იესო ირჩევს თორმეტ მოციქულს

წელიწად-ნახევარი გავიდა მას შემდეგ, რაც იესომ ქადაგება დაიწყო. მას ძალიან მნიშვნელოვანი გადაწყვეტილება ჰქონდა მისაღები – უახლოესი თანამსახურები უნდა აერჩია. საინტერესოა, ვის აირჩევდა ის და ვის მოამზადებდა ქრისტიანული კრების ხელმძღვანელებად. ამ გადაწყვეტილების მისაღებად მას იეჰოვას დახმარება სჭირდებოდა. ამიტომ, იესო მთაზე ავიდა და მთელი ღამე ლოცვაში გაატარა. დილით მოწაფეები თავისთან დაიბარა და მათგან 12 აირჩია მოციქულებად. გახსოვს რომელიმე მათგანის სახელი? მათ ერქვათ პეტრე, ანდრია, იაკობი, იოანე, ფილიპე, ბართლომე, თომა, მათე, ალფეს ვაჟი იაკობი, თადეოზი, სიმონი და იუდა ისკარიოტელი.

თორმეტი მოციქული იესოს ყველგან თან დაჰყვებოდა. მან ბევრი რამ ასწავლა მოციქულებს და საქადაგებლად გაგზავნა ისინი. იეჰოვამ მათ ავადმყოფების განკურნების და დემონების განდევნის ძალა მისცა.

იესომ თორმეტ მოციქულს მეგობრები უწოდა. ის ბოლომდე ენდობოდა მათ. ფარისევლები მოციქულებს უსწავლელ და უბრალო ხალხად თვლიდნენ. მაგრამ იესომ ბევრი რამ ასწავლა მათ და კარგად მოამზადა ისინი. მოციქულები ყოველთვის იესოს გვერდით იყვნენ – მის სიკვდილამდეც და მკვდრეთით აღდგომის შემდეგაც. იესო და მის მოციქულთა უმეტესობა გალილეელი იყო. ზოგიერთი მათგანი დაოჯახებული იყო.

მოციქულები არასრულყოფილები იყვნენ და შეცდომებს უშვებდნენ. ზოგჯერ დაუფიქრებლად ლაპარაკობდნენ და არასწორ გადაწყვეტილებებს იღებდნენ; ზოგჯერ მოთმინებასა და თავშეკავებას კარგავდნენ; ხანდახან იმაზეც კი კამათობდნენ, თუ ვინ იყო მათ შორის საუკეთესო. ამ ყველაფრის მიუხედავად, ისინი კარგი ადამიანები იყვნენ და იეჰოვა ძალიან უყვარდათ. იესოს ზეცაში წასვლის შემდეგ ისინი ქრისტიანული კრების პირველი წევრები გახდნენ და ბევრი კარგი საქმე გააკეთეს კრებისთვის.