ბიბლია — წიგნი, რომლის წაკითხვაც საჭიროა
როდესაც პიროვნება საუბრობს ბიბლიის შესახებ, არ ყოფნის აღმატებითი სიტყვები. ბიბლია ყველაზე მეტად გავრცელებული წიგნია კაცობრიობის ისტორიაში. ბიბლია არის უძველესი, ყველაზე ხშირად ნათარგმნი და მისი ადგილები მრავალჯერ ციტირებული, უდიდესი ზეგავლენის მქონე და ყველაზე მეტად დაფასებული. შესაძლებელია, რომ ბიბლია, აგრეთვე, არის ყველაზე მეტად საკამათო. ეს არის წიგნი, რომელმაც გაუძლო მრავალ აკრძალვას, ცეცხლში დაწვასა და მოწინააღმდეგეთა მხრიდან უამრავ შებღალვას. არსებობს კიდევ ერთი აღმატებითი მხარე, რომელსაც, სამწუხაროდ, მეტად აღარ მიაკუთვნებენ ბიბლიას. ნაკლებად სარწმუნოა, რომ ბიბლიის კითხვა ყველაზე ფართოდ მიმდინარეობს მთელ მსოფლიოში.
ადამიანთა უმრავლესობა, რომელთაც სახლში, სადღაც დადებული აქვთ ბიბლია, ფიქრობს, რომ ძალიან დაკავებულია საიმისოდ, რომ დრო ბიბლიის კითხვაში დაკარგოს. ოდესღაც კითხვა გავრცელებული გართობა იყო. ახლა, უმეტესობას ურჩევნია, თავისუფალი დრო ტელევიზორთან ან სხვა საქმიანობაში გაატაროს. ზოგიერთს, რომელიც ჯერ კიდევ კითხულობს ლიტერატურას, ურჩევნია რაიმე მსუბუქი და იოლად აღსაქმელი წაიკითხოს. ბიბლიის კითხვა მოითხოვს კონცენტრაციას, ხოლო ადამიანთა უმრავლესობა აღარ ახდენს ღრმა კონცენტრირებას იმაზე, რასაც კითხულობს.
მაგრამ, ბიბლიამ იმიტომ კი არ გაუძლო საუკუნეებს, რომ უბრალოდ ჩვენი წიგნების თაროებზე ყოფილიყო მიტოვებული. მრავალი საფუძვლიანი მიზეზი არსებობს იმისთვის, თუ რატომ არის ბიბლიის წაკითხვა საჭირო. ამასთან დაკავშირებით განვიხილოთ ზოგიერთი ფაქტი.
არ არის გასაკვირი, რომ მან გაძლო!
ტერმინი „ბიბლია“ წარმოიშვა ბერძნული სიტყვიდან ბი·ბლიʹა რაც ნიშნავს „პატარა წიგნებს“. ეს შეგვახსენებს, რომ ბიბლია შედგება რამდენიმე წიგნისგან, რომელთაგანაც ზოგიერთი არც თუ ისე პატარაა! ეს წიგნები დაიწერა ათას ექვსასზე მეტი წლის განმავლობაში. მართალია ბიბლიის მწერლები იყვნენ ადამიანები, მაგრამ ეს ადამიანები შთაგონებულნი იყვნენ უზენაესი წყაროდან. ბიბლიის ერთ-ერთმა მწერალმა თქვა: „წინასწარმეტყველება არასოდეს არ წარმოთქმულა ადამიანის ნებით, არამედ ადამიანები, სულიწმიდის მიერ ამოქმედებულნი, წარმოთქვამდნენ მას ღმერთისაგან“ (2 პეტრე 1:21). ყოველივე, რაც ბიბლიური წინასწარმეტყველების შესახებ არის ნათქვამი, ასევე ბიბლიის დანარჩენ ნაწილსაც შეეხება. ღვთივსულიერი „პატარა წიგნები“ აღსავსეა იეჰოვა ღმერთის დიდებული აზრებით (ესაია 55:9). არ არის გასაკვირი, რომ ბიბლიამ გაუძლო საუკუნეებს!
