ევნიკე
[ნაწარმოებია ფუძიდან, რომელიც ნიშნავს ძლევას]
მორწმუნე იუდეველი; ტიმოთეს დედა; დედამისი იყო ლოისი. მას ბერძენი მეუღლე ჰყავდა, რომელიც მის რწმენას არ იზიარებდა (სქ. 16:1). როგორც ჩანს, პავლე მოციქული ევნიკეს თავისი პირველი მისიონერული მოგზაურობის დროს შეხვდა ლისტრაში (მცირე აზია); მისი ქადაგების მოსმენის შემდეგ ევნიკე დედამის ლოისთან ერთად ქრისტიანი გახდა (სქ. 14:4—18). ევნიკეს უთვალთმაქცო რწმენა ჰქონდა (2ტმ. 1:5). მიუხედავად იმისა, რომ მისი ქმარი არ იზიარებდა მის რწმენას, ის ჩვილობიდანვე გულმოდგინედ ასწავლიდა თავის ვაჟს, ტიმოთეს წმინდა წერილებს და ეჭვგარეშეა, რომ გაქრისტიანების შემდეგაც აზიარებდა შვილს თავის რწმენას (2ტმ. 3:15). ვინაიდან ევნიკეს ბერძენი ქმარი ჰყავდა, ტიმოთე არ იყო წინადაცვეთილი (სქ. 16:3).