ჭეშმარიტება ცვლის ცხოვრებას

სამწუხაროა, მაგრამ სიმართლეა, რომ დღეს უამრავი ხალხისთვის ცხოვრება ძნელია — კრიტიკულიც კი. შესაძლებელია ასეთი ადამიანებისთვის ბედნიერების პოვნა? ზოგი ბოროტმოქმედია და თავის მოყვასსაც არ ინდობს. შეძლებენ როდისმე ისინი, საზოგადოების პატიოსანი წევრები გახდნენ? ორივე კითხვის პასუხი დადებითია. ადამიანებს შეუძლიათ შეიცვალონ. ცხოვრებაში ცვლილების შეტანა შესაძლებელია. მოციქულმა პავლემ გვიჩვენა, თუ როგორ, როცა დაწერა: „შეიცვალენით თქვენი გონების განახლებით, რათა შეიცნოთ, რა არის ღვთის ნება — კეთილი, სასურველი და სრულყოფილი“ (რომაელთა 12:2).

‘ღვთის სრულყოფილი ნების’ ხსენებამ შეიძლება იესოს მიერ თავისი მოწაფეებისთვის ნათქვამი გაგვახსენოს, რომელიც პავლეს ზემოხსენებულ სიტყვებზე ოცი წლით ადრე თქვა: „შეიცნობთ ჭეშმარიტებას და ჭეშმარიტება გაგათავისუფლებთ თქვენ“ (იოანე 8:32). ‘ჭეშმარიტებაში’ იესო გულისხმობდა ღვთისგან შთაგონებულ ცნობას — განსაკუთრებით ცნობას ღვთის ნების შესახებ, — რომელიც ბიბლიაშია ჩვენთვის შემონახული (იოანე 17:17). ნამდვილად ათავისუფლებს ბიბლიური ჭეშმარიტება ადამიანებს? ნამდვილად ცვლის ცხოვრებას ღვთის ნების შესრულება? რა თქმა უნდა. განვიხილოთ რამდენიმე მაგალითი.

სიცოცხლის აზრი

არცთუ ისე დიდი ხნის წინ გიბრალტარელი მოისესი ძალიან უბედური იყო. ის ყვება: „ლოთი ვიყავი და ქუჩაში ვიძინებდი. განადგურებულად ვგრძნობდი თავს. ყოველღამე ვთხოვდი ღმერთს, მოეღო მოწყალება და აღარ გამთენებოდა დღე. ვტიროდი, როდესაც ღმერთს ვეკითხებოდი, რატომ დავიბადე თუ უმუშევარი, უოჯახო და უთვისტომო ვიქნებოდი. რისთვის უნდა ვიცოცხლო?“ შემდეგ რაღაც მოხდა.

მოისესი განაგრძობს: „მე მივხვდი, რომ ღმერთმა მოისმინა ჩემი ლოცვა, როდესაც რობერტს, იეჰოვას მოწმეს, შევხვდი. რობერტმა მომცა ბიბლია და ბიბლიის შესასწავლად დამხმარე პუბლიკაცია „რას მოითხოვს ღმერთი ჩვენგან?“a ყოველდღე ერთად ვსწავლობდით ბიბლიას სკამზე, რომელზეც ღამეს ვათევდი. ერთი თვის შემდეგ რობერტმა იეჰოვას მოწმეთა ადგილობრივ სამეფო დარბაზში კრების შეხვედრაზე წამიყვანა. მალე ბიბლიურმა ჭეშმარიტებამ სავსებით შემიცვალა თვალსაზრისი. აღარ მძინავს ქუჩაში; აღარ ვეწევი და აღარ ვსვამ. ჩემი ცხოვრება შეიცვალა და ბედნიერი ვარ. ვიმედოვნებ, მალე მოვინათლები და ვემსახურები იეჰოვას.

