მშობლებო, დაიცავით თქვენი შვილები!

ნიგერიის საშუალო სკოლაში გოგონა, რომელიც თავისი სქესობრივი უზნეობით იყო ცნობილი, თანაკლასელ გოგონებს სიამოვნებით აძლევდა სექსთან დაკავშრებულ რჩევებს. მისი ერთ-ერთი რჩევის თანახმად, ნაყოფის მოსაცილებლად გამოყენებული ნივთიერება ინგლისური ლუდისმაგვარი სასმელის თამბაქოთი გაჯერებით უნდა მიეღოთ. მის მიერ მოყოლილი ამბები, რომლებიც პორნოგრაფიული ლიტერატურიდან იყო ამოღებული, მრავალ თანაკლასელს ხიბლავდა. ზოგმა სექსუალურ საკითხებში „ექსპერიმენტების“ ჩატარება დაიწყო, რის შედეგადაც ერთ-ერთი მათგანი დაორსულდა. ნაყოფის მოსაცილებლად მან ლუდისმაგვარი სასმელისა და თამბაქოს ნარევი დალია. რამდენიმე საათში გოგონას სისხლის ღებინება აუტყდა. რამდენიმე დღის შემდეგ კი საავადმყოფოში გარდაიცვალა.

დღეს მრავალი ახალგაზრდა განუწყვეტლივ სექსზე ლაპარაკობს, რითაც გულუბრყვილო მსმენელებზე დამღუპველ გავლენას ახდენს. ვის უნდა მიმართონ მოზარდებმა სექსთან დაკავშირებით იმ ზუსტი ცოდნის მისაღებად, რომელიც მათ დაიცავდა? რა შესანიშნავია, როდესაც ისინი ამისათვის ღვთისმოშიშ მშობლებს მიმართავენ, მშობლებს, რომლებსაც „უფლის მოძღვრებითა და დარიგებით“ მათი აღზრდის პასუხისმგებლობა აკისრიათ (ეფესელთა 6:4).

აფრიკელთა თვალსაზრისი სქესობრივი აღზრდის შესახებ

მსოფლიოში მრავალი მშობლისთვის ძნელია შვილებთან სქესობრივ საკითხებზე საუბარი. განსაკუთრებით ეს ასეა აფრიკაში. დონალდმა, ერთმა სიერა-ლეონელმა მამამ, თქვა: „ამას თითქმის არასოდეს აკეთებენ. აფრიკის კულტურაში ეს მიღებული არ არის“. ნიგერიელი ქალი, სახელად კონფედენტი, ამბობს: „ჩემი მშობლებისთვის სექსი ისეთი საკითხია, რომელზეც აშკარად არასოდეს არ უნდა ილაპარაკო; ეს ჩვენი კულტურისთვის მიუღებელია“.

აფრიკის ზოგ კულტურაში უხამსობად ითვლება სექსთან დაკავშირებული ისეთი სიტყვების ხსენებაც კი, როგორიცაა: ასო, სპერმა ან მენსტრუაცია. ერთმა ქრისტიანმა დედამ ქალიშვილს სიტყვა „სექსის“ გამოყენებაც კი აუკრძალა, თუმცა ნება დართო გამოეყენებინა სიტყვა „მრუშობა“. ამის საპირისპიროდ, ღვთის სიტყვა, ბიბლია, პირდაპირ ლაპარაკობს სექსზე და სასქესო ორგანოებზე (დაბადება 17:11; 18:11; 30:16, 17; ლევიანნი 15:2). ამის მიზანი ის კი არ არის, რომ ვინმე შეცბუნდეს ან გრძნობები აღეძრას, არამედ ის, რომ ღვთის ხალხი დაცული და დამოძღვრილი იყოს (2 ტიმოთე 3:16).

