იეჰოვას მსჯავრი ცრუ მოძღვართა წინააღმდეგ
„იერუსალიმის წინასწარმეტყველთა შორისაც ვხედავ სიბილწეს: გარყვნილებას მისდევენ და ცრუობენ. . . სოდომივით გახდნენ ჩემთვის ყველანი და გომორასავით — მისი მცხოვრებნი“ (იერემია 23:14).
1. რატომ ეკისრება ძალიან სერიოზული პასუხისმგებლობა მას, ვინც ღვთიურ სწავლებას გადასცემს ადამიანებს?
ყოველი, ვინც ღვთიურ სწავლებას გადასცემს ადამიანებს, საკუთარ თავზე იღებს ძალზე სერიოზულ პასუხისმგებლობას. იაკობის 3:1 იძლევა გაფრთხილებას: „ჩემო ძმებო, ბევრი ნუ გახდებით მასწავლებლად [მოძღვრად]. იცოდეთ, რომ უფრო დიდ მსჯავრს მივიღებთ“. დიახ, ღმერთის სიტყვის მასწავლებლებს გაცილებით სერიოზული პასუხისმგებლობა აქვთ, ვიდრე საერთოდ, ქრისტიანებს. რა მნიშვნელობა ექნება ამას იმ ადამიანებისთვის, რომლებიც ცრუ მოძღვრები აღმოჩნდებიან? მოდით, გადავხედოთ იერემიას დროინდელ მდგომარეობას. ჩვენ დავინახავთ, თუ როგორ იძლეოდა წინასწარ გაფრთხილებას დღევანდელობის შესახებ.
2, 3. რა განაჩენი გამოუტანა იეჰოვამ იერუსალიმის ცრუ მოძღვართ იერემიას მეშვეობით?
2 მეფე იოშიას მეფობის მე-13 წელს, ძველი წელთაღრიცხვით 647 წელს, იერემია დაინიშნა იეჰოვას წინასწარმეტყველად. იეჰოვა უკმაყოფილო იყო იუდევლების და ამიტომ წარგზავნა იერემია მათ სამხილებლად. იერუსალიმის წინასწარმეტყველები, ანუ მოძღვრები, იეჰოვას თვალში „სიბილწეს“ სჩადიოდნენ. მათი გარყვნილება იმდენად უზომო იყო, რომ იეჰოვამ იერუსალიმი და იუდა შეადარა სოდომსა და გომორს. ყოველივე ამას აღწერს იერემიას 23-ე თავი. მე-14 მუხლი ამბობს:
3 „იერუსალიმის წინასწარმეტყველთა შორისაც ვხედავ სიბილწეს: გარყვნილებას მისდევენ და ცრუობენ, უკეთურთა მხარი უჭირავთ, რომ არცერთი მათგანი არ მოიქცეს თავის უკეთურობისგან. სოდომივით გახდნენ ჩემთვის ყველანი და გომორასავით — მისი მცხოვრებნი“.
4. ცუდი მორალის როგორი პარალელი არსებობს იერუსალიმის ცრუ მოძღვრებსა და თანამედროვე ქრისტიანულ სამყაროს შორის?
4 დიახ, ამ წინასწარმეტყველებმა, ანუ მოძღვრებმა დატოვეს ძალიან ცუდი ზნეობრივი მაგალითი, რამაც უბიძგა ადამიანებს ეკეთებინათ იგივე. შეხედე ქრისტიანთა მდგომარეობას დღეს! ნუთუ ისინი იერემიას დროინდელი იერუსალიმის მცხოვრებთა მსგავსნი არ არიან? დღეს სამღვდელოება ნებას რთავს, რომ მის წრეში არსებობდნენ მრუშები და ჰომოსექსუალისტები და მათთვის ნებადართულიც კი არის ღვთისმსახურების შესრულება ტაძრებში. ნუთუ განსაცვიფრებელია, რომ ეკლესიების მრევლის უამრავი წევრიც უზნეოა?
5. რატომ არის ქრისტიანული სამყაროს მდგომარეობა უფრო უზნეო, ვიდრე სოდომისა და გომორის მოსახლეობის?
