გადამრჩენი მოქმედებები იეჰოვასაგან დღეს

იეჰოვას შესახებ ბიბლია გვეუბნება: „მრავალი სიავე ხვდება მართალს და ყველაფრისგან იხსნის უფალი“, „ვინაიდან იცის ღმერთმა, როგორ იხსნას განსაცდელისაგან ღვთისმოსავნი“ (ფსალმუნი 33:20; 2 პეტრე 2:9).

როგორ ეხმარება იეჰოვა გასაჭირში მყოფ თავის ხალხს? არა ბუნების ძალების სასწაულებრივად შეცვლით, ან სხვა ზებუნებრივი მოქმედებით, როგორც ამას მრავალი ადამიანი ფიქრობს, არამედ განსხვავებული ძალით, რომელიც ადამიანთა უმრავლესობას, სიმართლე რომ ვთქვათ, არ ესმის — სიყვარულით. დიახ, იეჰოვას უყვარს თავისი ხალხი და აღვივებს მათ შორის იმდენად ძლიერ სიყვარულს, რომ შესწევს უნარი შეასრულოს ის, რაც მათ სასწაულად ეჩვენებათ (1 იოანე 4:10-12, 21).

ზოგიერთი შეიძლება ამტკიცებს, რომ ამ კრიტიკულ დროში საჭიროა საკვები, წამლები და მატერიალური უზრუნველყოფა და არა სიყვარული. რასაკვირველია, ყოველივე ეს აუცილებელია. მიუხედავად ამისა, მოციქული პავლე მსჯელობს ასე: „სრული რწმენა რომ მქონდეს, ისეთი, რომ მთების გადაადგილება შემეძლოს, ხოლო სიყვარული არ გამაჩნდეს, არარაობა ვიქნებოდი. მთელი ჩემი ქონება რომ დავარიგო და ჩემი სხეული დასაწვავად გავწირო, ხოლო სიყვარული არ გამაჩნდეს არაფერი სარგებელი მაქვს“ (1 კორინთელთა 13:2, 3).

ჩვენ ხშირად ვკითხულობთ ნავსადგომებში დარჩენილი, გაფუჭებული ან მღრღნელების მიერ შეჭმული ჰუმანიტარული დახმარების შესახებ, იმ დროს, როდესაც ადამიანები იღუპებიან ავადმყოფობებისა და შიმშილისაგან. ან, რაც უფრო უარესია, ასეთი დახმარება შეიძლება ხარბი და უნამუსო ადამიანების ხელში ჩავარდეს, რომლითაც თვითონვე სარგებლობენ. ამრიგად, ერთია გქონდეს ხელმისაწვდომი მარაგი და სრულიად სხვა არის ხედავდე, რომ ამით გაჭირვებულები სარგებლობენ. ჭეშმარიტ სიყვარულსა და ზრუნვას შეუძლია განასხვავოს ეს.

სიყვარული მოქმედებაშია

ჰავაის კუნძულზე, კაუაიზე, რომლის მოსახლეობის რიცხვია 55 000 ადამიანი, 1992 წლის სექტემბერში ჩაიქროლა გრიგალმა „ინიკი“-მ. სიჩქარით 210 კილომეტრი საათში, გრიგალი, რომლის დაბერვა აღწევდა 260 კილომეტრს საათში, იყო 2 ადამიანის სიკვდილის მიზეზი, აგრეთვე დააზიანა 98 ადამიანი, დაანგრია სახლების 75 პროცენტი, უსახლკაროდ დატოვა 8 000 ადამიანი და 1 მილიარდი დოლარის ზარალი მოიტანა. ამ პატარა კუნძულზე მცხოვრებთა შორის, ექვს კრებაში იყო იეჰოვას დაახლოებით 800 მოწმე. როგორ გადაიტანეს მათ გრიგალი?

სანამ გრიგალი „ინიკი“ დაიწყებდა თავის მოქმედებას, მიმოსვლითი ზედამხედველის ხელმძღვანელობით, კრების უხუცესებმა დაამყარეს კონტაქტი კრებების ყველა წევრთან, რომ დარწმუნებულიყვნენ მათ უსაფრთხოებასა და მზადყოფნაში. ასეთმა სიყვარულუხვმა მზრუნველობამ მოწმეთა შორის სერიოზული ზიანის ან სიკვდილის არიდებას შეუწყო ხელი (შეადარე ესაია 32:1, 2).

