უფრო განდიდებული იეჰოვას სახლი
„დიდებით ავავსებ ამ სახლს, ამბობს ცაბაოთ უფალი“ (ანგია 2:7).
1. როგორ უკავშირდება სულიწმიდა რწმენასა და საქმეებს?
კარდაკარ ქადაგებისას იეჰოვას ერთ-ერთი მოწმე შეხვდა ორმოცდაათიანელ ქალს, რომელმაც შენიშნა: „ჩვენ სულიწმიდა გვაქვს, თქვენ კი საქმის გამკეთებელი ადამიანები ხართ“. მას ტაქტიანად აუხსნეს, რომ სულიწმიდის მქონე პიროვნება, ბუნებრივია, აღძრული იქნება, ღმერთს ემსახუროს. იაკობის 2:17-ში ნათქვამია: ‘თუ რწმენას საქმენი არ გააჩნია, თავისთავად მკვდარია’. იეჰოვას სულიწმიდის დახმარებით, მისი მოწმეები მტკიცე რწმენას ავითარებენ და სწორი მოქმედებისკენ — უმთავრესად კი, ‘მსოფლიოს ყველა ხალხისთვის დასამოწმებლად კეთილი ცნობის ქადაგებისკენ’ მათი აღძვრით, ის ‘დიდებით ავსებს თავის სახლს’. როცა იეჰოვასთვის სიამოვნების მინიჭებით ეს საქმე დასრულებული იქნება „მაშინ დადგება აღსასრული“ (მათე 24:14).
2. ა) როგორ კურთხევას მოგვიტანს იეჰოვასადმი საქმიანობაში თავგანწირვა? ბ) რატომ უნდა გვიხაროდეს ნებისმიერი მოჩვენებითი ‘დაგვიანება’?
2 იესოს ამ სიტყვებიდან ვასკვნით, რომ დღეს ჩვენი საქმიანობა უნდა შედგებოდეს სხვებისადმი ‘ბედნიერი ღვთის დიდებული სახარების’ ქადაგებაში, რომელიც მონდობილი გვაქვს (1 ტიმოთე 1:11). რაც უფრო სიხარულით სავსე თავგანწირვით ვემსახურებით იეჰოვას, მით უფრო სწრაფად მოგვეჩვენება აღსასრულის მოსვლა. აბაკუმის 2:2, 3-ში ჩვენ ვკითხულობთ იეჰოვას სიტყვებს: „ჩაწერე ხილვა და ფიქალებზე ამოკვეთე, რომ სწრაფად წაიკითხოს მკითხველმა. რადგან უკვე დათქმული ჟამისთვის არის ხილვა და ბოლოს გაცხადდება, არ გამტყუნდება. თუ დააგვიანდეს, დაელოდე, რადგან უსათუოდ მოვა, არ დაბრკოლდება“. დიახ, რომც „დააგვიანდეს“ „ხილვა“ გაცხადდება. იესოს სამეფო მმართველობის ამ 83-ე წელს ზოგმა შეიძლება იფიქროს, რომ სწორედ ახლა ვცხოვრობთ დაგვიანების პერიოდში. მაგრამ, განა არ უნდა გვიხაროდეს, რომ დასასრული ჯერ არ დამდგარა? შეიძლება საოცრებად ჩანდეს, მაგრამ 1990-იანი წლების ამ ათწლეულში მოიხსნა შეზღუდვები კეთილი ცნობის ქადაგებაზე აღმოსავლეთ ევროპაში, აფრიკის ზოგიერთ ნაწილსა და სხვა ქვეყნებში. მოჩვენებით ‘დაგვიანება’ დროს უთმობს უფრო მრავალ ‘ცხვარს’, შეკრებილ იქნეს ამ ახლად გახსნილ უბნებში (იოანე 10:16).
3. რატომ უნდა აღგვძრავდეს ‘ამ მოდგმასთან’ დაკავშირებული დღევანდელი გაგება, დაჟინებით ვემსახუროთ ღმერთს?
