„ისევე წრფელია შენი გული, როგორც ჩემი“?
«წამომყევი და ნახე ჩემი შური [„მოშურნეობა“, აქ] უფლისადმი» (მეოთხე მეფეთა 10:16).
1, 2. ა) როგორ გაუარესდა ისრაელში ისედაც ცუდი რელიგიური მდგომარეობა? ბ) რა მნიშვნელოვანი ცვლილებები უნდა მომხდარიყო მალე ისრაელში ძვ. წ. 905 წლის შემდეგ?
ისრაელისთვის ძვ. წ. 905 წელი დიდი ცვლილებების წელი იყო. დაახლოებით 100 წლის წინ სოლომონის განდგომილების გამო იეჰოვამ დაყო ისრაელის ერთიანი სამეფო (მესამე მეფეთა 11:9–13). შემდეგ სამხრეთ სამეფოში, იუდაში, სოლომონის ვაჟი, რობოამი, გამეფდა, ხოლო ჩრდილოეთ სამეფოში, ისრაელში, — იერობოამ ეფრემელი. სამწუხაროდ, ჩრდილოეთ სამეფოს ცუდი დასაბამი ჰქონდა. იერობოამმა არ ისურვა, მის ქვეშევრდომებს სამხრეთ სამეფოს ტაძარში ევლოთ თაყვანსაცემად, რადგან ეშინოდა, რომ ხალხს კვლავ დავითის სახლთან დაბრუნების სურვილი არ გასჩენოდა. ამიტომ ისრაელში ხბოსადმი თაყვანისცემა შემოიღო და ამგვარად კერპთაყვანისმცემლობა დააფუძნა, რაც ჩრდილოეთ სამეფოს არსებობის მთელი ისტორიის განმავლობაში გრძელდებოდა (მესამე მეფეთა 12:26–33).
2 აქაბ ყომრის ძის გამეფების შემდეგ მდგომარეობა უფრო გაუარესდა. მისმა არაისრაელმა ცოლმა, იზებელმა, ბაალისადმი თაყვანისცემას შეუწყო ხელი, იეჰოვას წინასწარმეტყველები კი დახოცა. წინასწარმეტყველ ელიას მიერ აქაბის გულწრფელი გაფრთხილების მიუხედავად, მან არაფერი გააკეთა მეუღლის შესაჩერებლად. მაგრამ ძვ. წ. 905 წელს აქაბი მოკვდა, ხოლო სამეფო ტახტზე მისი ძე იორამი ავიდა. დადგა ქვეყნის განწმენდის დრო. ელიას საქმის გამგრძელებელმა, ელისემ, ჯარის სარდალ იეჰუს აცნობა, რომ ის სცხო ღმერთმა ისრაელის მომდევნო მეფედ. რა დაევალა მას? გაენადგურებინა აქაბის ცოდვილი სახლი და შური ეძია იზებელის მიერ დაღვრილი წინასრმეტყველების სისხლისთვის (მეოთხე მეფეთა 9:1–10).
3, 4. როგორ აჩვენა იონადაბმა, რომ მისი გული ‘იეჰუსადმი წრფელი’ იყო?
3 ღვთის მითითებისადმი მორჩილმა იეჰუმ მოკლა ბოროტი იზებელი და ისრაელის განწმენდას აქაბის სახლის მოსპობით შეუდგა (მეოთხე მეფეთა 9:15–10:14, 17). შემდეგ ის თავის თანამზრახველს შეხვდა. „შეეყარა იონადაბ რექაბის ძეს, რომელიც მის შესახვედრად მოდიოდა, მიესალმა და უთხრა: ისევე წრფელია შენი გული, როგორც ჩემი გული შენდამი? მიუგო იონადაბმა: წრფელია. წრფელია და მომეცი ხელი. მისცა ხელი და მანაც აიყვანა თავის ეტლზე. უთხრა: წამომყევი და ნახე ჩემი შური უფლისადმი. და დასვეს ეტლზე“ (მეოთხე მეფეთა 10:15, 16).
