როგორ ვპოვოთ იმედი სასოწარკვეთილების დროს
წარმოიდგინე, ასეთი რამ რომ მოგსვლოდა: მთელი მატერიალური ქონება გაგინადგურდა. აღარ გყავს შვილები — სიცოცხლის სიხარული. მეუღლე მხარში არ გიდგება. სრულიად ჯანგატეხილი ხარ. ყოველი დღე აუტანელი განსაცდელია.
ეს შენი გადასატანი რომ ყოფილიყო, ნახავდი თუ არა სიცოცხლის გაგრძელების აღმძვრელ მიზეზს? თუ სასოწარკვეთილებაში ჩავარდებოდი?
ზემოთ აღწერილი სავალალო მდგომარეობა ბიბლიურ დროში მცხოვრებ მამაკაცზე, იობზე, გადამხდარი ნამდვილი ამბავია (იობი, თავები 1, 2). უკიდურესად გულდამძიმებული იობი მოთქვამდა: „მოსძაგდა ჩემს სულს სიცოცხლე“. ის სიკვდილს შეხვდებოდა როგორც შვებას (იობი 10:1; 14:13). მაგრამ საშინელი ტანჯვის მიუხედავად, იობმა შეინარჩუნა უმწიკვლოება ღვთის წინაშე. ამიტომაც „უკურთხა [იეჰოვამ] იობს დარჩენილი დღეები წინანდელზე უფრო მეტად“. ამრიგად, ის მშვიდობიანად მოკვდა, „მოხუცებული და დღესრული“ (იობი 42:12, 17).
იობის მოთმინების მაგალითს დღემდე აღფრთოვანებით ხვდებიან. მრავალმა განსაცდელმა გააუმჯობესა მისი თვისებები და სხვებიც წაახალისა კეთილი საქმეებისკენ (იაკობი 5:10, 11). ხოლო, რაც ყველაზე მნიშვნელოვანია, იობის წუნდაუდებელი უმწიკვლოება იეჰოვას გულს ახარებდა (იგავნი 27:11). ამრიგად, კოშმარული ტანჯვა, საბოლოოდ, ღვთისმოსაობის, რწმენისა და ერთგულების არნახულ გამარჯვებად იქცა, რომელმაც მრავალი კურთხევა მოუტანა იობს და მისი მაგალითით აღძრულებს.
იმედი სხვადასხვა განსაცდელის მიუხედავად
შესაძლოა შენც იობის მიერ გადატანილის მსგავს განსაცდელებს იტან. შეიძლება ემოციურად იფიტები საყვარელი ადამიანის დაკარგვის გამო. შეიძლება, სასტიკი ავადმყოფობა შენს არსებობას მტანჯველ განსაცდელად აქცევს. შეიძლება გულგამგმირავი განქორწინების შემდეგ მთელი ცხოვრება დაქუცმაცებულად გეჩვენება. შეიძლება ეკონომიკური წარუმატებლობები ძლიერ გასაჭირში გაგდებს. შესაძლოა ჭეშმარიტი თაყვანისმცემლობის სიძულვილით აღსავსე მოწინააღმდეგეების საშინელი დევნის სამიზნე ხარ. განსაცდელებთან გასამკლავებლად ბრძოლის გამო შეიძლება ფიქრობ, რომ მომავალს აზრი აღარა აქვს (1 პეტრე 1:6).
სასოწარკვეთილებაში ჩავარდნის ნაცვლად, ჰკითხე საკუთარ თავს: „რატომ ვიტანჯები?“ შენ იმიტომ იტანჯები, რომ სატანა ეშმაკის, ‘ბოროტის ძალაუფლებაში’ მყოფ ქვეყნიერებაში ცხოვრობ (1 იოანე 5:19, აქ). ამის შედეგად ყველა იტანჯება. გარკვეულწილად, თითოეულ ჩვენგანზე მოქმედებს სამეფოს შესახებ ცნობისადმი ეშმაკის მიერ შთაგონებული სიძულვილი, სხვების მხრიდან სიძულვილის გამომხატველი სიტყვები ან უღვთო ყოფაქცევიდან გამომდინარე შემაძრწუნებელი საქმეები, რომლებიც ფართოდაა გავრცელებული ამ ‘საზარელ ჟამს’ (2 ტიმოთე 3:1–5).