3 „არ დაბრკოლდება“, ამბობს წინასწარმეტყველება. იესომ თქვა, რომ დღევანდელი ბოროტი მოდგმა არ გადაივლის, ვიდრე „ყოველივე ეს არ მოხდება“ (მათე 24:34). ნიშნავს თუ არა მისი სიტყვების ახალი გაგება, რომ სამქადაგებლო საქმიანობა არცთუ ისე გადაუდებელია?a ფაქტები სწორედ საწინააღმდეგოს ნათელყოფს! თანამედროვე მოდგმა იძირება ისტორიაში არნახულ ბოროტებასა და კორუფციაში (შეადარე საქმეები 2:40). ჩვენ დაჟინებულები უნდა ვიყოთ მსახურებაში (2 ტიმოთე 4:2). დიდი გასაჭირის დროსთან დაკავშირებით ყველა წინასწარმეტყველება ცხადყოფს, რომ ის მოვა მოულოდნელად, დაუყოვნებლივ, ფარულად — ქურდივით (1 თესალონიკელთა 5:1–4; გამოცხადება 3:3; 16:15). „ამიტომ თქვენც მზად იყავით, ვინაიდან, რომელ საათსაც არ ფიქრობთ, მაშინ მოვა ძე კაცისა“ (მათე 24:44). ახლა, როცა კაცობრიობის უღვთო მოდგმა განადგურების ზღურბლზე დგას, ნათელია, არ ვისურვებთ, ქვეყნიური გართობის „ტალახში საგორაოდ“ დაბრუნებით, მარადიული ცხოვრების ძვირფასი იმედი დავკარგოთ! (2 პეტრე 2:22; 3:10; ლუკა 21:32–36).
4. რომელი მდგომარეობა მოითხოვს ‘დროული საზრდოს’ გაზრდას და რა ხდება ამ მოთხოვნილების დასაკმაყოფილებლად?
4 იესოს წინასწარმეტყველების თანახმად, 1914 წელი ‘მშობიარობის ტკივილთა დასაწყისი’ იყო, რადგან კაცობრიობამ „წუთისოფლის აღსასრულის“ პერიოდში შეაბიჯა. უბედურებები, კატასტროფული შემთხვევები და უკანონობა დღემდე იზრდება (მათე 24:3–8, 12). ამავე დროს იეჰოვამ დაავალა ცხებული ერთგული და გონიერი მონის კლასს, „დროულად“ უზრუნველყოს თავისი ბატონის, ქრისტეს, სახლეულისთვის სულიერი საზრდო (მათე 24:45–47). ახლა, ზეციერი ტახტიდან ეს მესიანური მეფე ხელმძღვანელობს შესანიშნავ სულიერ მასაზრდოებელ პროგრამას მთელ დედამიწაზე.
დიდი „ულუფა“
5. რა ყურადღებას იპყრობს ‘ულუფის’ ძირითადი პუნქტი?
5 განვიხილოთ ‘ულუფის’ მომზადება (ლუკა 12:42). ქრისტიანულ მენიუში ძირითად პუნქტს წარმოადგენს ღვთის სიტყვა, ბიბლია. ეფექტურად ბიბლიის სასწავლებლად, უპირველეს ყოვლისა, საჭიროა კარგად გადმოცემული, ზუსტი თარგმანი. წლების განმავლობაში ეს მოთხოვნილება თანდათან კმაყოფილდება, განსაკუთრებით 1950 წლიდან, როცა ინგლისურ ენაზე გამოქვეყნდა „ქრისტიანულ-ბერძნული წერილების ახალი ქვეყნიერების თარგმანი“. 1961 წლისთვის ხელმისაწვდომი გახდა მთლიანი ბიბლიის „ახალი ქვეყნიერების თარგმანი“ (ინგლ.) და ცოტა ხანში ეს გამოცემები სხვა ძირითად ენებზეც გამოჩნდა. 1996 სამსახურებრივი წლის განმავლობაში გამოქვეყნებული 3 ტომის შედეგად საერთო რიცხვმა 27-ს მიაღწია, რომელთაგან 14 მთლიანი ბიბლიაა. ბიბლიისა და ასევე დამხმარე ბიბლიურ პუბლიკაციებთან დაკავშირებული სამუშაოების შესასრულებლად დღეს 77 ქვეყანაში მთარგმნელობით საქმიანობას სრული დროით ასრულებს 1 174 მიძღვნილი ქრისტიანი.
6. როგორ შეხვდა საგუშაგო კოშკის საზოგადოება მოთხოვნილებას ბიბლიურ პუბლიკაციებზე?