5 იეჰოვამ იერუსალიმის მცხოვრებლები სოდომისა და გომორის მოსახლეობას შეადარა. მაგრამ ქრისტიანული სამყაროს მორალი, სოდომსა და გომორზე უფრო მეტად არის გახრწნილი. დიახ, ქრისტიანული სამყარო იეჰოვას თვალში საძრახისია. მათი მოძღვრები ბღალავენ ქრისტიანული მორალის კოდექსს. ეს კი იწვევს მორალური დეგრადაციის ატმოსფეროს, რომელიც გაჟღენთილია მანკიერების კეთების სურვილით და სხვადასხვაგვარი მაცდური მიდრეკილებებით. ასე ფართოდ გავრცელებული მორალურად დაცემული მდგომარეობა დღეს ჩვეულებრივ მოვლენად არის მიჩნეული.
„ცრუობენ“
6. რა თქვა იერემიამ იერუსალიმის წინასწარმეტყველთა ბოროტების შესახებ?
6 დაუკვირდი, თუ რას ამბობს მე-14 მუხლი იერუსალიმის წინასწარმეტყველების შესახებ. ისინი ‘ცრუობდნენ’. მე-15 მუხლის ბოლო ნაწილი დამატებით ამბობს, რომ „იერუსალიმის წინასწარმეტყველთაგან მოდის ცთუნება მთელს ქვეყანაში“. მე-16 მუხლი გვაფრთხილებს: „ასე ამბობს ცაბაოთ უფალი: არ შეისმინოთ წინასწარმეტყველთა სიტყვები, რასაც გიწინასწარმეტყველებენ, გაცთუნებენ ისინი, მოგონილ ხილვებს გიქადაგებენ, არა უფლისმიერს“.
7, 8. რატომ ჰგავს ქრისტიანული სამყაროს სამღვდელოება იერუსალიმის ცრუ წინასწარმეტყველთ და როგორ ზეგავლენას ახდენს ეს მათ მრევლზე?
7 იერუსალიმის ცრუ წინასწარმეტყველთა მსგავსად, ქრისტიანული სამყაროს სამღვდელოებაც ცრუობს, ავრცელებს განდგომილ მოძღვრებებს, რომლებიც არ გამომდინარეობს ღმერთის სიტყვისგან. რომელია ზოგიერთი ამ ცრუ მოძღვრებათაგანი? — სულის უკვდავება, სამება, განსაწმენდელი, ჯოჯოხეთის ცეცხლში ადამიანთა მარადიული წამება. ქრისტიანული სამყაროს სამღვდელოება ქადაგებს ყურის მომქავებელ მოძღვრებებს, რომელთა მოსმენაც სიამოვნებს ხალხს. ისინი განუწყვეტლივ იმეორებენ, რომ არავითარი უბედურება არ დაატყდება თავს ქრისტიანობას, რადგან ქრისტიანობას აქვს ღმერთის მშვიდობა. მაგრამ მღვდლები თავიანთ „მოგონილ ხილვებს“ ლაპარაკობენ. მათი სიტყვები არის სიცრუე. ისინი, რომელთაც სწამთ მსგავსი სიცრუის, სულიერად მოწამლულები არიან. ისინი მოტყუებულნი არიან და განადგურებისკენ მიდიან!
8 ყურადღება მიაქციე, თუ რა უთხრა ამ ცრუ მოძღვრებს იეჰოვამ 21-ე მუხლში: „მე არ გამომიგზავნია წინასწარმეტყველნი, თავად გამოიქცნენ; არაფერი მითქვამს მათთვის, თავისით წინასწარმეტყველებენ“. ასე რომ, დღეს სამღვდელოება არ არის ღმერთის მიერ წარმოგზავნილი და არც ღმერთის ჭეშმარიტებას ასწავლის. რა არის ამის შედეგი? — ბიბლიის შემაძრწუნებელი უცოდინარობა, რაც მრევლის წევრთა შორის არის გამეფებული, ვინაიდან მოძღვრები მათ ქვეყნიური ფილოსოფიით კვებავენ.
9, 10. ა) რა სიზმრები ჰქონდათ იერუსალიმის ცრუ მოძღვრებს? ბ) როგორ ასწავლის ქრისტიანული სამყაროს სამღვდელოება მათ მსგავსად ‘ცრუ სიზმრებს’?