ცხოვრებაში მომხდარი ტრაგედია შეიძლება იმის ბრალი იყოს, რომ ‘დროისა და შემთხვევის’ მსხვერპლი გახდი (ეკლესიასტე 9:11). სხვა მხრივ, ცხოვრებაში დაშვებული შეცდომები ზოგჯერ მემკვიდრეობით მიღებული ცოდვიანობის გამო ხდება (რომაელთა 5:12). სერიოზული შეცდომის შემდეგაც კი, თუ ინანიებდი და სულიერ დახმარებას ეძებდი, ნუ ფიქრობ, რომ ღმერთმა უარგყო (ფსალმუნი 102:10–14; იაკობი 5:13–15). ყველაზე მეტად ის ზრუნავს ჩვენზე (1 პეტრე 5:6, 7). შეგიძლია დარწმუნებული იყო, რომ „ახლოა უფალი გულმოდრეკილებთან და სულით მორჩილებს იხსნის“ (ფსალმუნი 33:19). რაც არ უნდა ტრაგიკული თუ სასტიკი იყოს შენი განსაცდელი, მასთან გასამკლავებლად იეჰოვას შეუძლია სიბრძნე მოგცეს (იაკობი 1:5–8). ყოველთვის გახსოვდეს, რომ იეჰოვას ყველანაირი ჭრილობის განკურნება შეუძლია. როცა მისი კეთილგანწყობილება გაქვს, ვერაფერი შეგიშლის ხელს სიცოცხლის ჯილდოს მოპოვებაში (რომაელთა 8:38, 39).
შეიძლება ჭირი მარგებელი იყოს?
არსებობს ძველი ანდაზა: „ზოგი ჭირი მარგებელიაო“. ამით, უბრალოდ, ითქმება, რომ ყველაზე არასასიამოვნო ვითარების მიუხედავადაც კი, ყოველთვის შეგიძლია იმედისთვის მიზეზის მოძებნა. ღვთის სიტყვაში ყოველივე ჩაწერილის მიზანი ისაა, რომ „გვქონდეს იმედი“ (რომაელთა 15:4). იმის მიუხედავად, თუ რამდენად მძიმეა შენი მდგომარეობა, ბიბლიაში მოცემულ აღთქმებსა და პრინციპებს შეუძლია შენთვის განახლებული სიხარულისა და იმედის მოტანა.
საღვთო წერილი გვიჩვენებს, რომ ‘ტანჯვა ხანმოკლე და მსუბუქია’ იმ საუკუნო კურთხევებთან შედარებით, რომელიც ღვთისმოყვარულებს წინ აქვთ (2 კორინთელთა 4:16–18). ბიბლია აგრეთვე აღნიშნავს, რომ განსაცდელში გამომუშავებული ღვთისმოსაწონი თვისებები განთქმულ სახელსა და მატერიალურ სიმდიდრეზე ბევრად უფრო ფასეულია (1 იოანე 2:15–17). ამრიგად, კეთილ მიზანს ტანჯვაც კი შეიძლება მოემსახუროს (ებრაელთა 5:8). სინამდვილეში, განსაცდელებში მოპოვებულის გამოყენებამ შეიძლება მოულოდნელი კურთხევები მოგიტანოს.
რთულმა განსაცდელმა შეიძლება უფრო ლმობიერი გაგხადოს. შეიძლება აღიარო, რომ წარსულში გახასიათებდა სხვების გამაღიზიანებელი და შენი სულიერი ზრდის დამაბრკოლებელი თვისებები. შესაძლოა ეს გადამეტებული თავდაჯერებულობა იყო. უბედურებით დამძიმებული შეიძლება უეცრად მიხვდე, რა უსუსური ხარ და რა ძალიან გჭირდება სხვები. თუ განსაცდელიდან გაკვეთილი ისწავლე და საჭირო ცვლილებები მოახდინე — ჭირი მარგებელი ყოფილა შენთვის.
რას იტყოდი, თუ წარსულში სხვებს უჭირდა შენთან ურთიერთობა, რადგან თავს ვერ აკონტროლებდი? ამ მიზეზმა შეიძლება, გარკვეულწილად, ჯანმრთელობაც კი შეგირყია (იგავნი 14:29, 30). მაგრამ ახლა მდგომარეობა შეიძლება ბევრად უკეთესი იყოს, რადგან თავშეკავებაში დახმარებისთვის შენ ღვთის სულს მიენდე (გალატელთა 5:22, 23).