ღმერთის მსახურთათვის, ყოველთვის ყველაზე მნიშვნელოვანი იყო ბიბლია. ისინი ეთანხმებიან პავლე მოციქულის სიტყვებს, რომელიც თავად იყო ბიბლიის მწერალი. მან თქვა: „მთელი წერილი ღვთივსულიერია და სასარგებლოა სასწავლებლად“ (2 ტიმოთე 3:16). ამიტომ, დღეს, ბიბლია არის იეჰოვას მოწმეთა რწმენის საფუძველი. ეს განსაზღვრავს მათ სწავლებებს და გავლენას ახდენს მათ მოქმედებებზე. ისინი მთელი გულით ურჩევენ ყველას, რომ ყოველდღიურად, თანდათანობით იკითხონ ღმერთის სიტყვა და მადლიერებით იფიქრონ მის არსზე (ფსალმუნი 1:1–3).
ბიბლიის კითხვის ჩვეულება
ბიბლიის კითხვის ჩვეულება სასარგებლო იყო წარსულში. ისრაელის მეფეებს ნაბრძანები ჰქონდათ, რომ ჰქონოდათ რჯულის თავიანთი ხელნაწერი ეგზემპლარები — ახლა ბიბლიის მნიშვნელოვანი ნაწილი — და ყოველდღიურად ეკითხათ იგი, როგორც ღმერთის ნების რეგულარული შემხსენებელი (მეორე რჯული 17:18–20). ბიბლიის კითხვის უგულებელყოფა მრავალი მეფის დაცემის მიზეზი იყო.
ბიბლიის შესწავლის ფასეულობა ნათლად ჩანს ასაკოვანი დანიელის ცხოვრებისეული შემთხვევიდან. იმ პერიოდში არსებული ბიბლიის ნაწილების შესწავლისას დანიელმა, ბაბილონში გადასახლებაში ყოფნის დროს ‘წიგნებიდან შეიტყო’, რომ იერემიას წიგნში ჩაწერილი მნიშვნელოვანი წინასწარმეტყველების შესრულება ახლოვდებოდა (დანიელი 9:2).
იმ პერიოდში, როდესაც იესო უნდა დაბადებულიყო „მართალი და ღვთის მოშიში“ კაცი სიმონი რწმენით ელოდა იმ პიროვნების ნახვას, რომელიც გახდებოდა მესია, ანუ ქრისტე. სიმონს აღუთქვეს, რომ ისე არ მოკვდებოდა, თუ არ იხილავდა ქრისტეს. როდესაც ხელში ეჭირა ყრმა იესო, სიმონის სიტყვებმა ესაიას წინასწარმეტყველებიდან ცხადყო, რომ ის იყო ბიბლიის წიგნების ყურადღებიანი მკითხველი, რომლის წერაც იმ პერიოდში უკვე დასრულებული იყო (ლუკა 2:25–32; ესაია 42:6).
როდესაც იოანე ნათლისმცემელი ქადაგებდა, „ხალხი მოელოდა“ მესიას. რას ცხადყოფს ეს? სავარაუდოა, რომ ებრაელთა უმეტესობისთვის კარგად იყო ცნობილი მესიის შესახებ წერილებში ჩაწერილი წინასწარმეტყველებები (ლუკა 3:15). ეს საინტერესოა, რადგან იმ დროისთვის წიგნები არ იყო იოლად ხელმისაწვდომი. ბიბლიის წიგნების ეგზემპლარებს მუყაითად ამზადებდნენ ხელით და შესაბამისად ძვირი და შესაძენად ძნელი იყო. საიდან იცოდა ხალხმა ბიბლიის წიგნების შინაარსი?