4 იონადაბი არ იყო ებრაელი. მიუხედავად ამისა, მისი სახელის მნიშვნელობის („იეჰოვა მოწადინებულია“, „იეჰოვა კეთილშობილია“ ან „იეჰოვა გულუხვია“) შესაბამისად, ის იეჰოვას თაყვანისმცემელი იყო (იერემია 35:6). რასაკვირველია, იონადაბს დიდი ინტერესი ჰქონდა, ენახა იეჰუს ‘მოშურნეობა უფლისადმი’. საიდან ვიცით ეს? მისი შეხვედრა ისრაელის ცხებულ მეფესთან შემთხვევითი არ იყო. იონადაბი „მის შესახვედრად მოდიოდა“ და ამ დროისთვის იეჰუს უკვე მოკლული ჰყავდა იზებელი და აქაბის სახლის სხვა წევრები. იონადაბმა იცოდა მომხდარის შესახებ, როცა მიიღო იეჰუს მოწვევა: ეტლზე ასულიყო. როდესაც საკითხი ცრუ და ჭეშმარიტ თაყვანისმცემლობას ეხებოდა, ის აშკარად იეჰუს ესე იგი იეჰოვას მხარეს იყო.
თანამედროვე იეჰუ და იონადაბი
5. ა) რა ცვლილებები მოელის მალე მთელ კაცობრიობას? ბ) ვინ არის დიდი იეჰუ და ვინ არის დედამიწაზე მისი წარმომადგენელი?
5 დღესაც, მალე მთელი კაცობრიობის მდგომარეობა რადიკალურად შეიცვლება, ისევე როგორც ეს ისრაელში ძვ. წ. 905 წელს მოხდა. უკვე ახლოს არის ის დრო, როდესაც იეჰოვა დედამიწას განწმენდს სატანის გავლენის ყველა ცუდი შედეგისგან, ცრუ რელიგიის ჩათვლით. ვინ არის თანამედროვე იეჰუ? სხვა არავინ, თუ არა იესო ქრისტე, რომლის შესახებაც ნაწინასწარმეტყველებია: „წელზე შემოირტყი შენი მახვილი, გმირო, შენი დიდებით და მშვენებით. და ამ შენი მშვენებით დაბრძანდი ეტლზე ჭეშმარიტების, თვინიერებისა და სიმართლის გულისათვის, და აჩვენებს საოცრებას მარჯვენა შენი“ (ფსალმუნი 44:4, 5). დედამიწაზე იესოს წარმომადგენლები ‘ღვთის ისრაელი’, ცხებული ქრისტიანები არიან, „რომლებიც იცავენ ღვთის მცნებებს და რომელთაც აქვთ იესოს მოწმობა“ (გალატელთა 6:16; გამოცხადება 12:17). ათას ცხრას ოცდაორი წლიდან იესოს ცხებული ძმები უშიშრად აცხადებენ იეჰოვას მომავალი სამსჯავრო მოქმედების შესახებ (ესაია 61:1, 2; გამოცხადება 8:7–9:21; 16:2–21).
6. ვინ გამოვიდა ერებიდან ცხებული ქრისტიანების მხარდასაჭერად და როგორ ავიდნენ ისინი, გადატანითი მნიშვნელობით რომ ვთქვათ, დიდი იეჰუს ეტლზე?
6 ცხებული ქრისტიანები მარტონი არ არიან. სწორედ ისე, როგორც იონადაბი წავიდა იეჰუს შესახვედრად, მრავალი ერის წარმომადგენელი გამოვიდა იესოს, დიდი იეჰუს, და მისი მიწიერი წარმომადგენლების მხარდასაჭერად, რათა დაიცვან ჭეშმარიტი თაყვანისმცემლობა (ზაქარია 8:23). იესოს მიერ ‘სხვა ცხვრებად’ წოდებული ადამიანები 1932 წელს ძველი იონადაბის თანამედროვე ეკვივალენტად აღიარეს და თანამედროვე იეჰუს ‘ეტლზე ასასვლელად’ მიიწვიეს (იოანე 10:16). როგორ? ‘ღვთის მცნებების დაცვითა’ და ცხებულებთან ერთად ‘იესოს მოწმობის გაზიარებით’. დღეს ამაში შედის ღვთის მიერ დამყარებული სამეფოს შესახებ ქადაგება, სამეფოსი, რომელშიც იესოა მეფედ დანიშნული (მარკოზი 13:10). ათას ცხრაას ოცდათხუთმეტ წელს ეს „იონადაბები“ გამოცხადების 7:9–17-ში აღწერილი „უამრავი ხალხი“ აღმოჩნდა.