სხვა ადამიანების მსგავსად, ერთ დროს შესაძლოა გაკლდა თანაგრძნობა იმ ადამიანებისადმი ლმობიერების გამოსავლენად, რომლებიც შეცდომებს უშვებენ. მაგრამ, თუ პირადად ჩავარდნილხარ ისეთ მდგომარეობაში, რომელშიც მოწყალება გწყუროდა, ალბათ, ახლა უფრო ფიქრობ სხვებისადმი ამ თვისების გამოვლენას. სხვებისგან გულთბილმა თანაგრძნობამ, ზრუნვამ და გულმოწყალებამ მიგახვედრა, რომ შენც უნდა გამოავლინო მსგავსი თვისებები მომნანიებელი დამნაშავეებისადმი. თუ ტკივილმა აღგძრა ხასიათში ამ სისუსტეების გამოსასწორებლად, ეს სწორედ ის მარგებლობაა, რომელიც შენი ჭირიდან გამოიტანე. შენ ისწავლე, რომ „წყალობა აღემატება სამსჯავროს“ (იაკობი 2:13; მათე 5:7).
რის თქმა შეიძლება, თუ ქრისტიანულ კრებაში მიღებული დასჯა ძვირფასი უპირატესობებისა და სხვების მხრიდან პატივისცემის ფასად დაგიჯდა? ნუ ჩავარდები სასოწარკვეთილებაში. დასჯითი ზომები ეხმარება კრებაში სიწმინდის შენარჩუნებას, მაგრამ მათ მიზნებში დამნაშავეების სულიერი აღდგენაც შედის. უნდა ვაღიაროთ, რომ «ყოველი წვრთნა [„დასჯა“, აქ] ამჟამად სიხარულად კი არ გვეჩვენება, არამედ მწუხარებად. მაგრამ შემდგომში სიმართლის მშვიდობიან ნაყოფს აძლევს მას, ვინც მის მიერ განისწავლა» (ებრაელთა 12:11). თუმცა დასჯა შეიძლება დიდი დარტყმა იყოს, ის იმედს არ ართმევს თავმდაბალ მომნანიებელ ადამიანს. ძველი დროის ისრაელის მეფე დავითი მკაცრად დაისაჯა დანაშაულისთვის, მაგრამ მოინანია და, საბოლოოდ, განსაკუთრებული ქება დაიმსახურა, როგორც გამოჩენილი რწმენის კაცმა (მეორე მეფეთა 12:7–12; ფსალმუნი 31:5; ებრაელთა 11:32–34).
შესაძლოა განსაცდელმა დიდი გავლენა მოახდინა შენს შეხედულებაზე. შეიძლება წარსულში ყურადღებას მატერიალისტურ მიზნებსა და მიღწევებზე ამახვილებდი, რომლებმაც აღიარება მოგიტანა და ამ ქვეყნიერებაში მაღალ სოციალურ საფეხურზე დაგაყენა. შესაძლოა ფინანსურ წარუმატებლობასა თუ მატერიალურ დანაკარგთან დაკავშირებულმა განსაცდელმა შენი ფიქრები უფრო მნიშვნელოვან საკითხებზე შეაჩერა (შეადარე ფილიპელთა 1:10). ახლა შენ გესმის, რომ მხოლოდ წმინდა მსახურებაში მოპოვებული სულიერი ფასეულობები და მიზნებია ის, რასაც ნამდვილი სიხარული და ხანგრძლივი კმაყოფილება მოაქვს.
მიენდე იეჰოვას
იეჰოვასადმი წმინდა მსახურების შესრულებას შეიძლება შენი ქრისტიანული რწმენის მოწინააღმდეგეთა მხრიდან დევნა და ტანჯვა მოჰყვეს. შეიძლება ასეთი განსაცდელის გამო თავი დაჩაგრულად იგრძენი, მაგრამ მას სარგებლობის მოტანა შეუძლია. ამ გამოცდამ შეიძლება რწმენა გაგიძლიეროს. უფრო მეტიც, შენი სიმტკიცის ხილვით შეიძლება დევნით დატანჯული სხვა ადამიანები გამხნევდნენ და გაძლიერდნენ. შენი შესანიშნავი ყოფაქცევის თვითმხილველნი შეიძლება ღვთის განსადიდებლად აღიძრან. შენს მოწინააღმდეგეებსაც კი შეიძლება შერცხვეთ და აღიარონ შენი კეთილი საქმეები! (1 პეტრე 2:12; 3:16).