6 საგუშაგო კოშკის საზოგადოების 24 საგამომცემლო ფილიალი მხარს უჭერს მთარგმნელთა ამ „ლაშქრის“ სამსახურს და ადრინდელზე უფრო დიდი რაოდენობით გამოსცემს პუბლიკაციებს. ამ მიზნით მთავარ ფილიალებში გრძელდება დამატებითი სწრაფმოქმედი როტაციული მანქანების დამონტაჟება. „საგუშაგო კოშკისა“ და „გამოიღვიძეთ!“-ის გამოცემა ყოველთვიურად იზრდება და საერთო ჯამში აღწევს 943 892 500 ეგზემპლარს, რაც წლის განმავლობაში 13, 4 პროცენტულ ზრდას წარმოადგენს. ბიბლიების და სქელყდიანი წიგნების გამოცემა მხოლოდ შეერთებულ შტატებსა და ბრაზილიაში, ფინეთში, გერმანიასა და იტალიაში, იაპონიაში, კორეასა და მექსიკაში 1995 წლიდან 40 პროცენტით გაიზარდა და 1996 წელს 76 760 098 ეგზემპლარს მიაღწია. შესაწირავებით სხვა ფილიალებმაც საგრძნობი წვლილი შეიტანეს ლიტერატურის გამოცემის საერთო ზრდაში.
7. რატომ ხდება უფრო გადაუდებელი ესაიას 54:2 დღეს?
7 ასეთი ზრდა, უმთავრეს წილად, საჭირო გახდა ამ საუკუნის 90-იან წლებში აღმოსავლეთ ევროპასა და აფრიკაში იეჰოვას მოწმეთა საქმიანობაზე დადებული შეზღუდვების მოხსნის გამო. სულიერი შიმშილი ამ ადგილებში ძალიან დიდია. ამიტომ ადრინდელზე უფრო გადაუდებლად ისმის ძლიერი მოწოდება: „გააფართოვე შენი კარვის ადგილი და გადაჭიმონ შენი ჩარდახების გადასახურავნი. ნუ დაინანებ, დააგრძელე შენი თოკები და გაამაგრე შენი პალოები“ (ესაია 54:2).
8. ხელგაშლილობის გამომხატველი როგორი გამოხმაურება უწყობს ხელს ფინანსურ მხარდაჭერას?
8 ამიტომ, საზოგადოების 104 ფილიალიდან მრავალში აუცილებელი იყო ნაგებობების გაფართოება. სასტიკი ეკონომიკური პირობების გამო ახლად გახსნილი უბნების უმრავლესობაში ხარჯების უდიდეს ნაწილს სამეფოს საქმისთვის უფრო მდიდარ ქვეყნებში გაკეთებული შესაწირავები ფარავს. საბედნიეროდ, კრებები და ცალკეული პირები მთელი გულით ეხმაურებიან ამ მდგომარეობას, როგორც ამას გამოსვლის 35:21-ის სულისკვეთება გადმოსცემს: „მივიდნენ სათითაოდ, ვისაც კი გულმა გაუწია და ვინც კი სულით აღიძრა, და მიიტანეს საუფლო ძღვენი სადღესასწაულო კარვის მოსაწყობად“. ჩვენ ვსარგებლობთ ამ შესაძლებლობით, რათა მადლობა ვუძღვნათ ყველას, ვინც ამ ხელგაშლილ გაცემაში მონაწილეობს (2 კორინთელთა 9:11).
9. როგორ სრულდება დღეს რომაელთა 10:13, 18?
9 საგუშაგო კოშკის საზოგადოების პუბლიკაციები 1996 წლის განმავლობაში, მართლაც, დედამიწის კიდით-კიდემდე განადიდებდა იეჰოვას სახელსა და განზრახვებს. ეს სწორედ ისე ხდება, როგორც მოციქულმა პავლემ იწინასწარმეტყველა. იოველის წინასწარმეტყველებისა და მე-18 ფსალმუნის ციტირებით მან დაწერა: „რადგან ყოველი, ვინც უფლის სახელს მოუხმობს, გადარჩება. მაგრამ ვამბობ: ნუთუ არ მოუსმენიათ? პირიქით, მთელ დედამიწას მოედო მათი ხმა და ქვეყნის კიდეებს — მათი სიტყვები“ (რომაელთა 10:13, 18). ამრიგად, ძვირფასი სახელის, იეჰოვას, განდიდებით მისი ხალხი მნიშვნელოვან როლს ასრულებს მისი თაყვანისმცემლობის სახლის დიდებით ავსებაში. მაგრამ, როგორ აღწევდა წარმატებას ეს განდიდება განსაკუთრებით 1996 წელს? მოდი, განვიხილოთ 26—29 გვერდებზე დართული ცხრილი.