7. როგორ აჩვენეს დღეს ქრისტიანებმა, რომ მათი ‘გულები წრფელია’ იესოს მიმართ?
7 უამრავმა ხალხმა და მათმა ცხებულმა ძმებმა 1930 წლიდან გაბედულად დაამტკიცეს, რომ ჭეშმარიტ თაყვანისცემას უჭერენ მხარს. აღმოსავლეთ და დასავლეთ ევროპის ზოგ ქვეყანაში, შორეულ აღმოსავლეთსა და აფრიკაში მრავალი შეეწირა თავის რწმენას (ლუკა 9:23, 24). სხვა ქვეყნებში მრავალი დააპატიმრეს, მრავალს კი გაშმაგებული ბრბო დევნიდა ან სხვა რაიმე სახით განიცდიდა დევნას (2 ტიმოთე 3:12). რწმენის რა შესანიშნავი გამოვლინებაა! 1997 სამსახურებრივი წლის ანგარიში აჩვენებს, რომ ისინი ახლაც გადაწყვეტილებით არიან აღსავსე, ემსახურონ ღმერთს იმის მიუხედავად, თუ რა მოჰყვება ამას შედეგად. მათი ‘გულები ახლაც წრფელია’ იესოს მიმართ. ეს გამოვლინდა 1997 წლის განმავლობაში, როცა 5 599 931 სამეფოს მაუწყებელმა, რომლებიც თითქმის ყველანი „იონადაბები“ იყვნენ, იესოს შესახებ დამოწმებაში 1 179 735 841 საათი გაატარა.
დღესაც თავგამოდებით ქადაგებენ
8. როგორ ამჟღავნებენ იეჰოვას მოწმეები ჭეშმარიტი თაყვანისცემისადმი თავგამოდებას?
8 იეჰუს ეტლს დიდი სისწრაფით მტარებლის სახელი ჰქონდა გავარდნილი, რაც იმის მაჩვენებელია, რომ ის თავგამოდებით ასრულებდა დავალებას (მეოთხე მეფეთა 9:20). იესოზე, დიდ იეჰუზე, ნათქვამია, რომ ის მოშურნეობამ ‘დაღრღნა’ (ფსალმუნი 68:10). გასაკვირი არ არის, რომ დღევანდელი ქრისტიანები, ცნობილი არიან თავიანთი მოშურნეობით. ყველგან, კრებაში თუ საჯაროდ, ისინი ‘ქადაგებენ სიტყვას, დაჟინებით, როგორც კეთილსასურველ პირობებში, ისე ძნელბედობის დროსაც’ (2 ტიმოთე 4:2, აქ). მათი თავგამოდება განსაკუთრებით გამოჩნდა 1997 წლის „ჩვენს სამეფო მსახურებაში“ სტატიის გამოქვეყნების შემდეგ, რომელშიც მოცემული იყო მოწოდება, რაც შეიძლება მეტს მიეღო მონაწილეობა დამხმარე პიონერულ მსახურებაში. თითოეულ ქვეყანაში გარკვეული რაოდენობის დამხმარე პიონერი უნდა ყოფილიყო. როგორი იყო შედეგი? განსაცვიფრებელი! მრავალ ფილიალში პიონერთა რიცხვმა მოსალოდნელს გადააჭარბა. ეკვადორზე მიზნად 4 000 იყო დასახული, მაგრამ მარტში იქ 6 936 დამხმარე პიონერი იყო. შეერთებულ შტატებში დაგეგმილი ჰქონდათ 100 000, ხოლო ამ შესანიშნავ საქმეში მარტში მონაწილეობა მიიღო 116 335-მა. იაპონიიდან მიღებულ იქნა ანგარიში, სადაც სამი თვის განმავლობაში მთლიანად 104 215 დამხმარე პიონერი იყო. ზამბიაში, სადაც დაგეგმილი ჰქონდათ 6 000, მარტში 6 414-მა ჩააბარა დამხმარე პიონერის ანგარიში; აპრილში — 6 532-მა, ხოლო მაისში — 7 695-მა. მსოფლიო მასშტაბით დამხმარე და საერთო პიონერთა რაოდენობა სულ 1 110 251-ს შეადგენდა, რაც 34, 2 პროცენტით მეტია, ვიდრე 1996 წელს.
