ჰეროდია
ჰეროდე ანტიპას ცოლი, რომელმაც ახ. წ. 32 წელს თავისი ქალიშვილის, სალომეს, მეშვეობით მოითხოვა და მიიღო იოანე ნათლისმცემლის თავი (მრ. 6:22—28). მამამისი არისტობულე (ჰეროდე დიდისა და მისი მეორე ცოლის, მარიამნა I-ის ვაჟი) და დედამისი ბიძაშვილ-მამიდაშვილები იყვნენ. ჰეროდიას ძმა იყო ჰეროდე აგრიპა I, რომელმაც სიცოცხლეს გამოასალმა მოციქული იაკობი, იოანეს ძმა (სქ. 12:1, 2).
ჰეროდიამ პირველად მამამისის ნახევარძმაზე, ფაქტობრივად, თავის ბიძაზე, ჰეროდე დიდისა და მისი მესამე ცოლის, მარიამნა II-ის ვაჟზე, იქორწინა. მისი პირველი ქმარი ჰეროდე ფილიპეს სახელით იყო ცნობილი. ასე განასხვავებდნენ მას იტურეისა და ტრაქონიტიდის მხარეების მმართველ ფილიპესაგან (ლკ. 3:1). ჰეროდე ფილიპესგან ჰეროდიას სალომე შეეძინა. როგორც ჩანს, სალომე მისი ერთადერთი შვილი იყო. ჰეროდია გაეყარა ჰეროდე ფილიპეს და მის ნახევარძმას, ჰეროდე ანტიპას (ჰეროდე დიდისა და მისი მეოთხე ცოლის, მალთაკიას ვაჟი) გაჰყვა ცოლად. ჰეროდე ანტიპა, რომელსაც იესო ქრისტემ „მელა“ უწოდა (ლკ. 13:31, 32) და რომელიც იმ დროისთვის ტეტრარქი იყო, ჰეროდიაზე დაქორწინების მიზნით თავის პირველ ცოლს, ნაბატეველთა მეფე ჰარიტატის ასულს გაეყარა.
იოანე ნათლისმცემელმა დაგმო ჰეროდიასა და ჰეროდე ანტიპას ქორწინება, როგორც იუდეველთა კანონით უკანონო და უზნეო კავშირი, რის გამოც იოანე ციხეში ჩასვეს და მოგვიანებით თავი მოჰკვეთეს. უშიშარი და სამართლიანი მხილების გამო ჰეროდიამ ისე მოიძულა იოანე ნათლისმცემელი, რომ პირველივე შესაძლებლობისთანავე მოაკვლევინა ეს წინასწარმეტყველი (მთ. 14:1—11; მრ. 6:16—28; ლკ. 3:19, 20; 9:9).
ჰეროდიას ძმა, ჰეროდე აგრიპა I, რომიდან ახ. წ. 38 წელს დაბრუნდა მეფის ტიტულით. ამან ძალიან გაანაწყენა ჰეროდია, რომლის ქმარი, მიუხედავად იმისა, რომ მეფის ვაჟი იყო, მხოლოდ ერთ-ერთი მხარის მმართველი რჩებოდა. ცოლის დაჟინებული მოთხოვნით ჰეროდე ანტიპა რომს გაემგზავრა სამეფო ტახტის მიღების იმედით. იოსებ ფლავიუსის ცნობით, ჰეროდიას ძმამ, აგრიპამ, იმპერატორ კალიგულას საიდუმლოდ წერილები გაუგზავნა, რომელშიც ანტიპას პართელებთან შეთქმულებაში სდებდა ბრალს. ეს ამბავი იმით დამთავრდა, რომ ანტიპა გალიაში გადაასახლეს. ჰეროდიაც მას გაჰყვა („იუდეველთა სიძველენი“, XVIII, 240—256 [vii, 1, 2], ინგლ.; „იუდეველთა ომი“, II, 181—183 [ix, 6], ინგლ.).