იყავი დარწმუნებული, რომ იეჰოვა განახორციელებს თავის განზრახვებს
„მართალნი დაიმკვიდრებენ ქვეყანას და იარსებებენ მასზე უკუნისამდე“ (ფსალმუნი 36:29).
1. რა განზრახვა აქვს იეჰოვას კაცობრიობასა და დედამიწასთან დაკავშირებით?
როდესაც იეჰოვამ შექმნა ადამიანთა პირველი წყვილი, ადამი და ევა, ისინი სრულყოფილები შექმნა. და ღმერთმა ისე შექმნა ისინი, რომ შეეძლოთ მარადიულად ცხოვრება, თუკი მის კანონებს დაემორჩილებოდნენ (დაბადება 1:26, 27; 2:17). ღმერთმა ისინი დაასახლა სამოთხის ტერიტორიაზე (დაბადება 2:8, 9). იეჰოვამ უთხრა მათ: „ინაყოფიერეთ და იმრავლეთ, აავსეთ დედამიწა“ (დაბადება 1:28). ამგვარად, მათი შთამომავლებით შეივსებოდა მთელი დედამიწა და მთელი პლანეტა იქნებოდა სამოთხე, სადაც სრულყოფილი და ბედნიერი ადამიანები იცხოვრებდნენ. რაოდენ მშვენიერი დასაბამი ჰქონდა ადამიანთა ოჯახს! „დაინახა ღმერთმა ყოველივე, რაც გააჩინა, და აჰა, ძალიან კარგი იყო“ (დაბადება 1:31).
2. რა კითხვები წამოჭრა ადამიანთა მდგომარეობამ?
2 მაგრამ, ადამიანთა მდგომარეობა ათასწლეულების მანძილზე, საერთოდაც არ ჰგავს ღმერთის თავდაპირველ ჩანაფიქრს. კაცობრიობა ძალიან დაშორდა სრულყოფილებას და ვერ განიცდის ნამდვილ ბედნიერებას. ცხოვრების პირობები იწვევს მწუხარებას, და როგორც ნაწინასწარმეტყველები იყო, ეს პირობები უფრო უარესდება თანამედროვე დროს (2 ტიმოთე 3:1-5, 13). ამიტომ, რატომ შეიძლება ვიყოთ დარწმუნებულნი, რომ ღმერთის განზრახვა ადამიანების მიმართ ახლო მომავალში განხორციელდება? კიდევ დიდხანს იქნება თუ არა სამწუხარო პირობები?
რა იყო შეცდომა
3. რატომ მაშინვე არ მოუღო ბოლო იეჰოვამ ადამიანთა აჯანყებას?
3 იმ ადამიანებმა, რომლებსაც აქვთ ღმერთის სიტყვის ზუსტი შემეცნება, იციან, თუ რატომ დაუშვა ღმერთმა ასეთი საშინელი პირობები დედამიწაზე. მათ, აგრეთვე, ისიც იციან, თუ რას მოიმოქმედებს ღმერთი ამასთან დაკავშირებით. ბიბლიის მეშვეობით მათ გაიგეს, რომ ადამიანთა პირველმა წყვილმა არასწორად გამოიყენა მშვენიერი დიდებული ძღვენი, არჩევნის თავისუფლება, რომელიც ღმერთმა უბოძა ადამიანებს (შეადარე 1 პეტრე 2:16). მათი არჩევანი მცდარი იყო, რადგან სურდათ ღმერთისგან დამოუკიდებლად არსებობა (დაბადება, თავი 2 და 3). მათმა აჯანყებამ წამოჭრა უაღრესად მნიშვნელოვანი კითხვები, მაგალითად: აქვს თუ არა სამყაროს სუვერენს უფლება, რომ უხელმძღვანელოს ადამიანებს? არის თუ არა მისი მმართველობა ადამიანებისთვის საუკუთესო? შეუძლიათ თუ არა ადამიანებს, წარმატებით იმმართველონ ღმერთის ზედამხედველობის გარეშე? ამ შეკითხვაზე პასუხის საპოვნელად სარწმუნო გზა იყო ის, რომ კაცობრიობის მმართველობისთვის მიეცათ საუკუნეები. შედეგი, ყოველგვარი ეჭვის გარეშე, ცხადყოფდა, ნამდვილად შეეძლოთ თუ არა ადამიანებს თავისი შემოქმედისგან განცალკევებით არსებობა.