9. კარდაკარ ქადაგების გარდა, როგორ პოულობენ იეჰოვას მოწმეები ხალხს, რათა კეთილი ცნობის შესახებ ესაუბრონ მათ?
9 მოციქულმა პავლემ ეფესელ უხუცესებს უთხრა: „არაფერი დამიშურებია სასარგებლო, თქვენთვის რომ არ მექადაგნა და არ მესწავლებინა საჯაროდ თუ სახლებში“ (საქმეები 20:20). დღეს იეჰოვას მოწმეები ბაძავენ პავლეს მაგალითს და თავგამოდებით ქადაგებენ კეთილ ცნობას კარდაკარ. მაგრამ სახლებში მობინადრეების პოვნა ადვილი არ არის. ამიტომ „ერთგული და გონიერი მონა“ სამეფოს მაუწყებლებს მოუწოდებს, მივიდნენ ხალხთან მათ სამუშაო ადგილებზე, დაელაპარაკონ ქუჩებში, პლაჟზე თუ პარკებში, ესე იგი, ყველგან (მათე 24:45–47). შედეგები შესანიშნავია.
10, 11. როგორ გამოავლინეს ორი ქვეყნის მაუწყებლებმა ინიციატივა, რათა ეპოვათ ის დაინტერესებული პირები, რომლებთანაც სახლში ვერ შეძლეს ურთიერთობის დამყარება?
10 კოპენჰაგენში (დანია) მაუწყებელთა პატარა ჯგუფები რკინიგზის მიმდებარე ქუჩებში ამოწმებდნენ. იანვრიდან ივნისამდე მათ გაავრცელეს 4 733 ჟურნალი, ჰქონდათ შესანიშნავი საუბრები და მრავალი განმეორებითი მონახულება. რამდენიმე მაუწყებელი მაღაზიებში ჟურნალების დამტარებლად დაინიშნა. ერთ ქალაქში ყოველ პარასკევს იმართებოდა დიდი ბაზრობა, სადაც ათასობით ადამიანი მოდიოდა. ამიტომ კრებამ გადაწყვიტა, ბაზრობაზე რეგულარული დამოწმება მოეწყო. ერთგან სკოლებში საინფორმაციო საქაღალდეები მიიტანეს, რომლებშიც განსაკუთრებით მასწავლებლებისთვის შესაფერისი პუბლიკაციებიც იყო.
11 ჰავაიშიც შეეცადნენ, გასაუბრებოდნენ მათ, ვისი ნახვაც სახლში შეუძლებელი იყო. მიმდინარეობდა დამოწმება განსაკუთრებულ ტერიტორიებზე, ხალხის თავმოყრის ადგილების ჩათვლით (ქუჩები, პარკები, მანქანების სადგომები და ავტობუსის გაჩერებები), საქმიან რაიონებში, სავაჭრო ცენტრებსა და აეროპორტებში; აგრეთვე ტელეფონით დამოწმება, საზოგადოებრივ ტრანსპორტსა (ავტობუსი) და სასწავლებლების ტერიტორიებზე დამოწმება. ყურადღება მიექცა, რომ სათანადო რაოდენობის მქადაგებლები გამოეყოთ თითოეულ ტერიტორიაზე და ვისაც დანიშნავდნენ, სათანადოდ ყოფილიყო მომზადებული. კარგად ორგანიზებული მსგავსი მცდელობის შესახებ ცნობები სხვა ქვეყნებიდანაც იქნა მიღებული. შედეგად, ურთიერთობა დამყარდა ისეთ დაინტერესებულ პირებთან, რომლებსაც, როგორც ჩანს, ვერასოდეს შეხვდებოდნენ კარდაკარ მსახურებისას.
