ახალგაზრდებო, ვის სწავლებას მიჰყვებით?
„ზოგიერთები განდგებიან რწმენისაგან, დაუჯერებენ. . . ეშმაკთა მოძღვრებებს“ (1 ტიმოთე 4:1).
1. ა) რა არჩევანი აქვს ახალგაზრდობას? ბ) როგორ ასწავლის იეჰოვა?
ახალგაზრდებისადმი მიმართული, აქ მოყვანილი კითხვა ასეთია: ვის სწავლებას მიჰყვებით? ის ცხადყოფს, რომ თქვენ, ახალგაზრდებს, გაქვთ არჩევანი. არჩევანი ღვთიურ სწავლებაზე გამოხმაურებასა და დემონთა მოძღვრებების მიმდევრობას შორის. იეჰოვა გვასწავლის თავისი სიტყვის, ბიბლიის, და, ასევე, იმ ადამიანთა მსახურების მეშვეობით, ვისაც დედამიწაზე თავის წარმომადგენლებად იყენებს (ესაია 54:13; საქმე 8:26–39; მათე 24:45–47). მაგრამ გიკვირს, რომ დემონებიც ასწავლიან?
2. რატომ არის სასიცოცხლოდ მნიშვნელოვანი მოვერიდოთ დემონთა მოძღვრებებს, განსაკუთრებით კი ამ დროში?
2 მოციქული პავლე წერდა: „უკანასკნელ დროებში ზოგიერთები განდგებიან რწმენისაგან, დაუჯერებენ მაცდურ სულებს და ეშმაკთა მოძღვრებებს“ (1 ტიმოთე 4:1). ვინაიდან ჩვენ, ვცხოვრობთ „უკანასკნელ დღეებში“, როცა სატანა და მისი დემონები განსაკუთრებულად აქტიურები არიან, თუ ხვდები, რატომ დავსვით კითხვა: ვის სწავლებას მიჰყვები? (2 ტიმოთე 3:1–5; გამოცხადება 12:7–12). რადგან, სატანა და მისი დემონები იმდენად მზაკვარნი და მაცდუნებელნი არიან თავიანთი მოქმედების მეთოდებში, სასიცოცხლოდ მნიშვნელოვანია, რომ ყურადღებით განვიხილოთ ეს საკითხი (2 კორინთელთა 11:14, 15).
დემონები და მათი სწავლებები
3. ვინ არიან დემონები, რა არის მათი მიზანი და როგორ ცდილობენ მის განხორციელებას?
3 ოდესღაც, დემონები იეჰოვას ანგელოზები იყვნენ, მაგრამ აჯანყდნენ თავიანთი შემოქმედის წინააღმდეგ და ამის გამო, სატანის მომხრეები გახდნენ (მათე 12:24). მათი მიზანია გარყვნან ადამიანები და ღმერთისადმი მსახურებას მოაცილონ. ამის შესასრულებლად დემონები იყენებენ ადამიან-მოძღვრებს, რომ ხელი შეუწყონ ცხოვრებაში ეგოიზმისა და უზნეობის განვითარებას, რომელსაც განსჯის იეჰოვა (შეადარე 2 პეტრე 2:1, 12–15). იმის განხილვა, თუ როგორ იქცნენ დემონებად ოდესღაც ერთგული ანგელოზები დაგეხმარება, გამოიცნო მათი მოძღვრებები და ცხოვრების წესი, რომლის განვითარებასაც ეს მოძღვრებები ხელს უწყობს.
4. ა) რატომ ჩამოვიდნენ ურჩი ანგელოზები დედამიწაზე ნოეს დღეებში? ბ) რა მოუვიდათ ბოროტ ანგელოზებს და მათ შვილებს წარღვნის დროს?
