დაე, არავინ გახრწნას შენი კეთილი ჩვევები

„ნუ დაიბნევით: ცუდი საზოგადოებანი ხრწნიან კეთილ ჩვევებს“ (1 კორინთელთა 15:33).

რამდენად ძლიერია მშობლიური სიყვარული! ის აღძრავს მშობლებს თავი გასწირონ შვილებისთვის, ასწავლონ და დაარიგონ ისინი. მოციქულ პავლეს, შესაძლოა, არ ჰყავდა საკუთარი შვილები, მაგრამ კორინთელ ქრისტიანებს სწერდა: „თუნდაც ათი ათასი აღმზრდელი გყავდეთ ქრისტეში, მამები ბევრი არა გყავთ, რამეთუ მე გშობეთ თქვენ ქრისტე იესოში სახარებით“ (1 კორინთელთა 4:15).

² ადრე პავლე მოგზაურობდა კორინთში, სადაც ქადაგებდა იუდევლებსა და ბერძნებს შორის. მან ხელი შეუწყო იქ კრების ჩამოყალიბებას. სხვა წერილში პავლემ თავისი მზრუნველობა შეადარა მეძუძური დედის მზრუნველობას, თუმცა კორინთის კრებისთვის ის მამის მსგავსი იყო (1 თესალონიკელთა 2:7). როგორც მოსიყვარულე ღვიძლი მამა, პავლე შეაგონებდა თავის სულიერ შვილებს. შენ შეგიძლია ისარგებლო კორინთელი ქრისტიანებისადმი მისი მამობრივი რჩევით: „ნუ დაიბნევით: ცუდი საზოგადოებანი ხრწნიან კეთილ ჩვევებს“ (1 კორინთელთა 15:33). რატომ სწერდა პავლე ამას კორინთელებს? როგორ შეგვიძლია ამ რჩევის გამოყენება?

რჩევები მათთვის და ჩვენთვისაც

³ პირველი საუკუნის ბერძენი გეოგრაფი სტრაბონი წერდა: «თავისი კომერციული საქმიანობის გამო კორინთი „მდიდარ“ ქალაქად იწოდება. რადგან ისთმოსზე მდებარეობს, ის ფლობს ორ ნავსადგურს, რომელთაგან ერთი გადის პირდაპირ აზიაში, ხოლო მეორე — იტალიაში, რაც აადვილებს საქონლის გაცვლა-გამოცვლას ორ ქვეყანას შორის». ყოველ ორ წელიწადში ერთხელ სახელგანთქმული ისთმოსის თამაშობების სანახავად კორინთში მრავალი ადამიანი მიედინებოდა.

⁴ როგორი იყო ხალხი ამ ქალაქში, რომელიც იყო როგორც სახელმწიფო ხელისუფლების, ასევე, აფროდიტესადმი ესთეტიკური თაყვანისცემის ცენტრი? პროფესორი ტ. ს. ევანზი ხსნიდა: „მოსახლეობა [იყო], ალბათ, დაახლოებით 400 000, საზოგადოება — მაღალი კულტურის მქონე, მაგრამ ზნედაცემული და ძალიანაც. . . აქაიაში მცხოვრები ბერძნები გამოირჩეოდნენ ცოცხალი ინტელექტითა და სიახლეებისადმი დაუოკებელი წყურვილით. . . მათი ეგოიზმი სექტანტობის ლამპრის გასამართავად მომარჯვებული ზეთის მსგავსი იყო.

⁵ გარკვეული დროის შემდეგ, ზოგიერთების მიერ, რომლებსაც ჯერ კიდევ ჰქონდათ ამპარტავნული ვარაუდების გამოთქმისკენ მიდრეკილება, კრება დაყოფამდე იყო მიყვანილი (1 კორინთელთა 1:10–31; 3:2–9). უდიდესი პრობლემა იყო ის, რომ ზოგიერთები ამბობდნენ: „არ არის მკვდრეთით აღდგომა“ (1 კორინთელთა 15:12; 2 ტიმოთე 2:16–18). როგორი მყარიც არ უნდა ყოფილიყო მათი მრწამსი (ანუ ცრუ მრწამსი), პავლეს მოუწია მათი გამოსწორება ნათელი მტკიცების მოყვანით, რომ ქრისტე „მკვდრეთით აღდგა“. ამგვარად, ქრისტიანებს შეეძლოთ ერწმუნათ, რომ ღმერთი მისცემდა „გამარჯვებას ჩვენი უფლის იესო ქრისტეს მიერ“ (1 კორინთელთა 15:20, 51–57). თუ შენ იქ იქნებოდი, დაგემუქრებოდა თუ არა საშიშროება?