მსოფლიო მკა
10. რომელ აღსანიშნავ მხარეებს ამჩნევ იეჰოვას ხალხის საქმიანობაში 26—29 გვერდებზე მოცემული ცხრილის მიხედვით?
10 ლუკას 10:2-ში მოცემული იესოს სიტყვები არასდროს ყოფილა უფრო ძლიერ მნიშვნელოვანი, ვიდრე დღეს: „სამკალი ბევრია, მუშაკი — ცოტა. ამიტომ ევედრეთ სამკლის პატრონს, რომ გამოგზავნოს მუშაკნი თავის სამკალში“. ეხმაურები თუ არა ამ მოწოდებას? მსოფლიოში მილიონობით ადამიანი დადებითად რეაგირებს ამაზე. ამას ადასტურებს სამეფოს მაუწყებელთა ახალი უმაღლესი რიცხვი — 5 413 769 ადამიანი — რომლებიც 1996 წლის განმავლობაში სამქადაგებლო მსახურებაში მონაწილეობის ანგარიშს აბარებდნენ. გარდა ამისა, მოინათლა 366 579 ახალი და-ძმა. რამდენად დიდად ვაფასებთ ‘ყოველი ერიდან სასურველებს’, რომლებიც ახლა ‘იეჰოვას თაყვანისმცემლობის სახლის დიდებით ავსებაში’ მონაწილეობენ! (ანგია 2:7, აქ).
11. რატომ გვაქვს მიზეზი, ვიყოთ ძალიან გახარებულები?
11 ახლად გახსნილ ტერიტორიებზე გაფართოების შესახებ ანგარიშები არაფრით ჩამორჩება ფენომენს. გვშურს თუ არა მათი, ვინც ახლა ასეთი ზრდით ხარობს? პირიქით, ჩვენც მათთან ერთად ვხარობთ. ყველა ქვეყანას პატარა საწყისები აქვს. ანგიას თანამედროვე წინასწარმეტყველი ზაქარია წერდა: ‘ვინ შერაცხა ეს დღე კნინად’? (ზაქარია 4:10). ჩვენ ძალიან ვხარობთ, რომ ქვეყნებში, სადაც დამოწმების საქმიანობა კარგად არის დაფუძნებული, დღეს სამეფოს მილიონობით მაუწყებელი ცხოვრობს და ხშირად, დიდ ქალაქებში ყოველკვირეულადაც კი, ამუშავებს უბნებს. განა გვაქვს მიზეზი, ჩამოვყაროთ ხელები, როცა დღეს იეჰოვა ოდესღაც არახელსაყრელი პირობების მქონე რაიონებისთვის გადარჩენის შესაძლებლობას აფართოვებს? არანაირი მიზეზი არ გვაქვს! „ყანა. . . არის წუთისოფელი“, — თქვა იესომ (მათე 13:38). დამოწმება სწორედ ისევე საფუძვლიანად უნდა გრძელდებოდეს, როგორც ადრინდელი მოწაფეები ამოწმებდნენ იუდაური სისტემის დასასრულის პერიოდში (საქმეები 2:40; 10:42; 20:24; 28:23).
მუდამ წინ
12. რა აღგვძრავს ‘წინ მოძრაობისკენ’? (იხილე აგრეთვე ჩარჩო «მკა „ქვეყნის კიდიდან“»).