მტკიცედ დგომა
12, 13. ა) რა ხერხი გამოიყენა სატანამ იეჰოვას მოწმეების წინააღმდეგ 1997 წელს? ბ) რა მხრივ გამოიღო ერთ-ერთ ქვეყანაში არსებულმა ცილისმწამებლურმა პროპაგანდამ საწინააღმდეგო შედეგი?
12 მრავალ ქვეყანაში 1997 წელს იეჰოვას მოწმეები სისასტიკისა და ცრუ პროპაგანდის მსხვერპლი გახდნენ, რომელიც აშკარად იმისთვის იყო გამიზნული, რომ მათ წინააღმდეგ კანონიერი მოქმედება ყოფილიყო შესაძლებელი. მაგრამ მოწმეები ამან ვერ დააშინა (ფსალმუნი 111:7, 8). მათ ახსოვდათ ფსალმუნმომღერლის სიტყვები: „ტყუილს ჩმახავენ ამპარტავანნი ჩემზე, მე მთელი გულით დავიცავ შენს ბრძანებებს“ (ფსალმუნი 118:69). ასეთი ცრუ საჯარო ბრალდებები, მხოლოდ იმის აშკარა მტკიცებაა, რომ ჭეშმარიტი ქრისტიანები მოძულებულები არიან, როგორც ამას იესოც წინასწარმეტყველებდა (მათე 24:9). ზოგჯერ ამას საწინააღმდეგო შედეგები მოჰქონდა. ბელგიაში ერთმა მამაკაცმა კარგად ცნობილ ყოველდღიურ გაზეთში იეჰოვას მოწმეების შესახებ დამამცირებელი სტატია წაიკითხა. ცილისმწამებლური ინფორმაციით შეცბუნებული, მომდევნო კვირას სამეფო დარბაზში კრებაზე დასასწრებად მივიდა, რის შემდეგაც იეჰოვას მოწმეებთან ბიბლიის შესწავლა გადაწყვიტა; ის სწრაფად მიიწევდა წინ. ადრე ეს მამაკაცი ბანდის წევრი იყო. ბიბლიის შესწავლა მას ცხოვრების მოწესრიგებაში დაეხმარა, რასაც მასთან ურთიერთობაში მყოფი ხალხიც ამჩნევდა. რასაკვირველია, ცილისმწამებლური სტატიის დამწერს აზრადაც არ მოსვლია, რომ ამას მსგავსი შედეგი ექნებოდა.
13 ბელგიაში ზოგი გულწრფელი ადამიანი გამოდიოდა ასეთი ცილისმწამებლური პროპაგანდის წინააღმდეგ. მათ შორის იყო ყოფილი პრემიერ-მინისტრი, რომელმაც აღიარა, რომ აღტაცებული იყო იეჰოვას მოწმეების საქმიანობით. აგრეთვე ერთ-ერთი დეპუტატი წერდა: „დროდადრო მათ შესახებ გავრცელებული ცილისმწამებლური ინფორმაციის საპირისპიროდ, [იეჰოვას მოწმეები] არ მიმაჩნია სახელმწიფოსადმი ოდნავი საშიშროების შემქმნელებადაც კი. ისინი მშვიდობისმოყვარე, კეთილსინდისიერი მოქალაქეები არიან, რომლებიც პატივს სცემენ ხელისუფლებას“. რა თქმა უნდა, ბრძნულია მოციქულ პეტრეს სიტყვები: „კარგად მოიქეცით წარმართებში, რათა რაშიც გაძაგებენ, როგორც ბოროტმოქმედებს, იმაში დაინახონ თქვენი კეთილი საქმეები და ადიდონ ღმერთი მონახულების დღეს“ (1 პეტრე 2:12).
ღირსშესანიშნავი გახსენების საღამოს აღნიშვნა
14. რა ამაღელვებელი ანგარიშები იქნა ჩაბარებული 1997 წელს გახსენების საღამოზე დამსწრეთა რაოდენობის შესახებ?
