ენ-განიმი

[ბაღების წყარო].

1. იუდეველთა ქალაქი შეფელას დაბლობზე, რომელიც იესო ნავეს ძის 15:33—35-ში სხვა ქალაქებთან, მათ შორის ადულამთან, ერთად მოიხსენიება. შესაძლოა ის მდებარეობდა ბეთ-შემეშის სამხრ.-ით, დაახლოებით 2,5 კმ-ში, თანამედროვე ბაით-ჯიმალის ადგილას ან მის სიახლოვეს. ზოგის აზრით, ენ-განიმი ბეთ-შემეშის დას.-ით დაახლოებით 1 კმ-ში, დღევანდელი უმ-ჯინას ადგილზე მდებარეობდა, თუმცა ეს ნაკლებად სავარაუდოა, რადგან იქ არცერთი წყარო არ გვხვდება.

2. ქალაქი, რომელიც ისაქარის ტომის სამკვიდრო მიწაზე მდებარეობდა (იეს. 19:17, 21). შესაძლოა ეს ის ქალაქი იყოს, რომელსაც იოსებ ფლავიუსი გინეას სახელით მოიხსენიებს. ვარაუდობენ, რომ ის დღევანდელი ჯენინია, ქალაქი, რომელიც მდებარეობს მეგიდოს, ანუ იზრეელის, ველის სამხრ. საზღვართან, ქალაქ მეგიდოს სამხრ.-აღმ.-ით დაახლოებით 18 კმ-ში და დოთანის ჩრდ.-აღმ.-ით დაახლოებით 8 კმ-ში, იერუსალიმიდან ნაზარეთისკენ მიმავალ მთავარ გზაზე. ჯენინი ბაღებშია ჩაფლული და ქალაქში წყაროცაა, რაც სრულიად აკმაყოფილებს სახელ ენ-განიმის მნიშვნელობას.

ენ-განიმი, თავისი საძოვრებიანად, გერშონის ძეებს მიეცათ, ანუ ის ლევიანთა ქალაქი იყო (იეს. 21:27—29). 1 მატიანის 6:73-ში ის, როგორც ჩანს, ანემის სახელითაა მოხსენიებული.