დევნის დროს სასოწარკვეთილების ასარიდებლად იეჰოვას უნდა მიენდო. მისი სიტყვა გვიჩვენებს, რომ განსაცდელისგან აუცილებლად მიიღებ შვებას, მაგრამ შეიძლება არა დაუყოვნებლივ, არა სურვილისთანავე. ამასობაში კი „ნუ მოიწყენთ კეთილი საქმეების კეთებას“ (2 თესალონიკელთა 3:13). განაგრძე განსაცდელებთან გასამკლავებლად და მათ გადასატანად საშუალებების მოძებნა. მაშინაც კი განაგრძე, როცა მდგომარეობა გამოუვალი ჩანს, „მიანდე უფალს შენი საზრუნავი და ის შეგეხიდება, იგი არასოდეს არ დაუშვებს წმიდანის წაბორძიკებას“ (ფსალმუნი 54:23). საკუთარი თავისადმი სიბრალულში ჩაძირვის ნაცვლად, დაფიქრდი, რა კურთხეული ხარ, რომ იცნობ იეჰოვას, მის ხალხში ხარ და უსასრულო სიცოცხლის იმედი გაქვს (იოანე 3:16, 36).
მუდამ იფიქრე მნიშვნელოვან საკითხებზე. ყოველდღიურად მიმართე იეჰოვას ლოცვით და სთხოვე ძალა და სირთულეების გადატანის უნარი (ფილიპელთა 4:6, 7, 13). განდევნე ყოველი ფიქრი იმ ადამიანებისთვის სამაგიეროს მიზღვაზე, რომლებიც შენი ტანჯვის მიზეზს წარმოადგენენ. ყველა საქმე იეჰოვას ხელს ჩააბარე (რომაელთა 12:19). ქრისტიანული თვისებების განვითარებით გამუდმებით ეძებე შენი პიროვნების გასაუმჯობესებელი საშუალებები (2 პეტრე 1:5–8). დააფასე ყოველივე, რასაც შენთვის სხვები და, მათ შორის, უხუცესები აკეთებენ, რომლებიც მოსიყვარულედ ზრუნავენ შენი სულიერი საჭიროებებისთვის (ებრაელთა 13:7, 17). ღვთის ერთგული იყავი, თვალი სიცოცხლის ჯილდოზე გეჭიროს, დარწმუნებული იმაში, რომ მას სიკვდილიც კი ვერ წაგართმევს (იოანე 5:28, 29; 17:3).
თუ დღეს ღრმად დარდობ ან მძიმე განსაცდელისგან იტანჯები, «ესავდე [„მიენდე“, აქ] უფალს მთელი გულით» და უსაზღვრო სიხარული აუცილებლად შეცვლის მწუხარებასა და გაჭირვებას (იგავნი 3:5, 6; იოანე 16:20). უბედურება გზას დაუთმობს ბედნიერებას, როცა ღმერთი გაკურთხებს, როგორც იობის შემთხვევაში მოიქცა. ახლანდელი ტანჯვა არაფერია ჯილდოსთან შედარებით (შეადარე რომაელთა 8:18). შენმა ერთგულმა გამძლეობამ შეიძლება სხვები გაამხნეოს და ხელი შეგიწყოს შესანიშნავი ქრისტიანული თვისებების განვითარებაში, რომლებიც ‘ახალ კაცად’ ჩამოყალიბებას მოჰყვება (ეფესელთა 4:23, 24; კოლასელთა 3:10, 12–14). მაშ, გამხნევდი მოციქული პეტრეს ბრძნული რჩევით: „ტანჯულებმაც ღვთის ნებისამებრ, თავიანთი სულები მიანდონ ჭეშმარიტ გამჩენს სიკეთის ქმნაში“ (1 პეტრე 4:19).
[სურათი 23 გვერდზე]
მოიქეცი იობის მსგავსად. ნურასდროს დაკარგავ იმედს.
[სურათი 24 გვერდზე]
მიენდე იეჰოვას მთელი გულით.