4 ნოეს დღეებში ანგელოზების გარკვეულ რაოდენობას გაუჩნდა ისეთი ლტოლვა ადამიანთა ასულებისადმი, რომ ამ სულიერმა ქმნილებებმა მიატოვეს თავიანთი მდგომარეობა ზეცაში და ჩამოვიდნენ დედამიწაზე. ქალებთან სექსუალური კავშირის შედეგად გაჩნდნენ ჰიბრიდული ბავშვები, რომლებსაც ნეფილიმებს უწოდებდნენ. რადგან სულიერი ქმნილებებისთვის არაბუნებრივია ადამიანებთან სექსუალური კავშირის დამყარება, ამიტომ ის, რასაც აკეთებდნენ ურჩი ანგელოზები იმ ქალებთან, იყო ისეთივე მცდარი, როგორც მოგვიანებით სოდომის მამაკაცებისა და ბიჭების მიერ ჩადენილი ჰომოსექსუალური აქტები (დაბადება 6:1–4; 19:4–11; იუდა 6, 7). მიუხედავად იმისა, რომ იმ ანგელოზების ცოლები თავიანთ ჰიბრიდულ ბავშვებთან ერთად წარღვნით განადგურდნენ, ბოროტმა ანგელოზებმა ჩამოიცილეს მატერიალიზირებული, ხორციელი სხეულები და დაბრუნდნენ ზეცაში, სადაც გახდნენ სატანა-ეშმაკის თანამშრომელი დემონები (2 პეტრე 2:4).
5. როგორი ქმნილებები არიან დემონები და როგორ ცდილობენ, ძირი გამოუთხარონ ღმერთის კანონებს?
5 ამ ისტორიული მონაცემების გათვალისწინებით, თუ ხვდები, როგორი ქმნილებები არიან, სინამდვილეში, დემონები? ისინი არიან სექსუალურად გარყვნილი არსებები, რომლებიც ადამიანთათვის უხილავად მართავენ სექსზე გადარეულ ქვეყნიერებას. თუმცა მათთვის აკრძალულია კვლავ ხორცის შესხმა, რომ ადამიანების მსგავსნი იყვნენ, ისინი ტკბებიან იმ ადამიანთა სექსუალური გარყვნილებით, რომელთა შეცდენა შეუძლიათ დედამიწაზე (ეფესელთა 6:11, 12). დემონები ცდილობენ, ძირი გამოუთხარონ იეჰოვას კანონებს, რომლებიც დაკავშირებულია უმწიკვლოებასა და ზნეობრიობასთან, იმით, რომ წარმოადგენენ ამ კანონებს, როგორც ზედმეტად შემზღუდველს. ეს ბოროტი ანგელოზები პროპაგანდას უწევენ სექსუალურ უზნეობას, როგორც ცხოვრების ნორმალურ, სიამოვნების მომგვრელ სტილს.
ხელის შეწყობა დემონთა მოძღვრებების გავრცელებისთვის
6. რატომ არ უნდა გვიკვირდეს, რომ დემონები მზაკვრულად უწყობენ ხელს თავიანთი მოძღვრებების გავრცელებას?
6 ის, რომ დემონები მზაკვრულად ხელს შეუწყობდნენ თავიანთი მოძღვრებების გავრცელებას, არ უნდა იყოს ჩვენთვის გასაკვირი, რადგან ევას შეცდენის დროს ეს მეთოდი გამოიყენა მათმა მეთაურმა, სატანა-ეშმაკმა. გაიხსენე, რომ ლაპარაკისას მას თითქოს სურდა დახმარებოდა ევას. „მართლა გითხრათ ღმერთმა, ბაღის არცერთი ხის ნაყოფი არ შეჭამოთო?“ — ჰკითხა სატანამ. შემდეგ, ის შეეცადა, ცბიერად გამოეთხარა ძირი ღმერთის სწავლებისთვის, როცა ეუბნებოდა ევას, რომ აკრძალული ხიდან ჭამა სარგებლობას მოუტანდა. „როგორც კი შეჭამთ, — შეჰპირდა ეშმაკი, — თვალი აგეხილებათ და შეიქნებით ღმერთივით კეთილისა და ბოროტის შემცნობელნი“ (დაბადება 3:1–5). ამრიგად, ევა იყო შეცდენილი, დიახ, მოხიბლული, რომ არ დამორჩილებოდა ღმერთს (2 კორინთელთა 11:3; 1 ტიმოთე 2:13, 14).