მიუხედავად კომუნიკაციისა და ტრანსპორტირების დარღვევისა, იმათ შორის ვინც პირველი ჩავიდა გრიგალის მოქმედების ადგილზე, იყო საგუშაგო კოშკის საზოგადოების ჰონოლულუს ფილიალის სამი წარმომადგენელი, რომელთაც სამოქალაქო თავდაცვამ კაუაიზე ჩამოფრენის სპეციალური ნებართვა მისცა. მათ დაუყოვნებლივ დაამყარეს კონტაქტი ადგილობრივ მოწმეებთან და მომდევნო დილით, დახმარებისათვის გეგმის შედგენის მიზნით, მოაწყვეს შეხვედრა. მოთხოვნილებების შეფასებისა და ჰონოლულუს ფილიალის მეშვეობით საჭირო მასალის შეძენისათვის ჩამოყალიბდა დახმარების კომიტეტი. გაუჩერებლივ მუშაობისას, ისინი ხელმძღვანელობდნენ დაზარალებულთათვის საჭიროების მიწოდებას, ასევე დანგრეული სახლების დალაგებასა და შეკეთებას.

გაჭირვებაში მყოფ ძმებს მარდად გამოეხმაურნენ მოწმენი სხვა კუნძულებიდან. აეროპორტის გახსნისთანავე, კაუაიზე დასახმარებლად ჩამოფრინდა 70 მოწმე. ჰუმანიტარული დახმარება ღირებულებით 100 000 დოლარი, რომელიც ასევე შეიცავდა გენერატორებს, ნავთქურებს, ლამპებსა და საკვებს, იყო გადმოტანილი გემით. კუნძულზე ერთ-ერთი სამეფო დარბაზი გამოყენებული იყო როგორც საწყობი; თუმცა არსებობდა გაძარცვის საშიშიროება. შემდეგ, სამეფო დარბაზს რამდენიმე სატვირთო სამხედრო მანქანა მიუახლოვდა, რომელთა მძღოლებმაც თავისი მანქანების იქ გაჩერების ნებართვა ითხოვეს. ჯარისკაცები ჩამწკრივდნენ მანქანების დასაცავად, ამრიგად ჰუმანიტარული დახმარების გაძარცვის პრობლემა მოიხსნა.

ხალხის დასახმარებლად ძმები იყენებდნენ გენერატორებს, რომ ყოველ სახლში ორი ან სამი საათით ემუშავებინათ მაცივრები. სხვადასხვა სახლების დასალაგებლად და შესაკეთებლად იგზავნებოდა ძმათა ჯგუფები. როდესაც ისინი მუშაობდნენ დის სახლში, მისი მეუღლე, რომელიც სასტიკად ეწინააღმდეგებოდა ჭეშმარიტებას, იმდენად იყო აღფრთოვანებული, რომ არაფერი შეეძლო გაეკეთებინა; ის მხოლოდ იდგა გვერდზე და ტიროდა. სხვა ჯგუფის მუშაობის დროს მოწმეთა ქცევამ და ორგანიზებულობამ იმდენად ღრმა შთაბეჭდილება მოახდინა სტუმარზე კონტინენტიდან, რომ მიუახლოვდა მათ და ჰკითხა, თუ რამ გახადა ისინი ქვეყნიერებისაგან ამდენად განსხვავებულები. როდესაც ძმამ ახსნა, რომ მიზეზი ღმერთისა და თანაქრისტიანების მიმართ სიყვარულია, მამაკაცმა მიუგო: „როგორ შემიძლია შევიცნო ღმერთი?“ (მათე 22:37-40). შემდეგ მან დაამატა: „თქვენ იმდენად ორგანიზებულნი ხართ, რომ ვინმე, შესაძლოა, დაელოდება ფლორიდაში ჩემს დაბრუნებას!“

მთლიანობაში, იეჰოვას მოწმეებმა მიიღეს მონაწილეობა კაუაიზე 295 სახლის დალაგებასა და შეკეთებაში. აქედან 207-ს მხოლოდ მცირე შეკეთება დასჭირდა, ხოლო 54 სერიოზულად იყო დაზიანებული და 19 მთლიანად დანგრეული. მათი სამუშაო, აგრეთვე, შეიცავდა კუნძულზე მცხოვრები ყოველი მოწმის მონახულებას, რათა ყველას უზრუნველყოფაში დარწმუნებულიყვნენ. როდესაც ერთ დას მიუტანეს ჰუმანიტარული დახმარება, მისმა მეზობელმა, რომელიც ბუდისტი იყო, შენიშნა, რომ თანამორწმუნეთაგან ჩაის პატარა პარკიც არ მიუღია. სხვა ქალმა, რომლის სახლი მოწმეთა მიერ იყო დალაგებული, თქვა: „თქვენ ბევრჯერ მოსულხართ ჩემს კარებთან და მე ვფიქრობდი თქვენზე, როგორც კარგ მეზობლებზე, მაგრამ მეზობლური სიყვარულის ასეთმა გამომჟღავნებამ მაჩვენა, თუ რას წარმოადგენს თქვენი ორგანიზაცია. დიდი მადლობა ყველაფრისთვის, რაც თქვენ გააკეთეთ!“

