რამდენ ხანს შეგვიძლია ვიცოცხლოთ?

ადამიანების სიცოცხლის ხანგრძლივობა იზრდება. ბევრს აინტერესებს, „რამდენ ხანს შეგვიძლია ვიცოცხლოთ?“.

„ახალი ბრიტანული ენციკლოპედიის“ (The New Encyclopædia Britannica, 1995) თანახმად, წარსულში მიაჩნდათ, რომ პიერ ჟუბერმა დიდხანს იცოცხლა; ის 1814 წელს 113 წლის ასაკში გარდაიცვალა. შესაძლოა, მსგავსი რამ სხვების შესახებაც ითქვა, მაგრამ ამის დასამტკიცებლად მყარი საფუძველი არ ჰქონდათ. მიუხედავად ამისა, არსებობს სარწმუნო მონაცემები, რომ ოდესღაც მრავალი ადამიანი უფრო დიდხანს ცოცხლობდა, ვიდრე პიერ ჟუბერი.

ჟანა-ლუიზა კალმანი 1875 წლის 21 თებერვალს სამხრეთ-აღმოსავლეთ საფრანგეთის ქალაქ არლში დაიბადა, 1997 წლის 4 აგვისტოს კი გარდაიცვალა; მან 122 წელზე მეტი იცოცხლა, რასაც დიდი გამოხმაურება მოჰყვა; ხოლო იაპონელი შიგეჩიო იზუმი 1986 წელს 120 წლის ასაკში გარდაიცვალა. 1999 წლის „გინესის მსოფლიო რეკორდების წიგნში“ შეტანილია დღესდღეობით ყველაზე ხნიერი ადამიანის სახელი — 118 წლის სარა ნაუსი. ის 1880 წლის 24 სექტემბერს პენსილვანიაში (აშშ) დაიბადა. 1998 წელს კანადელი მარი-ლუიზა ფებრონ მეიერიც 118 წლის ასაკში გარდაიცვალა, მხოლოდ იმ განსხვავებით, რომ სარაზე 26 დღით უფროსი იყო.

მართლაც, ძალზე ხნიერი ადამიანების რიცხვი შესამჩნევად გაიზარდა. სტატისტიკური მონაცემების მიხედვით, მომავალი საუკუნის პირველ ნახევარში 100 ან 100 წელს გადაცილებულების რიცხვი 2,2 მილიონზე მეტს მიაღწევს! ცნობილია, რომ 80 წლის და უფრო ხნიერების რიცხვი 1970 წლიდან 1998 წლამდე 26,7 მილიონიდან 66 მილიონამდე გაიზარდა, რაც 147 პროცენტს შეადგენს, მთელი მსოფლიოს მოსახლეობა კი ამ პერიოდში 60 პროცენტით გაიზარდა.

აღსანიშნავია ისიც, რომ ეს ხალხი ისეთი საქმეებითაა დაკავებული, რის გაკეთებაც 20 წლის ასაკის ახალგაზრდების უმრავლესობასაც კი არ შეუძლია. 1990 წელს 82 წლის ჯონ კელიმ მონაწილეობა მიიღო მარათონულ რბენაში და 42,2 კილომეტრი 5 საათსა და 5 წუთში გაირბინა, ხოლო 1991 წელს 84 წლის დიდმა ბებიამ, მევის ლინდგრენმა — 7 საათსა და 9 წუთში. ახლახან, 91 წლის მამაკაცმაც მიიღო მონაწილეობა ნიუ-იორკში გამართულ მარათონულ რბენაში!

ეს იმას არ ნიშნავს, რომ წარსულში მცხოვრები ადამიანების ასაკი არ იწვევდა გაოცებას. 99 წლის ბიბლიური პერსონაჟი, პატრიარქი აბრაამი, ‘გაიქცა თავისი სტუმრების მისაგებებლად’. 85 წლის ქალებ იეფუნის ძემ განაცხადა: „რა ძალაც მაშინ მქონდა [45 წლის წინათ], ახლაც ის ძალა მაქვს საბრძოლველად და მისასვლელ-მოსასვლელად“. ბიბლიაში აღნიშნულია, რომ, როდესაც მოსე 120 წლის იყო ‘არც თვალს აკლდა და არც ძალ-ღონე ჰქონდა გამოლეული’ (დაბადება 18:2; იესო ნავეს ძე 14:10, 11; მეორე რჯული 34:7, აქ).

იესო ქრისტემ პირველი მამაკაცი, ადამი, და კიდობნის მშენებელი, ნოე, მოიხსენია როგორც ისტორიულად ცნობილი პიროვნებები (მათე 19:4–6; 24:37–39). წიგნში „დაბადება“ ნათქვამია, რომ ადამმა იცოცხლა 930 წელი, ხოლო ნოემ — 950 წელი (დაბადება 5:5; 9:29). ნამდვილად ცხოვრობდნენ ადამიანები ასე დიდხანს? შეგვიძლია უფრო დიდხანს ვიცოცხლოთ, თუნდაც მარადიულად? გთხოვთ, გამოიკვლიოთ მომდევნო სტატიაში ამის დამამტკიცებელი ფაქტები.