უმეტეს შემთხვევაში საჯარო კითხვით. მაგალითად, მოსემ უბრძანა ხალხს, რომ ყოველთვის განსაზღვრულ დროს ისრაელთა შეკრებისას ეკითხათ ღმერთის მიერ მიცემული რჯული (მეორე რჯული 31:10–13). ახალი წელთაღრიცხვით პირველი საუკუნისთვის ბიბლიის კითხვა თავშეყრის დროს ფართოდ იყო გავრცელებული. მოწაფე იაკობმა აღნიშნა: „მოსეს უძველესი თაობებიდანვე ჰყავს ყველა ქალაქში მისი მოქადაგენი და ყოველ შაბათს იკითხება სინაგოგებში“ (საქმე 15:21).
დღეს იოლია რომ იქონიო ბიბლიის პირადი ეგზემპლარი. ეს „პატარა წიგნები“, სულ მცირე, დედამიწის მოსახლეობის 98 პროცენტისთვის არის ხელმისაწვდომი. ამიტომ სამწუხაროა, რომ უმრავლესობა არ არის დაინტერესებული, გაიგოს, თუ რისი თქმა სურს მათთვის ბიბლიას. მართალია ჩვენ ვცხოვრობთ მეცნიერებათა ეპოქაში, მაგრამ ღმერთის სიტყვა, ბიბლია განსაკუთრებულად „სასარგებლოა სასწავლებლად“. ბიბლია იძლევა რჩევას მორალთან, ადამიანთა ურთიერთობასა და სხვა მრავალ საკითხთან დაკავშირებით. უფრო მეტიც, ბიბლია გვთავაზობს მშვიდობიანი მომავლის შესახებ ერთადერთ მტკიცე იმედს.
იკითხე რეგულარულად
იეჰოვას მოწმეებმა თავიანთი საქმიანობის ძირითად ნაწილად აქციეს, რომ გაამხნევონ სხვები, რეგულარულად იკითხონ ბიბლია. ნიუ-იორკში, მსოფლიო მთავარი განყოფილების ბრუკლინის ქარხნის შენობაზე მსხვილი ასოებით მოჩანს რჩევა: „იკითხე ღმერთის სიტყვა, წმიდა ბიბლია, ყოველდღიურად“. მილიონობით გამვლელს წაუკითხავს ეს სიტყვები და იმედია, რომ მრავალი მათგანი ითვალისწინებს მათ.
მთელ მსოფლიოში, იეჰოვას მოწმეთა 73 000 კრებაზე მეტი, ყოველკვირეულად ატარებს თეოკრატიული სამსახურის სკოლის კურსებს. კურსის ნაწილი გათვალისწინებულია ბიბლიის შერჩეული ნაწილის საჯარო კითხვისათვის. დამსწრეთაგან ყველას აქვს დავალება, რომ სახლში ყოველკვირეულად პირადად წაიკითხოს ბიბლიის რამდენიმე თავი. ისინი, რომლებიც მიჰყვებიან ამ განრიგს, შედეგად, მთელ ბიბლიას კითხულობენ.
ეს წესი შეთანხმებულია ამ სკოლის ერთ-ერთ სახელმძღვანელო წიგნთან. „თეოკრატიული სამსახურის სკოლის სახელმძღვანელო“ (რუს.) ამბობს: „შენი პირადი განრიგის ერთ-ერთი შემადგენელი ნაწილი თვით ბიბლიის კითხვისთვის გამოყოფილი დროც უნდა იყოს. ძალიან ფასეულია მისი წაკითხვა თავიდან ბოლომდე. . . მაგრამ, კითხვის დროს შენი მიზანი მხოლოდ მასალის გადაკითხვა კი არ უნდა იყოს, არამედ წაკითხულზე სრული თვალსაზრისის შეძენა და ჩაფიქრებული უნდა გქონდეს მისი დამახსოვრება. გამოყავი დრო, რომ იფიქრო იმის შესახებ, თუ რას ამბობს ბიბლია“.