12 დიახ, ჩვენ არ უნდა ჩამოვრჩეთ იეჰოვას ანგელოზურ ზეციერ ეტლს ‘წინ მოძრაობისას’ (ეზეკიელი 1:12). ჩვენ გვახსოვს პეტრეს სიტყვები: „არ აყოვნებს უფალი აღთქმულს, ზოგიერთებს რომ დაყოვნებად მიაჩნიათ, არამედ სულგრძელია თქვენდამი და არ სურს, რომ ვინმე დაიღუპოს, არამედ რომ ყველა მივიდეს მოსანანიებლად“ (2 პეტრე 3:9). დაე აღგვძრას ეკონომიკურად ღარიბ ქვეყნებში ჩვენი ძმების სამაგალითო გულმოდგინებამ. არმაგედონის მოულოდნელი დაწყების ყოველი მოჩვენებითი დაყოვნება ნებას რთავს, რომ ამ ქვეყნებშიც შეიკრიბოს ასი ათასობით ადამიანი, როგორც კარგად დამუშავებულ ტერიტორიებში. არ შეცდე: «ახლოს არის უფლის დიდი დღე, ახლოს არის და მოვა ძალიან მალე [„ძალიან ჩქარობს“, აქ]» (სოფონია 1:14). ჩვენც უნდა ვიჩქაროთ, რომ საბოლოოდ საფუძვლიანად დავამოწმოთ!
13, 14. ა) რა შეიძლება ითქვას 1996 წლის განმავლობაში პუბლიკაციების გავრცელების შესახებ? ბ) რომელი სპეციალური გეგმების დასახვა შეუძლიათ კრებებს ყოველწლიურად და როგორ გეგმავ მონაწილეობის მიღებას?
13 თუმცა სამსახურებრივ ცხრილში წვრილმანები არ ჩანს, მასში გასულ წელს გავრცელებული ბიბლიების, წიგნებისა და ჟურნალების ყურადსაღები ზრდა შეინიშნება. მაგალითად, მსოფლიოს მასშტაბით ჟურნალების გავრცელება აჩვენებს 19 პროცენტიან ზრდას, საერთო ჯამში 543 667 923 ეგზემპლარს. ჩვენი ჟურნალები თვითონ ეხმარება მრავალგვარ ქადაგებას — ქადაგებას ქუჩაში, პარკებში, ავტობუსის გაჩერებებსა და საქმიან რაიონებში. ანგარიშები ცხადყოფს, რომ იმ უბნებში, სადაც სამეფოს შესახებ ინტენსიური ქადაგება მიმდინარეობს, ჩვენი ჟურნალების ხარისხი აოცებს განათლებულ ადამიანებს და ისინი თანხმობას გამოთქვამენ შესწავლაზე.
14 ყოველწლიურად აპრილის თვეში კრებები, ჩვეულებრივ, ორგანიზებას უწევენ ჟურნალებით სპეციალურ მსახურებას, რომელიც მთელი დღით კარდაკარ და სახალხო ადგილებში სამქადაგებლო კამპანიით გამოიხატება. მიიღებს თუ არა მონაწილეობას ამ ღონისძიებაში შენი კრება 1997 წლის აპრილში? აპრილის თვისთვის მომზადებულია „საგუშაგო კოშკისა“ და „გამოიღვიძეთ!“-ის შესანიშნავი გამოცემები და მთელ მსოფლიოში ამ ჟურნალების ერთდროული შეთავაზება, უეჭველია, თავის კვალს დატოვებს! კუნძულ კვიპროსზე არსებული კრებები, რომლებსაც დევიზად აქვთ „შეძლებისდაგვარად ყოველს მისწვდი კეთილი ცნობით“, ყოველთვიურად მიჰყვებიან ასე დაგეგმილ საქმიანობას ჟურნალებით და მიაღწიეს წლის განმავლობაში გავრცელებული ჟურნალების ახალ უმაღლეს რიცხვს — 275 359 ეგზემპლარს, რაც 54 პროცენტიან ზრდას წარმოადგენს.
ანგიას უკანასკნელი ცნობები
15. ა) რატომ გაგზავნა იეჰოვამ ანგია შემდეგი ცნობებით? ბ) რა გაკვეთილი უნდა მოგვცეს ანგიას მესამე ცნობამ?
