ქრისტიანული კრება — ნუგეშის წყარო

ოც წელს გადაცილებული პოპი, გულგატეხილი იყო, რადგან მშობლებთან ურთიერთობის ნაკლებობის გამო ოჯახში ცუდი სიტუაცია ჰქონდაa. მან ყველაფერი გულწრფელად უამბო ერთ უხუცესსა და მის მეუღლეს, მოგვიანებით კი მისწერა: „დიდ მადლობას გიხდით, რომ გამონახეთ დრო ჩემთან სასაუბროდ. ჩემთვის ძალიან ბევრს ნიშნავს თქვენი მზრუნველობა. მადლიერი ვარ იეჰოვასი, რომ შემახვედრა ხალხი, რომელთაც შემიძლია ვენდო და ვესაუბრო“.

ახლახანს დაქვრივებულმა ქალმა, ტულამ, რომელსაც ორი მოზარდი შვილი ჰყავს, დაინახა, რომ ემოციური და ფინანსური სირთულეების გამო გაჭირვების ჭაობში აღმოჩნდა. მას და მის შვილებს რეგულარულად აკითხავდა ერთი ქრისტიანი წყვილი კრებიდან და ანუგეშებდა. მას შემდეგ რაც ტულა გაუმკლავდა თავის სიტუაციას ბარათი გაუგზავნა მათ, რომელშიც მისწერა: „მე ყოველთვის გახსენებთ ჩემს ლოცვებში. ვიხსენებ იმ არაერთ შემთხვევას, როდესაც თქვენ დახმარება გამიწიეთ და მხარი დამიჭირეთ“.

ხომ არ გრძნობ ზოგჯერ, რომ ამ წუთისოფლის მზარდი ზეწოლის გამო „ტვირთმძიმე“ ხარ? (მათე 11:28). ხომ არ დაუმახინჯებია შენი ცხოვრება „დროს და შემთხვევას“ თავისი მტკივნეული შედეგებით? (ეკლესიასტე 9:11). თუ დიახ, ეს მარტო შენ არ გემართება. გარდა ამისა, შენ, ისევე როგორც ათასობით სხვამ, შეგიძლია მნიშვნელოვანი დახმარება ჰპოვო იეჰოვას მოწმეების ქრისტიანულ კრებაში. პირველ საუკუნეში მოციქულმა პავლემ დაინახა, რომ ზოგი თანაქრისტიანი განსაკუთრებულად „ანუგეშებდა“ მას (კოლასელთა 4:10, 11). შენც შეგიძლია გქონდეს ასეთი ნუგეში.

მხარდაჭერა და დახმარება

ქრისტიანულ ბერძნულ წერილებში სიტყვა „კრება“ ნათარგმნია ბერძნული სიტყვიდან „ეკლესია“, რაც ნიშნავს ერთად შეკრებილ ხალხს. ეს სიტყვა მოიცავს ერთიანობასა და ურთიერთმხარდაჭერას.

ქრისტიანული კრება მხარს უჭერს ღვთის სიტყვაში არსებულ ჭეშმარიტებას და აცხადებს ღვთის სამეფოს შესახებ კეთილ ცნობას (1 ტიმოთე 3:15; 1 პეტრე 2:9). გარდა ამისა, კრება სულიერ მხარდაჭერასა და დახმარებას უწევს მათ, ვინც მასთან არის დაკავშირებული. იქ ადამიანს მოსიყვარულე, ყურადღებიანი და მზრუნველი მეგობრების შეძენა შეუძლია, რომლებიც მზად არიან და სურვილიც აქვთ დაეხმარონ და ანუგეშონ სხვები გაჭირვებისას (2 კორინთელთა 7:5-7).

იეჰოვას მსახურები მის კრებაში ყოველთვის უსაფრთხოდ გრძნობენ თავს. ფსალმუნმომღერალი აღნიშნავდა, რომ ის სიხარულსა და უსაფრთხოებას გრძნობდა ღვთის ხალხში (ფსალმუნი 26:4, 5; 54:15; 121:1). მსგავსად ამისა, დღეს ქრისტიანული კრება თანამორწმუნეების ჯგუფია, რომლებიც აძლიერებენ და ამხნევებენ ერთმანეთს (იგავნი 13:20; რომაელთა 1:11, 12).