⁶ მკვდრების აღდგომის შესახებ მყარი მტკიცებების გადმოცემისას, პავლემ უთხრა მათ: „ნუ დაიბნევით: ცუდი საზოგადოებანი ხრწნიან კეთილ ჩვევებს“. ეს რჩევა ეხებოდა კრების იმ წევრებს, რომლებიც არ ეთანხმებოდნენ სწავლებას მკვდრების აღდგომის შესახებ. უბრალოდ, მერყევი ხომ არ იყვნენ ისინი იმ საკითხებში, რომლებიც მათთვის გაუგებარი იყო? (შეადარე ლუკა 24:38). არა. პავლე წერდა: ‘ზოგიერთი თქვენგანი ამბობს, რომ არ არის მკვდრეთით აღდგომა’, ასე რომ, ისინი გამოთქვამდნენ განსხვავებულ აზრს, რომელიც განდგომილებისკენ ტენდენცია იყო. პავლეს კარგად ესმოდა, რომ მათ შეეძლოთ სხვების კეთილი ჩვევებისა და აზროვნების გახრწნა (საქმე 20:30; 2 პეტრე 2:1).

⁷ როგორ შეგვიძლია გამოვიყენოთ ურთიერთობის შესახებ პავლეს გაფრთხილება? მას მხედველობაში არ ჰქონია, არ დავხმარებოდით ისეთ ვინმეს კრებაში, ვისაც უჭირს ბიბლიური მუხლის ან სწავლების გაგება. ნამდვილად, იუდას 22-ე, 23-ე მუხლები შეგვაგონებს, გულმოწყალედ დავეხმაროთ ასეთი ეჭვის მქონე წრფელ პიროვნებებს (იაკობი 5:19, 20). მაგრამ პავლეს მამობრივი რჩევა უთუოდ უნდა გამოვიყენოთ, თუ ვინმე გამუდმებით ეწინააღმდეგება იმას, რაც ვიცით ბიბლიური ჭეშმარიტების შესახებ ან გამუდმებით სკეპტიკურ, ან ნეგატიურ აზრს გამოთქვამს. ჩვენ ფრთხილად უნდა ვიყოთ ასეთ პირებთან ურთიერთობისას. რასაკვირველია, თუ ვინმე აშკარად განდგება, სულიერმა მწყემსებმა უნდა დაიცვან ფარა (2 ტიმოთე 2:16–18; ტიტე 3:10, 11).

⁸ ჩვენ, ასევე, შეგვიძლია გამოვიყენოთ პავლეს მამობრივი სიტყვები 1 კორინთელთა 15:33-დან იმ ადამიანთა მიმართ, რომლებიც არ არიან კრების წევრები და ხელს უწყობენ ცრუ სწავლებებს. როგორ შეიძლება მოვხვდეთ მათ საზოგადოებაში? ეს შეიძლება მოხდეს, თუ ვერ განვასხვავებდით მათ, რომლებისთვისაც შევძლებდით დახმარების აღმოჩენას ჭეშმარიტების შესწავლაში, იმათგან, რომლებიც კამათს იწყებენ მხოლოდ ცრუ მოძღვრების მხარდაჭერის მიზნით. მაგალითად, სამქადაგებლო მსახურების დროს შეიძლება წავაწყდეთ პიროვნებას, რომელიც გარკვეულ საკითხებში არ გვეთანხმება, მაგრამ შემდეგში სურს ამაზე საუბარი (საქმე 17:32–34). თავისთავად ეს არ არის პრობლემა, ვინაიდან ჩვენ მოხარული ვართ ბიბლიის ჭეშმარიტება გავაცნოთ ისეთ ვინმეს, ვისაც სურს მისი გაგება და დამაჯერებელი მტკიცებების წარსადგენად ხელმეორედ ვბრუნდებით მასთან (1 პეტრე 3:15). მაგრამ ზოგიერთს არა აქვს ბიბლიის ჭეშმარიტების პოვნის ნამდვილი სურვილი.

