ხელის ავსება ძალაუფლებით

ებრაული გამოთქმა მილლეʼ ჲად სიტყვასიტყვით ხელის ავსებას ნიშნავს და გამოიყენება მღვდელმსახურთა ძალაუფლებით აღჭურვის აღსანიშნავად. იეჰოვას წინაშე მღვდლებად დანიშვნისას აარონსა და მის ვაჟებს მოსემ ძალაუფლებით აუვსო ხელი ამ საქმის შესასრულებლად (გმ. 28:41; 29:9, 29, 33, 35; ლვ. 8:33; 16:32; 21:10; რც. 3:3). მოსემ დანიშვნის ვერძი დაკლა და კალათიდან აღებულ უფუარ კვერებთან ერთად რამდენიმე ნაჭერი აარონსა და მის ვაჟებს ხელებზე დაუწყო და იეჰოვას წინაშე შეარხია. ბოლოს ეს ყველაფერი დასაწვავ შესაწირავთან ერთად სამსხვერპლოზე ააბოლა (გმ. 29:19—25; ლვ. 8:22—28; იხ. ცხებული, ცხება; მღვდლად დანიშვნა; მღვდელი).

სხვებიც თავიანთ მღვდლებს ძალაუფლებით უვსებდნენ ხელს. კერპთაყვანისმცემელმა მიქამ ჯერ თავის ვაჟს, შემდეგ კი ორგულ ლევიანს ძალაუფლებით აუვსო ხელი, რათა მისი „ღმერთების სახლში“ მღვდლებად ემსახურათ (მსჯ. 17:5, 12). მოგვიანებით მეფე იერობოამმა, რომელმაც ისრაელში ხბოს თაყვანისმცემლობა შემოიღო, ჩვეულებრივი ხალხიდან დანიშნა მღვდლები. აარონის საგვარეულო მღვდლები და ლევიანები ერთგულად უჭერდნენ მხარს იეჰოვას თაყვანისმცემლობას, რომლის ცენტრიც იერუსალიმში იყო, და ისინი, როგორც ჩანს, სწორედ ამის გამო განდევნეს ათტომიანი სამეფოდან (1მფ. 12:31; 13:33; 2მტ. 13:9).