ქრისტიანული კრების წევრები სწავლობენ, რომ ‘სიკეთე მოიმოქმედონ ყველასთვის და უფრო მეტად მათთვის, ვინც თანამორწმუნეა’ (გალატელთა 6:10, აფ). ბიბლიაზე დაფუძნებული ცოდნა მათ აღძრავს, ერთმანეთისადმი ძმური და გულთბილი სიყვარული გამოავლინონ (რომაელთა 12:10; 1 პეტრე 3:8). კრებაში სულიერი ძმები და დები ცდილობენ, კეთილები, მშვიდობისმოყვარენი და თანამგრძნობნი იყვნენ (ეფესელთა 4:3). ისინი არ არიან ფორმალური მსახურები, არამედ ნამდვილ სიყვარულსა და მზრუნველობას ავლენენ სხვებისადმი (იაკობი 1:27).

ამიტომ დათრგუნულები კრებაში ოჯახურ ატმოსფეროს ხედავენ (მარკოზი 10:29, 30). გაერთიანებულ და მოსიყვარულე ხალხთან ყოფნა აძლიერებს მათ (ფსალმუნი 132:1-3). კრების საშუალებით „ერთგული და გონიერი მონა“ „დროულად“ ნოყიერ სულიერ საზრდოს გვაწვდის (მათე 24:45).

მოსიყვარულე ზედამხედველების მიერ გაწეული დახმარება

ქრისტიანული კრების წევრებს მასში შეუძლიათ მოსიყვარულე, გამგები და გამოცდილი მწყემსების პოვნა, რომლებიც მათ სულიერი მხარდაჭერითა და გამხნევებით უზრუნველყოფენ. ასეთი მწყემსები ჰგვანან „საფარს ქარში და თავშესაფარს ავდარში“ (ესაია 32:1, 2). სულიწმიდით დანიშნული უხუცესები ანუ ზედამხედველები ზრუნავენ ღვთის ცხვრისმაგვარ ხალხზე, ამხნევებენ ავადმყოფებსა და დათრგუნულებს და ცდილობენ დააბრუნონ შემცოდველები (ფსალმუნი 99:3; 1 პეტრე 5:2, 3).

რა თქმა უნდა, უხუცესები არ არიან პროფესიონალი ფსიქოლოგები ან კიდევ ექიმები, რომელთაც შეუძლიათ ფიზიკური და სულიერი დაავადებისგან განკურნონ თანამორწმუნეები. ამ ბოროტ წუთისოფელში სნეულებს ჯერაც სჭირდებათ „მკურნალი“ (ლუკა 5:31). მიუხედავად ამისა, ამ მწყემსებს შეუძლიათ მათი დახმარება, ვინც სულიერ მკურნალობას საჭიროებს (იაკობი 5:14, 15). თუმცა, როცა ეს შესაძლებელია, უხუცესები სხვაგვარ დახმარებასაც უწევენ (იაკობი 2:15, 16).

ვინ არის ასეთი მოსიყვარულე კრების დამაარსებელი? იეჰოვა ღმერთი! წინასწარმეტყველი ეზეკიელი გადმოგვცემს იეჰოვას სიტყვებს: „მე თავად მოვიკითხავ ჩემს ცხვარს და მოვძებნი! . . დავიხსნი ყველა იმ ადგილიდან, სადაც კი გაიფანტნენ . . . მე თავად დავმწყესავ ჩემს ცხვარს და მე თავად დავაბინავებ“. ღმერთი ზრუნავს თავის სუსტ და უძლურ ცხვარზე (ეზეკიელი 34:11, 12, 15, 16).