⁹ მრავალი ადამიანი პაექრობს საათობით, კვირების განმავლობაში, მაგრამ არა იმიტომ, რომ ეძებს ჭეშმარიტებას. მათ სურთ, უბრალოდ, ძირი გამოუთხარონ სხვის რწმენას და ამავე დროს თავი მოიწონონ ებრაული და ბერძნული ენების ან ევოლუციური თეორიის მოჩვენებითი ცოდნით. როცა წააწყდებიან მათ, ზოგიერთი მოწმე გრძნობს გამოწვევას რის შედეგიცაა გაჭიანურებული ურთიერთობა, რომელიც კონცენტრირებულია ცრუ რელიგიურ რწმენაზე, ფილოსოფიაზე ან მცდარ მეცნიერულ შეხედულებებზე. აღსანიშნავია, რომ იესო თავს არიდებდა მსგავს შემთხვევებს, თუმცა შეეძლო გამარჯვება მოეპოვებინა რელიგიურ ლიდერებთან კამათში, რომლებიც განსწავლული იყვნენ ებრაულ და ბერძნულ ენებში. როცა გამოწვევას წააწყდებოდა, იესო მოკლედ პასუხობდა და შემდეგ თავისი ყურადღება ისევ გადაჰქონდა თავმდაბალ პირებზე, ნამდვილ ცხვრებზე (მათე 22:41–46; 1 კორინთელთა 1:23—2:2).

¹⁰ თანამედროვე კომპიუტერებმა ცუდი საზოგადოებისკენ სხვა გზებიც გახსნა. ზოგიერთი კომერციული ფირმა აბონენტებს სთავაზობს შესაძლებლობას, გამოიყენონ კომპიუტერი ან ტელეფონი ელექტრონული განცხადების დაფაზე ცნობის გასაგზავნად, ამის მეშვეობით პიროვნებას შეუძლია ამ განცხადების დაფაზე მოათავსოს ცნობა, რომელიც ხელმისაწვდომია ყველა აბონენტისთვის. ეს იწვევს რელიგიურ თემაზე ეგრეთ წოდებულ ელექტრონულ დებატებს. ქრისტიანები შეიძლება გაიტაცოს მსგავსმა დებატებმა და მრავალი საათი გაატარებინოს განდგომილური აზროვნების მქონე პიროვნებასთან, რომელიც შეიძლება კრებიდან არის გარიცხული. 2 იოანეს მე-9 და მე-11 მუხლების მითითება ხაზს უსვამს ცუდი საზოგადოებებისგან თავის არიდების მამობრივ რჩევასa.

თავს ნუ მოიტყუებთ

¹¹ როგორც ვთქვით, კორინთი იყო კომერციული ცენტრი უამრავი დუქნებითა და სავაჭრო დაწესებულებებით (1 კორინთელთა 10:25). ისთმოსის თამაშებზე ჩამოსულებიდან მრავალი ცხოვრობდა კარვებში და ამ ღონისძიების განმავლობაში მედუქნეები ვაჭრობდნენ ადვილად დასაშლელ ფარდულებში ან თავშესაფარ ჯიხურებში (შეადარე საქმე 18:1–3). ეს პავლეს შესაძლებლობას აძლევდა, ეპოვა იქ სამუშაო და ეკეთებინა კარვები. და მას შეეძლო სამუშაო ადგილი გამოეყენებინა კეთილი ცნობის სასარგებლოდ. პროფესორი ჯ. მერფი-ო’კონორი წერს: «დუქნიდან, რომელიც იმყოფებოდა აფუსფუსებულ ბაზარში. . . სახით ხალხით გაჭედილი ქუჩისკენ მჯდარ პავლეს თავისუფლად შეეძლო ურთიერთობა ჰქონოდა არა მარტო თანამშრომლებსა და კლიენტებთან, არამედ ქუჩაში მყოფ მრავალ ადამიანთანაც. როცა ვაჭრობა მინელდებოდა, მას შეეძლო ჩამდგარიყო კარებში და შეეჩერებინა ისინი, ვისზეც ფიქრობდა, რომ მოუსმენდნენ. . . წარმოუდგენელია, რომ მის ენერგიულობასა და დამაჯერებელ საუბარს, ის სწრაფად არ გაეხადა „ცნობილი“ იმ არემარეში და ეს იზიდავდა ცნობისმოყვარეებს, არა მარტო უსაქმურებს, არამედ ინფორმაციის გულწრფელ მაძიებლებსაც. . . გათხოვილი ქალები, რომლებსაც გაგონილი ჰქონდათ მის შესახებ, მოიმიზეზებდნენ საყიდლებს და ასე ახერხებდნენ მოსამსახურეებთან ერთად მასთან მისვლას. დაძაბულ პერიოდებში, როცა დევნა ან აშკარა საშიშროება დაემუქრებოდათ, მორწმუნეებს შეეძლოთ მასთან შეხვედრა, როგორც კლიენტებს. სახელოსნო, აგრეთვე, საშუალებას აძლევდა ჰქონოდა ურთიერთობა საქალაქო თვითმმართველობის მოხელეებთან».

