ღმერთის მსახურები — ორგანიზებული და ბედნიერი ხალხი
„ნეტარ არს ხალხი, რომელსაც ჰყავს უფალი, თავისი ღმერთი“! (ფსალმუნი 143:15).
1, 2. ა) რატომ აქვს იეჰოვას უფლება, რომ დაუდგინოს თავის მსახურებს ნორმები? ბ) რომელია იეჰოვას ორი თვისება, რომლის მიბაძვაც განსაკუთრებით უნდა გვსურდეს?
იეჰოვა არის სამყაროს უზენაესი მმართველი, ყოვლისშემძლე ღმერთი, შემოქმედი (დაბადება 1:1; ფსალმუნი 99:3). მას აქვს ძალაუფლება, დაუდგინოს თავის მსახურებს მოქმედების ნორმები, რადგან იცის, თუ რა არის მათთვის საუკეთესო (ფსალმუნი 142:8). ის არის მათთვის უდიდესი მაგალითი, რომლის თვისებებსაც უნდა მიბაძონ. „მიბაძეთ ღმერთს, როგორც საყვარელმა შვილებმა“, — წერდა ერთ-ერთი მოციქული (ეფესელთა 5:1).
2 ღმერთის თვისება, რომელსაც უნდა მივბაძოთ, დაკავშირებულია ორგანიზებულობასთან. ის არ არის ‘უწესრიგობის ღმერთი’ (1 კორინთელთა 14:33). როდესაც ჩვენ ყურადღებით ვაკვირდებით იმას, თუ რა შექმნა იეჰოვამ, დავასკვნით, რომ ის არის სამყაროში ყველაზე ორგანიზებული პიროვნება. ხოლო, მეორე თვისება, რაშიც უნდა მივბაძოთ მას, არის ბედნიერება, ვინაიდან ის არის ‘ბედნიერი ღმერთი’ (1 ტიმოთე 1:11, აქ). მისი ორგანიზების უნარი გაწონასწორებულია ბედნიერებასთან. ერთი თვისება მეორე თვისების ხარჯზე არ იკავებს უფრო მნიშვნელოვან ადგილს.
3. როგორ ცხადყოფს ვარსკვლავებით მოჭედილი ზეცა ღმერთის ორგანიზების უნარს?
3 ყოველივე, რაც იეჰოვამ შექმნა — უდიდესიდან უმცირეს წვრილმანებამდე — ცხადყოფს, რომ ის არის ორგანიზებულობის ღმერთი. მაგალითად, განვიხილოთ ხილული სამყარო. ის შეიცავს ათასობით მილიარდ ვარსკვლავს. ეს ვარსკვლავები ბრმად არ არის მიმოფანტული. ასტროფიზიკოსმა ჯორჯ გრინსტაინმა აღნიშნა, რომ ეს არის „ვარსკვლავთა წყობის ნიმუში“. მათი წყობა არის ჯგუფური და მათ გალაქტიკები ეწოდებათ, ზოგიერთ გალაქტიკაში არის ასობით მილიარდი ვარსკვლავი. და გამოთვლილია, რომ არსებობს მილიარდობით გალაქტიკა! გალაქტიკებიც ორგანიზებულია, მათი გარკვეული რაოდენობა (რამდენიმედან ათასებამდე) ჯგუფებად არის განლაგებული და წარმოქმნიან გალაქტიკათა გროვებს. ვარაუდობენ, რომ გალაქტიკათა გროვები წარმოქმნიან გიგანტურ სისტემებს (ფსალმუნი 18:2; ესაია 40:25, 26).
4, 5. ჩამოთვალე დედამიწაზე არსებული ცოცხალი არსებების ორგანიზებულობის მაგალითები.
4 იეჰოვას ქმნილებების შესანიშნავი ორგანიზებულობა ჩანს ყველგან, მხოლოდ ხილულ ცაზე კი არა, არამედ დედამიწაზეც, სადაც ურიცხვი ცოცხალი არსებაა. ყოველივე ამასთან დაკავშირებით პროფესორი ფიზიკის დარგში პოლ დეივიზი წერდა, რომ დამკვირვებლები არიან „მოკრძალებული შიშით გამსჭვალული მატერიალური სამყაროს დიდებული და რთული ორგანიზების გამო“ (ფსალმუნი 103:24).
