შებნა

[შესაძლოა შებანიას შემოკლებული ფორმა]

მეფე ხიზკიას სამეფო კარის მოხელე. ერთ დროს შებნა სახლს (სავარაუდოდ, ხიზკიას სასახლეს) განაგებდა, რაც საკმაოდ დიდ თანამდებობად ითვლებოდა. მაგრამ იეჰოვას ბრძანებით ესაიამ გაკიცხა შებნა და უწინასწარმეტყველა, რომ მას გადააგდებდნენ მისი ადგილიდან. სავარაუდოდ, ამის მიზეზი შებნას სიამაყე და პატივმოყვარეობა იყო, რაც იმაში გამოიხატებოდა, რომ მან თავისთვის დიდებული სამარხი გამოკვეთა. მისი გრძელი სამოსელი, სარტყელი და სამფლობელო „დავითის სახლის გასაღებთან“ ერთად ღვთის მსახურ ელიაკიმს გადაეცა (ეს. 22:15—24).

აღსანიშნავია, რომ შებნას ძალაუფლება მთლიანად არ დაუკარგავს. ძვ. წ. 732 წელს, როცა სინახერიბი იერუსალიმს ემუქრებოდა, შებნა სამეფო კარის მწერლის მოვალეობას ასრულებდა. იმ დროს სახლთუხუცესს ელიაკიმთან და მემატიანესთან ერთად შებნა რაბშაკესთან მოსალაპარაკებლად გაგზავნეს. ისინი ტანსაცმელშემოხეულები დაბრუნდნენ ხიზკიასთან და რაბშაკეს სიტყვები ამცნეს, რის შემდეგაც მეფემ ისინი ესაიასთან გაგზავნა იეჰოვასთვის ამბის გამოსაკითხად (2მფ. 18:18—19:7; ეს. 36:3—37:7).