რა შესანიშნავი ცვლილებაა! ადამიანების უიმედობის მიზეზი ხშირად შემეცნების უქონლობაა. ისინი არ იცნობენ ღმერთს და არ იციან მისი შესანიშნავი განზრახვები. შემეცნების შეძენამ მოისესს ძალა და სიმამაცე მისცა ცხოვრების შესაცვლელად. ფსალმუნმომღერლის ღვთისადმი ლოცვის მსგავსად, მოისესის ლოცვაც შესმენილი იყო: „გამოავლინე შუქი შენი და ჭეშმარიტება შენი. ისინი წამიძღვებიან და მიმიყვანენ შენს წმიდა მთასთან და შენს სამკვიდროსთან“ (ფსალმუნი 42:3).

ბელიზში მცხოვრებ დანიელსაც მსგავსი რამ შეემთხვა. დანიელი არ იყო უსახლკარო, პირიქით, პრესტიჟული სამუშაო ჰქონდა. მაგრამ ოცი წლის განმავლობაში ნარკომანი და ლოთი იყო, უზნეო ცხოვრებას ეწეოდა. თუმცა კათოლიკურ ოჯახში გაიზარდა, დანიელი ცხოვრების აზრს ვერ ხედავდა და ღვთის არსებობაც ეეჭვებოდა. დახმარების ძიებაში სხვადასხვა ეკლესია მოიარა, მაგრამ გაიგო, რომ ბევრი მისი მეგობარი, რომელიც ეკლესიაში დადიოდა და ზოგი მისი მეგობარი მღვდელი ნარკომანი და ლოთი იყო. ამასობაში მისმა ცოლმა განქორწინება დააპირა.

იმედგაცრუებული დანიელი კლინიკაში დაწვა. მიუხედავად ამისა, მან იცოდა, რომ გამოსვლის შემდეგ მალევე ნარკოტიკებს დაუბრუნდებოდა, თუ დახმარებას არ მიიღებდა. მაგრამ რა დახმარებას? 1996 წლის მაისში, კლინიკიდან გამოსვლიდან ორი დღის შემდეგ, მიმართა ერთ-ერთ იეჰოვას მოწმეს და მისდა გასაკვირად სთხოვა: „ძალიან გთხოვ, მასწავლე ბიბლია“. მოწმე კვირაში ორჯერ ატარებდა დანიელთან ბიბლიის შესწავლას. დანიელმა მალევე დაიწყო თავისი ცხოვრების ღვთის ნებასთან შეთანხმება, ძველი მეგობრები შეცვალა ახალი ქრისტიანი მეგობრებით, რომლებიც ნარკომანები და ლოთები არ იყვნენ და რომლებიც უზნეო ცხოვრებას არ ეწეოდნენ. ამგვარად დანიელი მიხვდა, რომ, რასაც ბიბლია ამბობს, ჭეშმარიტებაა: „ბრძენკაცებთან მოსიარულე თავად დაბრძენდება, ბრიყვთა მეგობარი კი გაუბედურდება“ (იგავნი 13:20). ცოტა ხანში მან თქვა: „ცხოვრებაში პირველად შემიძლია ვთქვა, რომ სუფთა სინდისი მაქვს“. დანიელის ცხოვრებაც შეიცვალა.

პუერტო-რიკოში კიდევ ერთი მამაკაცი შეიცვალა საგრძნობლად. ის ციხეში იყო და ძალიან საშიშ პიროვნებად ითვლებოდა, რადგან საკმაოდ ბევრი ადამიანი ჰყავდა მოკლული. შეეძლო ბიბლიურ ჭეშმარიტებას, შეეცვალა ის? დიახ. იეჰოვას მოწმემ ჟურნალების „საგუშაგო კოშკი“ და „გამოიღვიძეთ!“ რამდენიმე ეგზემპლარი მისცა, მან კი მალევე უფრო მეტის მიღების სურვილი გამოთქვა. მასთან ბიბლიის შესწავლა იქნა დაწყებული და როგორც კი ბიბლიის ჭეშმარიტებამ მასზე ზეგავლენის მოხდენა დაიწყო, ცვლილებები ყველასთვის შესამჩნევი გახდა. მისი შეცვლის ერთ-ერთი პირველი ნიშანი ის იყო, რომ გრძელი თმა შეიჭრა და გაჩეჩილი წვერი გაიპარსა.

