იოანა

[იეჰოხანანის შემოკლებული ფორმა (მდედრ.), რაც ნიშნავს იეჰოვა წყალობას ავლენს, იეჰოვა მწყალობელია]

იმ რამდენიმე ქალთაგან ერთ-ერთი, რომელიც იესო ქრისტემ სნეულებისგან განკურნა. იგი მისი მიმდევარი გახდა და მასსა და მის მოციქულებს თავისი ქონებით ემსახურებოდა (ლკ. 8:1—3). იოანა, როგორც ჩანს, იმ ქალებს შორის იყო, რომლებიც იესოს ძელზე გაკვრას ესწრებოდნენ. ამ ქალებმა, რომლებმაც სამარხში წასაღებად სურნელოვანი მცენარეები და ნელსაცხებელი მოამზადეს, პირველებმა შეიტყვეს იესოს მკვდრეთით აღდგომის ამბავი, თუმცა მათი ნათქვამის დაჯერება თერთმეტ მოციქულს თავიდან გაუჭირდა (ლკ. 23:49, 55, 56; 24:1—11). იოანას ქმარი, ქუზა, ჰეროდე ანტიპას სახლთუხუცესი იყო (ლკ. 8:3).