სხვადასხვა კულტურაში არსებული ტაბუს მიუხედავად, კიდევ ერთი მიზეზი, თუ რატომ არ აკეთებს ამას ზოგიერთი მშობელი, გამოხატა ერთმა ნიგერიელმა მამამ: „თუ შვილებთან სექსზე ვილაპარაკებ, ამან შეიძლება მათ სქესობრივი უზნეობის ჩადენისკენ უბიძგოს“. მაგრამ განა შეიძლება სექსის შესახებ ბიბლიაზე დაფუძნებულმა ინფორმაციამ ბავშვებს სექსუალური ექსპერიმენტების ჩატარებისკენ უბიძგოს? რა თქმა უნდა, არა. ფაქტობრივად, რაც უფრო ნაკლები ცოდნა ექნება ამის შესახებ მოზარდს, მით უფრო მეტადაა მოსალოდნელი, ჩაიდინოს სქესობრივი უზნეობა. ‘[ზუსტ ცოდნაზე დაფუძნებული] სიბრძნე დაიფარავს კაცს,’ — აცხადებს ბიბლია (ეკლესიასტე 7:12).

იესოს იგავში კეთილგონიერმა კაცმა განჭვრიტა, რომ შესაძლებელი იყო ქარიშხლის ამოვარდნა და სახლი კლდეზე ააგო, ხოლო უგუნურმა — ქვიშაზე; სტიქიური უბედურებისას კი ეს უკანასკნელი დაინგრა (მათე 7:24–27). მსგავსად ამისა, კეთილგონიერმა ქრისტიანმა მშობლებმა იციან, რომ მათ შვილებს ამ წუთისოფლის დაცემული ზნეობრივი ნორმების ქარიშხლისმაგვარი გავლენის ატანა მოუწევთ და ამიტომ ზუსტ ცოდნასა და გაგებას აწვდიან, რაც მათ მტკიცედ დგომაში დაეხმარება.

კიდევ ერთი მიზეზი, რის გამოც მშობლები შვილებთან სექსზე არ ლაპარაკობენ, მოიყვანა ერთმა აფრიკელმა ქალმა: „როდესაც მოზარდი ვიყავი, ჩემი მშობლები, რომლებიც იეჰოვას მოწმეები იყვნენ, სექსთან დაკავშირებულ საკითხებზე არ მესაუბრებოდნენ, ამიტომ მე აზრადაც არ მომსვლია ჩემს შვილებთან ეს გამეკეთებინა“. მაგრამ დღეს ახალგაზრდებზე გავლენა უფრო დიდია, ვიდრე 10 ან 20 წლის წინ. და ეს გასაკვირი არ არის. ღვთის სიტყვაში ნაწინასწარმეტყველებია, რომ „უკანასკნელ დღეებში. . . ბოროტი ადამიანები და ცრუმარქვიები. . . წინ წაიწევენ უარესისაკენ, სხვებსაც აცდენენ და თავადაც ცდუნებაში იქნებიან“ (2 ტიმოთე 3:1, 13).

პრობლემას ის ართულებს, რომ მრავალ ბავშვს არ სურს ან არ შეუძლია ენდოს მშობლებს. აზრთა გაცვლა-გამოცვლა ხშირად უმნიშვნელო საკითხებშიც კი არა აქვთ. ერთი 19 წლის ახალგაზრდა ჩიოდა: „მე მშობლებთან არ ვსაუბრობ. მამა და მე ერთმანეთს აზრებს არ ვუზიარებთ. ის ყურადღებას არ მაქცევს“.

მოზარდებს იმისიც ეშინიათ, რომ სქესობრივ საკითხებზე შეკითხვებს, შეიძლება ცუდი შედეგები მოყვეს. ერთმა 16 წლის გოგონამ თქვა: „სქესობრივ საკითხებზე მე მშობლებთან არ ვსაუბრობ, რადგან მათი რეაქციის მეშინია. ცოტა ხნის წინ ჩემმა უფროსმა დამ დედას სექსთან დაკავშირებით რამდენიმე კითხვა დაუსვა. იმის ნაცვლად, რომ პრობლემის გამკლავებაში დახმარებოდა, დედას ამ კითხვების გამო ეჭვები დაებადა. ის ხშირად მეკითხებოდა ჩემი დის შესახებ და დროდადრო მისი ზნეობის შესახებ გადაკრულ სიტყვებს მეტყოდა. მე არ მინდა დავკარგო დედის სიყვარული, ამიტომ ჩემს პრობლემებზე მას არ ვესაუბრები“.

რისთვისაა საჭირო სწავლება?