7. რა შედეგი აქვს დემონთა მოძღვრებების მზაკვრულად გავრცელებას და რა გაფრთხილება გვეძლევა ჩვენ?
7 თანამედროვე დროში ძალიან ბევრი იყო შეყვანილი შეცდომაში. დემონები იმდენად მზაკვრულად უწყობდნენ ხელს სექსუალურ უზნეობას, რომ ის გახდა მისაღები მრავალთათვის, რომლებიც ოდესღაც კიცხავდნენ მას. მაგალითად, როდესაც შეერთებულ შტატებში ერთ-ერთი გაზეთის კარგად ცნობილმა კონსულტანტმა უპასუხა წერილს, დაუქორწინებელი პირების მიერ სქესობრივი კავშირის დამყარების თაობაზე, მან დაწერა: „არასდროს ვიფიქრებდი, რომ შევცვლიდი საკუთარ თვალსაზრისს ამ საკითხზე, მაგრამ ახლა მწამს, რომ წყვილებმა, რომლებიც სერიოზულად ფიქრობენ დაქორწინების შესახებ, უნდა გამოყონ დრო დასვენების დღეებში ერთად მოგზაურობისთვის, რომ შეამოწმონ, რამდენად უხდებიან ერთმანეთს“. მოგვიანებით მან დაუმატა: „ვერ ვიჯერებ, რომ ეს ჩემი დაწერილია!“. თვითონ ამ ქალსაც კი არ შეეძლო დაეჯერა, რომ ურჩევდა ადამიანებს სიძვას, მაგრამ ის აკეთებდა ამას! ნათელია, ჩვენ უნდა ვიფრთხილოთ, რომ დემონთა მოძღვრებებმა არ იმოქმედოს ჩვენს თვალსაზრისზე იმ მოქმედებების შესახებ, რომელსაც ღმერთი მსჯავრს სდებს (რომაელთა 1:26, 27; ეფესელთა 5:5, 10–12).
8. ა) როგორ გამოიყენება ბიბლიაში სიტყვა „ქვეყნიერება“? ბ) ვინ მართავს ქვეყნიერებას და როგორი თვალსაზრისი უნდა ჰქონდეთ იესოს მიმდევრებს ქვეყნიერებაზე?
8 არასდროს უნდა დავივიწყოთ, რომ სატანა არის „ამ ქვეყნიერების მთავარი“. სინამდვილეში, მოციქულმა იოანემ თქვა, რომ „მთელი ქვეყნიერება ბოროტის ძალაუფლებაში წევს“ (იოანე 12:31; 1 იოანე 5:19, აქ). მართალია, იესო ზოგჯერ იყენებდა სიტყვას „ქვეყნიერება“, როცა მთელ კაცობრიობას მოიხსენიებდა (მათე 26:13; იოანე 3:16; 12:46). მაგრამ, უფრო ხშირად ის იყენებდა სიტყვას „ქვეყნიერება“ ადამიანთა მთელი ორგანიზებული საზოგადოების მიმართ, რომელიც ჭეშმარიტი ქრისტიანული კრების გარეთ არსებობს. მაგალითად, იესომ თქვა, რომ მისი მიმდევრები არ უნდა იყვნენ „ქვეყნიერებისაგან“ (ადამიანთა ბიწიერი საზოგადოებისგან) და რადგან არაამქვეყნიურნი იყვნენ, ქვეყნიერება შეიძულებდა მათ (იოანე 15:19; 17:14–16). ბიბლია წინასწარ გვაფრთხილებს, რომ უნდა მოვერიდოთ მეგობრობას ქვეყნიერებასთან, რომელსაც მართავს სატანა (იაკობი 4:4).
