ლეგიონი

სახელი, რომლითაც ორიდან ერთ-ერთმა დემონით შეპყრობილმა საკუთარი თავი მოიხსენია იესო ქრისტესთან შეხვედრის დროს გალილეის ზღვის აღმოსავლეთ მხარეში. თუმცა მისი ნამდვილი სახელი ლეგიონი ვერ იქნებოდა. მან თავის თავს ლეგიონი იმიტომ უწოდა, რომ მრავალი დემონით იყო შეპყრობილი. შესაძლოა მასში მყოფი დემონებიდან ერთ-ერთმა, ალბათ, მთავარმა დემონმა, ათქმევინა ამ კაცს ეს სახელი. თუ გავითვალისწინებთ იმას, რომ ახ. წ. I ს-ში რომაული ლეგიონი 6000 კაცისგან შედგებოდა, შეგვიძლია წარმოვიდგინოთ, რამდენი დემონი ჰყავდა ამ კაცს. ეს და მასთან მყოფი მეორე კაცი ისეთი გაშმაგებული იყვნენ, რომ ვერავინ ბედავდა მათ საცხოვრებელთან, სამარხებთან ახლოს გავლას. დემონით შეპყრობილი კაცი, რომელმაც თავს ლეგიონი უწოდა, დედიშობილა დადიოდა, დღედაღამ ღრიალებდა და ქვებით ისერავდა სხეულს. მისი შებოჭვის ყოველი მცდელობა ამაო იყო, რადგან ჯაჭვებს წყვეტდა და ბორკილებს ამტვრევდა. ქრისტე იესომ გაათავისუფლა ეს და მასთან მყოფი კაცი დემონების ძალაუფლებისგან. მათგან გამოსული დემონები ღორების კოლტში შევიდნენ, ღორები კბოდედან გადაეშვნენ და გალილეის ზღვაში დაიხრჩვნენ (მთ. 8:28—34; მრ. 5:1—20; ლკ. 8:26—39; იხ. გადარელები; ღორი).

რომაული ლეგიონის შესახებ დაწვრილებითი ინფორმაციის მისაღებად იხ. ლაშქარი (რომაული ჯარი).