14 მართებულია, რომ იესოს შესახებ მქადაგებლები მისი სიკვდილის გახსენების საღამოს წლის ღირსშესანიშნავ დროდ მიიჩნევენ. 1997 წლის 23 მარტს ამ საღამოს 14 322 226 ადამიანი ესწრებოდა, რაც 1 400 000-ით მეტია, ვიდრე 1996 წელს (ლუკა 22:14–20). მრავალ ქვეყანაში გახსენების საღამოზე დამსწრეთა რიცხვი ბევრად აღემატებოდა სამეფოს შესახებ მაუწყებელთა რიცხვს, რაც მომავალი ზრდის შესანიშნავ პერსპექტივას იძლევა. მაგალითად, ჰაიტში 1997 წელს მაუწყებელთა რაოდენობამ ახალ უმაღლეს რიცხვს 10 621–ს მიაღწია, ხოლო გახსენების საღამოზე დამსწრეთა რიცხვმა — 67 259-ს. შეგიძლია იხილო წლიური ანგარიში, რომელიც 18-21 გვერდებზეა მოცემული და ნახო, თუ კიდევ რამდენ ქვეყანაში იყო დამსწრეების მსგავსი სიჭარბე მაუწყებლებთან შედარებით.
15. ზოგ ქვეყანაში როგორ გადალახეს ჩვენმა ძმებმა სერიოზული სირთულეები, რათა გახსენების საღამოს ზეიმს დასწრებოდნენ?
15 გახსენების საღამოზე დასწრება ყველასთვის როდი იყო იოლი. ალბანეთში ქვეყნის შიგნით არსებული არეულობის გამო საღამოს 7 საათიდან კომენდანტის საათი იყო დანიშნული, რის გამოც მთელ ქვეყანაში 115-მა პატარა ჯგუფმა გახსენების საღამო დაიწყო საღამოს 5 საათსა და 45 წუთზე. 6 საათსა და 08 წუთზე მზე ჩავიდა და დაიწყო 14 ნისანი. სიმბოლოები გადააწოდეს დაახლოებით 6 საათსა და 15 წუთზე. უმეტეს ადგილებში საბოლოო ლოცვა წარმოითქვა დაახლოებით 6 საათსა და 30 წუთზე და დამსწრეები სასწრაფოდ დაიშალნენ, რათა კომენდანტის საათის დაწყებამდე მოესწროთ სახლში მისვლა. მიუხედავად ამისა, დამსწრეთა რიცხვი 3 154-ს შეადგენდა, ხოლო მაუწყებელთა — 1 090-ს. აფრიკის ერთ ქვეყანაში, ქვეყნის შიგნით არსებული არეულობის გამო, სამეფო დარბაზში შესვლა შეუძლებელი იყო, რის გამოც ორმა უხუცესმა გადაწყვიტა, მესამე უხუცესის სახლში მოეწყოთ შეხვედრა, რათა ორგანიზება გაეკეთებინათ პატარა ჯგუფებად ზეიმის აღნიშვნისთვის. მესამე უხუცესის სახლში მოსახვედრად ორ უხუცესს თხრილი უნდა გადაელახა. მაგრამ ამ ტერიტორიაზე მიმდინარეობდა ომი, ამიტომ სნაიპერები ესროდნენ ნებისმიერს, ვინც ეცდებოდა ამ თხრილის გადალახვას. ერთმა უხუცესმა ყოველგვარი დაბრკოლების გარეშე გადალახა იგი. მეორეს, გადასვლისას გასროლის ხმა შემოესმა. ის მაშინვე მიწაზე გაერთხა და ცოცვა-ცოცვით მიაღწია უსაფრთხო ადგილს; ამ ადგილის მიღწევამდე კი ტყვიებს ზუზუნი გაჰქონდა მის თავს ზემოთ. უხუცესების შეხვედრა შედგა და კრების მოთხოვნილებები დაკმაყოფილდა.
„ყოველი ერიდან და ტომიდან. . . და ენებიდან“
16. როგორ გაუწია ერთგულმა და გონიერმა მონამ ორგანიზება, რომ კეთილი ცნობა პატარა ენობრივ ჯგუფებისთვისაც ყოფილიყო ხელმისაწვდომი?