15 მეორე ცნობის შეტყობინებიდან 63 დღის შემდეგ იეჰოვამ გაგზავნა ანგია მესამე განცხადებით, რომელიც დღესაც შეგვიძლია გულთან მივიტანოთ. ანგია ისე ლაპარაკობდა იუდეველებზე, თითქოს ისინი ტაძარს საფუძველს უყრიდნენ, რაც სინამდვილეში მათ 17 წლით ადრე გააკეთეს. კიდევ ერთხელ იეჰოვამ საჭიროდ ჩათვალა განწმენდის ჩატარება. მღვდლები და ხალხი გულგრილები გახდნენ და ამიტომ ისინი უწმინდურები იყვნენ იეჰოვას თვალში. შესაძლებელია, რომ დღეს იეჰოვას ხალხიდან ზოგი ადამიანი გულგრილი გახდეს და ყველაფერზე ნების მიმცემ და მატერიალისტურ ქვეყნიურ გზებსაც კი მიჰყვეს? უკიდურესად აუცილებელია, რომ „დღეიდან“ ყოველი ჩვენგანი დაუკვირდეს იეჰოვას სახელის განდიდებას, რომელიც დარწმუნებულია თავის აღთქმაში: „ამიერიდან. . . ვაკურთხებ“ (ანგია 2:10–19, აქ; ებრაელთა 6:11, 12).
16. რომელი ‘შერყევა’ არის მოახლოებული და რას გამოიწვევს ის?
16 იმავე დღეს ‘ცაბაოთ უფლის’ სიტყვა მეოთხედ და უკანასკნელად გამოეცხადა ანგიას. მან შეატყობინა, რას შეიცავდა ‘ცისა და მიწის შერყევა’ და თქვა: „დავამხობ სამეფოთა ტახტებს, მოვსპობ ხალხების სამეფოთა ძლიერებას, დავამხობ ეტლებს მხედრებითურთ და დაეცემიან ცხენები და მხედრები ერთმანეთის მახვილით“ (ანგია 2:6, 21, 22). ამრიგად, ‘შერყევა’ მიაღწევს კულმინაციას, როცა იეჰოვა სრულიად განწმენდს დედამიწას არმაგედონში. იმ დროისთვის „ყოველი ერიდან სასურველნი“ მოვლენ, რათა შექმნან ახალი ქვეყნიერების ადამიანთა საზოგადოების ბირთვი. რა დიდებული საფუძველია სიხარულისა და იეჰოვას განდიდებისთვის! (ანგია 2:7, აქ; გამოცხადება 19:6, 7; 21:1–4).
17. როგორ დაისვა იესო ‘ბეჭდად’?
17 თავისი წინასწარმეტყველების დასკვნისას ანგია წერს: „იმ დღეს, ამბობს ცაბაოთ უფალი, წაგიყვან შენ, ზერუბაბელ. . . და ბეჭედივით მეყოლები, რადგან ჩემი რჩეული ხარ, ამბობს ცაბაოთ უფალი“ (ანგია 2:23). ახლა ქრისტე იესო არის იეჰოვას ნამდვილი მესიანური მეფე და მღვდელმთავარი და თვითონ ასრულებს ზეცაში ორივე თანამდებობას, რომელსაც წინასახეობრივად გამგებელი ზერუბაბელი და მღვდელმთავარი იესო ცალ-ცალკე მიწიერ იერუსალიმში ასრულებდნენ. იეჰოვას მარჯვენაზე ოფიციალური ბეჭდის მსგავსად, იესო ის ერთადერთი პიროვნებაა, რომელიც გახდა „ჰო“, როგორც იეჰოვას ხელსაწყო ‘ღვთის ყველა აღთქმის’ განხორციელებაში (2 კორინთელთა 1:20; ეფესელთა 3:10, 11; გამოცხადება 19:10). ბიბლიის მთელი წინასწარმეტყველური ცნობა ხაზს უსვამს იეჰოვას ღონისძიებას ქრისტესთან, როგორც მეფესა და მღვდელ გამომსყიდველთან დაკავშირებით (იოანე 18:37; 1 პეტრე 1:18, 19).
18. როგორი დასკვნითი გამომაცოცხლებელი შესრულება ექნება ‘ცაბაოთ უფლის სიტყვებს’?