შვილებისთვის სექსუალურ საკითხებში სათანადო ცოდნის მიცემა არა მარტო სწორია, არამედ მათ მიმართ მზრუნველობის გამოვლენაცაა. თუ მშობლები არ ასწავლიან შვილებს სექსის შესახებ, ამას სხვები გააკეთებენ და, ჩვეულებრივ, ეს ხდება უფრო მალე, ვიდრე მშობლები მოელიან; ასევე ნაკლებად მოსალოდნელია, რომ სხვებმა ღვთის პრინციპების შესაბამისად ასწავლონ. ერთმა 13 წლის გოგონამ იმიტომ იმრუშა, რომ თანაკლასელმა უთხრა: თუ ქალწულობას შეინარჩუნებ, მომავალში საშინელი ტკივილის ატანა მოგიწევსო. „საქალწულე აპკს მაკრატლით გაგიჭრიან“, — უთხრა მან. მოგვიანებით, როდესაც მას ჰკითხეს, თუ რატომ არ უთხრა ქრისტიან დედას თანაკლასელის ნათქვამი, გოგონამ უპასუხა, რომ უფროსებთან ასეთ საკითხებზე არასოდეს ულაპარაკია.

ერთი ნიგერიელი გოგონა მოყვა: „სკოლის მეგობრები ცდილობდნენ დავერწმუნებინე, რომ სექსი ისეთი რამაა, რაც ყველა ნორმალურმა ადამიანმა უნდა გამოსცადოს. ისინი მეუბნებოდნენ, რომ, თუ ახლა სქესობრივი ურთიერთობა არ მექნებოდა ვინმესთან, 21 წლის ასაკში უკვე ავად გავხდებოდი და ეს საშინლად იმოქმედებდა ჩემზე, როგორც ქალზე. ამიტომ ისინი ამბობდნენ, რომ ასეთი საშინელების არიდების მიზნით, კარგია, ქორწინებამდე ვინმესთან გქონდეს სქესობრივი ურთიერთობა“.

რადგან ამ გოგონას მშობლებთან კარგი აზრთა გაცვლა-გამოცვლა ჰქონდა, მან მაშინვე დაინახა მოსმენილსა და სახლში ნასწავლს შორის არსებული სხვაობა. „სახლში რომ მივედი, ჩვეულებისამებრ, დედას მოვუყევი სკოლაში მოსმენილის შესახებ“. დედამ დაანახა მოსმენილი ინფორმაციის მცდარობა (შეადარე იგავნი 14:15).

სექსთან დაკავშირებულ საკითხებში ღვთიური სიბრძნის შესაძენად, ბავშვებისთვის საჭირო დახმარების აღმოჩენით, მშობლები მათ საშიში მდგომარეობების გარჩევისა და მათი გახრწნის მსურველი ხალხის ამოცნობის საშუალებას აძლევენ. ეს მათ სქესობრივი გზით გადამდები დაავადებების მიერ მიყენებული ზიანისა და არასასურველი ორსულობისგან იცავს. ეს ეხმარება, ჰქონდეთ საკუთარი თავის მიმართ პატივისცემა და პატივისცემა სხვებისგანაც, რომელიც მათ ასე სწყურიათ. აცილებს გაუგებრობებსა და წუხილს. ხელს უწყობს მართებული სქესობრივი ურთიერთობის მიმართ ჯანსაღი, დადებითი თვალსაზრისის განვითარებასა და ასევე ბედნიერებას, თუ ისინი მოგვიანებით დაქორწინდებიან. ის მათ ღვთის მოწონების შენარჩუნებაში ეხმარება. და, როდესაც ბავშვები მათ მიმართ გამოვლენილ სიყვარულით აღსავსე მზრუნველობას ხედავენ, ეს მშობლების მიმართ უფრო დიდი პატივისცემისა და სიყვარულისკენ აღძრავს.