¹² პავლე ხედავდა სამუშაო ადგილზე ‘ცუდი საზოგადოებების’ პოტენციალს. ჩვენც უნდა ამოვიცნოთ ის. აღსანიშნავია, რომ პავლემ აღწერა პოზიცია, რომელიც გავრცელებული იყო ზოგიერთებს შორის: „ვჭამოთ და ვსვათ, რადგან ხვალ დავიხოცებით“ (1 კორინთელთა 15:32). მან ეს უშუალოდ აღწერა თავის მამობრივ რჩევასთან ერთად: „ნუ დაიბნევით: ცუდი საზოგადოებანი ხრწნიან კეთილ ჩვევებს“. რა კავშირშია სამუშაო ადგილი და სიამოვნების ძიება პოტენციური საშიშროების შექმნასთან?

¹³ ქრისტიანებს სურთ სამუშაოზე გულითადები იყვნენ კოლეგების მიმართ და მრავალი შემთხვევა ცხადყოფს, თუ რამდენად ეფექტური შეიძლება იყოს ეს დამოწმებისთვის. მაგრამ თანამშრომლებმა შეიძლება არასწორად გაიგონ ასეთი გულითადობა, როგორც ურთიერთობისკენ გამოწვევა დროის ერთად საინტერესოდ გატარების მიზნით. მან შეიძლება ისე, სხვათაშორის დაგპატიჟოს სადილზე, შემოგთავაზოს სამუშაოს შემდეგ მცირე ხნით დასალევად დარჩენა ან დასვენების დღეებში ერთად გართობა. ეს ადამიანი შეიძლება კეთილი და პატიოსანი ჩანდეს და მოწვევაც შეიძლება უწყინარად გამოიყურებოდეს. მაგრამ პავლე გვირჩევს: „ნუ დაიბნევით“.

¹⁴ ზოგიერთი ქრისტიანი მოტყუვდა. მათ თანდათანობით მოადუნეს ყურადღება თანამშრომლებთან ურთიერთობის მიმართ. შესაძლოა, ეს აღმოცენდა საერთო სპორტული ინტერესების ან ჰობის ნიადაგზე. ან არაქრისტიანი თანამშრომელი შეიძლება იყოს განსაკუთრებით კეთილი და ყურადღებიანი, რაც გამოიწვევდა დროის ერთობლივად გატარების უფრო და უფრო გახშირებას იმ დონემდე, რომ ამ ურთიერთობას ამჯობინებდა კრებაში ზოგიერთთან ურთიერთობას. შემდეგ ამას შეიძლება მოჰყვეს მხოლოდ ერთი კრების გაცდენა. ის შეიძლება გახდეს საღამოს გვიან დაბრუნებისა და დილით სამქადაგებლო მსახურებაში მონაწილეობის ჩვევის მოშლის მიზეზი. ამას შეიძლება მოჰყვეს ისეთი კინო ან ვიდეოფილმების ყურება, რომელსაც ქრისტიანი, ჩვეულებრივ, ერიდება. „ოჰ, ეს მე არასდროს დამემართება“, შეიძლება ვფიქრობთ ჩვენ. მაგრამ ვინც მოტყუვდა, მათი უმრავლესობა, შესაძლოა, ასე ფიქრობდა. ჩვენ საკუთარ თავს უნდა დავუსვათ კითხვა: „რამდენად ვარ გადაწყვეტილებით აღსავსე, მივყვე პავლეს რჩევას?“