დროული და ნამდვილი დახმარება

მართლა წარმოადგენს ქრისტიანული კრება ნამდვილი დახმარების წყაროს? დიახ, ქვემოთ მოცემულ მაგალითებში აღწერილია სხვადასხვა შემთხვევები, რომელთა დროსაც კრება დახმარების წყარო აღმოჩნდა.

ახლობლის დაკარგვა. ანას ქმარი ხანგრძლივი ავადმყოფობის შემდეგ დაეღუპა. „მას შემდეგ ქრისტიანი და-ძმები სითბოსა და სიყვარულს არ მაკლებენ, — ამბობს ის. — თანამორწმუნეების გამამხნევებელმა კეთილმა სიტყვებმა და გულწრფელმა გულში ჩაკვრამ გამაძლიერა და საბოლოო გულგატეხილობისგან დამიცვა, რისთვისაც მადლობას ვუხდი იეჰოვას. მათ მიერ გამოხატული სიყვარულის გამო ვგრძნობ, რომ ძალიან გამხნევებული და გაძლიერებული ვარ, აგრეთვე ვგრძნობ, რომ ჩემზე გულითადად ზრუნავენ“. შესაძლებელია, შენც განიცადე ახლობლის სიკვდილით გამოწვეული ტკივილი. ასეთ დროს კრების წევრებს შეუძლიათ აუცილებელი ნუგეში და ემოციური მხარდაჭერა აღმოგიჩინონ.

ავადმყოფობა. პოლონელი მიმომსვლელი ზედამხედველი არტური რეგულარულად აკითხავდა შუა აზიის კრებებს, რომ სულიერად გაემხნევებინა ისინი. ერთ-ერთი ასეთი მონახულებისას ის სერიოზულად გახდა ავად, მისი გამოჯანმრთელება კი დიდ სირთულეებთან იყო დაკავშირებული. «მინდა, მოგითხროთ, როგორ იზრუნეს ჩემზე და-ძმებმა [ყაზახეთში], — ამბობს მადლიერების გრძნობით აღძრული არტური. — ძმებსა და დებს, რომელთა უმრავლესობასაც არც კი ვიცნობდი, და თვით დაინტერესებულებსაც კი ფული, პროდუქტები და წამლები მოჰქონდათ . . . ისინი ამას დიდი სიხარულით აკეთებდნენ.

წარმოიდგინეთ, რა გრძნობები დამეუფლა, როდესაც მივიღე კონვერტი ფულითა და პატარა წერილით: „ძვირფასო ძმაო, გულთბილად მოგიკითხავ. დედამ ნაყინისთვის მომცა ფული, მე კი გადავწყვიტე ის შენ მოგცე წამლისთვის. გთხოვ, მალე გამოჯანმრთელდი. იეჰოვას ჩვენ დიდი ხნით ვჭირდებით. გისურვებ ყოველივე კარგს. კიდევ მოგვიყევი რამე დამრიგებლური ამბები. ვოვა“ ». დიახ, როგორც ამ შემთხვევიდან ჩანს, კრებაში მყოფი ახალგაზრდები და მოხუცები ნუგეშს სცემენ სხვებს ავადმყოფობისას (ფილიპელთა 2:25-29).

დეპრესია. ტერის გულითადად სურდა პიონერად ანუ სამეფოს სრული დროით მქადაგებლად ემსახურა. მაგრამ გარკვეული სირთულეების გამო იძულებული გახდა შეეწყვიტა პიონერობა. „ძალიან დამნაშავედ ვგრძნობდი თავს, რომ დავიწყე ასეთი მსახურება და ერთი სრული წელიც ვერ ვიმსახურე“, — ამბობს ის. ტერი ცდებოდა, რადგან ფიქრობდა, რომ იეჰოვას მოწონება მის მიერ მსახურებაში გატარებული საათების რაოდენობაზე იყო დამოკიდებული (შეადარეთ მარკოზი 12:41-44). ის ძლიერ დეპრესიაში ჩავარდა და სხვებს გაერიყა. მაგრამ ტერის კრება დაეხმარა.