9 გარდა ამისა, სასულიერონი ავრცელებენ ცრუ იმედებს. მიაქციე ყურადღება 25-ე მუხლს: „გავიგონე, რაც თქვეს წინასწარმეტყველებმა, სიცრუეს რომ ქადაგებენ ჩემი სახელით: მესიზმრა, მესიზმრაო!“ რა სიზმრები იხილეს მათ? 32-ე მუხლი ამბობს: „აჰა, თავს ვესხმი წინასწარმეტყველებს, ცრუ სიზმრებს რომ ხედავენ, ამბობს უფალი. ყვებიან მათ და აცთუნებენ ჩემს ერს თავიანთი ტყუილებით და ტრაბახით. მე კი არ გამომიგზავნია ისინი, არც არაფერი მიბრძანებია მათთვის, არც არაფერში არგიან ამ ხალხს, ამბობს უფალი“.
10 რა ცრუ სიზმრებსა და იმედებს ასწავლიან სასულიერონი? იმას, რომ დღეს კაცობრიობის ერთადერთ იმედს მშვიდობისა და უსაფრთხოების მისაღწევად წარმოადგენს გაერთიანებული ერების ორგანიზაცია. უკანასკნელ წლებში სამღვდელოება გაერო-ს უწოდებდა „თანხმობისა და მშვიდობის უკანასკნელ იმედს“, „მშვიდობისა და სამართლის უზენაეს ფორუმს“, „მსოფლიო მშვიდობის ძირითად იმედს“. რაოდენ დიდი ილუზიაა! კაცობრიობის ერთადერთი იმედი არის — ღმერთის სამეფო. მაგრამ სამღვდელოება არ ქადაგებს და არ ასწავლის ჭეშმარიტებას იმ ზეციური მთავრობის შესახებ, რომელიც იესოს ქადაგების მთავარი თემა იყო.
11. ა) როგორ შეურაცხყოფდნენ იერუსალიმის ცრუ მოძღვრები ღმერთის პირად სახელს? ბ) იერემიას კლასისგან განსხვავებით, როგორ რეაგირებენ ღმერთის სახელზე ცრუ რულიგიური მოძღვრები?
11 უფრო მეტს გვეუბნება 27-ე მუხლი: „ცდილობენ დაავიწყონ ჩემს ერს ჩემი სახელი თავიანთი ზმანებით, რომელთაც ერთმანეთს უყვებიან, როგორც მათმა მამა-პაპამ დაივიწყა ჩემი სახელი ბაალის გამო“. იერუსალიმის ცრუ წინასწარმეტყველნი აიძულებდნენ ხალხს, რომ დაევიწყებინათ ღმერთის სახელი. ნუთუ იმავეს არ აკეთებენ თანამედროვე დროის ცრუ რელიგიის წარმომადგენლები? და რაც ყველაზე ცუდია, ისინი მალავენ ღმერთის სახელს — იეჰოვა. ისინი ასწავლიან, რომ ღმერთის სახელის გამოყენება არ არის აუცილებელი და ეს სახელი ამოიღეს ბიბლიის თარგმანებიდან. ისინი სასტიკად ეწინააღმდეგებიან მათ, რომლებიც ასწავლიან, რომ ღმერთის სახელია იეჰოვა. მაგრამ იერემიას კლასი, სულით ცხებულ ქრისტიანთა დარჩენილი ნაწილი, თანაქრისტიანებთან ერთად, ბაძავს იესოს. ისინი მილიონობით ადამიანს ასწავლიან ღმერთის სახელის შესახებ (იოანე 17:6).
მათი დანაშაულის მხილება
12. ა) რატომ მიუძღვით უდიდესი ბრალი ცრუ რელიგიურ მოძღვრებს სისხლის ღვრაში? ბ) რა როლი ითამაშა სამღვდელოებამ მსოფლიო ომებში?
