ამბოხება

ბერძნულმა სიტყვამ სტასის, რომლის პირველადი მნიშვნელობა დგომაა (ებ. 9:8), განზე დგომისა და ამბოხების მნიშვნელობა შეიძინა (მრ. 15:7; ლკ. 23:19, 25, Int). ის შეიძლება უთანხმოებადაც ითარგმნოს (სქ. 15:2). ზოგჯერ იგი აღნიშნავს ისეთ ამბოხებას, რომელიც ძალადობას შეიცავს (სქ. 23:7, 10).

რომის კანონმდებლობით ამბოხების წამქეზებელი, მონაწილე და მხარდამჭერი სიკვდილით ისჯებოდა. ამიტომაც გააფრთხილა ქალაქის მწერალმა ეფესოში შეკრებილი გაშმაგებული ბრბო: „მართლა გვემუქრება იმის საშიშროება, რომ ამბოხებისკენ მოწოდებაში დაგვადანაშაულონ დღეს მომხდარის გამო, ვინაიდან ვერაფრით გავამართლებთ ამ უწესრიგო თავყრილობას“ (სქ. 19:40). ბრალდება, რომელიც ტერტულუსმა რომაელ გამგებელ ფელიქსის თანდასწრებით წაუყენა პავლეს, თითქოს ის იუდეველებს ამბოხებისკენ მოუწოდებდა, საკმაოდ სერიოზული იყო, ვინაიდან თუ პავლეს დანაშაული დაუმტკიცდებოდა, სიკვდილით დასჯა არ ასცდებოდა (სქ. 24:5).