თანაქრისტიანთათვის მატერიალურ საჭიროებებზე ზრუნვის გარდა, პასუხისმგებელი პირები ჰუმანიტარულ დახმარებასთან ერთად სულიერი კეთილდღეობისთვისაც იღწვოდნენ. გრიგალის შემდეგ, ორ დღეზე ნაკლებ ვადაში, რამდენიმე კრებამ უკვე ჩაატარა შეხვედრები. უმალ დაუბრუნდნენ მუშაობას წიგნის შესწავლის პატარა ჯგუფები. ადგილობრივი უხუცესების დასახმარებლად სხვა კუნძულებიდან კაუაიზე ჩამოვიდა 10 უხუცესი, რათა კუნძულზე მცხოვრებ ყველა მოწმესთან სამწყემსო მონახულება ჩაეტარებინათ. მომდევნო კვირას ექვსივე კრებაში ჩატარდა „საგუშაგო კოშკი“-ს შესწავლა, ასევე, დახმარების კომიტეტის წევრის 30 წუთიანი თემა ჰუმანიტარული დახმარების განაწილების შესახებ, დასასრულს კი ფილიალის კომიტეტის, ჰონოლულუდან სპეციალურად ამ მიზნით ჩამოსული წევრის 30 წუთიანი გამოსვლა. თვითმხილველი იუწყება: „ყველა იყო გამხნევებული შესანიშნავი ხელმძღვანელობით და გრძნობდა სულიერ მზადყოფნას დარჩენილი პრობლემების გადასალახავად. პროგრამის დასასრულს დამსწრეთა უმრავლესობა თვალცრემლიანი იყო, აპლოდისმენტები კი თავისით მოდიოდა“.

მსოფლიო ძმობა

ასეთი სიყვარული და მზრუნველობა ახასიათებს იეჰოვას ხალხს მთელ მსოფლიოში. როდესაც, დაახლოებით ერთი წლით ადრე, დასავლეთ სამოაში ციკლონმა „ვალი“-მ ჩაიქროლა, მან საკმაოდ დიდი ზარალი მოიტანა, მაგრამ თავისი ძმების დასახმარებლად, დედამიწის სხვადასხვა ნაწილიდან დაუყოვნებლივ ჩამოვიდნენ იეჰოვას მოწმეები. მოგვიანებით, როდესაც მთავრობამ ყველა რელიგიისათვის, იეჰოვას მოწმეების ჩათვლით, მათი შენობების აღდგენისათვის დახმარების ფონდი დააფუძნა, მოწმეებმა დაუბრუნეს თანხა და გააყოლეს წერილი, რომელშიც ატყობინებდნენ, რომ უკვე აანაზღაურეს ზარალი და რომ თანხა შეიძლება იყოს გამოყენებული მთავრობის შენობების აღსადგენად. მათი მოქმედება გამოქვეყნდა ადგილობრივ გაზეთში. ამის აღნიშვნისას, მთავრობის ერთმა მოხელემ იეჰოვას მოწმესთან საუბრისას თქვა, რომ განიცდიდა სირცხვილის დიდ გრძნობას, რადგან მიუხედავად იმისა, რომ ციკლონის მსვლელობის დროს ყველა დაზიანებული შენობა დაზღვეული იყო, ეკლესიამ, რომელსაც თვითონ ეკუთვნოდა, მთავრობისაგან ფული მიიღო.

ამის მსგავსად, 1992 წლის სექტემბერში, საფრანგეთის სამხრეთ აღმოსავლეთით მდინარე იუვეზის მომატებასა და ვეზონ-ლა-რომენისა და გარშემო მდებარე 15 სოფლის წალეკვას გამოეხმაურნენ იეჰოვას მოწმეები. ერთ ღამეში წყალდიდობის შედეგად დაიღუპა 40 ადამიანი, დაინგრა 400 სახლი, ასობით სხვა სახლი დაზიანდა და ათასობით ოჯახი დარჩა წყლისა და ელექტრობის გარეშე. მომდევნო დღეს, დილით ადრე, წყალდიდობის შედეგად დაზარალებულთა დასახმარებლად პირველები მოვიდნენ მოწმეები ადგილობრივი კრებებიდან. ამ რეგიონის მოწმეებმა გულწრფელად მიიღეს თავიანთ სახლებში თავშესაფარის გარეშე დარჩენილები. დასახმარებლად ყველა კუთხიდან ჩამოვიდა ასობით მოწმე. ახლომდებარე ქალაქ ორანჟში იყო დაფუძნებული დახმარების კომიტეტი, რათა მოხალისეთა ოთხი ჯგუფის კოორდინაცია მოეხდინა, რომლებმაც მოაშორეს ტალახი და დაალაგეს სახლები, გარეცხეს ტალახით გაჟღენთილი ურიცხვი ტანსაცმელი, ასევე გაამზადეს და მთელ დაზარალებულ ტერიტორიაზე მიუტანეს ხალხს საკვები და დასალევი წყალი. მათ ნებაყოფლობით დაალაგეს ადგილობრივი სკოლა და რამდენიმე მუნიციპალური შენობა. ძმებმა და ასევე მოსახლეობამ დიდად დააფასა მათი დაუღალავი შრომა.