ტერი იხსენებს: „ერთმა ხანში შესულმა პიონერმა დამ ყურადღებით მომისმინა, როდესაც ჩემი გრძნობები გავუზიარე, ის დამეხმარა. მისი სახლიდან რომ წამოვედი, ისეთი გრძნობა მქონდა, თითქოს ტვირთი მოვიცილე გულიდან. იმ დღის შემდეგ ამ პიონერმა დამ და მისმა მეუღლემ, კრების უხუცესმა, დიდი დახმარება გამიწიეს. ისინი ყოველდღე მირეკავდნენ და მეკითხებოდნენ, როგორ ვიყავი . . . დროდადრო თავიანთ ოჯახურ შესწავლაზეც მპატიჟებდნენ; ამ შესწავლებმა დამანახვა, რამდენად მნიშვნელოვანია ოჯახის წევრების ახლო ურთიერთობა.“

არ არის უჩვეულო, რომ დეპრესია, გულგატეხილობა და მარტოობის გრძნობა ბევრს, მათ შორის მონათლულ ქრისტიანებსაც, ემართებათ. როგორი მადლიერები უნდა ვიყოთ, რომ ღვთის კრებაში უანგარო დახმარების მიღება შეგვიძლია! (1 თესალონიკელთა 5:14).

სტიქიური უბედურებები და უბედური შემთხვევები: წარმოიდგინე შენი თავი იმ ოჯახის ადგილას, რომელსაც სახლი დაეწვა და ყველაფერი დაკარგა. მალე, როგორც მათ თქვეს, „ისეთი გამხნევება მიიღეს, რომელიც არასოდეს დაავიწყდებათ, და, რომ მათზე დიდი შთაბეჭდილება მოახდინა იეჰოვას ხალხში არსებულმა ჭეშმარიტმა სიყვარულმა“. ისინი იხსენებენ: „ჩვენმა სულიერმა ძმებმა და დებმა მაშინვე დაიწყეს რეკვა; ისინი გულწრფელად გვამხნევებდნენ და თანაგვიგრძნობდნენ. გაუთავებლად რეკავდა ტელეფონი. ყველას გულწრფელი წუხილი და სიყვარული ისე გულის ამაჩუყებელი იყო, რომ მადლიერების ცრემლები მოგვდიოდა“.

მალე კრების უხუცესებმა ძმებისგან შექმნეს დიდი ჯგუფი, რომელმაც ამ ოჯახს რამდენიმე დღეში ახალი სახლი აუშენა. მათი ერთ-ერთი მეზობელი აღფრთოვანებული იყო: „უნდა გენახათ! მშენებლობაში ყველა მონაწილეობდა: კაცი თუ ქალი, ზანგი თუ ესპანელი!“ ეს ძმური სიყვარულის აშკარა მტკიცება იყო (იოანე 13:35).

თანაქრისტიანები მათ ტანსაცმლით, საკვებითა და ფულით დაეხმარნენ. ოჯახის უფროსი იხსენებს: „ეს შობის დღესასწაულს დაემთხვა, როდესაც ყველა საჩუქრებს აძლევს ერთმანეთს, მაგრამ ჩვენ გულწრფელად შეგვიძლია ვთქვათ, რომ არავის უგრძვნია მაშინ ისეთი ნამდვილი, უსაზღვრო გულუხვობა სხვისგან, როგორიც ჩვენ“. ოჯახის სხვა წევრებმა კი დაუმატეს: „ნელ-ნელა ხანძარი გვავიწყდება და მის ადგილს ჩვენს მეხსიერებაში ჩვენდამი გამოვლენილი სიკეთე და კარგი მეგობრები იკავებენ. მადლობლები ვართ ჩვენი ზეციერი მამის, იეჰოვა ღმერთის, ძმებისგან შემდგარი ასეთი საოცარი, ერთიანი ოჯახისთვის დედამიწაზე და იმისათვის, რომ ამ ოჯახის ნაწილი ვართ!“

რა თქმა უნდა, ასეთი დახმარება შეუძლებელია და არც არის მოსალოდნელი ყოველი უბედური შემთხვევისას, მაგრამ ამ შემთხვევიდან კარგად ჩანს, რა მხარდაჭერის აღმოჩენა შეუძლია კრებას.

