აღთქმა კორუფციისგან თავისუფალი ქვეყნიერების შესახებ

კორუფციამ საზოგადოების ყველა სფეროში შეაღწია. ყველგან: მთავრობაში, მეცნიერებაში, სპორტში, რელიგიასა და ბიზნესში, კორუფციის შეკავება შეუძლებელი ჩანს.

მთელი მსოფლიოს საინფორმაციო საშუალებები განუწყვეტლივ იუწყებიან კორუფციასთან დაკავშირებული სკანდალების შესახებ. მათ, რომლებმაც გადაწყვიტეს, მომსახურებოდნენ ადამიანთა ინტერესებს, ადანაშაულებენ, რომ საკუთარი ინტერესებისთვის იღწვიან, რადგან იღებენ ქრთამს. ძალიან გავრცელდა ეგრეთ წოდებული თანამდებობრივი დანაშაული. საზოგადოებასა და ეკონომიკაში მაღალი მდგომარეობის პირები დამნაშავეები არიან სერიოზულ ეთიკურ და კრიმინალურ ძალმომრეობაში, რომელიც დაკავშირებულია მათ საქმიანობასთან.

საგანგაშოა ის, რაც აღწერილია ერთ-ერთ ევროპულ ჟურნალში, როგორც «„მაღალი რანგის კორუფცია“ — ჩვეული საქმიანობა, რომლითაც მაღალი თანამდებობის პირები, მინისტრები და, ხშირად, სახელმწიფოს მეთაურები, სანამ დაამტკიცებენ მსხვილ სავაჭრო გარიგებას ან პროექტს, ითხოვენ ქრთამს». ერთ ქვეყანაში „ორი წლის მანძილზე პოლიციის მიერ ჩატარებულმა გამოძიებამ და თითქმის ყოველდღიურმა დაპატიმრებამაც ვერ შეაჩერა კორუფციით დაავადებული ადამიანები“, — აღნიშნავს ბრიტანული ჟურნალი „ეკონომისტი“ (The Economist).

ასე ფართოდ გავრცელებული კორუფციის გამო მრავალი ადამიანი ფიქრობს, რომ შეუძლებელია ვინმეს ნდობა. მათი თვალსაზრისი ბიბლის მწერლის, დავითის, აზრის გამეორებაა, რომელმაც თქვა: „ყველამ უარყო, ერთიანად საძულველნი გახდნენ; არ არის მქნელი კეთილისა, ერთიც არ არის“ (ფსალმუნი 13:3).

როგორ უმკლავდები ფართოდ გავრცელებული კორუფციის სინამდვილეს? ადამიანთა უმეტესობა, უბრალოდ, ყურადღებას არ აქცევს მას. მაგრამ მაშინაც კი, როდესაც ყურადღებას არ აქცევ მას, კორუფცია მაინც გაყენებს ზიანს. როგორ?

კორუფცია გავლენას ახდენს შენზე

დიდი თუ მცირე ზომის კორუფცია იწვევს ცხოვრების სიძვირეს, ამცირებს პროდუქციის ხარისხს და იწვევს სამუშაო ადგილების ნაკლებობასა და მცირე ანაზღაურებას. მაგალითად, გამოანგარიშებულია, რომ ისეთი დანაშაულით გამოწვეული ზარალი, როგორიცაა გაფლანგვა და თაღლითობა, სულ მცირე ათჯერ აღემატება იმ ზარალს, რომელიც გამოწვეულია ბინების გატეხვით, ქურდობითა და ყაჩაღობით. „ახალი ბრიტანული ენციკლოპედია“ (The New Encyclopædia Britannica, 1992) აღნიშნავს, რომ „შეერთებულ შტატებში ბიზნესსა და კომპანიებთან დაკავშირებული კორუფციით გამოწვეული ფულადი ზარალი, გამოანგარიშების თანახმად, წლიურად 200 მილიარდ დოლარს შეადგენს — ეს სამჯერ აღემატება ორგანიზებული დამნაშავეობით გამოწვეულ ფულად ზარალს“. ეს ენციკლოპედია განმარტავს, რომ მართალია იოლად ვერ განჭვრეტ მის შედეგებს, მაგრამ „ასეთი დანაშაულობები დიდ დარტყმას აყენებს მომსახურე ხალხის, მომხმარებლებისა და ასევე გარემოს უსაფრთხოებას“.