5 განვიხილოთ ცოცხალ არსებებში „რთული ორგანიზების“ ზოგიერთი მაგალითი. ნეიროქირურგმა ჯოზეფ ევანზმა ადამიანის თავის ტვინისა და ზურგის ტვინის შესახებ აღნიშნა: „დიდებული წესრიგის შესახებ არსებული ფაქტი ძალზე გასაოცარია“. მიკროსკოპული ცოცხალი უჯრედის შესახებ ბაქტერიოლოგმა ჰ. ჯ. შონესიმ აღნიშნა: „მიკრობიოლოგიური სამყაროს კომპლექსაცია და მშვენიერი წესრიგი იმდენად დიდებული აგებულებისაა, რომ როგორც ჩანს, არის ღმერთის მიერ დაწესებული სისტემა“. მოლეკულური ბიოლოგიის სპეციალისტმა მაიკლ დენტონმა უჯრედში არსებული გენეტიკური კოდის (დნმ) შესახებ თქვა: „ეს იმდენად ეფექტურია, რომ ყველა ინფორმაცია. . . რომელიც აუცილებელია იმისთვის, რომ პლანეტაზე არსებული ყველა სახეობის ორგანიზმის დაწვრილებითი დახასიათება მოხდეს. . . შესაძლოა მოთავსდეს ჩაის კოვზში და ადგილიც დარჩება სხვა ინფორმაციისთვის, რომლებსაც დღევანდლამდე დაწერილი ყველა წიგნი შეიცავს“ (იხილე ფსალმუნი 138:16).
6, 7. როგორი ორგანიზებულობა ჩანს სულიერ ქმნილებებში და როგორ გამოხატავენ ისინი მადლიერებას თავიანთი შემოქმედის მიმართ?
6 იეჰოვა მხოლოდ ფიზიკურ ქმნილებებს კი არ აწესრიგებს, არამედ სულიერ ქმნილებებსაც ზეცაში. დანიელის 7:10-ში ნათქვამია, რომ ანგელოზები „ბევრის ბევრნი [ათი ათასჯერ ათი ათასი, აქ] იდგნენ მის წინაშე“. ასი მილიონი ძლევამოსილი სულიერი ქმნილება თან ახლდა მას და თითოეულს დავალებული ჰქონდა შესაფერისი სამუშაო! განსაცვიფრებელია, რომ ვიფიქროთ ოსტატობაზე, რითაც ასეთი გასაოცარი რაოდენობის ორგანიზება ხდება. ბიბლია სათანადოდ აღნიშნავს: „ადიდეთ უფალი, ანგელოზნო მისნო; ძალით ძლიერნი, მისი სიტყვის შემსრულებელნი, ემორჩილებიან მის ნათქვამს. ადიდეთ უფალი, ყოველნო სპანო მისნო, მსახურნო მისნო, მისი ნების შემსრულებელნო“ (ფსალმუნი 102:20, 21; გამოცხადება 5:11).
7 რაოდენ შესანიშნავად მოწესრიგებული და ეფექტურია დიდებული შემოქმედის ქმნილებები! და არ არის გასაოცარი, რომ ზეციერ სამფლობელოში მყოფი სულიერი ქმნილებები, მოკრძალებული შიშით გამსჭვალულები, მორჩილებით აცხადებენ: „შენ ღირსი ხარ, უფალო და ღმერთო ჩვენო, რომ მიიღო დიდება, პატივი და ძალა, ვინაიდან შენ შექმენი ყოველივე და შენი ნებით იყვნენ და იქმნენ“ (გამოცხადება 4:11).
8. რომელი მაგალითები ცხადყოფს, რომ იეჰოვა ორგანიზებას უწევს თავის მსახურებს დედამიწაზე?