12 იერემიას კლასი ამხელს სამღვდელოებას, როგორც ცრუ მოძღვრებს, რომელთაც თავიანთი ფარა მიჰყავთ განადგურებისკენ მიმავალი ფართო გზით. დიახ, ცხებულთა დარჩენილმა ნაწილმა ნათელი გახადა, თუ რატომ დაიმსახურეს ამ მესიზმრეებმა იეჰოვასგან არაკეთილსასურველი განაჩენი. მაგალითად, იეჰოვას მსახურები ხშირად იყენებენ გამოცხადების 18:24-ს, სადაც წერია, რომ დიდ ბაბილონში „იქნა ნაპოვნი. . . დედამიწაზე ყველა მოკლულის სისხლი“. გაიხსენე ომები, რომლებიც რელიგიების დაპირისპირების საფუძველზე მოხდა. რამდენად დიდი დანაშაული მიუძღვის ცრუ რელიგიის მოძღვრებს! მათმა სწავლებებმა ხელი შეუწყო განხეთქილებებსა და სიძულვილს სხვადასხვა რწმენისა და ეროვნების ადამიანებში. პირველი მსოფლიო ომის შესახებ წიგნი — „მქადაგებლები არიგებენ იარაღს“ (ინგლ.) ამბობს: „კლერკები, [მღვდლები] ომს, თავიანთ მგზნებარე სულიერ მნიშვნელობასა და მიმართულებას ანიჭებდნენ. . . ამგვარად, ეკლესიები მთელი სამხედრო სისტემის განუყოფელი ნაწილი გახდა“. მსგავსი სიტუაცია იყო მეორე მსოფლიო ომის დროსაც. სამღვდელოება სავსებით უჭერდა მხარს ერთა შორის ომებს და აკურთხებდა შეიარაღებულ ძალებს. ქრისტიანულ ქვეყნიერებაში მიმდინარე ორი მსოფლიო ომის დროს ერთი და იგივე რელიგიის წარმომადგენლები ხოცავდნენ ერთმანეთს. საეროთა და სასულიეროთა ფრაქციები ქრისტიანულ სამყაროში დღემდე წარმოადგენენ სისხლის ღვრის მიზეზს. რაოდენ საზარელი შედეგი ჰქონდა მათ ცრუ მოძღვრებებს!
13. როგორ ამტკიცებს იერემიას 23:22, რომ ქრისტიანული სამყაროს სამღვდელოებას არავითარი კავშირი აქვს იეჰოვასთან?
13 გეთაყვა, ყურადღება მიაქციე იერემიას 23-ე თავის 22-ე მუხლს: „ჩემს საბჭოში რომ მდგარიყვნენ, ჩემს ერს გამოუცხადებდნენ ჩემს სიტყვებს და მოაქცევდნენ მათ ბოროტი გზიდან და ავკაცობიდან“. ქრისტიანული სამყაროს რელიგიური მქადაგებლები იეჰოვას საბჭოში რომ ყოფილიყვნენ, ახლო ურთიერთობა რომ ჰქონოდათ მასთან, როგორც ერთგულ და გონიერ მსახურებს, მაშინ ისინიც ღმერთის ნორმებთან შეთანხმებულად იცხოვრებდნენ. ისინიც აღუძრავდნენ სურვილს ქრისტიანული სამყაროს წარმომადგენლებს, რომ მოესმინათ ღმერთის სიტყვები. მაგრამ ამის ნაცვლად, თანამედროვე დროის ცრუ რელიგიის მოძღვრებმა ადამიანები ღმერთის მოწინააღმდეგის, სატანა-ეშმაკის, ბრმა მსახურებად აქციეს.
14. რომელი ძლიერი მხილება იქნა გაცხადებული 1958 წელს ქრისტიანული სამღვდელოების შესახებ?