ბიბლია ამბობს, რომ ღმერთი პატიობს ცოდვილებს, რომლებიც ნამდვილად ინანიებენ და იცვლიან ცხოვრებას. პავლემ დაწერა: „ნუთუ არ იცით, რომ უსამართლონი ვერ დაიმკვიდრებენ ღვთის სასუფეველს? ასეთი იყო ზოგიერთი თქვენგანი. მაგრამ განიბანეთ“ (1 კორინთელთა 6:9, 11). უსათუოდ, როგორც ამ სიტყვებმა ანუგეშა ეს კაცი, ისევე საქმეების 24:15-ში ჩაწერილმა: „იქნება მკვდრეთით აღდგომა როგორც მართალთა, ისე უკეთურთა“. მან თქვა: „მინდა იქ ვიყო, როდესაც მკვდრები აღდგებიან, რათა პატიება ვთხოვო მათ, ვინც მოვკალი“.

ახალი ოჯახი

ერთ დღეს, არგენტინაში სახარების სრული დროით მქადაგებელს, იეჰოვას მოწმეს, ლუისს, წარუდგინეს ახალგაზრდა, რომელსაც ცხოვრების სევდიანი ისტორია ჰქონდა. დაბადებიდანვე მშობლებისგან მიტოვებული, უპატრონო ბავშვთა სხვადასხვა სახლში გაიზარდა. დაახლოებით 20 წლის იყო, როდესაც შეიტყო დედის ადგილსამყოფელი და გადაწყვიტა მასთან ახლოს ეცხოვრა. მძიმედ მუშაობდა, შეაგროვა საკმაო ფული და წავიდა იმ ქალაქში, სადაც დედამისი იყო. მან თავისთან მანამდე დატოვა, სანამ ფული ჰქონდა, შემდეგ კი სთხოვა წასულიყო. ამ უარყოფამ ის გაანადგურა.

მაგრამ ლუისმა ამ ახალგაზრდა კაცს ბიბლიური ჭეშმარიტება შეატყობინა. ჭეშმარიტება, რომელიც ამხნევებდა: „რადგან დამაგდო ჩემმა დედ-მამამ, ხოლო უფალი მიმიღებს მე“ (ფსალმუნი 26:10). ახალგაზრდამ გაიგო, რომ ზეციერი მამა ჰყავდა, რომელიც არასდროს მიატოვებდა. ის ახლა მოხარულია, რომ ახალი ოჯახის — იეჰოვას ოჯახის წევრია.

სხვა კაცმა ამავე ქვეყანაში იეჰოვას მოწმეს უთხრა, რომ ჟურნალი „საგუშაგო კოშკი“ ძალიან მოსწონდა. რატომ? იმიტომ რომ მან გადაარჩინა მისი ოჯახი. ამ კაცმა ერთ დღეს სამსახურის შემდეგ სანაგვეში დაინახა ჟურნალი „საგუშაგო კოშკი“ სათაურით „განქორწინება“. რადგან მის ოჯახს დანგრევა ემუქრებოდა, აიღო ჟურნალი და დაიწყო კითხვა. სახლში მისვლისას ცოლთან ერთად წაიკითხა. ეს წყვილი შეეცადა გამოეყენებინა ჟურნალში მოცემული ბიბლიაზე დაფუძნებული რჩევები (ეფესელთა 5:21—6:4). მალე მათი ურთიერთობა გაუმჯობესდა. მათ შეწყვიტეს გაყრის პროცესი და ახლა ერთად სწავლობენ ბიბლიას.