8 იეჰოვა, ასევე, ორგანიზებას უწევს თავის მსახურებს დედამიწაზე. როდესაც ნოეს დღეებში, ძველი წელთაღრიცხვით 2370 წელს, წარღვნა მოავლინა დედამიწაზე, ნოემ და კიდევ შვიდმა ადამიანმა, როგორც ორგანიზებულმა ოჯახმა, გადაიტანეს წარღვნა. ძველი წელთაღრიცხვით 1513 წელს იეჰოვამ რამდენიმე მილიონი ადამიანისთვის მოაწყო ეგვიპტის მონობიდან მასობრივი გამოსვლა და მისცა მათ კანონთა დაწვრილებითი კრებული, რომ ორგანიზებული ყოფილიყო მათი ყოველდღიური საქმეები და თაყვანისცემა. მოგვიანებით, აღთქმულ მიწაზე, ათიათასობით ადამიანი იყო ორგანიზებული, რომ განსაკუთრებული მსახურება გაეწია ტაძარში (პირველი ნეშტთა 23:4, 5). პირველ საუკუნეში ქრისტიანული კრება ორგანიზებული იყო ღვთიური მითითებით, რადგან „მან დააყენა ერთნი მოციქულებად, მეორენი წინასწარმეტყველებად, ზოგნი მახარებლებად, ზოგნი მწყემსებად და მასწავლებლებად, წმიდანთა სრულყოფილებისათვის მსახურების საქმისათვის“ (ეფესელთა 4:11, 12).
დღევანდელი მსახურებიც ორგანიზებული არიან
9, 10. როგორ გაუწია იეჰოვამ ორგანიზება თავის ხალხს დღეს?
9 ამის მსგავსად, იეჰოვამ ორგანიზება გაუწია თავის დღევანდელ მსახურებს, ასე რომ, მათ დღეს შეუძლიათ ეფექტურად შეასრულონ თავიანთი მსახურება — სამეფოს შესახებ კეთილი ცნობის ქადაგება — ვიდრე იეჰოვა გაანადგურებს ამ უღმერთო ქვეყნიერებას (მათე 24:14). განვიხილოთ თუ რას მოიცავს ეს გლობალური საქმიანობა და რამდენად მნიშვნელოვანია კარგი ორგანიზება. მილიონობით მამაკაცი, ქალი და ბავშვი სწავლობს, თუ როგორ გადასცეს ბიბლიური ჭეშმარიტება ადამიანებს. ამ სწავლების დასახმარებლად, იბეჭდება უდიდესი რაოდენობის ბიბლია და ბიბლიაზე დაფუძნებული ლიტერატურა. ამიტომაც, „საგუშაგო კოშკის“ ყოველი გამოცემა ამჟამად 16 მილიონზე მეტი ტირაჟით იბეჭდება 120 ენაზე, ხოლო „გამოიღვიძეთ!“ — 13 მილიონიანი ტირაჟით 73 ენაზე. თითქმის ყველა გამოცემა იბეჭდება ერთდროულად, ასე რომ, იეჰოვას ყველა მსახური ერთსა და იმავე ინფორმაციას ერთსა და იმავე დროს ღებულობს.
10 დამატებით, იეჰოვას მოწმეების დაახლოებით 73 000-ზე მეტი კრება მთელ მსოფლიოში ორგანიზებულია, რომ რეგულარულად შეხვდეს ბიბლიური მითითებების შესასწავლად (ებრაელთა 10:24, 25). ყოველწლიურად ათასობით ადამიანისთვის იმართება უფრო დიდი შეხვედრები — სარაიონო და საოლქო კონგრესები. ასევე დიდი მასშტაბით მიმდინარეობს ახალი ან გაუმჯობესებული სამეფო დარბაზების, საკონგრესო დარბაზების, ბეთელის სახლებისა და ბიბლიური ლიტერატურის ბეჭდვისთვის განკუთვნილი ობიექტების გლობალური მშენებლობა. არსებობს სკოლები ბიბლიის მასწავლებელთა სპეციალური განსწავლისთვის, ასევე ისეთი სკოლებიც, როგორიცაა საგუშაგო კოშკის ბიბლიური სკოლა გალაადი მისიონერთათვის, ასევე პიონერული მსახურების სკოლა, რომელიც მსოფლიოს მრავალ ქვეყანაში ტარდება.
11. მომავალში როგორ იქნება სასარგებლო, რომ ახლა ვსწავლობთ კარგ ორგანიზებას?