კორუფციის მწარე ნაყოფი გვახსენებს მეფე სოლომონის სიტყვებს: „კვლავაც ვხედავდი ძალადობას, რაც კი ხდებოდა ამ მზისქვეშეთში: აჰა, იღვრება ჩაგრულთა ცრემლი და მათ არავინ არ ანუგეშებს; მათ მჩაგვრელთა ხელშია ძალა, არავინა ჰყავთ ნუგეშისმცემი“ (ეკლესიასტე 4:1).

უნდა შევეგუოთ თუ არა კორუფციას? გარდაუვალია თუ არა ის? კორუფციისგან თავისუფალი ქვეყნიერება განუხორციელებელი ოცნება ხომ არ არის? საბედნიეროდ, არა! ბიბლია გვასწავლის, რომ უსამართლობასა და უკანონობას მალე მოეღება ბოლო.

რას გვეუბნება ბიბლია

ბიბლია გვეუბნება, რომ კორუფცია დაიწყო მაშინ, როდესაც ძლევამოსილი ანგელოზი წავიდა ღმერთის წინააღმდეგ და აჯანყებაში ადამიანთა პირველი წყვილიც ჩააბა (დაბადება 3:1–6). მათ ცოდვილ გზას კარგი არაფერი მოუტანია. პირიქით, იმ დღიდან, რაც ადამმა და ევამ შესცოდეს იეჰოვა ღმერთის წინააღმდეგ, მათ საკუთარ თავზე განიცადეს კორუფციით გამოწვეული უარყოფითი შედეგები. მათ სხეულში დაიწყო დეგრადაციის ნელი პროცესი, რაც გარდაუვალ სიკვდილს უძღვოდა წინ (დაბადება 3:16–19). მას შემდეგ ისტორია აღსავსეა მექრთამეობით, ვერაგობითა და თაღლითობით. ჩანს, რომ უამრავი დამნაშავე დაუსჯელი რჩება.

ჩვეულებრივი დამნაშავეებისგან განსხვავებით, იშვიათად თუ ხდება ხელმძღვანელობის წარმომადგენლებისა და პოლიტიკოსების დაპატიმრება ან იშვიათად თუ აიძულებენ მათ აანაზღაურონ უპატიოსნო გზით მიღებული ფული. იმის გამო, რომ საიდუმლოდ ხდება ქრთამების, ანაზღაურებისა და გადასახადების აღება, მაღალი რანგის კორუფციის გამოაშკარავება, ხშირად, საკმაოდ ძნელია. მაგრამ ეს არ ნიშნავს, რომ კორუფციისგან თავისუფალი ქვეყნიერება განუხორციელებელი ოცნებაა.

ადამიანთა შემოქმედი, იეჰოვა ღმერთი მოიტანს კორუფციისგან თავისუფლებას. ერთადერთი გამოსავალია ღვთის ჩარევა. რატომ? იმიტომ რომ კაცობრიობის უხილავი მტერი, სატანა ეშმაკი კვლავაც თავგზას უბნევს ადამიანებს. როგორც პირველი იოანეს 5:19-ში ვკითხულობთ: „მთელი წუთისოფელი ბოროტებაში [ბოროტის ძალაუფლებაში, აქ] ძევს“. კიდევ რით უნდა აიხსნას მზარდი კორუფცია, რომლის უმრავლესობა დაუსჯელი რჩება?

ადამიანთა არავითარ ძალისხმევას არ შეუძლია გაიმარჯვოს სატანასა და მის დემონებზე. მხოლოდ ღვთის ჩარევა უზრუნველყოფს მორჩილ ადამიანებს ‘ღვთის შვილების დიდების თავისუფლებით’ (რომაელთა 8:21). იეჰოვა გვპირდება, რომ მალე სატანა შებოჭილი იქნება და ვეღარასოდეს მოატყუებს კაცობრიობას (გამოცხადება 20:3). ამავე დროს, თუ გვსურს ვიცხოვროთ ღვთის ახალ ქვეყნიერებაში, რომელიც თავისუფალი იქნება კორუფციისგან, უნდა უარვყოთ ქვეყნიერების გახრწნილი გზები.