4, 5. ა) რა იყო ადამიანთა მიერ ღმერთის მმართველობის უარყოფის შედეგი? ბ) რა ცხადყო ყოველგვარი ეჭვის გარეშე ჟამთა სვლამ?
4 როდესაც ადამმა და ევამ მიატოვეს ღმერთი, ღმერთმა აღარ შეუნარჩუნა მათ სრულყოფილება. მისი მხარდაჭერის გარეშე მათი მდგომარეობა გაუარესდა. შედეგი იყო არასრულყოფილება, სიბერე და საბოლოოდ სიკვდილი. მემკვიდრეობითი კანონის თანახმად, ადამიანთა პირველმა წყვილმა ეს უარყოფითი თვისებები გადასცა მთელ თავის შთამომავლობას, მათ შორის ჩვენც (რომაელთა 5:12). და რა შედეგი მოჰყვა ადამიანთა მმართველობას ათასწლეულების მანძილზე? — კატასტროფული მმართველობა, როგორც ეკლესიასტეს 8:9-ში სამართლიანად არის აღნიშნული: „კაცი კაცზე მძლავრობდა თავისდა საზიანოდ“.
5 ჟამთა სვლამ ყოველგვარი ეჭვის გარეშე ცხადყო, რომ ადამიანებს არ ძალუძთ თავიანთი შემოქმედისგან დამოუკიდებლად წარმატებით მართონ თავიანთი საქმიანობა. ბიბლიის ინსპირირებულმა მწერალმა, იერემიამ თქვა: „ვიცი, უფალო, რომ ადამიანის ნებაზე არ არის მისი გზა, რომ მიმავალი კაცი ვერ წარმართავს თავის ნაბიჯებს“ (იერემია 10:23; მეორე რჯული 32:4, 5; ეკლესიასტე 7:29).
ღმერთის განზრახვა არ შეცვლილა
6, 7. ა) შეცვალეს თუ არა ისტორიის ათასწლეულებმა იეჰოვას განზრახვა? ბ) რას შეიცავდა იეჰოვას განზრახვა?
6 შეცვალა თუ არა ბოროტებითა და ტანჯვით აღვსილმა, ადამიანთა ისტორიის ათასობით წლებმა ღმერთის განზრახვა? ღმერთის სიტყვა აღნიშნავს: „ასე ამბობს უფალი, ცათა შემოქმედი (ის არის ღმერთი, რომელმაც მიწა გამოსახა და შექმნა; მან დაამყარა იგი, საუკაცრიელოდ არ შეუქმნია, დასასახლებლად გამოსახა)“ (ესაია 45:18). მაშასადამე, ღმერთმა დედამიწა შექმნა იმისთვის, რომ ადამიანებით ყოფილიყო დასახლებული; ეს კვლავაც არის მისი განზრახვა.
7 იეჰოვამ დედამიწა მხოლოდ იმისთვის კი არ შექმნა, რომ ადამიანებით დაესახლებინა, არამედ იმისთვისაც, რომ მთელი დედამიწა სამოთხედ ქცეულიყო, რაც სიხარულს მოუტანდა სრულყოფილსა და ბედნიერ ადამიანებს. აი, რატომ იწინასწარმეტყველა ბიბლიამ, რომ იქნებოდა ‘ახალი დედამიწა’ — ადამიანთა საზოგადოება, ‘რომელზეც დამკვიდრებულია სიმართლე’ (2 პეტრე 3:13). გამოცხადების 21:4-ში ბიბლია გვეუბნება, რომ ახალ ქვეყნიერებაში ღმერთი „მოსწმენდს ყოველგვარ ცრემლს მათი [ადამიანების] თვალებიდან და აღარ იქნება სიკვდილი; გლოვა, გოდება და ტკივილიც აღარ იქნება“. სწორედ ამიტომ უწოდა იესომ ამ, მოახლოებულ ახალ ქვეყნიერებას, რომელიც დედამიწაზე იქნება, ‘სამოთხე’ (ლუკა 23:43).
