ელიეზერი

[ჩემი ღმერთი შემწეა].

1. დამასკოელი კაცი და უშვილო აბრაამის შესაძლო მემკვიდრე. აბრაამი მას თავისი „სახლის მსახურად“ მოიხსენიებს (დბ. 15:2, 3). არქეოლოგიური აღმოჩენები, მაგალითად, ნუზიში ნაპოვნი ფილები, ნათელს ჰფენს, თუ რატომ მიიჩნევდა აბრაამი ელიეზერს თავის მემკვიდრედ. ხშირად უშვილო წყვილი შვილად იყვანდა ბიჭს, რომელიც სიბერეში იზრუნებდა მათზე, დამარხავდა და მათ ქონებას მემკვიდრეობით მიიღებდა. მაგრამ, თუ შვილად აყვანის შემდეგ წყვილს ვაჟი გაუჩნდებოდა, მათი ქონება ნამდვილ ვაჟს გადაეცემოდა.

როგორც ჩანს, სწორედ ელიეზერი, აბრაამის სახლეულობაში ყველაზე უფროსი მსახური და ქონების განმგებელი, გაგზავნა აბრაამმა ნახორის სახლეულობაში, ზემო შუამდინარეთში, თავისი ვაჟისთვის, ისაკისთვის ცოლის მოსაყვანად. თავისი ბატონის, აბრაამის მსგავსად, ელიეზერიც ითხოვდა იეჰოვას ხელმძღვანელობას და აღიარებდა, რომ ღმერთმა წარუმართა გზა (დბ. 24:2, 4, 12—14, 56).

2. მოსეს ორი ვაჟიდან უმცროსი, რომელსაც მოსემ დაარქვა ეს სახელი, რადგან ღმერთი იყო მისი შემწე და ფარაონის მახვილისგან იხსნა (გმ. 18:4). ელიეზერს შეეძინა მხოლოდ ერთი ვაჟი, რეხაბია, რომელსაც ბევრი შთამომავალი ჰყავდა. ერთ-ერთი მათგანი, შელომოთი, დავითის დროს თავის ძმებთან ერთად დანიშნული იყო მთელი განწმენდილი ნივთების მეთვალყურედ (1მტ. 23:17; 26:25, 26, 28).

3. ბექერის ვაჟი და ბენიამინის შთამომავალი (1მტ. 7:6, 8).

4. იმ შვიდი მღვდლიდან ერთ-ერთი, რომლებიც მესაყვირეები იყვნენ იეჰოვას კიდობნის წინ, როცა დავითმა ის ობედ-ედომის სახლიდან იერუსალიმში გადაიტანა (1მტ. 15:24).

5. ზიქრის ვაჟი და რეუბენის ტომის თავკაცი დავითის მეფობის დროს (1მტ. 27:16).

6. მარეშელი დოდავაჰუს ძე. წინასწარმეტყველი, რომელმაც იწინასწარმეტყველა, რომ იეჰოვა ჩაშლიდა ხომალდების ასაგებად მეფე იეჰოშაფატისა და ბოროტი მეფე ახაზიას მიერ წამოწყებულ საქმეს (2მტ. 20:35—37; 1მფ. 22:48).

7. გადასახლებულთა ერთ-ერთი თავკაცი, რომელიც ეზრასთან ერთად დაბრუნდა იერუსალიმში (ეზრ. 8:16).

8. ერთ-ერთი მღვდელი „იეშუას ძეთაგან“, რომლებმაც ყურად იღეს ეზრას რჩევა და პირობა დადეს, რომ უცხოელ ცოლებს გაუშვებდნენ (ეზრ. 10:18, 19).

9. ლევიანი, რომელმაც ეზრას მოწოდების თანახმად გაუშვა უცხოელი ცოლი (ეზრ. 10:23, 44).

10. ხარიმის ძეთაგან ერთ-ერთი, რომელმაც ყურად იღო ეზრას მოწოდება და გაუშვა უცხოელი ცოლი (ეზრ. 10:31, 44).

11. იესოს დედის, მარიამის წინაპარი (ლკ. 3:29).