11 რაოდენ კარგად გაუწია იეჰოვამ ორგანიზება თავის ხალხს დედამიწაზე, რომ ‘შეასრულონ თავიანთი მსახურება’ იეჰოვას წარმომადგენელი ანგელოზების მეშვეობით! (2 ტიმოთე 4:5; ებრაელთა 1:13, 14; გამოცხადება 14:6). იმით, რომ იეჰოვა ამჟამად თავის მსახურებს ასწავლის კარგ ორგანიზებულობას, ის სხვა მიზანსაც ასრულებს. მისი მსახურები იმდენად კარგად არიან მომზადებული, რომ როდესაც გადაიტანენ ამ ქვეყნიერების აღსასრულს, ორგანიზებული იქნებიან ახალ ქვეყნიერებაში საცხოვრებლად. შემდეგ, იეჰოვას მითითებებით ორგანიზებულნი, მთელი მსოფლიოს მასშტაბით დაიწყებენ სამოთხის გაშენებას. ისინი, ასევე, კარგად იქნებიან მომზადებული, რომ ღმერთის დაწვრილებითი მოთხოვნები, რომლებიც სასიცოცხლოდ აუცილებელია, შეასწავლონ მკვდრეთით აღმდგარ მილიარდობით ადამიანს (ესაია 11:9; 54:13; საქმე 24:15; გამოცხადება 20:12, 13).
ორგანიზებულნი, მაგრამ ბედნიერნი
12, 13. რატომ შეგვიძლია ვთქვათ, რომ იეჰოვას სურს თავისი ხალხისთვის ბედნიერება?
12 იმ დროს, როცა იეჰოვა არის განსაცვიფრებელი მშრომელი და ჩინებული ორგანიზატორი, ის არ არის ცივი, მკაცრი ან მექანიზმივით მოქმედი. პირიქით, ის არის ძალიან გულთბილი, ბედნიერი პიროვნება, რომელიც ზრუნავს ჩვენს ბედნიერებაზე. „ის ზრუნავს თქვენზე“, — ნათქვამია 1 პეტრეს 5:7-ში. მისი მზრუნველობა და სურვილი, რომ მისი მსახურები იყვნენ ბედნიერები შეგვიძლია დავინახოთ იმით, რაც შექმნა ადამიანებისთვის. მაგალითად, როდესაც ღმერთმა შექმნა სრულყოფილი მამაკაცი და ქალი, მოათავსა ნეტარების სამოთხეში (დაბადება 1:26–31; 2:8, 9). მისცა ყველაფერი, რაც მათ სჭირდებოდათ, რომ უაღრესად დიდი ბედნიერება ეგრძნოთ. მაგრამ მათ ყველაფერი დაკარგეს თავიანთი აჯანყების გამო. მათი ცოდვის შედეგად, ჩვენ ყველამ შთამომავლობით მივიღეთ არასრულყოფილება და სიკვდილი (რომაელთა 3:23; 5:12).
13 მიუხედავად იმისა, რომ ჩვენ, ადამიანები, ამჟამად არასრულყოფილები ვართ, მაინც შეგვიძლია ვპოვოთ ბედნიერება იმით, რაც ღმერთმა შექმნა. უამრავი რამ არსებობს, რასაც შეუძლია სიამოვნება მოგანიჭოს — დიდებული მთები; ლამაზი ტბები, მდინარეები, ოკეანეები და სანაპიროები; მრავალი სურნელოვანი ყვავილი და სხვა სახეობის მცენარეების უსასრულო ნაირფეროვნება; ურიცხვი გემრიელი კერძი; თვალწარმტაცი დაისი, რომლის ყურება არასოდეს მოგბეზრდება, ვარსკვლავებით მოჭედილი ზეცა, რომელიც ღამით ძალიან შთამბეჭდავია; ცხოველთა სამყაროს უამრავი სახეობა და მათი მიმზიდველი სიცელქე; შთამაგონებელი მუსიკა; საინტერესო და სასარგებლო სამუშაო; კარგი მეგობრები. ნათელია, რომ პიროვნება, რომელმაც ორგანიზება გაუწია ყოველივე ამას, არის ბედნიერი და სიხარულს პოულობს იმით, რომ სხვებსაც ანიჭებს ბედნიერებას.
14. როგორი წონასწორობის დაცვას მოითხოვს იეჰოვა ჩვენგან, როდესაც ვბაძავთ მას?