8. რატომ შეგვიძლია ვიყოთ დარწმუნებულნი, რომ იეჰოვა განახორციელებს თავის განზრახვებს?
8 რადგან იეჰოვა არის სამყაროს ყოვლადძლიერი და ყოვლად ბრძენი შემოქმედი, არავის შეუძლია მისი განზრახვის ჩაშლა. „დაიფიცა ცაბაოთ უფალმა და თქვა: როგორც ჩავიფიქრე, ისე იქნება; როგორც გადავწყვიტე, ისე მოხდება“ (ესაია 14:24). ამგვარად, რადგანაც ღმერთმა თქვა, რომ დედამიწას გადააქცევს სამოთხედ, სადაც იცხოვრებენ სრულყოფილი ადამიანები — აუცილებლად მოხდება. იესომ თქვა: „ნეტარ არიან თვინიერნი, ვინაიდან ისინი დაიმკვიდრებენ ქვეყანას“ (მათე 5:5; შეადარე ფსალმუნი 36:29). ჩვენ შეგვიძლია ვიყოთ დარწმუნებულნი, რომ ეს დანაპირები განხორციელდება. სინამდვილეში, ჩვენ შეგვიძლია სიცოცხლე გავწიროთ ამისთვის.
მათ სწამდათ იეჰოვა
9. რა გააკეთა აბრაამმა, რითაც ცხადყო, რომ სწამდა იეჰოვა?
9 კაცობრიობის ისტორიის მანძილზე მრავალი ადამიანი მზად იყო სიცოცხლეც კი გაეწირა ღმერთის განზრახვისთვის, რომელიც დედამიწასთან იყო დაკავშირებული იმიტომ რომ, ისინი დარწმუნებულნი იყვნენ, რომ ღმერთი განახორციელებდა მას. თუმცა, მათი ცოდნა შესაძლოა განსაზღვრული იყო, მათ სწამდათ იეჰოვა და თავიანთ ცხოვრებას უძღვნიდნენ ღმერთის ნების შესრულებას. მაგალითად ასეთი პიროვნება იყო, აბრაამი, რომელიც დედამიწაზე ქრისტეს მოვლინებამდე დაახლოებით 2 000 წლით ადრე ცხოვრობდა, დიდი ხნით ადრე, ვიდრე დაიწყებოდა ბიბლიის წერა. მას სწამდა, რომ იეჰოვა განახორციელებდა თავის აღთქმებს. შესაძლებელია, რომ აბრაამმა შემოქმედის შესახებ შეიტყო თავისი წინაპრისგან, ერთგული სემისგან, სემმა კი, თავის მხრივ, გაიგო ნოესგან. ამიტომ, როდესაც ღმერთმა უთხრა აბრაამს, დაეტოვებინა ქალდეველთა მდიდარი ქალაქი ურა, რომ გამგზავრებულიყო უცნობ და საშიშ ქვეყანაში, ქანაანში, პატრიარქმა იცოდა, რომ შეეძლო მინდობოდა იეჰოვას და ამიტომაც გაემგზავრა (ებრაელთა 11:8). მოგვიანებით იეჰოვამ უთხრა მას: „გაქცევ დიდ ხალხად“ (დაბადება 12:2).
10, 11. რატომ იყო აბრაამი მზად, რომ საკუთარი მხოლოდშობილი შვილი მსხვერპლად შეეწირა?
