მკითხველთა შეკითხვები

■ ეთანხმება თუ არა ბიბლიის პრინციპებს, რომ დაქორწინებულმა ქრისტიანმა წყვილმა გამოიყენოს ჩასახვის საწინააღმდეგო აბები?

ბიბლია პირდაპირ არ ამბობს, რომ ქრისტიანი წყვილი ვალდებულია, ჰყავდეს შვილები და, თუ სურს ბავშვები, რამდენი. თითოეულმა წყვილმა პირადად და დიდი პასუხისმგებლობის გრძნობით უნდა გადაწყვიტოს, გაუწევს თუ არა კონტროლს ბავშვების სიმრავლეს. თუ მათ სურთ, რომ მიმართონ შობადობის კონტროლს, კონტრაცეპტივების არჩევა მათი პირადი საქმეა. მაგრამ მათ უნდა გადაწყვიტონ — ბიბლიიდან გამომდინარე თვალსაზრისისა და საკუთარი სინდისის თანახმად — თუ რომელი მეთოდი გამოიყენონ, რომ პატივისცემით მოეპყრონ სიცოცხლის სიწმინდეს.

ბიბლია გვიჩვენებს, რომ ადამიანის სიცოცხლე ჩასახვისთანავე იწყება; სიცოცხლის მომცემი ხედავს ახლადჩასახულ სიცოცხლეს, „ჩანასახს“, რომელიც შემდეგ საშვილოსნოში ვითარდება (ფსალმუნი 138:16; გამოსვლა 21:22, 23a; იერემია 1:5). ამიტომაც არავითარ შემთხვევაში არ უნდა მოისპოს ჩასახული სიცოცხლე. ეს იქნებოდა აბორტი.

ჩასახვის საწინააღმდეგო აბები ფართოდ გამოიყენება მთელ მსოფლიოში. როგორ იცავს ის ქალს? არსებობს ორი ძირითადი ტიპის აბი — კომბინირებული აბი და მხოლოდ პროგესტინის შემცველი აბი (მინიაბი). გამოკვლევით ნათელი გახდა მათი მოქმედების ძირითადი პრინციპი, თუ როგორ იცავენ ქალს ბავშვის გაჩენისგან.

კომბინირებული აბი შეიცავს ჰორმონებს: ესტროგენსა და პროგესტინს. „საკვებისა და სამედიცინო პრეპარატების ადმინისტრაციის“ (აშშ) თანახმად, კომბინირებული აბის მოქმედების „ძირითადი პრინციპი“ არის „ოვულაციის დათრგუნვა“. სათანადო მიღებისას ეს აბი თითქმის ყოველთვის თრგუნავს საკვერცხიდან კვერცხუჯრედის გამოსვლას. როდესაც არც მოუმწიფებელი და არც მომწიფებული კვერცხუჯრედი არ თავისუფლდება, საშვილოსნოს ლულაში განაყოფიერება არ ხდება. ამ ტიპის აბებმა, შეიძლება გამოიწვიოს „ენდომეტრიუმის“ [საშვილოსნოს ლორწოვანი გარსის] ცვლილებები (რაც, როგორც ჩანს, აქვეითებს ჩანასახის უნარს, ჩამაგრდეს საშვილოსნოს ლორწოვან გარსში)“, ეს კი მიჩნეულია მეორე ადგილზე მდგომ მექანიზმად.

იმ მიზნით, რომ თავი აარიდონ გვერდით ეფექტებს, შეიმუშავეს ესტროგენის მცირე დოზის შემცველი კომბინირებული აბები. როგორც ჩანს, ეს მცირე დოზის შემცველი კომბინირებული აბი საკვერცხეებში უფრო მეტ აქტიურობას იწვევს. დოქტორი გაბრიელ ბიელი, ჯანდაცვის ეროვნული ინსტიტუტის კონტრაცეპტივების შემუშავების ფილიალის მმართველი, ამბობს: „მეცნიერული ფაქტების უმეტესობა გვიჩვენებს, რომ ესტროგენის მცირე დოზის შემცველი აბებითაც კი ოვულაცია 100 პროცენტით კი არ ჩერდება, არამედ დაახლოებით 95 პროცენტით. მაგრამ ის ფაქტი, რომ ხდება ოვულაცია, იგივე არ არის, რომ ხდება განაყოფიერება“.