14 ამგვარად, იეჰოვას არა მხოლოდ ორგანიზებულობა და ეფექტურობა სურს. მას ასევე სურს, რომ თავისი მსახურები იყვნენ ბედნიერები, ისეთივე ბედნიერები, როგორიც თავად არის. მას არ სურს, რომ მათ თავიანთი ბედნიერების ხარჯზე ფანატიკურად გაუწიონ ორგანიზება ყველაფერს. ღმერთის მსახურებს ორგანიზებულობა გაწონასწორებული უნდა ჰქონდეთ ბედნიერებასთან, ისევე, როგორც ღმერთი აკეთებს ამას, რადგან სადაც ღმერთის ძლიერი სულია, იქ ბედნიერებაა. სინამდვილეში, გალატელთა 5:22 გვიჩვენებს, რომ ღმერთის წმიდა სულის მეორე ნაყოფი, რომელიც მოქმედებს მის ხალხზე, არის „სიხარული“.
სიყვარული წარმოშობს ბედნიერებას
15. რატომ არის სიყვარული მნიშვნელოვანი ჩვენი ბედნიერებისთვის?
15 ძალიან საინტერესოა ყურადღება მივაქციოთ იმას, რომ ბიბლია აღნიშნავს: ‘ღმერთი არის სიყვარული’ (1 იოანე 4:8, 16). ბიბლიაში არ არის ნათქვამი, რომ ‘ღმერთი არის ორგანიზებულობა’. სიყვარული არის ღმერთის მთავარი თვისება და მას უნდა მიბაძონ მისმა მსახურებმა. ამიტომაც ღმერთის სულის პირველ ნაყოფად გალატელთა 5:22-ში მოხსენიებულია „სიყვარული“, შემდეგ „სიხარული“. სიყვარული წარმოშობს სიხარულს. როდესაც ვბაძავთ იეჰოვას სიყვარულს სხვებთან ურთიერთობისას, ასეთ მოქმედებას მოჰყვება ბედნიერება, რადგან სიყვარულით აღსავსე ადამიანი ბედნიერია.
16. როგორ გვიჩვენა იესომ სიყვარულის აუცილებლობა?
16 იმის აუცილებლობა, რომ მივბაძოთ ღმერთის სიყვარულს, ნათელი გახდა იესოს სწავლებებში. მან თქვა: „როგორც მამამ მასწავლა, ისე ვლაპარაკობ“ (იოანე 8:28). განსაკუთრებით რა ისწავლა იესომ, რომელსაც თავის მხრივ სხვებსაც ასწავლიდა? ეს იყო ორი უდიდესი მცნება — ღმერთისა და მოყვასისადმი სიყვარული (მათე 22:36–39). იესომ ასეთი სიყვარულის მაგალითი მოგვცა. მან თქვა: „მამა მიყვარს“, მან ეს დაამტკიცა იმით, რომ თვით სიკვდილამდე შეასრულა მამის ნება. მან ხალხის მიმართ სიყვარული გამოამჟღავნა იმით, რომ მოკვდა მათთვის. პავლე მოციქულმა უთხრა ეფესელ ქრისტიანებს: „ქრისტემ შეგვიყვარა ჩვენ და თავისი თავი მისცა ჩვენთვის“ (იოანე 14:31; ეფესელთა 5:2). ამგვარად, იესომ უთხრა თავის მიმდევრებს: „ესაა ჩემი მცნება: რათა გიყვარდეთ ერთმანეთი, როგორც მე შეგიყვარეთ თქვენ“ (იოანე 15:12, 13).
17. როგორ გვიჩვენა პავლემ, რომ სხვების მიმართ სიყვარულის გამოხატვას დიდი მნიშვნელობა აქვს?
