თავი 19

ხომ არ გამოვიდე სკოლიდან?

შენი აზრით, რამდენი წელი უნდა ისწავლო სკოლაში? ․․․․․

შენს მშობლებს რამდენი წელი უნდათ, რომ ისწავლო სკოლაში? ․․․․․

ემთხვევა ერთმანეთს თქვენი პასუხები? რომც დაემთხვეს, ზოგჯერ შეიძლება მაინც გაგიჩნდეს სკოლიდან გამოსვლის სურვილი. ნაცნობია შენთვის ქვემოთ მოცემული სიტუაციები?

„ზოგჯერ ისეთ სტრესში ვიყავი, რომ დილით ადგომაც კი არ მინდოდა. ვფიქრობდი, რატომ უნდა მევლო სკოლაში და მესწავლა ის, რასაც ვერასდროს გამოვიყენებდი“ (რეიჩელი).

„სკოლა ისე მღლიდა, რომ მინდოდა თავი დამენებებინა და მუშაობა დამეწყო. მეგონა, სკოლაში დროს ტყუილად ვკარგავდი. მერჩივნა, მემუშავა და ჩემი ფული მქონოდა“ (ჯონი).

„ქალაქის ცენტრში მდებარე სკოლაში რომ გადავედი, კლასელებთან საერთოს ვერ ვპოულობდი. სწავლა არ მიჭირდა, უბრალოდ ზედ არავინ არ მიყურებდა. თითქმის სულ მარტო ვიყავი. ვინც ჩემსავით გარიყული იყო, ისინიც კი არ მელაპარაკებოდნენ. წამოსვლა მინდოდა სკოლიდან“ (რაიენი).

„ყოველდღე ოთხი საათი მჭირდებოდა დავალებების მოსამზადებლად. თემებს, საკონტროლოებსა და დავალებებს ვერ ავუდიოდი. მეგონა, ამდენ რამეს თავს ვერ გავართმევდი, ამიტომ სკოლისთვის თავის დანებება მინდოდა“ (სინდი).

„ჩვენს სკოლაში ერთხელ ცრუ განგაში ატყდა ბომბის გამო, სამმა თვითმკვლელობა სცადა, ერთმა თავი მოიკლა, ხულიგნებიც არ გვაკლდნენ. ზოგჯერ იმდენი ცუდი რამ ხდებოდა, რომ სკოლიდან წამოსვლა მინდოდა“ (როუზი).

ნაცნობია შენთვის ეს სიტუაციები? პირადად შენ, რატომ გაგიჩნდა სკოლიდან წამოსვლის სურვილი?

․․․․․

შეიძლება სერიოზულად ფიქრობ სწავლისთვის თავის დანებებას. მაგრამ საინტერესოა, რატომ გინდა სწავლის შეწყვეტა — იმიტომ, რომ უკვე მიიღე საკმარისი ცოდნა თუ იმიტომ, რომ სკოლა მოგბეზრდა? მოდი ჯერ გავიგოთ, რას ნიშნავს სწავლისთვის თავის დანებება.

სკოლიდან გამოსვლა თუ სწავლისთვის თავის დანებება?

შენი აზრით, რა სხვაობაა სკოლიდან გამოსვლასა და სწავლისთვის თავის დანებებას შორის?

․․․․․

ზოგიერთ ქვეყანაში კანონით მოითხოვება, რომ ახალგაზრდამ მხოლოდ 5—8 კლასი დაამთავროს. ზოგან კი მოსწავლეებისგან 10—12 კლასის დამთავრება მოითხოვება. აქედან გამომდინარე, არ არსებობს ერთიანი საერთაშორისო სტანდარტი, თუ რამდენი წელი უნდა ისწავლო სკოლაში.

ზოგ ქვეყანაში ნებადართულია, რომ ახალგაზრდებმა სკოლის მთელი პროგრამა ან კონკრეტული საგნები სახლში გაიარონ. იმ მოსწავლეებზე, რომლებიც მშობლების ნებართვით სახლში გადიან სასწავლო პროგრამას, ვერ ვიტყვით, რომ სწავლას თავს ანებებენ.