10 რა მოხდა მას შემდეგ, რაც აბრაამს შეეძინა ისააკი? იეჰოვამ უთხრა აბრაამს, რომ ისააკის მეშვეობით მისი შთამომავლობა გადაიქცეოდა დიდ ხალხად (დაბადება 21:12). ასე რომ, ერთი შეხედვით სრულიად საპირისპიროდ ჩანდა, როდესაც იეჰოვამ რწმენის გამოცდის მიზნით უთხრა აბრაამს, რომ ისააკი მისთვის მსხვერპლად შეეწირა (დაბადება 22:2). ასე რომ, იეჰოვასადმი მტკიცე რწმენამ უბიძგა აბრაამს, შეესრულებინა მოთხოვნა, მან აღმართა დანა, რათა შეეწირა ისააკი. ბოლო მომენტში იეჰოვამ წარგზავნა ანგელოზი, რომ შეეჩერებინა აბრაამი (დაბადება 22:9-14).
11 რატომ იყო აბრაამი ასეთი მორჩილი? ებრაელთა 11:17-19 ამბობს: „რწმენით მიიყვანა აბრაჰამმა მსხვერპლად ისააკი, როცა გამოიცადა, და რაკი აღთქმა ჰქონდა, სწირავდა მხოლოდშობილს, რომელზეც ნათქვამი იყო: ისააკში დაგერქმევა შენ თესლი. ვინაიდან მიიჩნია, რომ ღმერთს მკვდრეთით აღდგენის ძალაც შესწევს; ამიტომ მიიღო იგი მაგალითის სახით“. მსგავსადვე აღნიშნავს რომაელთა 4:20, 21: „იგი [აბრაამი] არ შერყეულა ღმერთის აღთქმაში ურწმუნობით, . . . გულდაჯერებული იყო, რომ ის [ღმერთი], ვინც აღუთქვა, შესრულებასაც შეძლებს“.
12. როგორ იყო აბრაამი დაჯილდოებული რწმენის გამო?
12 აბრაამი თავისი რწმენის გამო დაჯილდოვდა არა მხოლოდ იმით, რომ შეწყალებული იქნა ისააკი და მისგან წარმოიშვა ‘დიდი ხალხი’, არამედ სხვა მხრივაც. ღმერთმა უთხრა აბრაამს: „იკურთხებიან შენი შთამომავლობის წყალობით ქვეყნიერნი, რადგან შეისმინე ჩემი სიტყვა“ (დაბადება 22:18). როგორ? ღმერთის ზეციური სამეფოს მეფე დაიბადებოდა აბრაამის შთამომავლობაში. ეს სამეფო გაანადგურებდა სატანის ბოროტ ქვეყნიერებას (დანიელი 2:44; რომაელთა 16:20; გამოცხადება 19:11-21). შემდეგ, მთელ გაწმენდილ დედამიწაზე, რომელსაც უხელმძღვანელებს ზეციური სამეფო, იქნება სამოთხე და ‘ყველა ხალხებიდან’ მოსული ადამიანები, რომლებიც ასრულებენ ღმერთის ნებას, მარადიულად დატკბებიან სრულყოფილი ჯანმრთელობითა და მარადიული სიცოცხლით (1 იოანე 2:15-17). მიუხედავად იმისა, რომ აბრაამი ფლობდა მხოლოდ განსაზღვრულ ცოდნას ღმერთის სამეფოს შესახებ, მას სწამდა ღმერთი და ელოდა სამეფოს დაარსებას (ებრაელთა 11:10).
13, 14. რატომ ენდობოდა იობი ღმერთს?