17 სასიცოცხლოდ თუ რამდენად მნიშვნელოვანია სიყვარული, პავლემ შემდეგი სიტყვებით გამოხატა: „თუ მე ადამიანებისა და ანგელოზების ენებით რომ ვლაპარაკობ, ხოლო სიყვარული არ გამაჩნია, მაშინ ჟღარუნა რვალი ვარ ან მჟღერი წინწილა. წინასწარმეტყველება რომ მქონდეს, ყველა საიდუმლო და ყოველგვარი ცოდნა რომ ვუწყოდე, სრული რწმენა რომ მქონდეს, ისეთი, რომ მთების გადაადგილება შემეძლოს, ხოლო სიყვარული არ გამაჩნდეს, არარაობა ვიქნებოდი. მთელი ჩემი ქონება რომ დავარიგო და ჩემი სხეული დასაწვავად გავწირო, ხოლო სიყვარული არ გამაჩნდეს, არაფერი სარგებელი მაქვს. ახლა კი რჩება რწმენა, იმედი, სიყვარული — ეს სამი. ხოლო მათგან სიყვარულია დიდი“ (1 კორინთელთა 13:1–3, 13).
18. რას შეგვიძლია მოველოდეთ კიდევ იეჰოვასგან, რაც ბედნიერების დამატებით საბაბს გვაძლევს?
18 თუ ჩვენ ვბაძავთ იეჰოვას სიყვარულს, შეგვიძლია დარწმუნებული ვიყოთ ღმერთის სიყვარულში ჩვენს მიმართ, ისეთ შემთხვევაშიც კი, როდესაც შეცდომებს ჩავდივართ, ვიცით, რომ ‘ღმერთი არის მწყალობელი და შემბრალებელი, სულგრძელი, დიდმადლიანი და ჭეშმარიტი’ (გამოსვლა 34:6). თუ ჩვენ გულწრფელად მოვინანიებთ, როდესაც შეცდომებს დავუშვებთ, ღმერთი არ იმახსოვრებს თითოეულ შეცდომას, ის სიყვარულით გვპატიებს (ფსალმუნი 102:1–3). დიახ, „მწყალობელი და შემწყალებელია უფალი“ (იაკობი 5:11). ამის ცოდნა ხელს უწყობს ჩვენს ბედნიერებას.
შედარებითი ბედნიერება დღეს
19, 20. ა) რატომ არის სრული ბედნიერება დღეს შეუძლებელი? ბ) როგორ გვიჩვენებს ბიბლია, რომ შეგვიძლია დღესვე ვიგრძნოთ შედარებითი ბედნიერება?
19 შესაძლებელია თუ არა ბედნიერება დღეს, უკანასკნელ დღეებში, დანაშაულობებით, ძალადობითა და უზნეობით აღსავსე ქვეყნიერებაში, რომელსაც მართავს სატანა და სადაც გვემუქრება ავადმყოფობა და სიკვდილი? რასაკვირველია, შეუძლებელია, რომ ახლავე ველოდეთ ისეთ ბედნიერებას, რომელიც ღმერთის ახალ ქვეყნიერებაში იქნება, ზუსტად ისეთ ბედნიერებას, რომელიც ბიბლიაშია აღწერილი: „აჰა, შევქმნი ახალ ცას და ახალ მიწას, აღარ გაიხსენება წინანდელნი და ფიქრადაც არავის მოუვა. მხოლოდ იხარებთ და იმხიარულებთ სულმუდამ ჩემს შექმნილზე“ (ესაია 65:17, 18).
20 ახლა ღმერთის მსახურებს შეუძლიათ ჰქონდეთ შედარებითი ბედნიერება, იმიტომ, რომ მათ იციან ღმერთის ნება და აქვთ ზუსტი შემეცნება იმის შესახებ, რომ ღმერთის დიდებული კურთხევა მალე გადმოიფრქვევა ახალ, სამოთხედქცეულ დედამიწაზე (იოანე 17:3; გამოცხადება 21:4). აი, რატომ ამბობს ბიბლია: „უფალო ძალთა! ნეტარია კაცი შენზე მონდობილი“, „ნეტარია ყოველი, რომელსაც ეშინია უფლისა და იარება მისი გზებით“, „ნეტარ არიან თვინიერნი, ვინაიდან ისინი დაიმკვიდრებენ ქვეყანას“ (ფსალმუნი 83:13; 127:1; მათე 5:5). მაშასადამე, თანამედროვე რთული ვითარების მიუხედავად, ჩვენ მაინც კმაყოფილები ვართ, რომ შეგვიძლია გარკვეული ზომით ვიგრძნოთ ბედნიერება. თვით ისეთ შემთხვევაშიც, როდესაც რაღაც არასასიამოვნო შეგვემთხვევა, ჩვენ არ უნდა ვიყოთ დამწუხრებული იმ ადამიანების მსგავსად, რომლებიც არ იცნობენ იეჰოვას და არა აქვთ მარადიული სიცოცხლის იმედი (1 თესალონიკელთა 4:13).
