლება დაგისვან. მოიძიე ამ კითხვებზე პასუხები და წინასწარ მოიფიქრე, რა პასუხს გასცემ (იხილე ცხრილი „წინასწარ იფიქრე, როგორ უპასუხებ“, გვერდი 127).

5. მოიფიქრე, რით დაიწყებ. თუ მზად ხარ სასაუბროდ, რით უნდა დაიწყო? ორი არჩევანი გაქვს. ქადაგება შეგვიძლია შევადაროთ ცურვას. ზოგი ნელ-ნელა შედის წყალში, ზოგი კი პირდაპირ ხტება. მსგავსად ამისა, შეგიძლია არარელიგიური თემით დაიწყო საუბარი, ანუ ნელ-ნელა შეხვიდე წყალში, ან თუ ძალიან ნერვიულობ და სულ იმაზე ფიქრობ, გამოგივა თუ არა საუბარი, ჯობია, პირდაპირ დაიწყო ლაპარაკი შენს მრწამსზე, ანუ პირდაპირ ჩახტე წყალში (ლუკა 12:11, 12). 17 წლის ენდრიუ ამბობს: „ჩემთვის გაცილებით რთული იყო იმაზე ფიქრი, რომ ჩემს რწმენაზე უნდა მესაუბრა, ვიდრე თვითონ საუბარი. ერთხელაც გავბედე და ამოვიღე ხმა. ვერც კი წარმოვიდგენდი, რომ საუბარს ასე ადვილად გავაგრძლებდი“b.

6. იყავი გონიერი. „გონიერი ადამიანი ჯერ ფიქრობს და შემდეგ მოქმედებს“, — დაწერა სოლომონმა (იგავები 13:16, „დღევანდელი ინგლისური თარგმანი“). ნუ ჩაებმები კამათში, რაც იმის მსგავსი იქნებოდა, რომ წყალმარჩხ ადგილას ჩაგეყვინთა. გახსოვდეს, რომ არის ლაპარაკის დრო და არის დუმილის დრო (ეკლესიასტე 3:1, 7). ზოგჯერ იესოც არ პასუხობდა დასმულ შეკითხვებს (მათე 26:62, 63).

თუ პასუხის გაცემას არჩევ, აჯობებს მოკლე და თავაზიანი პასუხი გასცე. მაგალითად, თუ კლასელი დაცინვით გკითხავს: „რატომ არ ეწევი სიგარეტს?“, შეგიძლია მარტივად უპასუხო: „არ მინდა ორგანიზმი მოვიწამლო“. მისი რეაქციით მიხვდები, გააგრძელო თუ არა შენი მრწამსის შესახებ საუბარი.

ამ თავში განხილული ექვსი პუნქტი დაგეხმარება, ‘ყოველთვის მზად იყო შენი რწმენის დასაცავად’ (1 პეტრე 3:15). რასაკვირველია, მზადყოფნა არ ნიშნავს იმას, რომ არასდროს ინერვიულებ. 18 წლის ალანა ამბობს: „თუ შიშის მიუხედავად საუბარს დაიწყებ, ისეთი განცდა დაგეუფლება, თითქოს სასწაული მოახდინე — მოერიე შიშს და გარისკე საუბრის დაწყება, რომელიც შეიძლება კარგად არ წარმართულიყო. თუ კარგად წარიმართა, ხომ მთლად უკეთესი! თუ გამბედაობას მოიკრებ და დაიწყებ საუბარს, ნახავ, რამხელა სიხარულს იგრძნობ“.

[სქოლიოები]

საკვანძო ბიბლიური მუხლი

„ყოველთვის მზად იყავით, დამცველებად გამოხვიდეთ ყველას წინაშე, ვინც თქვენი იმედის გამო ახსნა-განმარტებას გთხოვთ, ოღონდ ეს რბილად და ღრმა პატივისცემით აკეთეთ“ (1 პეტრე 3:15).

რჩევა

იმას კი ნუ ეტყვი შენს კლასელებს, რა უნდა სწამდეთ და რა — არა, დამაჯერებლად აუხსენი, შენ რა გწამს, და რატომ ფიქრობ, რომ, რაც გწამს, ლოგიკურია.

იცოდი, რომ . . . ?

ზოგიერთ შენს კლასელს შეიძლება მოსწონდეს, რომ ბიბლიური ნორმებით ცხოვრობ, მაგრამ მოერიდოს და ვერ გკითხოს შენი მრწამსის შესახებ.

რა უნდა გავაკეთო

კლასელი, რომელსაც ჩემს მრწამსზე დაველაპარაკებოდი, არის (დაწერე, სულ მცირე, ერთი კლასელის სახელი) ․․․․․

ჩემი აზრით, მას ყველაზე მეტად დააინტერესებს ․․․․․

რა ვკითხო მშობლებს ამ საკითხზე? ․․․․․

როგორ ფიქრობ?