18 ნამდვილად, დღევანდელ დღეს ყველაზე განდიდებული მდგომარეობაა, აღმოვჩნდეთ იეჰოვას მბრწყინავ სულიერ ტაძარში! და მალე, როცა იეჰოვა სატანის ქვეყნიერებას გაანადგურებს, ანგიას 2:9-ს ექნება შემდეგი აღმაფრთოვანებელი შესრულება: „ამ ადგილზე მოვაფენ მშვიდობას, ამბობს ცაბაოთ უფალი“. საბოლოოდ, მშვიდობა! — ხანგრძლივი, საყოველთაო მშვიდობა, გარანტირებული იეჰოვას ‘ბეჭდით’, ქრისტე იესოთი, ‘მშვიდობის მთავრით’, რომლის შესახებაც დაწერილია: „ხელმწიფების განსადიდებლად და უბოლოო მშვიდობისთვის. . . ცაბაოთ უფლის შური აღასრულებს ამას“ (ესაია 9:5, 6). იეჰოვას თაყვანისმცემლობის სახლის დიდებას საუკუნოდ აირეკლავს მისი უზენაესი ხელისუფლების მშვიდობით სავსე მთელი სამფლობელო. დაე ჩვენც მარადიულად დავრჩეთ ამ სახლში! (ფსალმუნი 26:4; 64:5; 83:11).
[სქოლიოები]
a იხილე „‘ბოროტი მოდგმისგან’ ხსნა“ და „სიფხიზლის დრო“ „საგუშაგო კოშკის“ სასწავლო სტატიებში №11.
შეგიძლია თუ არა, ახსნა?
◻ როგორ ‘ივსება დიდებით’ იეჰოვას დღევანდელი სახლი?
◻ რატომ არ იყო კეთილი ცნობის ქადაგება ასე გადაუდებელი წინათ?
◻ როგორ აღგვძრავს 1996 სამსახურებრივი წლის ანგარიში გადაუდებელი ქადაგებისკენ?
◻ როგორ მსახურობს ქრისტე იეჰოვას ‘ბეჭდად’?
[ჩარჩო 23-ე გვერდზე]
მკა „ქვეყნის კიდიდან“
ესაიას 43:6-ში ვკითხულობთ იეჰოვას ბრძანებას: „არ დააკავო! მოიყვანე ჩემი ვაჟები შორეთიდან და ჩემი ასულები — ქვეყნის კიდიდან“. დღეს ეს მუხლი არნახულად სრულდება აღმოსავლეთ ევროპაში. ავიღოთ, მაგალითად, წინათ კომუნისტური ქვეყანა მოლდოვა. არსებობს სოფლები, რომელთა მოსახლეობის ნახევრამდე დღეს იეჰოვას მოწმეები არიან. მათ დიდი მანძილის გადალახვა უწევთ საქადაგოდ უბნების მოსაძებნად, მაგრამ ისინი არაფერს ზოგავენ ამისთვის! ამ კრებებში მრავალი მაუწყებელი ადრეულ 50-იან წლებში ციმბირში განდევნილების შთამომავლები არიან. ახლა ოჯახები მკის საქმიანობას უძღვებიან. 12 565 მაუწყებლიდან გასულ წელს 1 917 მოინათლა. მოლდოვას კრებებიდან 43 კრება, ინდივიდუალურად დაახლოებით 150 მაუწყებელს შეიცავს, ხოლო რაიონების რაოდენობა ახალ სამსახურებრივ წელს ოთხიდან რვამდე გაიზარდა.
აგრეთვე აღსანიშნავია ზრდა ალბანეთში. იეჰოვას ურყევად ერთგულ მოწმეთა პატარა ჯგუფი უკიდურესად სასტიკ დიქტატურას დაახლოებით 50 წლის განმავლობაში განიცდიდა. მათგან ზოგიერთი მოკლული იყო. ეს გვახსენებს იესოს დანაპირებს: „ნუ გეშინია ნურაფრისა, რისი გადატანაც მოგიწევს. აჰა, ეშმაკი ჩააგდებს ზოგ თქვენგანს საპყრობილეში, რათა გამოიცადოთ. . . სიკვდილამდე ერთგული იყავი და მოგცემ სიცოცხლის გვირგვინს“ (გამოცხადება 2:10; იხილე აგრეთვე იოანე 5:28, 29; 11:24, 25). რას ვხედავთ დღეს ალბანეთში? ესაიას 60:22-ში მოცემული იეჰოვას აღთქმის, მართლაც, საოცარ შესრულებას: „მცირე ათასად გადაიქცევა“! 