თუ ქალს დაავიწყდება კომბინირებული აბიდან, დანიშნული გეგმის თანახმად, თუნდაც ერთი აბის მიღება, საკმაოდ დასაშვებია, რომ ძირითადად მეორე ადგილზე მდგომი მექანიზმი შეუშლის ხელს შობადობას. ქალების გამოკვლევამ, რომლებსაც დაავიწყდათ მცირე დოზის ორი აბის მიღება, ცხადყო, რომ 36 პროცენტ შემთხვევაში არ მოხდა ოვულაცია. ჟურნალი „კონტრასეფშნ“ (Contraception) იუწყება, რომ ასეთ შემთხვევებში „ენდომეტრიუმსა და საშვილოსნოს ყელის ლორწოზე აბების გავლენამ შეიძლება კვლავაც გამოიწვიოს. . . კონტრაცეპტული უსაფრთხოება“.

რა შეიძლება ითქვას მეორე ტიპის აბზე — მხოლოდ პროგესტინის შემცველი აბის (მინიაბის) შესახებ? „დრაგ ევალუიშნს“ (Drug Evaluations) (1986) იუწყება: „ოვულაციის დათრგუნვა მხოლოდ პროგესტინის შემცველი კონტრაცეპტივის მთავარი შტრიხი არ არის. ეს ნივთიერება იწვევს საშვილოსნოს ყელის ლორწოს გასქელებას, რაც, ასე თუ ისე, აბრკოლებს სპერმას; მან შეიძლება გაახანგრძლივოს ლულაში გავლის პროცესი და აგრეთვე გამოიწვიოს ენდომეტრიული ინვოლუცია [რაც აჩერებს განაყოფიერებული კვერცხუჯრედის განვითარებას]“.

ზოგი მკვლევარი ირწმუნება, რომ მხოლოდ პროგესტინის შემცველი აბით „ნორმალური ოვულაცია მარტო 40 პროცენტში ხდება“. ასე რომ, ამ აბის მიღების დროს ხშირად ხდება ოვულაცია. სავარაუდოა, რომ საშვილოსნოს ყელის გარეთა პირის სქელი ლორწო შესაძლოა აჩერებს სპერმის მოძრაობას და ამგვარად, შესაძლოა, არ ხდება განაყოფიერება; მაგრამ, წინააღმდეგ შემთხვევაში, საშვილოსნოში აბებით გამოწვეული საზიანო გარემო შესაძლოა ხელს უშლის განაყოფიერებული კვერცხუჯრედის იმპლანტაციასა და ჩანასახის განვითარებას.

აუცილებელია იმის გათვალისწინებაც, რომ, როდესაც რეგულარულად ხდება ჩასახვის საწინააღმდეგოდ ორივე ტიპის აბების მიღება, სავარაუდოა, რომ უმეტეს შემთხვევაში არ ხდება განაყოფიერება და ამრიგად, არ არის აბორტული. მაგრამ, რადგანაც მხოლოდ პროგესტინის შემცველი აბის (მინიაბის) მიღების დროს უმეტეს შემთხვევაში ხდება ოვულაცია, უდიდესი შესაძლებლობა არსებობს, რომ ნაყოფის დაბადებას ხელს უშლის ახლადჩასახული სიცოცხლის საშვილოსნოში ჩამაგრების დათრგუნვით. მეცნიერულმა გამოკვლევებმა ცხადყო, რომ ჩვეულებრივ (საშვილოსნო, რომელზეც გავლენა არ მოუხდენია ჩასახვის საწინააღმდეგო აბებს) „პირველ გამორჩენილ პერიოდამდე კარგავს. . . სამოც პროცენტ განაყოფიერებულ კვერცხუჯრედს“. ფაქტი, რომ ეს ხდება, სავსებით განსხვავდება შობადობის კონტროლის იმ მეთოდის გამოყენების არჩევისგან, რომელიც თრგუნავს განაყოფიერებული კვერცხუჯრედის იმპლანტაციას.

როგორც ვხედავთ, განსახილველად არსებობს სავსებით განსაზღვრული მორალური ასპექტები, თუ წყვილი ექიმთან არჩევს ჩასახვის საწინააღმდეგო აბების გამოყენების საკითხს. ქრისტიანებმა ისე უნდა გადაწყვიტონ თვით პირადი საკითხებიც, რომ ჩვენი ღვთის, სიცოცხლის მომცემის, წინაშე შეინარჩუნონ ‘წრფელი სინდისი’ (საქმეები 23:1; გალატელთა 6:5).

[სქოლიოები]