14 სამღვდელოების მხილება იერემიას კლასის მიერ გამანადგურებელი იყო. მაგალითად, 1958 წელს ნიუ-იორკში იეჰოვას მოწმეთა საერთაშორისო კონგრესზე „ღვთაებრივი ნება“, საგუშაგო კოშკის საზოგადოების ვიცე-პრეზიდენტმა წარადგინა განცხადება, სადაც ნათქვამი იყო: „ყოველგვარი ორაზროვნებისა და ყოყმანის გარეშე ვაცხადებთ, რომ დანაშაულის, არასრულწლოვანთა სამართალდარღვევის, სიძულვილის, კამათის, ცრუ რწმენის. . . და ასევე, გამძვინვარებული საზოგადოებრივი მღელვარების ფესვები არის არასწორი რელიგია, ცრუ რელიგია, რომლის მმართველი არის კაცობრიობის უხილავი მტერი, სატანა-ეშმაკი. ადამიანთა შორის პასუხისმგებლობა მსოფლიო პირობების გამო ყველაზე მეტად ეკისრება რელიგიურ ხელმძღვანელებსა და წინამძღოლებს, ხოლო უფრო მეტად კი პასუხისმგებელია ქრისტიანული სამყაროს სამღვდელოება. . . . პირველი მსოფლიო ომის შემდეგ, ქრისტიანული სამყაროს ურთიერთობა ღმერთთან იერემიას დროინდელი ისრაელების ურთიერთობას ჰგავს. დიახ, ქრისტიანული სამყარო უფრო საზარელი განადგურების ზღურბლზე დგას ვიდრე იერემიას მიერ ნანახი იერუსალიმის განადგურება“.
ცრუ მოძღვართა განკითხვა
15. რას წინასწარმეტყველებს მშვიდობის შესახებ სამღვდელოება? განხორციელდება თუ არა ეს წინასწარმეტყველებები?
15 როგორ მოქმედებდა სამღვდელოება ამ გაფრთხილების შემდეგ? როგორც მე-17 მუხლი აღწერს: „ეუბნებიან ჩემს მაგინებლებს: უფალმა თქვა, მშვიდობა გექნებათო. და ყველას, ვინც თავის გულისთქმას აჰყოლია, ეუბნებიან: უბედურება არ დაგემართებათო“. არის თუ არა ეს სიმართლე? — არა! იეჰოვა გამოააშკარავებს სამღვდელოების წინასწარმეტყველებების სიცრუეს და არ განახორციელებს იმას, რასაც ისინი იეჰოვას სახელით ამბობენ. მაგრამ, მიუხედავად ამისა, სამღვდელოების ცრუ რწმუნება ღმერთთან დამყარებული მშვიდობის შესახებ ძალზე მაცდუნებელია!
16. ა) როგორია დღევანდელი ქვეყნიერების მორალური ატმოსფერო და ვის ეკისრება პასუხისმგებლობა ამის გამო? ბ) რას აკეთებს იერემიას კლასი ამ ქვეყნიერების გაუარესებული მორალის წინააღმდეგ?
16 შესაძლოა ფიქრობ: „როგორ, მე სამღვდელოებამ ცრუ მოძღვრებით გამასულელა? — არავითარ შემთხვევაში!“ მაგრამ ნუ იქნები ასე დარწმუნებული! გაიხსენე, რომ სამღვდელოების ცრუ სწავლებამ ხელი შეუწყო მზაკვრული და საშინელი მორალური ატმოსფეროს განვითარებას. მათი მოძღვრების თანახმად ნებადართულია ყველაფერი და ნებისმიერი უზნეობა მისატევებელია. გართობები, ფილმები, სატელევიზიო გადაცემები, ჟურნალები და მუსიკა გადაგვარების გზაზე მდგომი მორალით არის გაჟღენთილი. ამიტომ უნდა ვიყოთ ზედმიწევნით ფრთხილნი, რომ არ მოვექცეთ ამ დაცემული, მაგრამ მოხერხებული მზაკვრობით მიმზიდველი მორალის გავლენის ქვეშ. ახალგაზრდები შეიძლება გაებან დამაკნინებელი ფილმებისა და მუსიკის მახეში. გაიხსენე, რომ თანამედროვე ადამიანების მდგომარეობა, რომლებისთვისაც ყველაფერია ნებადართული, სამღვდელოების ცრუ მოძღვრებების უშუალო შედეგია და აგრეთვე მათივე დანაშაული, რომ მხარი ვერ დაუჭირეს ღმერთის სამართლიან ნორმებს. იერემიას კლასი იბრძვის ასეთი უზნეო თვალსაზრისის წინააღმდეგ და ეხმარება იეჰოვას მსახურებს, რომ მოერიდონ იმ ბოროტებას, რომელშიც ჩაფლულია ქრისტიანული სამყარო.
17. ა) იერემიას წინასწარმეტყველების თანახმად, რა განაჩენი დაატყდა თავს ბოროტ იერუსალიმს? ბ) რა დაემართება მალე ქრისტიანულ სამყაროს?