კარგი აზრთა გაცვლა-გამოცვლა

მშობლებმა რჩევები შვილების საჭიროებებს რომ მოურგონ, ამისთვის აზრთა გაცვლა-გამოცვლაა საჭირო. თუ მშობლებმა არ იციან, რას ფიქრობენ შვილები და რა აქვთ გულში, გონივრულმა რჩევამაც კი შეიძლება ისეთივე სარგებლობა მოიტანოს, როგორიც იმ ექიმის მცდელობამ, რომელიც პაციენტს წამალს უწერს და ამ დროს არაფერი იცის მისი დაავადების ხასიათის შესახებ. ეფექტური მრჩეველები რომ იყვნენ, მშობლებმა უნდა იცოდნენ, სინამდვილეში, თუ რაზე ფიქრობენ და რას გრძნობენ მათი შვილები. საჭიროა, ესმოდეთ ის გავლენა და პრობლემები, რომლებსაც ისინი ხვდებიან, აგრეთვე უნდა ესმოდეთ საკითხები, რომლებიც მათ აწუხებთ. ძალიან მნიშვნელოვანია შვილებისთვის ყურადღებით მოსმენა, მათ მიმართ ‘სმენაში მკვირცხლობა და სიტყვაში ნელობა’ (იაკობი 1:19; იგავნი 12:18; ეკლესიასტე 7:8).

მშობლებმა რომ შვილებთან ახლო ურთიერთობა დაამყარონ და შეინარჩუნონ, ისეთი ურთიერთობა, რომლის დროსაც შვილები თავისუფლად უმხელენ გულისნადებს, საჭიროა დრო, მოთმინება და ძალისხმევა. მაგრამ რა შესანიშნავი შედეგები მოაქვს ამ მიზნის მიღწევას! დასავლეთ აფრიკელი ხუთი შვილის მამა ამბობს: „მე მამაც ვარ და მესაიდუმლეც. შვილები თავისუფლად მელაპარაკებიან ნებისმიერ საკითხზე, მათ შორის სექსზეც. გოგონებიც კი მიზიარებენ თავიანთ გულისნადებს. ყოველთვის გამოვყოფთ დროს მათ პრობლემებზე სასაუბროდ. ისინი სიხარულსაც მიზიარებენ“.

ბოლა, მისი ერთ-ერთი ქალიშვილი, ამბობს: «მამას არაფერს არ ვუმალავ. ის ყურადღებიანი და გულისხმიერია. არ გვიყვირის, არც მკაცრად გვექცევა მაშინაც კი, როდესაც რაღაცას ვაშავებთ. მაშინვე განრისხების ნაცვლად, ის აანალიზებს საკითხს და გვანახებს, თუ რა უნდა ვაკეთოთ ან რა არ უნდა გაგვეკეთებინა. ის ხშირად იყენებს წიგნებს: „ახალგაზრდები“ და „ოჯახური ბედნიერება“»a.

როდესაც შესაძლებელია, კარგია თუ მშობლები, შვილებს პატარაობიდან უწყებენ სექსის შესახებ საუბარს. ეს მოზარდობის ხშირად რთული პერიოდის განმავლობაში რეგულარული საუბრების ჩატარებას უყრის საფუძველს. თუ ასეთი საუბრები ბავშვობიდან არ იწყება, მოგვიანებით მათი წამოწყება უხერხულობას იწვევს, თუმცა ამის გაკეთება შესაძლებელია. ერთმა ხუთი შვილის დედამ თქვა: „საკუთარ თავს ძალას ვატანდი, გამეკეთებინა ეს მანამ, სანამ მე და ჩემს შვილს უხერხულობის გრძნობა არ გაგვიქრა“. რადგან საშიშროება ძალიან დიდია, ნამდვილად ღირს ასეთი ძალისხმევის მოხმარება.

დაცული და ბედნიერნი

ბავშვები მადლიერები არიან მშობლების, რომლებიც სიყვარულით ისეთ ცოდნას აძლევენ, რაც მომავალში დაიცავს მათ. განვიხილოთ იეჰოვას რამდენიმე აფრიკელი მოწმის მონათხრობი:

ყვება 24 წლის მოჯიზოლა: „ყოველთვის მადლიერი ვიქნები დედაჩემის. მან თავის დროზე მომცა საჭირო განათლება სექსის შესახებ. თუმცა დიდი ხნის წინათ, როდესაც ის ამის შესახებ მესაუბრებოდა, თავს უხერხულად ვგრძნობდი, ახლა მესმის, თუ რამდენად სასარგებლო იყო ეს ჩემთვის“.

ინიობონგი ამბობს: „ყოველთვის ბედნიერებით ვიხსენებ და ვფიქრობ იმაზე, რაც დედაჩემმა ჩემთვის სექსის შესახებ სათანადო მომზადებით გააკეთა. ამან დიდი დახმარება გამიწია დაქალების პერიოდში. მეც ასევე დავეხმარები ჩემს მომავალ შვილებს“.