თუ სწავლისთვის დროზე ადრე აპირებ თავის დანებებას, იქნება ეს სკოლაში თუ სახლში, დაფიქრდი შემდეგ კითხვებზე:

რა მოითხოვება კანონით? როგორც ზემოთ იყო აღნიშნული, ზოგ ქვეყანაში განსხვავებული კანონი არსებობს სკოლაში სწავლის წლების რაოდენობასთან დაკავშირებით. მინიმუმ რამდენი კლასის დამთავრება მოითხოვება კანონით შენს ქვეყანაში? ხარ თუ არა უკვე ბოლო სავალდებულო კლასში? თუ უმაღლესი ხელისუფლებისადმი მორჩილების შესახებ ბიბლიურ რჩევას უგულებელყოფ და დროზე ადრე გამოდიხარ სკოლიდან, ესე იგი, სწავლას თავს ანებებ (რომაელები 13:1).

საკმარისი ცოდნა მაქვს ჩემი მიზნების მისაღწევად? რას მინდა მივაღწიო მიღებული ცოდნით? ჯერ არ გიფიქრია ამაზე? თუ წინასწარ არ იფიქრებ, დაემსგავსები მატარებლის მგზავრს, რომელმაც არ იცის, სად უნდა წასვლა. ამიტომ მშობლებთან ერთად შეავსე 139-ე გვერდზე მოცემული ჩარჩო „რას მინდა მივაღწიო მიღებული ცოდნით?“. ეს დაგეხმარება იმის განსაზღვრაში, თუ რა გინდა სინამდვილეში. ამასთანავე, შენ და შენი მშობლები იმის განსაზღვრასაც შეძლებთ, თუ რამდენი ხანი ღირს სწავლის გაგრძელება სკოლაში (იგავები 21:5).

ალბათ, მასწავლებლები ან სხვები გეუბნებიან, რამდენ ხანს უნდა ისწავლო სკოლაში. მაგრამ საბოლოო გადაწყვეტილება მაინც შენმა მშობლებმა უნდა მიიღონ (იგავები 1:8; კოლოსელები 3:20). არ იქნება გონივრული, თუ შენ და შენი მშობლების მიერ დასახული მიზნების მიღწევამდე შეწყვეტ სწავლას.

რატომ მინდა სკოლიდან გამოსვლა? ფრთხილად იყავი, რომ თავი არ მოიტყუო (იერემია 17:9). ადამიანი მიდრეკილია იმისკენ, რომ გამართლება მოუძებნოს თავის ეგოისტურ მიზნებს (იაკობი 1:22).

დაწერე საპატიო მიზეზები, თუ რატომ გინდა სკოლიდან ნაადრევად გამოსვლა.

․․․․․

დაწერე ეგოისტური მიზეზები, თუ რატომ გინდა სკოლიდან ნაადრევად გამოსვლა.

․․․․․

რომელი საპატიო მიზეზები დაწერე? შესაძლოა გინდა მუშაობის დაწყება ოჯახის ფინანსური მხარდაჭერის მიზნით ან მოხალისედ მსახურება გსურს. ეგოისტურ მიზეზებს შორის შეიძლება იყოს საკონტროლოებისა და საშინაო დავალებებისთვის თავის არიდება. მთავარია გააცნობიერო, რატომ გინდა სკოლიდან გამოსვლა — საპატიო თუ ეგოისტური მიზეზების გამო.

კიდევ ერთხელ დახედე ჩამოწერილ მიზეზებს და ხუთბალიანი სისტემით შეაფასე, თუ რატომ გინდა სკოლიდან ნაადრევად გამოსვლა (1 იყოს ყველაზე უმნიშვნელო მიზეზი, ხოლო 5 — ყველაზე მნიშვნელოვანი). თუ სწავლისთვის თავის დანებება იმიტომ გინდა, რომ პრობლემებს გაექცე, იცოდე, რომ ცხოვრებაში პრობლემები მაინც შეგხვდება.

რა დაშავდება, თუ სწავლას თავს დავანებებ?

სკოლისთვის თავის დანებება რაღაცით მატარებლიდან გადმოხტომას ჰგავს. მატარებელი შეიძლება არ იყოს კომფორტული და არც მგზავრები მოგეწონოს, მაგრამ თუ მატარებლიდან გადმოხტები, ვერც დანიშნულების ადგილს მიაღწევ და შეიძლება რამე დაიზიანო კიდეც. მსგავსადვე, თუ სწავლას თავს დაანებებ, ვერ მიაღწევ სასურველ მიზნებს, რაშიც სკოლაში მიღებული ცოდნა დაგეხმარებოდა. ამას სხვა პრობლემებიც მოჰყვება — ზოგი მალევე და ზოგიც მოგვიანებით.