9, 10. ა) რომელი ქვეყნიური საშუალებები აღძრავენ უხამს სექსუალურ სურვილებს? ბ) რამდენად შესაძლებელია იმის გამოცნობა, თუ ვინ დგას ქვეყნიური გართობებით გამოწვეული მოძღვრებების უკან?
9 მოციქული იოანე დაჟინებით გვირჩევდა: „ნუ შეიყვარებთ ქვეყნიერებას, ნურც იმას, რაც ქვეყნიერებაზეა“. აგრეთვე, მან თქვა: ‘ყოველივე, რაც ქვეყნიერებაზეა — ხორციელი გულისთქმა, თვალთა გულისთქმა და ამაო დიდება ცხოვრებისა — მამისაგან არ არის’ (1 იოანე 2:15, 16). დაფიქრდი ამაზე. რა არის დღეს ქვეყნიერებაში, რაც აღძრავს მცდარ სურვილებს, როგორც, ვთქვათ, ლტოლვას უკანონო სექსისკენ? (1 თესალონიკელთა 4:3–5). რას ვიტყოდით ამქვეყნიური მუსიკის მნიშვნელოვანი ნაწილის შესახებ? პირობითად მსჯავრდადებულთა ზედამხედველმა ქალმა, რომელიც კალიფორნიის პოლიციიდან იყო, თქვა: „ძირითადად, მუსიკა ასწავლის, რომ არ უნდა დაუჯერო მშობლებს, და რომ უნდა იცხოვრო ისე, როგორც გსურს“. თუ გეცნო ასეთი მუსიკით შემოთავაზებული მოძღვრებების წყარო?
10 გაიხსენე, რომ სატანამ, სინამდვილეში, უთხრა ევას: ‘შენ უშვებ ხელიდან რაღაცას. წარმართე ცხოვრება, როგორც გსურს. თავად გადაწყვიტე, თუ რა არის კეთილი, რა — ბოროტი. შენ არ გჭირდება ღმერთის მოსმენა’ (დაბადება 3:1–5). განა იგივე ცნობა, არ მოიპოვება ქვეყნიური მუსიკის უმეტეს ნაწილში? მაგრამ, დემონები ასწავლიან არა მხოლოდ მუსიკის მეშვეობით. სწავლებისთვის ისინი იყენებენ, ასევე, კომერციულ სატელევიზიო პროგრამებს, ფილმებსა და ვიდეოს. როგორ? ქვეყნიერების საკომუნიკაციო არხები სთავაზობს გართობებს, რომლებიც ღმერთის ზნეობრივ სწავლებებს წარმოადგენს, როგორც გადაჭარბებულს. ისინი პროპაგანდას უწევენ ქორწინების გარეშე კავშირს მასზე ყურადღების გამახვილებით და იმით, რომ ამ კავშირს სანატრელად წარმოადგენენ.
11. რას ასწავლის, ხშირად, ტელევიზია ზნეობასთან დაკავშირებით?
11 ჟურნალი „იუ.ეს. ნიუს ენდ ვორლდ რიპორტ“-ი (ინგლ.), ცხადყოფს: „საღამოს იმ პერიოდში, როდესაც ტელეგადაცემებს უმრავლესობა უყურებს, 1991 წლის განმავლობაში სამმა [ამერიკულმა] ქსელმა უჩვენა 10 000-ზე მეტი სექსუალური ეპიზოდი; ყოველ სცენაზე, რომელიც აღწერდა დაქორწინებულ პარტნიორთა შორის სექსუალურ კავშირს, მოდიოდა 14 სექსუალური სცენა დაუქორწინებლებს შორის“. როგორ ფიქრობთ, რას ასწავლის ტელევიზია, თუ ერთი წლის განმავლობაში, იმ პერიოდში, როცა ტელეგადაცემებს უმრავლესობა უყურებს, აკრძალული სექსის 9 000-ზე მეტ შემთხვევას უჩვენებს? ბარი საპოლსკი, რომელმაც გაწია თანამშრომლობა მოხსენების შექმნაში, სახელწოდებით, „სექსი ტელევიზიით საღამოს პერიოდში: 1979 წელი 1989-თან შედარებით“ (ინგლ.), ცხადყოფს: „თუ ყმაწვილი უყურებს ტელეგადაცემებს, სადაც ადამიანები არშიყობენ ან აშკარად სექსუალურად იქცევიან, მომავალი წლების განმავლობაში ათასობით ასეთი სცენა ასწავლიდა მას, რომ სექსი სასიამოვნოა და რომ მას არაფერი მოჰყვება შედეგად“. ეჭვგარეშეა: ქვეყნიური გართობები ასწავლიან ახალგაზრდებს, რომ წესები არ არსებობს, რომ ქორწინების გარეშე კავშირი მისაღებია, და რომ ცხოვრებას იმ ნორმებით, რომლებსაც იეჰოვა განსჯის არ ექნება ცუდი შედეგი (1 კორინთელთა 6:18; ეფესელთა 5:3–5).