სხვა მრავალ ადგილში იეჰოვას მოწმეები, ისევე როგორც ყველა ადამიანი, იტანჯებიან ისეთი უბედურებებისაგან, როგორიცაა წყალდიდობები, ქარიშხლები და მიწისძვრები. ისინი არ ადანაშაულებენ ღმერთს ან კიდევ სხვა ვინმეს, რადგან ესმით, რომ ეს მოვლენები გაუთვალისწინებელი ან აუცდენელი გარემოების შედეგია (ეკლესიასტე 9:11). უფრო მეტიც, რაც არ უნდა საზარელ ვითარებაში ჩავარდნენ ისინი დარწმუნებულნი არიან, რომ მათ იხსნის თანამორწმუნეთა თავგანწირული სიყვარული. ასეთი მოსიყვარულე მოქმედებები — რწმენის შედეგია, რომელსაც ისინი ამჟღავნებენ. მოციქული იაკობი განმარტავს: „თუ ძმა ან და შიშვლები არიან და დღიური საზრდო აკლიათ, რომელიმე თქვენგანი კი ეტყვის მათ: მშვიდობით იარეთ, გათბით და ისაზრდოეთ; სხეულისათვის საჭიროს კი არ მისცემთ, რა სარგებელია? ასეა რწმენაც. თუ საქმენი არ გააჩნია, თავისთავად მკვდარია“ (იაკობი 2:15-17).

ნამდვილი მფარველობის წყარო

იმის ნაცვლად, რომ დაამყარონ იმედი რაიმე სახეობის ღვთაებრივ სასწაულებზე, იეჰოვას მოწმეებს ესმით, რომ დახმარება მოიპოვება ქრისტიანულ მსოფლიო ძმობაში. სინამდვილეში, ის, რაც ძმობას ძალუძს შეასრულოს უბედურების დროს, სასწაულზე ნაკლები არაა. მათ ახსოვთ იესოს სიტყვები ჩაწერილი მათეს 17:20-ში: „მდოგვის მარცვლისოდენა რწმენა რომ გქონდეთ და უთხრათ ამ მთას: აქედან იქით გადადი, იგი გადავა, და არაფერი იქნება თქვენთვის შეუძლებელი“. დიახ, მთების მსგავსი დაბრკოლებები ქრება, როდესაც სიყვარულთან გაერთიანებული ჭეშმარიტი ქრისტიანული რწმენა იწყებს მოქმედებას.

ამ ცვალებად და სახიფათო დროს მთელ მსოფლიოში იეჰოვას ხალხი გრძნობს ღმერთის მფარველ კალთას. ისინი გრძნობენ იმას, რაც თქვა ფსალმუნმომღერალმა: „მშვიდად დავწვები და დავიძინებ, რადგან შენ, უფალო, მხოლოდ შენ მამყოფებ უშიშრად“ (ფსალმუნი 4:9). ისინი გაბედულად ეპყრობიან მათთვის მიცემულ დავალებას: „ექადაგება ეს სახარება სასუფევლის შესახებ მთელ მსოფლიოში ყველა ხალხს დასამოწმებლად. და მაშინ მოვა აღსასრული“ (მათე 24:14). მოწმეები, ყოველგვარი ეჭვის გარეშე, ელოდებიან, რომ იეჰოვა განახორციელებს განზრახვას მშვიდობიანი, სამართლიანი ახალი ქვეყნიერების შესახებ, რომელშიც ისინი აღარ დაიტანჯებიან ადამიანისა თუ სტიქიების მიერ გამოწვეული უბედურებების გამო (მიქა 4:4).

[სურათები მე-10 გვერდზე]

წყალდიდობისგან დაზარალებულთა დასახმარებლად ყველა მხრიდან ჩამოვიდნენ იეჰოვას მოწმეები