სამეფოს მაუწყებლები იტყობინებიან

ღვთის სიტყვის გამწმენდი ძალა

ცნობილია, რომ ნარკომანების უმეტესობა კლინიკებიდან გათავისუფლების შემდეგ ძველ ჩვევებს უბრუნდება. მაგრამ ღვთის სიტყვა შემძლეა გააკეთოს ის, რასაც კლინიკები, ჩვეულებრივ, ვერ უმკლავდებიან (ებრაელთა 4:12). ღვთის სიტყვა და სული მრავალს დაეხმარა ნარკომანიის დაძლევასა და შემდეგი რჩევის გამოყენებაში: „განვიწმიდოთ ხორცისა და სულის ყოველგვარი სიბილწისაგან, ღვთის მოშიშებით აღვასრულოთ სიწმიდე“ (2 კორინთელთა 7:1).

ამის მაგალითია მიანმაში მომხდარი შემთხვევა. მამაკაცი, რომელიც მრავალი წელი ებრძოდა ნარკოტიკებისადმი მიდრეკილებას, ყვება: „ნარკომანი ჯერ კიდევ მოზარდობისას გავხდი. ბევრჯერ ვცადე თავის დანებება, მაგრამ ვერ შევძელი. ნარკომანიის გამო ქურდობას მივყავი ხელი. შედეგად, 1988 წელს ერთი წლით ციხეში ჩამსვეს.

ციხიდან გათავისუფლების შემდეგ ურთიერთობა განვაახლე ყოფილ მეგობრებთან. მალე ამის შემდეგ კვლავ დავუბრუნდი ნარკომანიას. ამ თვითგამანადგურებელი გეზის აღების შედეგად ოჯახის წევრებმა ყოველგვარი ურთიერთობა შეწყვიტეს ჩემთან. გარდა ამისა, ჩემმა მოჯანყე განწყობილებამ დასახლებაში მრავალს ჩემდამი შიში ჩაუნერგა და უკვე ისინიც გამირბოდნენ.

შემდეგ, ერთ დღეს, გარდაუვალი რამ მოხდა — ნარკოტიკი დიდი დოზით მივიღე. მე ციხეში დამაბრუნეს, ამჯერად სამი წლით. თუმცა ციხე ძალიან მკაცრი იყო, როგორღაც გადავურჩი სიკვდილს.

სახლში დაბრუნებისას ოჯახს პატიება ვთხოვე წარსული შეცდომებისთვის. მათ გულმოწყალედ მიმიღეს, მაგრამ მეგობრებმა კიდევ ერთხელ მიბიძგეს, დავბრუნებოდი ადრინდელ გზებს.

ბოლოს, ბებია ადგილობრივ პასტორს მოელაპარაკა, რომ გარკვეულ ბიბლიურ სკოლაში შევსულიყავი. პასტორი დათანხმდა. მაგრამ, ვიდრე სიარულს დავიწყებდი, მამიდამ, რომელიც იეჰოვას მოწმეა, მითხრა, რომ, თუ ნამდვილად ბიბლიის შესწავლა მინდოდა, მოწმეებთან უნდა მესწავლა.

წავედი სამეფო დარბაზში და გამაცნეს მამაკაცი, რომელიც თანახმა იყო, ბიბლია ესწავლებინა ჩემთვის. მრავალი დამსწრე გულთბილად მესალმებოდა და მაგრძნობინეს, რომ უხაროდათ ჩემი მისვლა.

ბიბლიის შესწავლისა და ქრისტიანულ შეხვედრებზე დასწრების დაწყების შემდეგ ნარკოტიკებისკენ ლტოლვა შეცვალა ძლიერმა სურვილმა — დავახლოვებოდი ღმერთს. ერთ წელიწადში იმას მივაღწიე, რომ სიცოცხლე იეჰოვა ღმერთს მივუძღვენი და მიძღვნის სიმბოლოდ წყალში მოვინათლე.

ამას წინათ, კარდაკარ მსახურებისას, შევხვდი ყოფილ მეგობარ ნარკომანს. მას ვერ გაეგო ჩემი საოცარი შეცვლა. ამან დამოწმების საშუალება მომცა და ველაპარაკე სამეფოს იმედზე.

როგორც იქნა, ვიპოვე სიცოცხლის ნამდვილი მიზანი და აზრი. ღვთის დახმარებისა და მის სიტყვაში მოცემული რჩევის საშუალებით ახლა შემიძლია სხვებს დავეხმარო, ჩამოიცილონ ნარკოტიკების ბოროტად გამოყენების გამხრწნელი ჩვევა“.