იოშიას უყვარდა ღვთის კანონი

იოშია 8 წლის იყო, როცა გამეფდა იუდაში. იმ პერიოდში ხალხი კერპებს სცემდა თაყვანს და ჯადოქრობას მიმართავდა. როცა იოშია 16 წლის გახდა, გადაწყვიტა, გაეგო, როგორ ეცა სწორად იეჰოვასთვის თაყვანი. 20 წლის იოშიამ მთელ სამეფოში დაიწყო კერპებისა და ცრუ ღმერთების სამსხვერპლოების განადგურება. 26 წლის ასაკში კი იეჰოვას ტაძრის შესაკეთებელი სამუშაოები დაიწყო.

მღვდელმთავარმა ხილკიამ გრაგნილზე დაწერილი იეჰოვას კანონი იპოვა ტაძარში. შესაძლოა ეს მოსეს ხელით დაწერილი გრაგნილიც კი იყო. მწერალმა შაფანმა ის მეფეს მიუტანა და ხმამაღლა წაუკითხა. მეფე იოშია მიხვდა, რომ ხალხი თურმე მრავალი წლის მანძილზე აღარ ასრულებდა ამ კანონში ჩაწერილ იეჰოვას სიტყვებს. მეფემ ხილკიას უთხრა: იეჰოვა ძალიან განრისხებულია ჩვენზე. წადი და ჰკითხე, როგორ მოვიქცეთ. ღმერთმა წინასწარმეტყველი ქალის, ხულდას, მეშვეობით გასცა მათ პასუხი: იუდაში მცხოვრებმა ხალხმა მიმატოვა, რის გამოც დაისჯებიან. მაგრამ ეს არ მოხდება იოშიას მეფობის დროს, რადგან მან თავი დაიმდაბლა ჩემ წინაშე.

იეჰოვას სიტყვების მოსმენის შემდეგ მეფე იოშიამ იუდას ხალხი ტაძართან შეკრიბა და იეჰოვას კანონი ხმამაღლა წაუკითხა. მეფემ და მთელმა ხალხმა აღთქმა დაუდო იეჰოვას, რომ მთელი გულით დაემორჩილებოდნენ მას.

უკვე მრავალი წელი იყო გასული, რაც იუდეველებს პასექი არ აღენიშნათ. მაგრამ მას შემდეგ, რაც იოშიამ კანონის წიგნიდან გაიგო, რომ პასექი ყოველ წელს უნდა ეზეიმათ, ხალხს უთხრა: პასექი უნდა აღვნიშნოთ იეჰოვასთვის! მეფემ საპასექო მსხვერპლად დიდძალი შესაწირავი გაიღო და ტაძარში მგალობელთა გუნდი მოამზადა. მთელმა ერმა სიხარულით იზეიმა პასექი, რის შემდეგაც შვიდდღიანი უფუარობის დღესასწაულიც აღნიშნეს. წინასწარმეტყველ სამუელის შემდეგ ასე დიდებულად არ აღუნიშნავთ პასექი ისრაელში. იოშიას მართლა ძალიან უყვარდა ღვთის კანონი. შენც გსიამოვნებს იეჰოვაზე უფრო და უფრო მეტის გაგება?