17 რა განაჩენს გამოუტანს დიდებული მსაჯული იეჰოვა, ქრისტიანული ქვეყნიერების ცრუ მოძღვრებს? მე-19, მე-20, 39-ე და მე-40 მუხლები პასუხობს: „აჰა, უფლის ქარიშხალი — რისხვა ამოვარდა! ქარბორბალა დაუბერავს და ბოროტეულთ დაატყდება თავს. არ გაბრუნდება უფლის რისხვა, ვიდრე არ შეასრულებს, ვიდრე არ მიაღწევს განზრახულს. . . სრულიად დაგივიწყებთ და დაგაგდებთ თქვენ და ამ ქალაქს, რომელიც თქვენთვის და თქვენი მამა-პაპისთვის მქონდა მოცემული; ჩაგაგდებთ სამუდამო სირცხვილში და სამუდამო დამცირებაში, რაც არასოდეს იქნება დავიწყებული“. ყოველივე აქ ჩამოთვლილი დაატყდა თავს იერუსალიმსა და მის ტაძარს, ხოლო ახლა, ძალიან მალე, მსგავსი გასაჭირი დაატყდება თავს ბოროტ ქრისტიანულ სამყაროს.
განაცხადი ‘უფლის განაჩენის [ტვირთის]’ შესახებ
18, 19. ‘უფლის განაჩენის [ტვირთის]’ შესახებ რა ამცნო იერემიამ იუდას და რა მნიშვნელობით?
18 რა არის იერემიას კლასისა და მათი თანამორწმუნეების პასუხისმგებლობა? 33-ე მუხლი გვეუბნება: ‘თუ შეგეკითხება ეს ხალხი ან წინასწარმეტყველი, ან მღვდელი: რა არისო უფლის განაჩენი [ტვირთი, აქ]? უთხარი მათ. . . [ო, რა ტვირთი ხართ თქვენ — ხალხო! აქ]. მე მიგატოვებთ თქვენ, ამბობს უფალი’.
19 ებრაულ სიტყვას, რომელიც გადმოთარგმნილია სიტყვით „ტვირთი“, აქვს ორი მნიშვნელობა. ის შეიძლება ნიშნავდეს ღმერთის მნიშვნელოვან განაჩენს, ასევე, რომელიმე პიროვნების შეწუხებასა და თავის მობეზრებას. აქ მოყვანილი გამოთქმა „იეჰოვას ტვირთი“ აღნიშნავს წინასწარმეტყველების სიმძიმეს — განაჩენს, რომ იერუსალიმი განადგურებისთვის იყო განწირული. მოსწონდა თუ არა ხალხს ისეთი მძიმე წინასწარმეტყველების სიტყვები, რომელსაც იერემია ღმერთის ძალით განუწყვეტლივ იმეორებდა? — არა, ხალხი დასცინოდა იერემიას: ‘რა არის უფლის განაჩენი (ტვირთი)? ჩვენ დარწმუნებული ვართ, რომ შენი წინასწარმეტყველება კიდევ ერთი დამღლელი ტვირთი იქნება!’ მაგრამ რა უთხრა იეჰოვამ მათ? აი, რა: „[ო, რა ტვირთი ხართ თქვენ — ხალხო!] მე მიგატოვებთ თქვენ“[აქ]. დიახ, ის ადამიანები იეჰოვასთვის ტვირთი იყო და იეჰოვა აპირებდა მათ მიტოვებას, რომ მეტად აღარ დასწოლოდნენ ტვირთად.
20. რა არის ‘უფლის განაჩენი [ტვირთი]’ დღეს?
20 რა არის „იეჰოვას ტვირთი“ დღეს? — ღმერთის სიტყვის წინასწარმეტყველური ცნობის სიმძიმე. ეს არის მძიმე განაჩენი, რომელიც ქრისტიანული სამყაროს მოახლოებულ განადგურებას იტყობინება. რადგან ჩვენ ვართ იეჰოვას ხალხი, გვაქვს სერიოზული პასუხისმგებლობა, რომ განვაცხადოთ ‘იეჰოვას ტვირთის’ შესახებ. ხოლო რაკი განადგურება ახლოვდება, ჩვენ ყველას უნდა ვაუწყოთ, რომ ქრისტიანული სამყაროს ჭირვეული წარმომადგენლები იეჰოვასთვის არის „ტვირთი“, დიახ, და ‘ო, რა ტვირთი!’ და რომ იეჰოვა მალე აპირებს თავი დააღწიოს ამ „ტვირთს“ და მიატოვოს ქრისტიანული სამყარო გასაჭირში.
