სამეფოს მაუწყებლები იტყობინებიან

ყოფილი მოწინააღმდეგე ჭეშმარიტებას სწავლობს

ლიბერიის სამოქალაქო ომთან დაკავშირებით უკანასკნელ ცნობებში ბევრი რამ ითქვა. ომმა ათიათასობით ადამიანი იმსხვერპლა, უფრო მეტი კი გადასახლებულ იქნა. მიუხედავად ასეთი სიდუხჭირისა, გულწრფელი ადამიანები განაგრძობენ ჭეშმარიტების მიღებას, როგორც ამას ქვემოთ მოყვანილი შემთხვევა ადასტურებს.

ათი წლიდან ჯეიმსი ლუთერანული ეკლესიის სწავლებებით აღიზარდა. მას შემდეგ, რაც ხელი მიჰყო ეკლესიის გაზეთის რედაქტორობას, ჯეიმსი სარგებლობდა თავისი მდგომარეობით და იეჰოვას მოწმეების საწინააღმდეგო სტატიებს აქვეყნებდა. მიუხედავად იმისა, რომ არასოდეს შეხვედრია იეჰოვას მოწმეებს, მაინც ამ საქმით იყო დაკავებული.

დროთა განმავლობაში მან მიატოვა გაზეთის რედაქტორობა და მოტელის მფლობელი გახდა, საიდანაც კარგ შემოსავალს ღებულობდა. ერთ მშვენიერ დღეს, როდესაც მოტელის რეგისტრატურაში იჯდა, ორი კარგად ჩაცმული და ესტუმრა. როდესაც ფაქიზად ჩაცმული მოწმეები დაინახა, შიგნით შეიპატიჟა. მაგრამ, როცა დებმა მისვლის მიზანი აუხსნეს, უპასუხა: „სასაუბროდ არ მცალია“. მოწმეებმა შესთავაზეს ჟურნალების „საგუშაგო კოშკისა“ და „გამოიღვიძეთ!“-ის გამოწერა, რაზედაც ჯეიმსი მხოლოდ იმიტომ დათანხმდა, რომ დები თავიდან მოეცილებინა. მამაკაცი 12 თვის განმავლობაში ღებულობდა სახლში ჟურნალებს, მაგრამ იმ ფურცელსაც კი არ ხსნიდა, რომელზეც მისი მისამართი ეწერა, და ჩანთაში ინახავდა.

ქვეყანაში სამოქალაქო ომი მძვინვარებდა, ამიტომ ჯეიმსმა სხვა ჩანთაში ფული და ძვირფასეულობა ჩაალაგა, რომ პირველივე იერიშისთანავე გაქცეულიყო. ერთ დილით მის სახლს უკან ხელყუმბარა აფეთქდა. პანიკაში ჩავარდნილმა ჩანთას ხელი სტაცა და გაქცევით თავს უშველა. ათასობით გაქცეული მოქალაქის მსგავსად, ჯეიმსს რამდენიმე შემმოწმებელი პუნტი უნდა გაევლო, სადაც ხშირად უდანაშაულო მოქალაქეებს ძარცვავდნენ და უმიზეზოდ კლავდნენ.

პირველი შემოწმებისას ჯეიმსს რამდენიმე შეკითხვა დაუსვეს, შემდეგ კი ჩანთის გახსნა მოსთხოვეს. როცა ჩანთა გახსნა და შიგ ჩაიხედა, თვალებს არ დაუჯერა. შეძრწუნდა, როდესაც დაინახა, რომ ეს ის ჩანთა არ იყო, რომელშიც მისი ძვირფასეულობა ელაგა. დაბნეულს ის ჩანთა წამოეღო, სადაც გადაუშლელი ჟურნალები „საგუშაგო კოშკი“ და „გამოიღვიძეთ!“ ეწყო. მაგრამ, როდესაც ჯარისკაცმა ჟურნალები დაინახა და მათზე მისი სახელი წაიკითხა თქვა: „ოჰ, თქვენ იეჰოვას მოწმე ყოფილხართ. ჩვენ თქვენ არ გეძებთ, ვიცით, რომ თქვენ არ იტყუებით“. რამდენიმე ჟურნალის ჩანთიდან ამოღების შემდეგ, ჯარისკაცმა უთხრა წასულიყო.

მსგავსი რამ მოხდა ცხრა სხვა პუნქტზეც, რადგან ყველა ჯარისკაცს ჯეიმსი იეჰოვას მოწმე ეგონა და უვნებლად უშვებდა. ჯეიმსი გახარებული იყო, რომ თავისი ძვირფასეულობა არ წამოიღო, რადგან მომხდარის საფუძველზე დაასკვნა, რომ იმ ნივთების გამო უეჭველად მოკლავდნენ.

ბოლოს, როდესაც უკანასკნელ და ყველაზე სახიფათო პუნქტს მიუახლოვდა, შეძრწუნდა გარშემო დაყრილი გვამების დანახვაზე. თავზარდაცემულმა ჯეიმსმა იეჰოვას სახელს მოუხმო. ის ლოცულობდა, რომ, თუ ღმერთი ამ სიკვდილის ველზე იხსნიდა, მთელი დარჩენილი სიცოცხლე მისი მსახური იქნებოდა.

როდესაც ჯეიმსმა ჯარისკაცებს ჩანთა უჩვენა, მათაც იგივე უთხრეს: „ჩვენ თქვენნაირ ადამიანებს არ ვეძებთ“. შემდეგ კი დაუმატეს: „ერთი თქვენი ძმა ამ გორაკის დაბლა ცხოვრობს. მასთან მიდით“. ამ დროისთვის ჯეიმსს მთლიანად შეცვლილი ჰქონდა წარმოდგენა იეჰოვას მოწმეებზე. ის დაუყოვნებლივ დაუკავშირდა ძმას და დათანხმდა ბიბლიის შესწავლაზე წიგნით „შენ შეგიძლია მარადიული ცხოვრება სამოთხეში დედამიწაზე“a.

რამდენიმე დღის შემდეგ, თავდასხმის გამო ჯეიმსი იძულებული შეიქნა იმ ტერიტორიიდან გაქცეულიყო და სადმე მოშორებულ ადგილას მიმალულიყო. თან მხოლოდ წიგნი „მარადიული ცხოვრება“ წაიღო. 11 თვის განმავლობაში მოწმეებისგან იზოლირებულმა წიგნი ხუთჯერ შეისწავლა. ბოლოს, როდესაც ქალაქში დაბრუნება შეძლო, ბიბლიის შესწავლა მოწმეებთან განაგრძო და სწრაფად მიაღწია წარმატებებს. მალე მოინათლა და ახლა სულიერ ძმებთან ერთად ერთგულად მსახურობს.

[სქოლიოები]