¹⁵ ის, რაც განვიხილეთ სამუშაო ადგილის შესახებ, ეხება მეზობლებთან ჩვენს ურთიერთობასაც. ნამდვილად, ძველი კორინთის ქრისტიანებს ჰყავდათ მეზობლები. ზოგიერთ კულტურაში ნორმალურია, იყო მეზობლებისადმი ძალიან მეგობრული და ყურადღებიანი. სოფლების იზოლირების გამო იქ მეზობლები ერთმანეთზე არიან დანდობილი. ზოგიერთ ქვეყანაში არსებობს ძალიან მტკიცე ნათესაური კავშირები, რის გამოც ხშირია ურთიერთმიპატიჟებები. მაგრამ, როგორც იესომ თვალნათლივ გვიჩვენა, მნიშვნელოვანია გაწონასწორებული თვალსაზრისი (ლუკა 8:20, 21; იოანე 2:12). გვაქვს თუ არა მიდრეკილება მეზობლებისა და ნათესავების მიმართ შევინარჩუნოთ იგივე ურთიერთობა, რაც გვქონდა ჭეშმარიტი ქრისტიანობის მიღებამდე? ხელახლა ხომ არ გადაგვეხედა ასეთი ურთიერთობებისთვის და შეგნებულად ხომ არ დაგვედგინა მართებული საზღვრები?

¹⁶ ერთხელ იესომ სამეფოს შესახებ სიტყვა შეადარა თესლს, რომელიც „გზასთან დავარდა, მოვიდნენ ფრინველები და აკენკეს ის“ (მათე 13:3, 4, 19). მანამდე კი ეს ნიადაგი დაიტკეპნა მრავალი ადამიანის წინ და უკან სიარულის გამო. ასე ემართება მრავალ ადამიანს. მათი ცხოვრება აღსავსეა მეზობლებით, ნათესავებითა და მიმსვლელ-მომსვლელებით, რომლებიც მათ დიდ დროს ართმევენ. ეს, როგორც მოყვანილი იყო, ტკეპნის მათი გულის ნიადაგს და ჭეშმარიტების თესლს ფესვის გადგმას უძნელებს. მსგავსი გულგრილობა შეიძლება განვითარდეს პიროვნებაში, ვინც უკვე ქრისტიანია.

¹⁷ ზოგიერთი მეზობელი ან ნათესავი შეიძლება იყოს მეგობრული და თანამგრძნობი, მაგრამ არსებითად არავითარ ინტერესს არ ავლენდეს სულიერი საქმეების მიმართ და არავითარ სიყვარულს — სამართლიანობისადმი (მარკოზი 10:21, 22; 2 კორინთელთა 6:14). რადგან ქრისტიანები გავხდით, ეს არ ნიშნავს, რომ გავხდით არამეგობრულნი ან მოურიდებელნი. იესო გვირჩევდა, გამოგვევლინა სხვების მიმართ ნამდვილი ინტერესი (ლუკა 10:29–37). მაგრამ როგორც შთამაგონებელი, ასევე აუცილებელია პავლეს რჩევა, ვიყოთ წინდახედულები ჩვენს ურთიერთობებში. როცა ვიყენებთ ზემოთ მოყვანილ რჩევას, არ უნდა დაგვავიწყდეს ეს უკანასკნელიც. თუ გონებაში არ გვექნება ორივე პრინციპი, ჩვენი ჩვევები შეიძლება გაიხრწნას. როგორია შენი ჩვევები შენს მეზობლებსა და ნათესავებთან შედარებით პატიოსნების ან კეისრის კანონისადმი მორჩილების საკითხში? მაგალითად, ისინი შეიძლება თვლიდნენ, რომ გადასახადის გადახდის დროს შემოსავლის ან ფინანსური მოგების შესახებ ინფორმაციის დამახინჯება არსებობისთვის აუცილებელია. მათ შეიძლება დამაჯერებლად ილაპარაკონ თავიანთ შეხედულებებზე, თუ შემთხვევით მოხვდები მათთან ფინჯან ყავაზე ან ხანმოკლე შეხვედრაზე. როგორ შეიძლება ამან იმოქმედოს შენს აზროვნებასა და პატიოსან ჩვევებზე? (მარკოზი 12:17; რომაელთა 12:2). „ნუ დაიბნევით: ცუდი საზოგადოებანი ხრწნიან კეთილ ჩვევებს“.