21. ა) რატომ განადგურდა იერუსალიმი ძველი წელთაღრიცხვით 607 წელს? ბ) იერუსალიმის განადგურების შემდეგ რა დაემართა ცრუ წინასწარმეტყველებს და რა — იეჰოვას ჭეშმარიტ წინასწარმეტყველს და რის რწმენას გვინერგავს ეს დღეს ჩვენ?
21 იეჰოვას განაჩენი იერემიას პერიოდში აღსრულდა მაშინ, როდესაც ბაბილონელებმა ძველი წელთაღრიცხვით 607 წელს გაანადგურეს იერუსალიმი. ეს, წინასწარმეტყველების თანახმად იყო ‘სირცხვილი და. . . დამცირება’ ჯიუტი და ორგული ისრაელებისთვის (იერემია 23:39, 40). მომხდარმა დაანახა მათ, რომ იეჰოვამ, რომელსაც ისინი განუწყვეტლივ უტეხდნენ სახელს, ბოლოს და ბოლოს მიატოვა ისინი, რომ მოემკათ თავიანთი ბოროტების ნაყოფი. იერუსალიმის თავდაჯერებულ ცრუ წინასწარმეტყველთა ბაგეები სამუდამოდ დადუმდა. მხოლოდ იერემიას ბაგე აგრძელებდა წინასწარმეტყველების წარმოთქმას. იეჰოვამ არ მიატოვა ის. იეჰოვა ასევე არ მიატოვებს იერემიას კლასს, როდესაც მძიმე განაჩენის თანახმად გაანადგურებს ქრისტიანული სამყაროს სამღვდელოებასა და მათი სიცრუის დამჯერთ.
22. რა დაემართება ქრისტიანულ სამყაროს იეჰოვას განაჩენის თანახმად?
22 დიახ, რელიგიური ქრისტიანული სამყარო, რომელსაც გაძარცვავენ და სამარცხვინოდ ამხელენ, დაემსგავსება ძველი წელთაღრიცხვით 607 წელს გავერანებულ და დაუსახლებელ იერუსალიმს. ეს არის დამსახურებული განაჩენი, რომელიც იეჰოვამ გამოუცხადა ცრუ მოძღვრებს. ეს განაჩენი სისრულეში იქნება მოყვანილი. როგორც წარსულში, ნამდვილად შესრულდა ღვთის მიერ შთაგონებული იერემიას გაფრთხილება, ახლაც, თანამედროვე დროსაც შესრულდება. დაე, ვიყოთ იერემიას მსგავსნი. დაე, უშიშრად ვაუწყოთ ადამიანებს იეჰოვას წინასწარმეტყველური ტვირთი, რომ იცოდნენ მათ, თუ რატომ დაატყდებათ სრული სამართლიანობით მსჯავრი ცრუ რელიგიის მოძღვრებს.
[კითხვები გამეორებისთვის]
◻ როგორი თვალსაზრისი ჰქონდა იეჰოვას ძველი იერუსალიმის ბოროტებაზე?
◻ რა თვალსაზრისით „ცრუობს“ ქრისტიანული სამყარო?
◻ თანამედროვე დროის სამღვდელოების რა საძრახისი საქმიანობა იქნა მხილებული?
◻ იეჰოვას რომელი ‘ტვირთის’ შესახებ იუწყებიან დღეს?
[სურათი მე-8 გვერდზე]
იერუსალიმის წინასწარმეტყველნი სჩადიოდნენ „სიბილწეს“.
[სურათი მე-9 გვერდზე]
‘მოგონილ ხილვებს ქადაგებენ’.
[სურათი მე-10 გვერდზე]
განადგურებული იერუსალიმი ასიმბოლოებს იმას, თუ რა მოელის საბოლოოდ ქრისტიანულ სამყაროს.