● რა შეიძლება იყოს იმის მიზეზი, რომ კლასელები დაგცინიან შენი რელიგიური შეხედულებების გამო?

● თუ გადაწყვეტ კლასელებთან შენი მრწამსის შესახებ საუბარს, რატომ არის მნიშვნელოვანი, რომ დამაჯერებლად ელაპარაკო?

[ჩანართი 126 გვერდზე]

„ბავშვობაში არ მინდოდა, თანატოლებისგან განსხვავებული ვყოფილიყავი. მაგრამ დროთა განმავლობაში დავინახე, რომ ჩემი რწმენის წყალობით უფრო აზრიანად ვცხოვრობდი. ამის გაანალიზებამ საკუთარი თავისადმი რწმენა შემმატა — მეამაყებოდა ის, რაც მწამდა“ (ჯეისონი).

[ჩარჩო 124 გვერდზე]

რით შეგიძლია დაიწყო?

● რას გეგმავ ზაფხულში? (ის რომ გიპასუხებს, მერე უთხარი, შენ რა გეგმები გაქვს, მაგალითად გინდა, რომ კონგრესს დაესწრო ან მსახურება გააფართოო).

● მოიხსენიე რომელიმე ახალი ამბავი და ჰკითხე: გაიგე ეს ამბავი? რას ფიქრობ ამაზე?

● როგორ ფიქრობ, გამოსწორდება მსოფლიო ფინანსური მდგომარეობა? (ან ახსენე სხვა რომელიმე პრობლემა). (მოისმინე მისი პასუხი). რატომ ფიქრობ ასე?

● მორწმუნე ხარ?

● როგორ წარმოგიდგენია შენი ცხოვრება ხუთი წლის შემდეგ? (პასუხის მოსმენის შემდეგ უთხარი, რა სულიერი მიზნები გაქვს).

[ცხრილი 127 გვერდზე]

(სრული ტექსტი იხილეთ პუბლიკაციაში)

სამუშაო გვერდი

წინასწარ იფიქრე, როგორ უპასუხებ

გააკეთე ასლი!

რჩევა: ეს ცხრილი შენს მშობლებთან და ქრისტიან მეგობრებთან ერთად განიხილე. შეავსე თავისუფალი გრაფები. დაფიქრდი, კიდევ რა კითხვები შეიძლება დაგისვან შენმა კლასელებმა, და მოიფიქრე, რას უპასუხებ.

ნეიტრალიტეტი

კითხვა

რატომ არ მღერი ეროვნულ ჰიმნს? რა, არ გიყვარს შენი სამშობლო?

პასუხი

როგორ არ მიყვარს ჩემი სამშობლო, მაგრამ თაყვანს არა ვცემ.

შემდეგი კითხვა

ესე იგი, არ იბრძოლებ შენი სამშობლოს დასაცავად?

პასუხი

არა, და არც სხვა ქვეყნებში მცხოვრები მილიონობით იეჰოვას მოწმე იბრძოლებს ჩვენი ქვეყნის წინააღმდეგ.

სისხლი

კითხვა

სისხლის გადასხმა რომ დაგჭირდეს, არ გადაისხამ?

პასუხი

გადავისხამ სისხლის უსაფრთხო ალტერნატიულ საშუალებას, რომელიც შიდს-ით ან ჰეპატიტით არ დამაინფიცირებს. მაგრამ ბიბლიაში წერია, რომ უნდა მოვერიდოთ სისხლს. ამიტომ სისხლს არ გადავისხამ.

შემდეგი კითხვა

მაგრამ რომ კვდებოდე? ნუთუ არ გაპატიებს ღმერთი?

პასუხი

․․․․․

პირადი არჩევანი

კითხვა

თქვენი რელიგიის ესა და ეს მიმდევარი ასე და ასე მოიქცა. შენ რატომ არ იქცევი ასე?

პასუხი

ჩვენ ვსწავლობთ ღვთის მოთხოვნებს, მაგრამ დაპროგრამებულები არა ვართ. არჩევანს ყველა თვითონ აკეთებს.

ეს ორმაგი სტანდარტებით ცხოვრება არ არის?

პასუხი

․․․․․

შემოქმედება

კითხვა

რატომ არ გჯერა ევოლუციის?

პასუხი

რატომ უნდა მჯეროდეს? თვითონ მეცნიერები ვერ თანხმდებიან, არადა მათ წესით მეტი ესმით!

შემდეგი კითხვა

․․․․․

პასუხი

․․․․․

[სურათი 125 გვერდზე]

ქადაგება შეიძლება ცურვას შევადაროთ. შეგიძლია წყალში ნელ-ნელა შეხვიდე ან პირდაპირ ჩახტე.