ახალგაზრდული ჩვევებიც

¹⁸ ახალგაზრდები ადვილად ექცევიან ნანახისა და გაგონილის გავლენის ქვეშ. არ შეგინიშნავს, თუ როგორ ჰგავს ბავშვი ჟესტებითა და მანერებით თავის მშობლებს ან და-ძმებს? ჩვენ არ უნდა გაგვაოცოს, რომ ბავშვებზე შეიძლება მნიშვნელოვან გავლენას ახდენდნენ თავიანთი სიყრმის მეგობრები ან სკოლის ამხანაგები (შეადარე მათე 11:16, 17). თუ შენი შვილი იმყოფება ისეთი ახალგაზრდების წრეში, რომლებიც უპატივცემლოდ ლაპარაკობენ თავიანთი მშობლების შესახებ, რატომ გგონია, რომ ეს გავლენას არ მოახდენს შენს შვილებზე? მაგრამ, თუ ისინი სხვა ახალგაზრდებისგან ხშირად ისმენენ უწმაწურ ლაპარაკს? თუ სკოლაში ან მეზობლობაში თანატოლები შეაგულიანებენ ახალი სტილის ფეხსაცმლის ან მოდური ძვირფასეულობისკენ? უნდა ვიფიქროთ, რომ ახალგაზრდა ქრისტიანები ასეთი გავლენის ქვეშ ვერ მოექცევიან? განა თქვა პავლემ, რომ 1 კორინთელთა 15:33-ის გამოყენებას აქვს ასაკობრივი ზღვარი?

¹⁹ თუ შენ მშობელი ხარ, გაქვს თუ არა შეგნებული ამ რჩევის საფუძვლიანობა შვილების შესახებ გადაწყვეტილების მიღებისას? იმის აღიარება, რომ ყველა ახალგაზრდა, რომელთა წრეშიც არის შენი შვილი მეზობლობასა თუ სკოლაში, არ ნიშნავს იმას რომ ცუდია — ალბათ დაგეხმარება. ზოგიერთი მათგანი, როგორიცაა შენი მეზობლები, ნათესავები და თანამშრომლები, შეიძლება იყვნენ სასიამოვნონი და წესიერნი. ეცადე, დაეხმარო შენს შთამომავლობას, დაინახოს ეს და შეითვისოს, რომ გაწონასწორებულად ეკიდები პავლეს ბრძნულ, მშობლიურ რჩევას კორინთელთა მიმართ. როდესაც ხედავენ შენს გაწონასწორებულ მოქმედებას, ეს შეიძლება მათ დაეხმაროს, რომ მოგბაძონ (ლუკა 6:40; 2 ტიმოთე 2:22).

²⁰ თქვენ, ვინც ჯერ კიდევ ახალგაზრდები ხართ, ეცადეთ განიხილოთ, თუ როგორ გამოიყენოთ პავლეს ეს რჩევა და გაითვალისწინოთ, რომ ეს მნიშვნელოვანია ყველა ქრისტიანისთვის, როგორც ახალგაზრდისთვის, ისე მოხუცისთვის. ეს შეიძლება ადვილი არ იყოს, მაგრამ რატომ არ უნდა შევხვდეთ ამ გამოწვევას მზად? გაიგეთ, ზოგიერთებს რომ ბავშვობიდან იცნობთ, ეს არ ნიშნავს, რომ ისინი ვერ იმოქმედებენ და ვერ გააფუჭებენ თქვენს ჩვევებს, რომლებითაც თქვენ, ქრიატიანი ახალგაზრდები ყალიბდებით (იგავნი 2:1, 10–15).

დადებითი ნაბიჯები ჩვენი ჩვევების დასაცავად

²¹ თითოეულ ჩვენგანს გვჭირდება ვინმესთან ურთიერთობა. ვინაიდან ფაქტია, რომ ურთიერთობებმა შეიძლება დადებითი ან უარყოფითი გავლენა იქონიონ, ფრთხილად უნდა ვიყოთ. ეს დადასტურდა ადამზე და ასწლეულების განმავლობაში დღემდე მცხოვრებ ყველა ადამიანზე. მაგალითად, იუდას ერთ-ერთი კარგი მეფე იოშაფატი სარგებლობდა იეჰოვას კეთილგანწყობილებითა და კურთხევით. მაგრამ შემდეგ მან დაუშვა, რომ თავისი ვაჟი დაქორწინებულიყო ისრაელის მეფის, აქაბის, ქალიშვილზე. ცუდ საზოგადოებასთან ეს ურთიერთობა იოშაფატს თითქმის სიცოცხლის ფასად დაუჯდა (მეოთხე მეფეთა 8:16–18; მეორე ნეშტთა 18:1–3, 29–31). თუ ჩვენ ურთიერთობის არჩევისას არაბრძნულ არჩევანს ვაკეთებთ, ეს შეიძლება გახდეს სწორედ ასეთი საფრთხე.