იეჰოვას მოწმეების სხვა პუბლიკაციებიც მსგავსად ამხნევებენ მკითხველებს, რომ იკითხონ ბიბლია. მაგალითად, ამ ჟურნალის თანმხლებ ჟურნალში „გამოიღვიძეთ!“ მოცემულია ახალგაზრდებისთვის გამხნევება: „წაკითხული გაქვს თუ არა. . . ბიბლია თავიდან ბოლომდე? დიახ, ბიბლია დიდი წიგნია, მაგრამ იქნებ პატარ-პატარა ნაწილებად წაგეკითხა?. . . ‘კეთილშობილი’ ადამიანები ბერეაში ‘ყოველდღე არჩევდნენ წერილებს’ (საქმე 17:11). თუ შენ ყოველდღიურ განრიგში გექნება 15 წუთიანი კითხვა. . , ბიბლიის წაკითხვას შეძლებ ერთ წელიწადში“. დიახ, იეჰოვას მოწმეებს მიაჩნიათ, რომ თანამედროვე დროის ქრისტიანები კარგად უნდა იცნობდნენ წერილებს, ღმერთის წარსული დროის მსახურთა მსგავსად.
ამ მიზნით იეჰოვას მოწმეებმა მე-20 საუკუნეში შექმნეს ბიბლიის ერთობლივი კითხვის ახლი მეთოდი. მათ რამდენიმე ენაზე დაამზადეს აუდიოკასეტები, რომლებიც მთელ ბიბლიას შეიცავს. მრავალი ადამიანისთვის ეს შესანიშნავი დამხმარე აღმოჩნდა, რომ გადაელახა ბიბლიის კითხვის დაბრკოლება. ზოგიერთები უსმენენ ამ ჩანაწერებს, როდესაც საქმიანობენ ოჯახში, ატარებენ მანქანას ან როდესაც დაკავებულნი არიან სხვა საქმით. დაჯდე და მშვიდად უსმინო ბიბლიის ნაწილების კითხვას და ამავე დროს ჩუმად იკითხო საკუთარი ეგზემპლარი არის ძალიან სასიამოვნო.
თუ შენ ჯერ კიდევ ყოველდღიურად არ კითხულობ ბიბლიას, იქნებ ჩვეულებად აქციო მოქმედება? ეს არ მოითხოვს ყოველდღიურად დიდ დროს, მაგრამ სარგებელი ძალიან დიდი იქნება: წერილების გამოყენება შესაძლებლობას მოგცემს, რომ ბრძნულად იმოქმედო და დატკბე სულიერად ღირებული სიცოცხლით. შენ იმოქმედებ იმ ბრძანების თანახმად, რომელიც დიდი ხნის წინათ ისრაელთა წინამძღოლს, იესო ნავეს ძეს მიეცა: „ნუ გაქრება რჯულის ეს წიგნი შენი ბაგეებიდან, დღითა და ღამით ფიქრობდე მასზე, რომ ყველაფერი შეასრულო, რაც იქ წერია. რადგან მაშინ წარგემართება გზა და მაშინ გექნება წარმატება“ (იესო ნავეს ძე 1:8).
ბიბლიის ყოველი გვერდი მორჩილი კაცობრიობისთვის იეჰოვას სიყვარულით აღსავსე განზრახვას იუწყება. ღმერთის სიტყვის ზუსტი შემეცნების შედეგი არის ჭეშმარიტი ბედნიერება და სამოთხეში, შესანიშნავ ახალ ქვეყნიერებაში მარადიული ცხოვრების იმედი, სადაც უწყვეტი კურთხევა იქნება (ლუკა 23:43; 2 პეტრე 3:13). დაე, მტკიცედ ჩაეჭიდე მშვენიერ შესაძლებლობას, რომ წაიკითხო და შეისწავლო ბიბლია და მოიპოვე ეს შესანიშნავი სიცოცხლე.