ცხრამეტი წლის კიუნლემ თქვა: „მშობლები დამეხმარნენ, გამეძლო იმ გავლენისთვის, რომელსაც წუთისოფლის უზნეო ქალები ახდენდნენ ჩემზე. მშობლებისგან დამოძღვრილი რომ არ ვყოფილიყავი, ცოდვას ჩავიდენდი. ყოველთვის მადლიერი ვიქნები იმისთვის, რაც მათ ჩემთვის გააკეთეს“.

კრისტიანამ თქვა: „დედასთან სექსთან დაკავშირებულ საკითხებში აზრთა გაცვლა-გამოცვლა ჩემთვის დიდად სასარგებლო აღმოჩნდა. ამან სასიკვდილო დაავადებებისა და არასასურველი ორსულობისგან დამიცვა, აგრეთვე შესაძლებლობა მომცა უმცროსი ძმებისა და დებისთვის კარგი მისაბაძი მაგალითი დამეტოვებინა. ამით ხალხისგან პატივისცემასაც მივაღწიე და ჩემი მომავალი ქმარიც პატივისცემით მომეპყრობა. და რაც ყველაზე მნიშვნელოვანია, იეჰოვა ღმერთთან მისი მითითებების დაცვის შედეგად კარგი ურთიერთობა მაქვს“.

ბოლამ, რომელიც ზემოთ მოვიხსენიეთ, აღნიშნა: „ერთმა თანაკლასელმა მითხრა, რომ სქესობრივი სიამოვნება ყოველგვარი საქორწინო ვალდებულებების გარეშე უნდა მიიღოო. მისთვის სექსი გართობა იყო. მაგრამ, როდესაც დაორსულდა და სკოლაში გამოსაშვები გამოცდების ჩაბარება ვერ შეძლო, მიხვდა, რომ ეს ასე არ იყო. კარგი მამა რომ არ მყოლოდა და ჩემთვის ხელმძღვანელობა არ გაეწია, შესაძლოა მეც ამ გოგოს მდგომარეობაში აღმოვჩენილიყავი და მხოლოდ საკუთარი მწარე გამოცდილებიდან მიმეღო გაკვეთილი“.

რამხელა კურთხევაა, როდესაც ქრისტიანი მშობლები შვილებს ამ სექსზე გადარეულ მსოფლიოში ეხმარებიან, რათა ‘დაბრძენდნენ გადასარჩენად’ (2 ტიმოთე 3:15, „ახალი აღთქმა და ფსალმუნი“, 1990 წლის გამოცემა). მათი ბიბლიაზე დაფუძნებული მითითებები ძვირფასი სამკაულის მსგავსია, რომელიც ღვთის თვალში ამკობს და ამშვენებს მათ შვილებს (იგავნი 1:8, 9). ბავშვები თავს უსაფრთხოდ გრძნობენ და მშობლებიც კმაყოფილების გრძნობით ივსებიან. ერთმა აფრიკელმა მამამ, რომელიც ყოველთვის ცდილობს, გულახდილი აზრთა გაცვლა-გამოცვლა ჰქონდეს თავის მოზარდებთან, თქვა: „ჩვენ მშვიდად ვართ. მე და ჩემი მეუღლე დარწმუნებული ვართ, რომ ჩვენმა შვილებმა იციან, თუ რა სიამოვნებს იეჰოვას; შეუძლებელია ისინი გარეშეებმა შეაცდინონ. დარწმუნებული ვართ, რომ ისინი ისეთ რამეს არ ჩაიდენენ, რითაც ოჯახს ტკივილს მიაყენებენ. მადლობელი ვარ იეჰოვასი, რომ ისინი ამართლებენ ჩვენს ნდობას“.

[სქოლიოები]

[სურათი 10 გვერდზე]

ქრისტიან მოზარდებს, რომლებიც მშობლებისგან ბიბლიაზე დაფუძნებულ სწავლებას ღებულობენ, შეუძლიათ არ აჰყვნენ სხვა მოზარდების მიერ მოყოლილ დამახინჯებულ ინფორმაციას.