12. რატომ წარმოადგენს საშიშროებას, განსაკუთრებულად ქრისტიანი ახალგაზრდებისთვის, ქვეყნიური გართობები?
12 ქვეყნიური მუსიკა, კინოფილმები, ვიდეო და ტელევიზია ჩაფიქრებულია ისე, რომ მიიზიდოს ახალგაზრდა ადამიანები. ეს არხები ავრცელებენ დემონთა გარყვნილ მოძღვრებებს! მაგრამ, უნდა გვიკვირდეს თუ არა ეს? დაფიქრდი ამაზე. თუ ცრუ რელიგია და პოლიტიკა სატანის ქვეყნიერების ნაწილია — რაც ნამდვილად ასეა — გონივრული იქნებოდა კი გვერწმუნა, რომ გართობები, რომელთაც ქვეყნიერება ხელს უწყობს, თავისუფალია დემონური გავლენისგან? თქვენ, ახალგაზრდებო, განსაკუთრებით უნდა გაფრთხილდეთ, არ „დაუშვათ, რომ თქვენს გარშემო მყოფმა სამყარომ ჩაგჭედოთ საკუთარ ყალიბში“ (რომაელთა 12:2, „ახალი აღთქმა თანამედროვე ინგლისურ ენაზე“ (ინგლ.) ჯ. ბ. ფილიპსი).
გამოსცადე საკუთარი თავი
13. როგორ უნდა შეამოწმო საკუთარი თავი?
13 იმის გარკვევა, თუ ვის სწავლებას მიჰყვები, შეიძლება არა მხოლოდ შენი მეტყველებით, არამედ, საქმეებითაც (რომაელთა 6:16). ამიტომ ჰკითხე საკუთარ თავს: „ავლენს თუ არა ცხოვრების მიმართ ჩემს პოზიციაზე და სტილზე ცუდ გავლენას ის, რასაც ვსწავლობ ქვეყნიური პროპაგანდის არხებიდან? ძალუძთ თუ არა დემონთა მოძღვრებებს, შეიჭრან ჩემს ცხოვრებაში“? რომ გაგიადვილდეს ასეთ კითხვებზე პასუხი, იქნებ შეგედარებინა დრო და ძალისხმევა, რომელსაც იყენებ ბიბლიის შესწავლისთვის, ქრისტიანულ შეხვედრებზე დასწრებისა და სხვებთან ღმერთის სამეფოს შესახებ საუბრისთვის, იმ დროსთან, რომელსაც ხარჯავ ტელევიზორის ყურებასა და მუსიკის მოსმენაში, სპორტის საყვარელ სახეობაში მონაწილეობის მიღებაში ან მსგავს მოქმედებებში? რადგანაც მრავალი რამ, სინამდვილეში კი, თვით შენი ცხოვრებაა საფრთხეში, პატიოსნად გამოსცადე საკუთარი თავი (2 კორინთელთა 13:5).
