ატადი

[მაყვალი]

ადგილი იორდანეს მხარეში, რომლის ზუსტი ადგილმდებარეობა უცნობია. მას ეწოდა „ატადის კალო“. ეგვიპტიდან წამოსული პროცესია, რომელიც ქანაანისკენ მიდიოდა მაქფელას მინდორში მდებარე გამოქვაბულში იაკობის გასასვენებლად, შვიდ დღეს გაჩერდა აქ და სამგლოვიარო წეს-ჩვეულებას ასრულებდა. შესაძლოა, ატადი ადამიანის სახელი იყო, თუმცა ამ შემთხვევაში, როგორც ჩანს, გეოგრაფიული ადგილი იგულისხმება. პროცესიას ესწრებოდნენ ფარაონის მსახურებიც და ეგვიპტის მიწაზე მცხოვრები უხუცესებიც. როცა ქანაანელებმა დაინახეს, როგორ ასრულებდნენ სამგლოვიარო წეს-ჩვეულებებს, თქვეს: „მწარედ გლოვობენ ეგვიპტელები!“. ამიტომ დაერქვა ამ ადგილს აბელ-მიცრაიმი, რაც ეგვიპტელთა გლოვას ნიშნავს (დბ. 50:7—13).

ბიბლიის არაერთ თარგმანში (მაგ., სსგ, ბსგ, AS, AT, RS) დაბადების 50:10, 11-ში გვხვდება ფრაზა: „იორდანეს გაღმა“. შესაბამისად, ზოგი ასკვნის, რომ ატადის კალო მდინარე იორდანეს აღმოსავლეთით მდებარეობდა. ეს ნიშნავს, რომ პროცესია პირდაპირი გზით კი არ წავიდა, არამედ მკვდარ ზღვას შემოუარა, შესაძლოა იმიტომ, რომ ფილისტიმელებისთვის თავი აერიდებინათ. მაგრამ ებრაული სიტყვა ბეʽევერ, რომელიც გაღმად ითარგმნა, შეიძლება მიუთითებდეს როგორც იორდანეს აღმოსავლეთ, ისე დასავლეთ მხარეზე. ხუთწიგნეულის წერის დასასრულს მოაბის მიწაზე მყოფი მოსესთვის „იორდანეს გაღმა“ შეიძლებოდა მდინარის დასავლეთი მხარე ყოფილიყო. თუმცა „ახალი ქვეყნიერების თარგმანმა“ ეს პრობლემატური საკითხი გადაჭრა და ებრაული ტექსტის ზუსტად გადმოსაცემად ამ მუხლებში გამოიყენა ფრაზა „იორდანეს მხარეში“.