13 რამდენიმე ასწლეულის მოგვიანებით, ძველი წელთაღრიცხვით მე-17 და მე-16 საუკუნეებს შორის, ახლანდელი არაბეთის ტერიტორიაზე ცხოვრობდა იობი. ეს იყო ის პერიოდი, ვიდრე დაიწყებოდა ბიბლიის წერა. იობი იყო „ალალი, წრფელი, ღვთისმოშიში და ბოროტებას განრიდებული“ (იობი 1:1). როდესაც სატანამ იობს თავს დაატეხა საზიზღარი, მტანჯველი დაავადება, ერთგულმა იობმა, მძიმე განსაცდელის მიუხედავად, ‘არ სცოდა თავისი ბაგეებით’ (იობი 2:10). იობს სწამდა ღმერთი. იმ დროს, როდესაც არ იცოდა წვრილმანები, თუ რატომ იტანჯებოდა ასე ძლიერ, მან თავისი სიცოცხლე გასწირა ღმერთისა და მისი აღთქმებისთვის.
14 იობმა იცოდა, რომ თუ მოკვდებოდა, ღმერთს შესწევდა ძალა, ერთ მშვენიერ დღეს დაებრუნებინა მისთვის სიცოცხლე. მან ეს იმედი გამოავლინა მაშინ, როდესაც იეჰოვა ღმერთს უთხრა: „ოჰ, ნეტავ ქვესკნელში [სამარხში] დამმალავდე, . . . დროს დამინიშნავდე და მერე გამიხსენებდე! თუ მოკვდა კაცი, განა კვლავ იცოცხლებს?. . . დამიძახებდი და მეც ხმას გაგცემდი“ (იობი 14:13-15). იობმა ტანჯვაში ყოფნის დროსაც კი გამოამჟღავნა იეჰოვას სუვერენობისადმი რწმენა, მან თქვა: ‘სიკდვილამდე არ გავწირავ ჩემს უმწიკვლოებას!’ (იობი 27:5).
15. როგორ გამოთქვა დავითმა საკუთარი დაჯერებულობა იეჰოვას განზრახვების შესახებ?
15 იობის შემდეგ, დაახლოებით ექვსი საუკუნის მოგვიანებით და დედამიწაზე იესოს მოსვლამდე, დაახლოებით ათასი წლით ადრე, თავისი რწმენა, ახალი ქვეყნიერების შესახებ, გამოთქვა დავითმა. ფსალმუნებში მან თქვა: „უფალზე მინდობილნი დაიმკვიდრებენ ქვეყნიერებას. კიდევ ცოტა და აღარ იქნება ბოროტი, . . . ხოლო თავმდაბალნი დაიმკვიდრებენ ქვეყნიერებას და დაამდებიან დიდი მშვიდობით. . . მართალნი დაიმკვიდრებენ ქვეყანას და იარსებებენ მასზე უკუნისამდე“. დავითმა, რადგანაც ჰქონდა ურყევი რწმენა, თქვა: „მიენდე უფალს. . . ისიამოვნე უფლის მიერ და ის აგისრულებს გულის წადილს“ (ფსალმუნი 36:3, 4, 9-11, 29).
16. რა იმედი ჰქონდა ‘მოწმეთა დიდ ღრუბელს’?
16 საუკუნეების განმავლობაში ერთგულ მამაკაცებსა და ქალებს დედამიწაზე მარადიული სიცოცხლის იგივე იმედი ჰქონდათ. სინამდვილეში მათ წარმოქმნეს ‘მოწმეთა ღრუბელი’, და პირდაპირი გაგებით გასწირეს თავიანთი სიცოცხლე ღმერთის აღთქმებისთვის. იეჰოვას მრავალი უძველესი მოწმეთაგანი თავისი რწმენის გამო აწამეს და მოკლეს, მათ სწამდათ, რომ ‘უკეთეს აღდგომას მიაღწევდნენ’. როგორ მოხდება ეს? ახალ ქვეყნიერებაში ღმერთი დააჯილდოებს მათ უკეთესი აღდგომითა და მარადიული სიცოცხლით (იოანე 5:28, 29; ებრაელთა 11:35; 12:1).
ქრისტიან მოწმეებს სწამთ ღმერთი
17. რამდენად მტკიცე იყო პირველი საუკუნის ქრისტიანების რწმენა იეჰოვასადმი?