21. როგორ უწყობს ხელს ბედნიერებას იეჰოვას მსახურების მიერ საკუთარი დროის, ენერგიისა და სახსრების ხარჯვა?
21 იეჰოვას მსახურები კიდევ იმიტომ არიან ბედნიერები, რომ თავიანთ დროს, ენერგიასა და სახსრებს ხარჯავენ იმისათვის, რომ ბიბლიური ჭეშმარიტება შეასწავლონ სხვებსაც, განსაკუთრებით იმ ადამიანებს, რომლებიც ‘კვნესიან და მოთქვამენ იმ სისაძაგლეთა გამო’, რომელიც გამეფებულია სატანის ქვეყნიერებაში (ეზეკიელი 9:4). ბიბლია ამბობს: „ნეტარ არს, ვინც ფიქრობს ღატაკზე. უბედურების დღეს გადაარჩენს მას უფალი. უფალი დაიცავს მას და აცოცხლებს და ბედნიერი იქნება ქვეყანაზე“ (ფსალმუნი 40:2, 3). როგორც იესომ თქვა: „უფრო ნეტარია აძლევდე, ვიდრე იღებდე“ (საქმე 20:35).
22. ა) რა შეიძლება ითქვას ბედნიერების შესახებ, რომელიც ღმერთის მსახურებისგან განსხვავებით არა აქვთ იმ ადამიანებს, რომლებიც არ ემსახურებიან მას? ბ) რა განსაკუთრებული მიზეზის გამო უნდა მოველოდეთ ბედნიერებას?
22 იეჰოვას მსახურები დღესვე არ მოელიან უზომო ბედნიერებას, მათ შეუძლიათ მიაღწიონ იმ ბედნიერებას, რომელსაც ვერ იგრძნობენ ის ადამიანები, რომლებიც არ ემსახურებიან ღმერთს. იეჰოვა ამბობს: „აჰა, იყიჟინებენ ჩემი მორჩილნი, გულმხიარულნი, თქვენ კი იყვირებთ გულმწუხარენი და ივალალებთ სულგამწარებულნი!“ (ესაია 65:14). ღმერთის მსახურებს აქვთ განსაკუთრებული მიზეზი, რომ დღესვე იყვნენ ბედნიერები — მათ აქვთ სულიწმიდა, რომელიც „ღმერთმა უბოძა მის გამგონეებს“ (საქმე 5:32). და გახსოვდეს — სადაც ღმერთის სულია, იქ ბედნიერებაა (გალატელთა 5:22).
23. რას განვიხილავთ შემდეგ სტატიაში?
23 ღმერთის მსახურთა ორგანიზაციაში დღეს მნიშვნელოვან როლს ასრულებენ „უხუცესები“, უფროსი მამაკაცები, რომლებიც უძღვებიან კრებებს და ხელს უწყობენ იეჰოვას ხალხის ბედნიერებას (ტიტე 1:5). როგორი თვალსაზრისი უნდა ჰქონდეთ მათ თავიანთი პასუხისმგებლობისა და სულიერ ძმებსა და დებთან ურთიერთობის შესახებ? ეს საკითხი განხილული იქნება შემდეგ სტატიაში.
როგორ უპასუხებდი?
□ როგორ ადასტურებს უამრავი ქმნილება იეჰოვას ორგანიზებულობას?
□ როგორ გაუწია იეჰოვამ თავის მსახურებს ორგანიზება წარსულში და დღეს?
□ ჩვენგან როგორი წონასწორობის გამოვლენა სურს იეჰოვას?
□ რამდენად მნიშვნელოვანია სიყვარული ჩვენი ბედნიერებისთვის?
□ როგორ ბედნიერებას შეგვიძლია მოველოდეთ ახლა?
[საავტორო უფლება მე-7 გვერდზე]
Top: Courtesy of ROE/Anglo-Australian Observatory, photograph by David Malin