მაღლიდან გარდმომავალი სიბრძნე

ბევრმა ქრისტიანულ კრებაში დახმარებისა და გაძლიერების სხვა წყარო იპოვა. კერძოდ რომელი? „ერთგული და გონიერი მონის“ მიერ მოწოდებული პუბლიკაციები, რომელთა შორისაც არის ბევრისთვის ცნობილი „საგუშაგო კოშკი“ და „გამოიღვიძეთ!“. იმისთვის, რომ მათში გონივრული რჩევები და პრაქტიკული მითითებები იყოს მოცემული, ეს პუბლიკაციები ძირითადად ბიბლიაში არსებულ ღვთიურ სიბრძნეს ეყრდნობა (ფსალმუნი 118:105). ბიბლიურ ინფორმაციასთან ერთად ამ პუბლიკაციებში მოცემულია ისეთ თემებზე ჩატარებული საიმედო და ავტორიტეტული კვლევა ძიების შედეგები, როგორიც არის: დეპრესია, ცუდი მოპყრობის გამო მიყენებული ჭრილობების მოშუშება და სხვადასხვა სოციალური თუ ეკონომიკური პრობლემები, სირთულეები, რომლებსაც ახალგაზრდები აწყდებიან და სიძნელეები, რომლებიც განვითარებადი ქვეყნებისთვის არის დამახასიათებელი. უპირველესყოვლისა, ეს პუბლიკაციები მხარს უჭერს ღვთის გზას, როგორც ცხოვრების საუკეთესო გზას (ესაია 30:20, 21).

ყოველ წელს საზოგადოება „საგუშაგო კოშკი“ მადლიერების გამომხატველ ათასობით წერილს ღებულობს. ჟურნალში „გამოიღვიძეთ!“ მოცემულ თვითმკვლელობის შესახებ სტატიაზე ერთხელ ერთმა რუსმა ახალგაზრდა მამაკაცმა საზოგადოებას მისწერა: „ჩემი დეპრესიულობის გამო . . . არაერთხელ მიფიქრია თავის მოკვლაზე. ამ სტატიამ კი გამიძლიერა რწმენა, რომ ღმერთი დამეხმარება ჩემი პრობლემების გადაჭრაში. მას უნდა, რომ ვიცოცხლო. მადლობა ღმერთს მხარდაჭერისთვის, რომელიც ამ სტატიის მეშვეობით აღმომიჩინა“.

თუ ამ წუთისოფლის პრობლემების ბობოქარი ტალღები გადაულახავად გეჩვენებათ, დარწმუნებული იყავით, რომ ქრისტიანული კრება უსაფრთხო თავშესაფარია. მართლაც, თუ ამ უსიყვარულო წუთისოფლის ხრიოკი უდაბნო ძალებს გართმევთ, იეჰოვას ორგანიზაციაში შეგიძლიათ გამომაცოცხლებელი ოაზისი იპოვოთ. მას შემდეგ, რაც საკუთარ თავზე გამოსცდით ასეთ მხარდაჭერას, შეიძლება თქვენც გაიმეოროთ ერთი ქრისტიანი ქალის სიტყვები, რომელიც გაუმკლავდა მეუღლის სერიოზულ ავადმყოფობას და თქვა: „ჩვენდამი გამოვლენილი სიყვარულისა და მზრუნველობის გამო ვგრძნობდი, რომ მთელი ამ გაჭირვების განმავლობაში იეჰოვა მხარში მედგა. დიდად მადლიერი ვარ, რომ იეჰოვას დიდებული ორგანიზაციის წევრი ვარ!“

[სქოლიო]

[სურათები 26 გვერდზე]

ჩვენ შეგვიძლია ნუგეში ვცეთ ყველას, მათ შორის ავადმყოფებსა და მათ, ვისაც ახლობელი დაეღუპა.