14. რა იმოქმედებს ჩვენს სულიერ ჯანმრთელობაზე და რა გამომაფხიზლებელი აზრი უნდა გვახსოვდეს?
14 შენ კარგად გესმის, რომ მატერიალური საკვები, რომელსაც ჭამ, იმოქმედებს შენს ფიზიკურ ჯანმრთელობაზე. მსგავსად ამისა, შენი სულიერი ჯანმრთელობა დამოკიდებულია იმაზე, თუ რით კვებავ შენს გონებასა და გულს (1 პეტრე 2:1, 2). იმ დროს, როდესაც შენს რეალურ ინტერესებთან დაკავშირებით შეიძლება მოიტყუო თავი, არ შეგიძლია მოატყუო ჩვენი მოსამართლე, იესო ქრისტე (იოანე 5:30). შეეკითხე საკუთარ თავს: „იესო, რომ დედამიწაზე ყოფილიყო, შემრცხვებოდა თუ შევიდოდა ჩემს ოთახში და მოისმენდა ჩემს მუსიკას ან ნახავდა ტელეგადაცემებს, რომლებსაც მე ვუყურებ?“ გამომაფხიზლებელია ის ფაქტი, რომ იესო უყურებს ჩვენს საქმეებს და იცის მათ შესახებ (გამოცხადება 3:15).
წინააღუდექი დემონთა მოძღვრებებს
15. რატომ უნდა იბრძოლონ ქრისტიანებმა შეუპოვრად, რომ წინააღუდგნენ დემონთა მოძღვრებებს?
15 გავლენა, რომელსაც დემონები ახალგაზრდებზე ახდენენ, რომ მიჰყვნენ მათ მოძღვრებებს, შემაძრწუნებელია. ეს ბოროტი სულები სთავაზობენ დაუყოვნებლივი კმაყოფილებით ცხოვრებას, რომელიც შედგება სიხარულისა და სიამოვნებისგან. იმისთვის, რომ ესიამოვნებინა ღმერთი, ძველ დროში მცხოვრებმა მოსემ უარყო „დროებითი, ცოდვიანი განცხრომა“, ყოფილიყო ფარაონის ოჯახის გამოჩენილი წევრი (ებრაელთა 11:24–27). არ არის იოლი უარყო ის, რასაც დემონები გთავაზობენ, ამიტომ შეუპოვრად უნდა იბრძოლო, რომ აკეთო სიმართლე. განსაკუთრებით იმიტომ, რომ გვაქვს მემკვიდრეობით მიღებული ცოდვა და ჩვენს გულს ხშირად სწყურია აკეთოს ის რაც ცუდია (დაბადება 8:21; რომაელთა 5:12). ცოდვილი მიდრეკილებების გამო მოციქულ პავლესაც კი ეჭირა საკუთარი თავი მტკიცედ და არ უშვებდა, რომ ხორციელ სურვილებს გაემარჯვა მასზე (1 კორინთელთა 9:27; რომაელთა 7:21–23).
16. როგორ შეუძლია ახალგაზრდობას წინააღუდგეს ზეგავლენას, ჩაებას უზნეო მოქმედებებში?
16 მიუხედავად იმისა, რომ შეიძლება ცდუნდე, ‘აყვე უმრავლესობას ბოროტ საქმეში’, ღმერთს ძალუძს დაგეხმაროს წინააღუდგე ზემოქმედებას თანატოლების მხრიდან, გაჰყვე მათ მცდარ გზას (გამოსვლა 23:2; 1 კორინთელთა 10:13). მაგრამ, შენ გმართებს, მოუსმინო ღმერთის მითითებებს და გულში ჩაიმარხო მისი სიტყვები (ფსალმუნი 118:9, 11). უნდა შეიგნო, რომ როცა ახალგაზრდა ადამიანები განცალკევდებიან, სექსუალური სურვილი შეიძლება გაიზარდოს და მიიყვანოს ღმერთის კანონის დარღვევამდე. „როცა მეგობარ-ბიჭთან მარტო ვრჩები ჩემს სხეულს სურს გააკეთოს ერთი, გონება კი მეორეს მკარნახობს“ — აღიარა ერთმა გოგონამ. ამიტომ აღიარე ნაკლოვანებები და შეიგნე, რომ შენი გული უნდოა (იერემია 17:9). ნუ იქნები ყველასგან განცალკევებით (იგავნი 18:1, აქ). შეზღუდე გრძნობების გამომჟღავნება. და რაც განსაკუთრებულად მნიშვნელოვანია, იმეგობრე მხოლოდ იმათთან, ვისაც უყვარს იეჰოვა და ვისაც მისი კანონების მიმართ ღრმა პატივისცემა აქვს (ფსალმუნი 118:63; იგავნი 13:20; 1 კორინთელთა 15:33).