17 ახალი წელთაღრიცხვით პირველ საუკუნეში, ახლად დაფუძნებულ ქრისტიანულ კრებას იეჰოვამ უფრო მეტი დაწვრილებითი ცნობები განუცხადა სასუფევლისა და მისი მმართველობის შესახებ დედამიწაზე. მაგალითად, მისი სულით ინსპირირებულმა მოციქულმა იოანემ დაწერა, რომ იესოსთან ზეციურ სამეფოში გაერთიანებულთა რიცხვი 144 000 იქნებოდა. ისინი, ღმერთის ერთგული მსახურები, ‘ადამიანებისგან გამოსყიდულები იქნებიან’ (გამოცხადება 7:4; 14:1-4). ისინი ქრისტესთან ერთად უხელმძღვანელებენ დედამიწას, როგორც ‘მეფეები’ ზეცაში (გამოცხადება 20:4-6). პირველი საუკუნის ქრისტიანებს ისე მტკიცედ სჯეროდათ იეჰოვა ღმერთის განზრახვები ზეციური სამეფოსა და მიწიერი სამფლობელოს შესახებ, რომ მზად იყვნენ თავიანთი სიცოცხლე გაეღოთ ამ რწმენისთვის. უმრავლესობაც სწორედ ასე მოიქცა.
18. როგორ ბაძავენ თანამედროვე დროის მოწმეები დიდი ხნის წინანდელ თანამორწმუნეებს?
18 დღეს, იეჰოვას დაახლოებით ხუთ მილიონ მოწმეს ღმერთის მიმართ ისეთივე რწმენა აქვს როგორც მათ თანამორწმუნეებს, რომლებიც საუკუნეებით ადრე ცხოვრობდნენ. თანამედროვე დროის მოწმეებმაც გასწირეს თავიანთი სიცოცხლე ღმერთის აღთქმებისთვის. მათ თავიანთი სიცოცხლე უძღვნეს მას და აქვთ სრული ბიბლია, რომ განამტკიცონ თავიანთი რწმენა (2 ტიმოთე 3:14-17). იეჰოვას თანამედროვე დროის მოწმეები ბაძავენ იესოს პირველი საუკუნის მიმდევრებს, რომელთაც განაცხადეს: „ღმერთს უფრო მეტად უნდა ვმორჩილებდეთ, ვიდრე ადამიანებს“ (საქმე 5:29). ამ საუკუნეში, ქრისტიან მოწმეთაგან მრავალი სასტიკად იდევნებოდა. ზოგიერთი მათგანი კი რწმენის გამო იქნა მოკლული. სხვები კი მოკვდნენ ავადმყოფობით, ან უბედური შემთხვევით, ან კიდევ სიბერის გამო. წარსული დროის ერთგული მოწმეების მსგავსად, მათ სწამდათ იეჰოვა, რადგან იცოდნენ, რომ ღმერთი ახალ ქვეყნიერებაში დაუბრუნებს მათ სიცოცხლეს, ესე იგი აღადგენს მკვდრეთით (იოანე 5:28, 29; საქმე 24:15; გამოცხადება 20:12, 13).
19, 20. რა გავიგეთ ბიბლიური წინასწარმეტყველებებიდან ჩვენი დროის შესახებ?
19 იეჰოვას მოწმეები აფასებენ იმ ფაქტს, რომ მათი გამოსვლა მრავალი ხალხიდან და გაერთიანება მსოფლიო საძმოში დიდი ხნის წინათ იყო ბიბლიაში ნაწინასწარმეტყველები (ესაია 2:2-4; გამოცხადება 7:4, 9-17). იეჰოვამ დაავალა მათ მსოფლიო მასშტაბის სამქადაგებლო საქმიანობა, რომ შეკრიბოს თავისი წყალობისა და მფარვილობის ქვეშ გულწრფელი ხალხი (იგავნი 18:10; მათე 24:14; რომაელთა 10:13). ყოველი მათგანი სრულ ნდობას აცხადებს იეჰოვას მიმართ, რადგან იციან, რომ ის ძალიან მალე შეიყვანს მათ თავის საოცარ ახალ ქვეყნიერებაში (შეადარე 1 კორინთელთა 15:58; ებრაელთა 6:10).