პრობლემები, რომლებსაც მალევე შეხვდები. შეიძლება გაგიჭირდეს სამუშაოს შოვნა და თუ იშოვი, ანაზღაურება იმდენი მაინც არ გექნება, რამდენიც სკოლის დამთავრების შემთხვევაში გექნებოდა. ნორმალურად რომ იცხოვრო, შეიძლება დღის განმავლობაში უფრო მეტხანს მოგიწიოს მუშაობა და თანაც ისეთ გარემოში, რომელიც სკოლის გარემოზე გაცილებით არასასიამოვნო იქნება.

პრობლემები, რომლებსაც მოგვიანებით შეხვდები. გამოკვლევებმა ცხადყო, რომ სკოლიდან ნაადრევად გამოსულებს შედარებით სუსტი ჯანმრთელობა აქვთ, ხშირად ხვდებიან ციხეში და ხშირად უწევთ სოციალური პროგრამებით სარგებლობა.

რა თქმა უნდა, სკოლის დამთავრება იმის გარანტია არ არის, რომ ეს პრობლემები არ შეგექმნება, მაგრამ რატომ უნდა გაირთულო ცხოვრება სწავლის შეწყვეტით?

რატომ არ ღირს სკოლისთვის თავის დანებება?

თუ საკონტროლო ვერ დაწერე ან მძიმე დღე გქონდა სკოლაში, შეიძლება ყველაფერზე ხელი ჩაიქნიო და მომავალი პრობლემები არაფრად მოგეჩვენოს იმის ფონზე, რასაც ახლა განიცდი. მაგრამ სანამ ამ „იოლ“ გზას აირჩევ, დაფიქრდი ამ თავის დასაწყისში მოხსენიებული ახალგაზრდების სიტყვებზე, რომლებიც არ ნანობენ, რომ სკოლა დაამთავრეს.

„მოთმინება ვისწავლე, ემოციურად გავძლიერდი. ვისწავლე ისიც, რომ რაღაცის კეთებით სიამოვნების მიღება ჩემზეა დამოკიდებული. სკოლა ხატვის ნიჭის განვითარებაშიც დამეხმარა, რაც მომავალში გამომადგება“ (რეიჩელი).

„ახლა უკვე ვიცი, რომ მიზანს მხოლოდ გულმოდგინე შრომით შემიძლია მივაღწიო. სკოლაში ტექნიკურ მომზადებას გავდივარ, რაც შესაძლებლობას მომცემს, ჩემთვის სასურველ პროფესიას დავეუფლო და სტამბაში ვიმუშაო მექანიკოსად“ (ჯონი).

„სწავლას არ შევუშინდი და მშვენივრად ავითვისე წერა-კითხვა. სკოლაში ვისწავლე შენიშვნებისა და რჩევების მიღება, ჩემი აზრების გასაგებად და ლოგიკურად გადმოცემა, რაც ქრისტიანულ მსახურებაში მეხმარება“ (რაიენი).

„სკოლა დამეხმარა გავმკლავებოდი იმ პრობლემებს, რომლებსაც ვხვდებოდი სკოლაში, სხვებთან ურთიერთობისას თუ ზოგადად ცხოვრებაში, რამაც მტკიცე პიროვნებად ჩამომაყალიბა“ (სინდი).

„სკოლამ მომამზადა იმ სირთულეებისთვის, რომლებსაც მომავალში შევხვდებოდი სამსახურში. ბევრ ისეთ სიტუაციაში მოვხვდი, როცა საკუთარი მრწამსის უკეთ გამოკვლევა დამჭირდა, რამაც რწმენა განმიმტკიცა“ (როუზი).

ბრძენმა მეფე სოლომონმა დაწერა: „საქმის დასასრული სჯობია მის დასაწყისს. მომთმენი კაცი სჯობია სულით ამპარტავანს“ (ეკლესიასტე 7:8). ასე რომ, ჯობია, მოთმინებით გაუძლო იმ პრობლემებს, რომლებსაც სკოლაში ხვდები, ვიდრე ნაადრევად გამოხვიდე სკოლიდან. თუ ასე მოიქცევი დასასრულით კმაყოფილი დარჩები.