ადამიანებს შეუძლიათ შეიცვალონ

იესო ქრისტეს ცხოვრების დროს იყვნენ ისეთი ადამიანები, რომლებიც ბოროტად იყენებდნენ ძალაუფლებას და ჩაგრავდნენ თავიანთ მოყვასს. მაგალითად გადასახადების ამკრეფები ცნობილი იყვნენ გახრწნილი მოქმედებით. იმ დროს მექრთამეობა მაინც არსებობდა, მიუხედავად იმისა, რომ ღვთის მიერ დაწვრილებით იყო მოცემული კანონი: „ქრთამს ნუ აიღებ, რადგან ქრთამი აბრმავებს თვალხილულს და ასხვაფერებს მართალთა საქმეებს“ (გამოსვლა 23:8). ზაქემ, გადასახადების ამკრეფთა უფროსმა, აღიარა, რომ იყო გამომძალველი და მიმართავდა ცრუ ბრალდებებს. მაგრამ იმის ნაცვლად, რომ იესოს მხარი დაეჭირა გლობალური სოციალური რეფორმისთვის, ის ემუდარებოდა ადამიანებს, რომ მოენანიებინათ და მიეტოვებინათ თავიანთი არასწორი გზები. ამის შედეგი იყო ის, რომ ცუდი რეპუტაციის მქონე გადასახადების ამკრეფებმა, მაგალითად, მათემ და ზაქემ, მიატოვეს თავიანთი წარსული ცხოვრების წესი (მათე 4:17; 9:9–13; ლუკა 19:1–10).

ასევე დღესაც, მათ, რომლებიც მონაწილეობენ უპატიოსნო საქმეებში, შეუძლიათ მიატოვონ კორუფცია იმით, რომ ‘შეიმოსონ ახალ კაცად, რომელიც შექმნილია ღვთისამებრ სიმართლითა და ჭეშმარიტების სიწმიდით’ (ეფესელთა 4:24). თუმცა, შესაძლოა, არ არის იოლი, რომ გადასახადები პატიოსნად გადაიხადო ან შეწყვიტო მაქინაციები. მაგრამ დადებითი შედეგები, რომლებსაც ასეთი მოქმედება მოიტანს, ნებისმიერ ძალისხმევად ღირს.

ადამიანები, რომლებზეც ზემოქმედებას ვერ ახდენს კორუფციით აღსავსე ქვეყნიერება და რომლებიც ზრუნავენ სხვების კეთილდღეობაზე, ტკბებიან სულიერი სიმშვიდით. მათ არ ეშინიათ, რომ არასწორი მოქმედების გამო ციხეში მოხვდებიან. პირიქით, ისინი ხარობენ, რომ აქვთ სუფთა სინდისი. ისინი ბაძავენ ბიბლიაში მოცემულ მაგალითს, რომელიც წინასწარმეტყველ დანიელს შეეხება. ბიბლიის ჩანაწერებში ნათქვამია, რომ მაღალი თანამდებობის პირები ცდილობდნენ ეპოვათ რამე საბაბი დანიელის წინააღმდეგ. „მაგრამ რაიმე საბაბისა და შეცოდების პოვნა ვერ იქნა და ვერ მოახერხეს, რადგან ერთგული იყო იგი და რაიმე შეცდომა ან დანაშაული არ აღმოაჩნდა“ (დანიელი 6:5).

იეჰოვას აღთქმა

იეჰოვამ აღუთქვა ადამიანებს, რომ „ცოდვილმა კაცმა ასჯერაც რომ ჩაიდინოს ბოროტი საქმე, მიეტევება; მე ისიც ვიცი, რომ მიეგებათ მადლი ღვთისმოსავთ, რომელთაც ეშინიათ ღვთისა. არ მიეგებათ მადლი ბოროტეულთ და ლანდივით დღემოკლე იქნება ყველა, ვისაც ღვთისა არ ეშინია“ (ეკლესიასტე 8:12, 13).

და როგორი შვება იქნება, როდესაც კორუფცია აღარ გამოიწვევს ადამიანთა უბედურებას! რამდენად დიდი კურთხევაა, იცხოვრო მარადიულად იმ ქვეყნიერებაში, სადაც აღარ იქნება კორუფცია! ეს არ არის შეუძლებელი. ბიბლია ლაპარაკობს ‘საუკუნო სიცოცხლის იმედზე, რომელიც აღუთქვა უტყუარმა ღმერთმა უწინარეს საუკუნეთა’ (ტიტე 1:2). თუ შენ გძულს კორუფცია და გიყვარს სიმართლე, კარგი შესაძლებლობა გაქვს იხილო ღვთის აღთქმის განხორციელება, რომელიც კორუფციისგან თავისუფალ ქვეყნიერებას შეეხება.

[სურათი მე-4 გვერდზე]

კორუფცია გავრცელებულია სამთავრობო და საქმიან წრეებში.

[სურათი მე-5 გვერდზე]

კორუფცია, ხშირად, გავლენას ახდენს სახელმწიფოების ოფიციალურ პირებთან ურთიერთობაზე.