1990 წელს ალბანეთში მხოლოდ ერთმა მაუწყებელმა ჩააბარა ანგარიში სამქადაგებლო მსახურებაზე. მიუხედავად ამისა, იტალიიდან და სხვა ქვეყნებიდან უფრო მეტი „მუშაკი“ გამოეხმაურა იესოს მოწოდებას: „ამიტომ წადით და მოიმოწაფეთ ყველა ხალხი, მონათლეთ ისინი“ (მათე 28:19; ლუკა 10:2). იესოს სიკვდილის გახსენების საღამოსთვის 1996 წელს სამქადაგებლო მსახურებაში აქტიურად მონაწილეობდა 773 მაუწყებელი და გახსენების საღამოს შეხვედრებზე მათ შეკრიბეს 6 523 ადამიანი, რაც მაუწყებელთა რიცხვს რვაზე მეტჯერ აღემატება! შორეული რაიონებიდან დამსწრეთა საოცრად დიდი რიცხვის შესახებ იტყობინებიან. თუმცა ქალაქებს, კიუკესსა და დივიეკეს, ადგილობრივი მაუწყებლები არ ჰყავს, იქ გახსენების საღამოს ესწრებოდა შესაბამისად 192 და 230 ადამიანი. კრიუიეში, სადაც მხოლოდ ერთი მაუწყებელია, ესწრებოდა 212 ადამიანი. კორჩეში 30 მაუწყებელმა დაიქირავა ნაგებობა 300-ზე მეტი დამსწრისთვის. აუდიტორიაში ადამიანთა ამ რიცხვის მოთავსების შემდეგ სხვა 200 ადამიანს უადგილობის გამო გამობრუნება მოუწია. ჭეშმარიტად, ყანა მზადაა მკისთვის!
რუმინეთიდან მოდის ასეთი ცნობები: «კარდაკარ მსახურებისას შეგვხვდა მამაკაცი, რომელმაც თქვა, რომ იეჰოვას მოწმე იყო და ცხოვრობდა პატარა ქალაქში, რომელშიც, მონაცემების თანახმად, არც ერთი მოწმე არ იყო. მან თქვა, რომ მის გარდა იქ ცხოვრობდა 15 ადამიანი, რომლებიც წლების განმავლობაში ხუთშაბათობითა და კვირაობით ატარებდნენ შეხვედრებს და რომ მათ კარდაკარ მსახურება დაიწყეს. მომდევნო დღეს იმ ქალაქში ჩავედით. ჩვენს მოლოდინში ორ ოთახში დაგვხვდა 15 მამაკაცი, ქალი და ბავშვები, რომლებმაც მიიღეს 20 წიგნი და ჟურნალების ბოლო გამოცემების 20 ეგზემპლარი. ჩვენ ვუჩვენეთ ბიბლიის შესწავლის ჩატარების მეთოდები. ერთად ვიმღერეთ და ყველაზე გადაუდებელ კითხვებს ვუპასუხეთ. ერთ-ერთმა, რომელიც ჯგუფს ხელმძღვანელობდა, აღიარა: „რამდენიმე დღის წინ აცრემლებული ვევედრებოდი იეჰოვას, მწყემსი გამოეგზავნა ჩვენთან და ჩემს ლოცვას პასუხი გაეცა“. ჩვენ უკიდურესად გახარებულები ვიყავით, ხოლო ჩვენი წამოსვლის დროს მან ობლის მსგავსად, რომელმაც საბოლოოდ მამა იპოვა, თქვა: „ძალიან გთხოვთ, ნუ დაგვივიწყებთ. კვლავ მოგვინახულეთ!“ ასეც მოვიქეცით და ახლა ამ ქალაქში ბიბლიის შვიდი შესწავლა ტარდება. მრავალ ახალ ტერიტორიაზე საქმიანობა საოცრად იწყება ბიბლიური ლიტერატურის საშუალებით, რომელიც ძალიან ფასდება, რაც ნათელყოფს, რომ ეს საქმიანობა ღვთიური წყაროდან მომდინარეობს».
[ცხრილი 26-29 გვერდებზე]
იეჰოვას მოწმეების 1996 სამსახურებრივი წლის მსოფლიო ანგარიში
[სურათები 24, 25 გვერდებზე]
„ყოველი ერიდან სასურველნი“ იკრიბებიან ზღვის კუნძულებზე (1), სამხრეთ ამერიკაში (2), აფრიკასა (3) და აზიაში (4), ჩრდილოეთ ამერიკასა (5) და ევროპაში (6).