პატარა იესოს ასტროლოგები ინახულებენ

აღმოსავლეთიდან რამდენიმე კაცი გრძელ გზას ადგება. ისინი ასტროლოგები არიან. ასტროლოგები ვარსკვლავთა განლაგებას სწავლობენ, რის მიხედვითაც, მათივე მტკიცებით, შეუძლიათ ახსნან, რა მნიშვნელობა აქვს ამა თუ იმ მოვლენას ადამიანთა ცხოვრებაში (ესაია 47:13). ამ მამაკაცებმა, როგორც თავად თქვეს, აღმოსავლეთში, თავიანთ მშობლიურ მხარეში იუდეველთა მეფის „ვარსკვლავი“ იხილეს და ასობით კილომეტრზე გაჰყვნენ მას, მაგრამ ამ „ვარსკვლავმა“ ისინი ბეთლემში კი არა, იერუსალიმში ჩაიყვანა.

როდესაც ასტროლოგები იერუსალიმში ჩადიან, კითხულობენ: „სად არის იუდეველთა მეფე რომ დაიბადა? აღმოსავლეთში მისი ვარსკვლავი ვიხილეთ და მოვედით, რათა მდაბლად თაყვანი ვცეთ“ (მათე 2:1, 2).

ამის მოსმენაზე მეფე ჰეროდე მოსვენებას კარგავს. ამიტომ უხმობს უფროს მღვდლებსა და სხვა იუდეველ რელიგიურ წინამძღოლებს და ეკითხება, სად უნდა დაბადებულიყო ქრისტე. წმინდა წერილებზე დაყრდნობით ისინი პასუხობენ: „ბეთლემში“ (მათე 2:5; მიქა 5:2). ამის შემდეგ ჰეროდე საიდუმლოდ იბარებს ასტროლოგებს და ეუბნება: „წადით, კარგად მოძებნეთ ის ბავშვი და, როცა იპოვით, შემატყობინეთ, რომ მეც წავიდე და მდაბლად თაყვანი ვცე“ (მათე 2:8). სინამდვილეში კი ჰეროდეს პატარას მოკვლა სურს.

მას შემდეგ, რაც ასტროლოგები იერუსალიმს ტოვებენ, გასაოცარი რამ ხდება. „ვარსკვლავი“, რომელიც აღმოსავლეთში იხილეს, კვლავ წინ მიუძღვით. აშკარაა, რომ ეს არ არის ჩვეულებრივი ვარსკვლავი, ის მათ მიმართულებას აძლევს. ამ „ვარსკვლავს“ ასტროლოგები სწორედ იმ სახლამდე მიჰყავს, სადაც იოსები და მარიამი თავიანთ პატარასთან ერთად ცხოვრობენ. „ვარსკვლავი“ სწორედ ამ სახლის თავზე ჩერდება.

როდესაც სახლში შედიან, მარიამს და პატარა იესოს ხედავენ. ისინი ემხობიან და მდაბლად თაყვანს სცემენ ბავშვს, რის შემდეგაც ძღვნად ოქროს, გუნდრუკსა და სმირნას გადასცემენ. როდესაც უკან გაბრუნებას აპირებენ, სიზმარში ღვთისგან გაფრთხილებას იღებენ, რომ არ დაბრუნდნენ ჰეროდესთან; ამიტომ თავიანთ ქვეყანაში სხვა გზით მიდიან.

როგორ ფიქრობთ, ვინ მოუვლინა მათ ეს „ვარსკვლავი“? ალბათ, გახსოვთ, რომ ამ „ვარსკვლავს“ ასტროლოგები პირდაპირ იესოსთან, ქალაქ ბეთლემში არ ჩაუყვანია. მან თავიდან ისინი იერუსალიმში მიიყვანა, სადაც მეფე ჰეროდეს შეხვდნენ, რომელმაც იესოს მოკვლა განიზრახა. ღმერთი რომ არ ჩარეულიყო და არ გაეფრთხილებინა ასტროლოგები, ჰეროდე უეჭველად განახორციელებდა თავის ბოროტ ჩანაფიქრს. აქედან გამომდინარე, ლოგიკურია, დავასკვნათ, რომ ეს „ვარსკვლავი“ ღვთის დაუძინებელმა მტერმა, სატანამ მოავლინა, რათა სისრულეში მოეყვანა თავისი მზაკვრული განზრახვა და მოეკლა ღვთის ძე.