ურუგვაელი ლუისიც არ იყო ბედნიერი. ნარკომანიამ, სპირიტიზმმა, კერპთაყვანისმცემლობამ, ლოთობამ და მრავალმა სხვა რამემ მისი ცხოვრება არია. ბოლოს ლუისი იმედგაცრუებული ათეისტი გახდა. ერთხელ მეგობარმა მისცა წიგნი „სიცოცხლე — როგორ წარმოიშვა ის? ევოლუციის გზით თუ შემოქმედებით?“b. ამის შედეგად ლუისი მცირე ხნით დაუკავშირდა იეჰოვას მოწმეებს, მაგრამ მალევე დაუბრუნდა ალკოჰოლსა და ნარკოტიკებს. ერთხელაც, როდესაც ნაგვით სავსე ორმოში გონს მოეგო, დარდით დამძიმებულმა ლოცვით მიმართა „იესო ქრისტეს მამას“, რადგანაც არ იცოდა, როგორ მიემართა ღვთისთვის.

ღმერთს სთხოვა, ეჩვენებინა მისთვის, თუ ჰქონდა მის ცხოვრებას აზრი. «ზუსტად მეორე დღესვე, — ყვება ლუისი, — ნაცნობმა მომცა წიგნი, რომელიც აღარ სჭირდებოდა. მისი სათაური? „გამოცხადება — მისი გრანდიოზული აპოგეა ახლოსაა!“ »c წიგნი მას კითხვაზე პასუხის მიღებაში დაეხმარა. ლუისმა კვლავ ილოცა დახმარებისთვის, რომ ეპოვა რელიგია, რომელიც აჩვენებდა, თუ როგორ ემსახურა ღვთისთვის. და აი სასწაული! ზარი დაირეკა, იეჰოვას ორი მოწმე კართან იდგა. ლუისმა დაუყოვნებლივ დაიწყო მათთან ბიბლიის შესწავლა. მან სწრაფად წაიწია წინ და ახლა უხარია, რომ იეჰოვას მონათლული მოწმეა. მორალურად სუფთა ცხოვრებას ეწევა და სხვებსაც ეხმარება სიცოცხლის აზრის პოვნაში. მისთვის ფსალმუნის 64:3-ში ჩაწერილი სიტყვები განხორციელდა: „მომსმენო ლოცვისა, შენთან მოვა ყველა ხორციელი“.

ფილიპინელი ალანი აქტივისტი სტუდენტი იყო. ის მიეკუთვნებოდა ორგანიზაციას, რომლის დევიზიც იყო: „დავამხოთ მთავრობა, რათა მომავალმა თაობამ თანასწორუფლებიანობით გაიხაროს“. მაგრამ ერთ დღეს იეჰოვას მოწმეებს შეხვდა და გაიგო ბიბლიიდან ღვთის განზრახვა კაცობრიობასთან დაკავშირებით. ეს განზრახვა შეიცავს ინსპირირებულ დაპირებას: „კიდევ ცოტა და აღარ იქნება ბოროტი. . . ხოლო თავმდაბალნი დაიმკვიდრებენ ქვეყნიერებას და დაამდებიან დიდი მშვიდობით“ (ფსალმუნი 36:10, 11). ალანმა თქვა: „მე მალევე აღმოვაჩინე, რომ რისთვისაც ჩვენი მოძრაობა იბრძოდა, დიდი ხნის წინ იყო დაპირებული ბიბლიაში. ყველაფერი, რაც ძალიან გვსურდა, მოგვეცემა ღვთის სამეფოში“. ალანი ახლა მხარს უჭერს ღვთის სამეფოს და ეხმარება სხვებს, ირწმუნონ ბიბლიური ჭეშმარიტება.

დიახ, ცხოვრებაში ცვლილების შეტანა შესაძლებელია, როდესაც ადამიანები ღვთის სიტყვის, ბიბლიის, ჭეშმარიტებას ითვალისწინებენ. მართლაცდა დგება დრო, როდესაც ყველა გადარჩენილი ადამიანი ღვთის ნებასთან შეთანხმებულად იცხოვრებს. რა დიდებული ცვლილება იქნება! მაშინ შესრულდება წინასწარმეტყველება: „არავინ იბოროტებს და არავინ იბილწებს მთელ ჩემ წმიდა მთაზე, რადგან აივსება მიწა უფლის ცოდნით, როგორც ზღვა არის წყლებით დაფარული“ (ესაია 11:9).

[სქოლიოები]