20 ბიბლიური წინასწარმეტყველება ცხადყოფს, რომ სატანის ქვეყნიერება, გადამწყვეტი 1914 წლიდან უკვე დაახლოებით 80 წელია, იმყოფება უკანასკნელი დღეების პერიოდში. ეს ქვეყნიერება უახლოვდება აღსასრულს (რომაელთა 16:20; 2 კორინთელთა 4:4; 2 ტიმოთე 3:1-5). ამიტომ იეჰოვას მოწმეებს აქვთ მხნეობა და სიმტკიცე, რადგან ისინი მიხვდნენ, რომ ღმერთის სამეფო აიღებს პასუხისმგებლობას დედამიწის საქმიანობის სრული მოწესრიგებისთვის. ღმერთი ბოლოს მოუღებს დღევანდელ ბოროტ ქვეყნიერებას, დაამყარებს თავის სამართლიან ახალ ქვეყნიერებას, და სრულად წარხოცავს ცუდ მდგომარეობას, რომელიც საუკუნეების განმავლობაში არსებობდა დედამიწაზე (იგავნი 2:21, 22).
21. რა შეიძლება გვიხაროდეს თანამედროვე დროის პრობლემების მიუხედავად?
21 შემდეგ, მარადიულობის განმავლობაში, ღმერთი დაგვანახებს უდიდეს მზრუნველობას, გადმოაფრქვევს მრავალ კურთხევას, რომელიც გაცილებით უფრო მეტად აანაზღაურებს იმ ტკივილს, რომელიც წარსულში გვქონდა. ახალ ქვეყნიერებაში იმდენად ბევრი რამ იქნება კარგი, რომ წარსული პრობლემები მეხსიერებიდან თანდათანობით გაქრება. რაოდენ დამამშვიდებელია იმის ცოდნა, რომ იეჰოვა ‘აღაპყრობს ხელს და დააკმაყოფილებს ყოველ სულდგმულს’ (ფსალმუნი 144:16; ესაია 65:17, 18).
22. რატომ უნდა გვწამდეს იეჰოვა?
22 ახალ ქვეყნიერებაში ერთგული ადამიანები დაინახავენ რომაელთა 8:21-ში ჩაწერილი სიტყვების შესრულებას: „თვით ქმნილებაც განთავისუფლდება ხრწნილების მონობისაგან ღმერთის შვილთა დიდების თავისუფლებისათვის“. ისინი, აგრეთვე, იხილავენ იმ ლოცვის განხორციელებას, რომელიც იესომ ასწავლა თავის მიმდევრებს: „და მოვიდეს სუფევა შენი, და იყოს ნება შენი, ვითარცა ცათა შინა, ეგრეცა ქვეყანასა ზედა“ (მათე 6:10). ასე რომ, სრულად იწამე იეჰოვა, რადგან მისი უტყუარი აღთქმაა: „მართალნი დაიმკვიდრებენ ქვეყანას და იარსებებენ მასზე უკუნისამდე“ (ფსალმუნი 36:29).
როგორ უპასუხებდი?
◻ რა განზრახვა აქვს იეჰოვას კაცობრიობასა და დედამიწასთან დაკავშირებით?
◻ რატომ დაუშვა ღმერთმა ცუდი პირობები დედამიწაზე?
◻ როგორ უჩვენეს ძველი დროის ერთგულმა ადამიანებმა, რომ სწამდათ იეჰოვა?
◻ რატომ სწამთ დღეს ღმერთის მსახურებს იეჰოვა?
[სურათი 29-ე გვერდზე]
აბრაამს სწამდა, რომ იეჰოვას შესწევდა მკვდრების აღდგენის ძალა.