16 მოციქულმა იოანემ თქვა, რომ უამრავი ხალხი გამოვიდოდა „ყოველი ერიდან და ტომიდან, ხალხებიდან და ენებიდან“ (გამოცხადება 7:9). ამიტომ ხელმძღვანელმა საბჭომ ორგანიზება გაუწია, რომ ლიტერატურა უფრო მეტ ენაზე ყოფილიყო ხელმისაწვდომი, იმ ხალხის ენაზეც კი, რომლებიც პატარა ტომებს და ხალხთა მცირე ჯგუფებს ქმნიან. მაგალითად, მოზამბიკში ტრაქტატი „ცხოვრება მშვიდობიან ახალ ქვეყნიერებაში“ კიდევ ხუთ ენაზე გამოიცა. ნიკარაგუაში ბროშურა „მარადიულად იხარე სიცოცხლით დედამიწაზე!“ გამოვიდა მისკიტოს ენაზე; ეს იყო საზოგადოება „საგუშაგო კოშკის“ მიერ გამოცემული პირველი პუბლიკაცია ამ ენაზე. მისკიტოს ინდიელები დიდი სიხარულით შეხვდნენ მშობლიურ ენაზე ბროშურის გამოცემას. 1997 წელს საზოგადოებამ ნება დართო კიდევ 25 ენაზე გამოსულიყო ლიტერატურა და მილიარდზე მეტი ჟურნალი გამოსცა.
17. რომელმა ენობრივმა ჯგუფმა მიიღო დახმარება კორეაში და რა დიდი დახმარება გაუწია ვიდეოკასეტებმა მოსახლეობის ამ ნაწილს?
17 კორეაში კიდევ ერთმა ენობრივმა ჯგუფმა მიიღო დახმარება. 1997 წელს იქ პირველად ჩატარდა კონგრესი კორეულ ჟესტების ენაზე. კორეაში ჟესტების ენაზე 15 კრება ტარდება, რომლებშიც 543 მაუწყებელია, ხოლო კონგრესს 1 174 ესწრებოდა; მოინათლა — 21. ყრუ-მუნჯების დასახმარებლად, რომლებისთვისაც ძნელია ნათქვამი ან დაწერილი სიტყვის გაგება, პუბლიკაციები 13 სხვადასხვა ჟესტების ენაზე ვიდეოკასეტების სახით გამოიცა. ამგვარად, ყრუ-მუნჯებს დაეხმარნენ, რათა „წაეკითხათ“ და შეესწავლათ კიდეც კეთილი ცნობა, რასაც შესანიშნავი შედეგი მოჰყვა. შეერთებულ შტატებში ადრე ყრუ-მუნჯის მონათვლამდე მიყვანას ხუთი წელი სჭირდებოდა. ახლა ამერიკულ ჟესტების ენაზე გამოცემული ვიდეოკასეტების საშუალებით, ზოგი ყრუ-მუნჯისთვის წლების ეს რიცხვი ერთამდე დავიდა.
‘ეტლზე დარჩენა’
18. რის გაკეთებას შეუდგა იეჰუმ იონადაბთან შეხვედრის შემდეგ?
18 ძველად, ძვ. წ. 905 წელს, იონადაბის შემოერთების შემდეგ იეჰუმ ცრუ თაყვანისცემის მოსპობა გადაწყვიტა. მან მიიწვია ბაალის ყველა თაყვანისმცემელი: „გამოაცხადეთ ბაალის დღესასწაული“. შემდეგ მთელ ქვეყანაში დაგზავნა ხალხი, რათა დარწმუნებულიყო, რომ ბაალის არც ერთი თაყვანისმცემელი არ დააკლდებოდა ამ შემთხვევას. როცა ბრბომ თავი მოიყარა ცრუ ღვთაების დიდ ტაძარში, დიდი ყურადღებით შეამოწმეს, ხომ არ იყო მათ შორის იეჰოვას რომელიმე თაყვანისმცემელი. ბოლოს იეჰუმ და მისმა ჯარისკაცებმა დახოცეს ბაალის თაყვანისმცემლები. „ასე გადააშენა იეჰუმ ბაალი ისრაელიდან“ (მეოთხე მეფეთა 10:20–28).