საკვანძო ბიბლიური მუხლი

„მოჩქარე . . . სიდუხჭირეში იქნება“ (იგავები 21:5).

რჩევა

თუ გიჭირს სკოლაში არსებულ გარემოსთან შეგუება, ჰკითხე მშობლებს, რისი გაკეთება შეგიძლია იმისათვის, რომ მდგომარეობა შეიმსუბუქო და შეძლო სკოლის დამთავრება.

იცოდი, რომ . . . ?

სწავლას უფრო ხშირად ისინი ანებებენ თავს, ვინც გაკვეთილებს აცდენენ.

რა უნდა გავაკეთო

თუ მიჭირს საგნის სწავლა, სკოლიდან გამოსვლის მაგივრად მე ․․․․․

თუ გადავიღალე და ამის გამო მინდა სკოლისთვის თავის დანებება, ამ პრობლემის მოსაგვარებლად მე ․․․․․

რა ვკითხო მშობლებს ამ საკითხზე? ․․․․․

როგორ ფიქრობ?

● რატომ არის აუცილებელი, რომ კარგად ისწავლო წერა-კითხვა და მათემატიკა?

● როგორ დაგეხმარება სიბეჯითე, რომ საუკეთესოდ გამოიყენო სკოლაში გატარებული წლები?

● რატომ უნდა იფიქრო იმაზე, თუ რა სახის სამუშაოს მოჰკიდებ ხელს სკოლის დამთავრების შემდეგ?

[ჩანართი 140 გვერდზე]

„პრობლემებს ვერ გაექცევი. სკოლაში სწავლა საკუთარი თავის გატანას გასწავლის, რაც შემდგომში სამსახურშიც გამოგადგება და ნებისმიერ სხვა ადგილასაც“ (რამონა).

[ჩარჩო 139 გვერდზე]

სამუშაო გვერდი

რას მინდა მივაღწიო მიღებული ცოდნით?

განათლების მიღების მთავარი მიზანი ის არის, რომ სამომავლოდ შეძლო სამუშაოს შოვნა და საკუთარ თავსა და მომავალ ოჯახზე ზრუნვა (2 თესალონიკელები 3:10, 12). გიფიქრია, სად გინდა იმუშაო და როგორ მოგამზადებს სკოლაში გატარებული წლები მომავალი სამსახურისთვის? ქვემოთ მოცემული კითხვები იმის განსაზღვრაში დაგეხმარება, გაქვს თუ არა არჩეული სწორი კურსი.

რა გამომდის კარგად? (მაგალითად, ადვილად ახერხებ სხვებთან ურთიერთობას? გიყვარს საკუთარი ხელით რამის კეთება ან შეკეთება? ადვილად პოულობ გამოსავალს რთული სიტუაციებიდან?) ․․․․․

რა და რა სახის სამუშაოს შესრულებაში გამომადგებოდა ჩემი ესა თუ ის უნარი? ․․․․․

რა სახის სამუშაოს შოვნაა შესაძლებელი იქ, სადაც მე ვცხოვრობ? ․․․․․

რომელ საგნებს ვსწავლობ ინტენსიურად, რაც მომავალში სამსახურის შოვნაში დამეხმარება? ․․․․․

სწავლის კიდევ რა საშუალებები მაქვს, რომ უფრო ადვილად მივაღწიო დასახულ მიზნებს? ․․․․․

გახსოვდეს, შენი მიზანი სამომავლოდ გამოსადეგი ცოდნის მიღებაა. ამიტომ მეორე უკიდურესობაში ნუ გადავარდები და ნუ დაემსგავსები „მარადმწვანე“ მოსწავლეს, რომელიც არ აპირებს „მატარებლიდან“ ჩამოსვლას მხოლოდ იმიტომ, რომ ზრდასრული ადამიანის პასუხისმგებლობებს გაექცესa.

[სქოლიო]

[სურათი 138, 139 გვერდებზე]

სკოლისთვის თავის დანებება რაღაცით მატარებლიდან გამდმოხტომას ჰგავს.