ხური

1. იუდას შთამომავალი; ქალებისა და ეფრათას ვაჟი; ხელოსან ბეცალელის პაპა; ხურის შთამომავალთაგან ზოგი, შესაძლოა, ბეთლემში დასახლდა (გმ. 31:2; 35:30; 38:22; 1მტ. 2:19, 20, 50, 51, 54; 4:1—4; 2მტ. 1:5). შესაძლოა, ის არის იგივე ხური №2.

2. მოსესა და აარონთან დაახლოებული პირი; ეგვიპტის დატოვებიდან მალევე, როცა ისრაელებს ამალეკელები დაესხნენ თავს, ხური მოსესა და აარონთან ერთად ავიდა გორაზე. მას და აარონს მოსეს ხელები ეჭირათ, ვიდრე იეჰოვამ ისრაელებს ამალეკელებზე არ გაამარჯვებინა (გმ. 17:8—13). ამ შემთხვევიდან არც ისე დიდი ხნის შემდეგ, როცა მოსე და იესო ნავეს ძე სინას მთაზე ავიდნენ ღვთისგან ახალი კანონების მისაღებად, ბანაკი ხურსა და აარონს ჩააბარეს (გმ. 24:12—14). როგორც ჩანს, ის არის იგივე ხური (№1), რომელიც კარვის ხელოსნის, ბეცალელის პაპა იყო. იოსებ ფლავიუსი წერდა, რომ ხური მირიამის ქმარი იყო, მაგრამ ბიბლია არაფერს ამბობს ამის შესახებ („იუდეველთა სიძველენი“, III, თ. 2, აბზ. 4).

3. მიდიანელი მეფე; ამორეველი მეფის, სიხონის ხუთი ვასალი მეფიდან ერთ-ერთი. ისინი მანამდე ემორჩილებოდნენ სიხონს, სანამ აღთქმული მიწისკენ მიმავალმა ისრაელმა ის არ დაამარცხა (იეს. 13:15, 16, 21; რც. 21:21—24). ამის შემდეგ ხურმა და სხვა ოთხმა მიდიანელმა მეფემ ისრაელისთვის წინააღმდეგობის გასაწევად, როგორც ჩანს, კავშირი შეკრეს მოაბელ მეფე ბალაკთან (რც. 22:1—7). მოგვიანებით, იეჰოვას მითითებისამებრ, ისრაელებმა გაილაშქრეს მიდიანელების წინააღმდეგ, მოკლეს ხური, მისი ოთხი მოკავშირე მიდიანელი მეფე და ხარბი წინასწარმეტყველი ბალაამი (რც. 31:1—8).

4. ეფრემის მთიან მხარეში მცხოვრები იმ ზედამხედველის მამა, რომელიც სარჩოთი ამარაგებდა სოლომონს (1მფ. 4:7, 8).

5. გადის შთამომავალი ბუზის ხაზით (1მტ. 5:11, 14).

6. რეფაიას მამა; ხურის ვაჟი რეფაია იერუსალიმის გალავნის აღდგენაში ეხმარებოდა ნეემიას (ნემ. 3:9).