19. როგორი სული უნდა გამოვავლინოთ და რა მიზნისკენ უნდა ვისწრაფოდეთ მთელი გულით, თუ გავითვალისწინებთ იმას, რაც მალე თავს დაატყდება კაცობრიობას?
19 დღეს ცრუ რელიგიის საბოლოო განკითხვა სულ ახლოსაა. ანგელოზების ხელმძღვანელობით ქრისტიანები მთელ კაცობრიობას ამცნობენ კეთილ ცნობას; მოუწოდებენ, ეშინოდეთ ღვთის და გამოეყონ ცრუ რელიგიას (გამოცხადება 14:6–8; 18:2, 4). თვინიერ ადამიანებს მოუწოდებენ, დაემორჩილონ ღვთის სამეფოს, სადაც იეჰოვამ მეფედ იესო ქრისტე დანიშნა (გამოცხადება 12:10). ამ ამაღელვებელ დროს არ უნდა შევასუსტოთ ჩვენი თავგამოდება ჭეშმარიტი თაყვანისმცემლობის დაცვაში.
20. რა გადაწყვეტილებით იქნებით აღსავსე 1998 სამსახურებრივი წლის განმავლობაში?
20 ერთხელ, დიდი სირთულის პირისპირ ყოფნისას, მეფე დავითი ლოცულობდა: „წრფელია ჩემი გული, ღმერთო, წრფელია ჩემი გული. გიმღერებ და გიგალობებ. განგადიდებ ხალხებში, უფალო, გიგალობებ ერებში“ (ფსალმუნი 56:8, 10). ჩვენც მტკიცედ უნდა ვიდგეთ. 1997 სამსახურებრივი წლის განმავლობაში, მრავალი განსაცდელის მიუხედავად, გაისმოდა იეჰოვა ღმერთის დიდების ხოტბის შემსხმელი მძლავრი ხმა. დაე მიმდინარე წელსაც ისმოდეს მსგავსი ან უფრო მძლავრი ხმა! დაე ეს ასე იყოს, მიუხედავად სატანის ნებისმიერი მცდელობისა, სიხარული დაგვაკარგინოს ან წინააღმდეგობა გაგვიწიოს. ასე მოქცევით ვაჩვენებთ, რომ ჩვენი გული სიწრფელეს ინარჩუნებს დიდი იეჰუს, იესო ქრისტეს, მიმართ და მთელი გულით გამოვეხმაურებით ინსპირირებულ მოწვევას: „იხარეთ უფლის მიერ და იმხიარულეთ, წმიდანებო; და იზეიმეთ, გულით მართლებო“ (ფსალმუნი 31:11).
შეგიძლია განმარტო?
◻ რა ცვლილებები მოხდა ისრაელში ძვ. წ. 905 წელს?
◻ ვინ არის თანამედროვე იეჰუ და როგორ აჩვენებს „უამრავი ხალხი“, რომ მისი გული „წრფელია“ თანამედროვე იეჰუს მიმართ?
◻ წლიური ანგარიშის რომელი სტატისტიკური მონაცემები აჩვენებენ 1997 სამსახურებრივ წელს იეჰოვას მოწმეთა თავგამოდებას?
◻ რა სული უნდა გამოვავლინოთ 1998 სამსახურებრივი წლის განმავლობაში, სატანის ნებისმიერი წინააღმდეგობის მიუხედავად?
[ცხრილი 18–21 გვერდებზე]
იეჰოვას მოწმეების 1997 სამსახურებრივი წლის მსოფლიო ანგარიში
[ტექსტი სრულად მოცემულია პუბლიკაციაში]
[სურათი 15 გვერდზე]
გახსენების საღამოზე დამსწრეთა თვალში საცემი რაოდენობა მომავალი ზრდის შესანიშნავი მაჩვენებელია.
[სურათი 16 გვერდზე]
როგორც იონადაბი უჭერდა მხარს იეჰუს, ისე „უამრავი ხალხი“ დღეს მხარს უჭერს უფრო დიდ იეჰუს, იესო ქრისტეს, და მის ცხებულ ძმებს.