17. რას შეუძლია დაეხმაროს ქრისტიან ახალგაზრდებს, მოიპოვონ ძალა, რომ წინააღუდგნენ დემონთა მოძღვრებებს?
17 ყურადღებით შეისწავლე შენი სულიერი გაძლიერებისთვის განკუთვნილი ქრისტიანული პუბლიკაციები, რომლებიც დაგეხმარება. მაგალითად, განიხილე „საგუშაგო კოშკის“ და „გამოიღვიძეთ!“-ის სტატიები და ამასთანავე წიგნში, „შენ შეგიძლია მარადიული ცხოვრება სამოთხეში დედამიწაზე“, მოცემული თავი სათაურით, „ბრძოლა სწორი მოქმედებისთვის“. დაე, წმინდა წერილების მითითებები ღრმად დამკვიდრდეს შენს გონებასა და გულში და ეს განგამტკიცებს. არასდროს დაივიწყო, რომ ამ ქვეყნიერებაში, რომელსაც დემონები მართავენ, არ არის იოლი, ქმნა სიმართლე. ამიტომ, შეუპოვრად იბრძოლე (ლუკა 13:24). განავითარე შენი სულიერი ძალა. არ მიბაძო უძლურ, გაუბედავ ადამიანებს, რომლებიც ბრბოს მისდევენ.
ისარგებლე ღვთიური სწავლებით
18. რა არის სასარგებლო ღვთიურ სწავლებაში?
18 გახსოვდეს, ასევე, რომ შენ არასდროს გამოტოვებ ღირსშესანიშნავ რამეს, თუ მიჰყვები იეჰოვას სწავლებას. ის ნამდვილად გრძნობს სიყვარულს შენს მიმართ და ამიტომ არის „დამმოძღვრავი სასიკეთოდ“ (ესაია 48:17). ამრიგად, მისდიე იეჰოვას სწავლებას და გაექეცი გულის ტკივილს სინდისის ქენჯნის გამო, საკუთარი თავის მიმართ პატივისცემის დაკარგვას, არასასურველ ფეხმძიმობას, სქესობრივი კავშირით გადამდებ ავადმყოფობებს ან მსგავს ტრაგედიებს. იეჰოვას უხარია, როცა მისი მსახურები პასუხს სცემენ სატანის გამოწვევაზე, რომ გამოცდის დროს, ადამიანები არ დარჩებიან ღმერთის ერთგულნი (იობი 1:6–12). თუ შენი ერთგულებით გაუხარებ იეჰოვას გულს, გადარჩები, როცა ამ ქვეყნიერებისთვის არახელსაყრელ განაჩენს გამოიტანს და როცა მისი კანონების ყველა უგულებელმყოფელს გაანადგურებს (იგავნი 27:11; 1 კორინთელთა 6:9, 10; 1 იოანე 2:17).
19. რა სარგებელია, გქონდეს კავშირი იმათთან, ვინც აფასებს იეჰოვას სწავლებას?