²² მოდი, გულთან ახლოს მივიტანოთ სიყვარულით აღსავსე რჩევა, რომლითაც პავლე მოგვიწოდებს 1 კორინთელთა 15:33-ში. ეს არ არის სიტყვები, რომლებიც მხოლოდ ასე ხშირად უნდა მოვისმინოთ და ვიმეოროთ დაზეპირების მიზნით. ისინი ირეკლავენ პავლეს მამობრივ სიყვარულს, რომელიც მას ჰქონდა კორინთელი ძმებისა და დების მიმართ და რომელიც ჩვენზეც ვრცელდება. და ეჭვგარეშეა, რომ ისინი შეიცავენ რჩევას, რომლითაც ჩვენმა ზეციერმა მამამ უზრუნველგვყო, რადგან მისი სურვილია ჩვენს ძალისხმევას წარმატება ჰქონდეს (1 კორინთელთა 15:58).

[სქოლიოები]

გახსოვს თუ არა?

◻ რომელ განსაკუთრებულ მიზეზზე წერდა პავლე 1 კორინთელთა 15:33-ში?

◻ როგორ შეგვიძლია გამოვიყენოთ პავლეს რჩევა სამუშაო ადგილზე?

◻ როგორი გაწონასწორებული თვალსაზრისი უნდა გვქონდეს მეზობლების შესახებ?

◻ რატომ არის 1 კორინთელთა 15:33 სათანადო რჩევა, განსაკუთრებით, ახალგაზრდებისთვის?

[სასწავლო კითხვები]

1, 2. ა) რას გრძნობდა მოციქული პავლე კორინთელი ქრისტიანების მიმართ და რატომ? ბ) რომელი განსაკუთრებული რჩევა უნდა მივიღოთ მხედველობაში?

3, 4. რა ვიცით პირველი საუკუნის კორინთისა და მისი მოსახლეობის შესახებ?

5. რა საშიშროება ემუქრებოდა კორინთელ ძმებს?

6. პავლეს რჩევა 1 კორინთელთა 15:33-დან, განსაკუთრებით, ვისთვის იყო გამოსადეგი?

7. როგორია ერთ-ერთი მდგომარეობა, რომლის დროსაც უნდა მივყვეთ 1 კორინთელთა 15:33-ს?

8. როგორი წინდახედულება უნდა გამოვიჩინოთ, როცა ვინმე ბიბლიის საწინააღმდეგო აზრს გამოთქვამს?

9. როგორ უნდა ვრეაგირებდეთ, როცა ვაწყდებით გამოწვევას ჩვენს რწმენასთან დაკავშირებით?

10. რატომ არის გაფრთხილება ქრისტიანებისთვის დროული, რომლებსაც აქვთ კომპიუტერი და რომლებისთვისაც ხელმისაწვდომია განცხადებების ელექტრონული დაფა?

11. რის შესაძლებლობას იძლეოდა კომერციული მდგომარეობა კორინთში?

12, 13. როგორ შეიძლება 1 კორინთელთა 15:33-ის მართებულად გამოყენება სამუშაო ადგილზე?

14. როგორ შეიძლება ზოგიერთი ქრისტიანი შეცდომაში იქნეს შეყვანილი ურთიერთობის საშუალებით?

15. როგორი გაწონასწორებული პოზიცია უნდა გვქონდეს მეზობლების მიმართ?

16. როგორ უნდა გავიგოთ იესოს სიტყვები მათეს 13:3, 4-დან?

17. როგორ შეუძლია მეზობლებსა და სხვებთან ურთიერთობას, იმოქმედოს ჩვენზე?

18. რატომ არის ახალგაზრდებისთვის სათანადო 1 კორინთელთა 15:33-ში მოცემული რჩევა?

19. რა თვალსაზრისი უნდა ჩაუნერგონ მშობლებმა შვილებს?

20. ახალგაზრდებო, რა გამოწვევას უნდა შევხვდეთ გაბედულად?

21. ა) რა გვჭირდება ურთიერთობასთან დაკავშირებით? ბ) რატომ შეგვიძლია ვიყოთ დარწმუნებული, რომ ზოგიერთთან ურთიერთობა შეიძლება საშიში აღმოჩნდეს?

22. რა უნდა მივიტანოთ გულთან ახლოს და რატომ?