სამეფოს მაუწყებლები იტყობინებიან
მან ‘ძვირფასი მარგალიტი’ იპოვა
„ცათა სასუფეველი წააგავს ვაჭარს, რომელიც ლამაზ მარგალიტებს ეძებს; როდესაც იპოვის ერთ ძვირფას მარგალიტს, წავა, გაყიდის ყოველივეს, რაც აბადია, და იყიდის მას“. იესომ ამ სიტყვებით ღვთის სამეფოს აღმატებული მნიშვნელობა აჩვენა (მათე 13:45, 46). ისინი, ვისაც ესმის სამეფოს მნიშვნელობა, ხშირად დიდ მსხვერპლზე მიდიან, რათა დაეუფლონ მას. ამას ცხადყოფს ერთი შემთხვევა ტაივანში, პინდუნის ოლქში.
ბ-ნმა და ქ-ნმა ლინებმა ბიბლიის შესწავლა დაიწყეს იეჰოვას მოწმეებთან 1991 წელს. როცა ეს ადგილობრივმა მღვდელმა შეიტყო, შეეცადა თავისი ეკლესიის წევრებად გაეხადა ისინი. რადგან ლინებს საქმე ჰქონდათ გახსნილი — ადგილობრივ ბაზარზე ყიდდნენ ღორისა და იხვის სისხლს — გადაწყვიტეს მღვდლის თვალსაზრისის გაგება ამ საკითხთან დაკავშირებით. „ყველაფერი, რაც ღმერთმა შექმნა, ადამიანს შეუძლია ჭამოს“, — უპასუხა მან. მოწმეებმა კი უთხრეს, ყურადღება მიექციათ იმისთვის, თუ რას ამბობს ბიბლია. მათ გაიგეს, რომ იეჰოვა ღმერთისთვის სისხლი წმინდაა, რადგან „სული ყოვლისა ხორცისა სისხლი თვისი არს“ (ლევიანნი 17:10, 11, „ძველი აღთქმა“, 1900 წლის გამოცემა). ამიტომ ჭეშმარიტმა ქრისტიანებმა ‘თავი უნდა შეიკავონ სისხლისგან’ (საქმეები 15:20). ამ საკითხთან დაკავშირებით საღვთო წერილის განხილვის შედეგად, მათ გადაწყვიტეს აღარ გაეყიდათ სისხლი, მიუხედავად იმისა, რომ ეს მათი შემოსავლის ძირითადი წყარო იყო. მაგრამ მოკლე დროში ისინი უფრო დიდ გამოცდას შეხვდნენ.
ჭეშმარიტების შეცნობამდე ლინებმა „ფუფალად“ ცნობილი ბეტელის პალმის 1 300 ძირი დარგეს თავიანთ ნაკვეთზე. თუმცა ხუთი წელი იყო საჭირო, სანამ ხეები მოგებას მოუტანდა, პირველი მოსავლის აღებიდან ლინებს შეეძლოთ ყოველწლიურად 77 000 ამერიკული დოლარის აღება. როცა მოახლოვდა მოსავლის აღება, ლინებს სერიოზული გადაწყვეტილების მიღება მოუწიათ. ბიბლიის შესწავლის შედეგად მათ გაიგეს, რომ ქრისტიანები უნდა განიწმინდონ „ხორცისა და სულის ყოველგვარი სიბილწისაგან“, რაც ნიშნავს, არ მიყვნენ და ხელი არ შეუწყონ ისეთ უწმინდურ ჩვევებს, როგორიცაა თამბაქოს მოწევა, ნარკოტიკების ბოროტად გამოყენება და ბეტელის კაკლის ღეჭვა (2 კორინთელთა 7:1). როგორ მოიქცნენ ისინი?
სინდისით შეწუხებულმა ბ-მა ლინმა შეწყვიტა შესწავლა. ამასობაში, ქ-მა ლინმა გაყიდა ძველი ხეებიდან მოკრეფილი ბეტელის პალმის თესლი და მოიგო 3 000-ზე მეტი დოლარი. ამით მათ იგემეს, რა მოელოდათ უახლოეს მომავალში, თუ თავიანთ ხეებს დატოვებდნენ. მაგრამ ბ-ნ ლინს სინდისი აწუხებდა.
მას აწუხებდა ეს საკითხი, სანამ ერთ დღეს ადგილობრივ მოწმეებს არ სთხოვა, მის მაგივრად ამოეჩეხათ ბეტელის პალმები. მოწმეებმა აუხსნეს, რომ ეს გადაწყვეტილება მას უნდა მიეღო; მაშასადამე, მას უნდა ‘ეტარებინა თავისი სატარებელი’ და მოეჭრა ხეები (გალატელთა 6:4, 5). მოწმეებმა შეახსენეს მას, არ დაევიწყებინა 1-ლ კორინთელთა 10:13-ში მოცემული დაპირება: „არ შეგმთხვევიათ განსაცდელი, გარდა ადამიანურისა. და სარწმუნოა ღმერთი, რომელიც არ დაუშვებს, რომ თქვენს შესაძლებლობაზე მეტად გამოიცადოთ, არამედ განსაცდელში გამოსავალსაც მოგცემთ, რომ შესძლოთ გადატანა“. მოწმეებმა აგრეთვე დაარწმუნეს ის: „ჩვენ რომ ამოგიჩეხოთ ხეები, შეიძლება ინანო და ჩვენ დაგვაბრალო ეს ზარალი“. ამის შემდეგ ცოტა ხანი გავიდა და ერთხელ ქ-ნი ლინი ელექტროხერხის ხმაურმა გამოაღვიძა. მისი ქმარი და ბავშვები ბეტელის პალმებს ჭრიდნენ!
ბ-მა ლინმა გამოსცადა, რომ იეჰოვა თავისი დაპირების ერთგულია. მან იშოვა სამუშაო, რომელმაც საშუალება მისცა, სუფთა სინდისი ჰქონოდა და იეჰოვას განმადიდებელი გამხდარიყო. ის მოინათლა იეჰოვას მოწმეების სარაიონო კონგრესზე 1996 წლის აპრილში.
დიახ, საბოლოოდ ბ-მა ლინმა ‘გაყიდა ყოველივე, რაც ებადა’ და იყიდა ‘ძვირფასი მარგალიტი’. ახლა ის ფასდაუდებელ უპირატესობას ფლობს — იეჰოვა ღმერთთან ახლო ურთიერთობას და მისი სამეფოს ინტერესებისთვის მსახურებას.