19 მჭიდრო კავშირს თუ დაამყარებ მათთან, ვინც მადლიერია იეჰოვასი ყველაფრისთვის, რაც მათთვის გააკეთა, შენ შეგიძლია ისწავლო მათი გამოცდილებიდან. ერთმა ახალგაზრდა გოგონამ, რომელიც იყო ნარკომანი და მიჰყვებოდა უზნეო ცხოვრებას, განაცხადა: „რომ არ მომესმინა იეჰოვასთვის, მკვდარი ვიქნებოდი. პიროვნება, რომელსაც ცოლად უნდა გავყოლოდი მოკვდა შიდს-ისგან. ყველა ჩემი ახლო მეგობარი, რომელიც ქვეყნიერებაში მყავდა, დაიღუპა ან ელოდება სიკვდილს შიდს-ისგან. მე ხშირად ვხედავ მათ ქუჩებში და ყოველ დღე ვმადლობ იეჰოვას მისი კანონებისთვის, რომლებიც მართავენ მის ხალხს და დაგვეხმარებიან დავრჩეთ წმიდად, თუ ვიყენებთ მათ. მე არასდროს მიგრძვნია ამდენი ბედნიერება, კმაყოფილება და უსაფრთხოება ჩემს ცხოვრებაში“. ჭეშმარიტად, თუ მივყვებით იეჰოვას სწავლებას, ის ყოველთვის სარგებლობას მოგვიტანს!
გააკეთე სწორი არჩევანი
20, 21. ა) რომელი ორი არჩევანი აქვს ახალგაზრდობას? ბ) რომელ ხანგრძლივ სარგებლობას ნახავ, თუ მიჰყვები ღვთიურ სწავლებას?
20 ახალგაზრდებო, მოგიწოდებთ: გააკეთეთ სწორი არჩევანი იეჰოვასადმი მსახურებით. შემდეგ, მტკიცედ ჩაეჭიდეთ ამ გადაწყვეტილებას (იესო ნავეს ძე 24:15). სინამდვილეში, შენ შეგიძლია გააკეთო ორიდან მხოლოდ ერთი არჩევანი. იესომ თქვა, რომ ფართო და განიერია გზა — იოლი გზაა, ასიამოვნო საკუთარ თავს. ამ გზას მიჰყავს სასიკვდილო დასასრულისკენ, დაღუპვისკენ. სხვა გზა ვიწროა. რთულია იარო ამ გზით უზნეო ქვეყნიერებაში, რომელსაც დემონები მართავენ. მაგრამ ეს გზა მასზე მიმავალთ საბოლოოდ მიიყვანს ღმერთის შესანიშნავ ახალ ქვეყნიერებაში (მათე 7:13, 14). რომელ გზას აირჩევ შენ? ვის სწავლებას მიჰყვები?
21 იეჰოვა გაძლევს არჩევნის საშუალებას. ის არ ცდილობს დაგაძალოს, ემსახურო მას. „სიცოცხლე და სიკვდილი დაგიდევი წინ“ — თქვა ღმერთის წინასწარმეტყველმა მოსემ, შემდეგ მოუწოდა: „აირჩიე სიცოცხლე“. ამ არჩევნის გაკეთება შეიძლება თუ ‘გეყვარება უფალი, შენი ღმერთი, მოუსმენ მის სიტყვას და მიეწებები მას’ (მეორე რჯული 29:2; 30:19, 20). დაე, ბრძნული არჩევნით მიჰყევი ღვთიურ სწავლებას და დატკბი უსასრულო სიცოცხლით ღმერთის დიდებულ ახალ ქვეყნიერებაში.
როგორ უპასუხებდი?
□ ვინ არიან დემონები და რას ასწავლიან ისინი?
□ როგორ უწყობენ ხელს დემონები თავიანთი მოძღვრებების გავრცელებას დღეს?
□ როგორ არის შესაძლებელი წინააღუდგე დემონთა მოძღვრებებს?
□ რა არის სასარგებლო იმაში, თუ მიჰყვები იეჰოვას სწავლებას?
[სურათი 31-ე გვერდზე]
შეგრცხვებოდა თუ არა, იესოს რომ მოესმინა შენი საყვარელი მუსიკა?