მან ხელი შეუწყო სინათლის გავრცელებას „ქვეყნის კიდემდე“
მოციქული პავლე სულიერ სინათლეს ავრცელებდა „ქვეყნის კიდემდე“. შედეგად, ბევრმა „ირწმუნა, ვინც საუკუნო სიცოცხლისათვის იყო განწესებული“ (საქმეები 13:47, 48; ესაია 49:6).
სულიერი სინათლის გავრცელების დიდი სურვილი იეჰოვას მოწმეების ხელმძღვანელი საბჭოს წევრის, თავგამოდებული და დაუღალავი ქრისტიანის, უილიამ ლოიდ ბერის ცხოვრებიდანაც ჩანდა. ძმა ბერი 1999 წლის 2 ივლისს გარდაიცვალა, როდესაც ჰავაის კუნძულებზე გამართულ საოლქო კონგრესზე სიტყვით გამოდიოდა.
ლოიდ ბერი 1916 წლის 20 დეკემბერს ახალ ზელანდიაში დაიბადა. მისი დედ-მამა იმთავითვე დიდ ინტერესს ავლენდა ბიბლიური ჭეშმარიტებების მიმართ, რომლებიც საზოგადოება „საგუშაგო კოშკის“ მიერ გამოქვეყნებულ ჩ. ტ. რასელის პუბლიკაციებში იყო მოცემული. მაშასადამე, ძმა ბერი ერთგული ქრისტიანების ოჯახში გაიზარდა.
მიუხედავად იმისა, რომ სპორტით იყო დაკავებული, უმაღლეს სასწავლებელში სწავლობდა და სამეცნიერო ხარისხზეც მუშაობდა, ძმა ბერის მთელი ყურადღება სულიერ საკითხებზე ჰქონდა მიპყრობილი. ასე რომ, 1939 წლის 1 იანვარს მან სრული დროით მსახურება დაიწყო და ავსტრალიაში არსებულ საზოგადოების ფილიალში ბეთელის ოჯახის წევრი გახდა. როდესაც 1941 წელს მთავრობამ საზოგადოების მოღვაწეობა აკრძალა, ძმა ბერი კვლავ ფილიალის საქმეებით იყო დაკავებული; დროდადრო თანამორწმუნეების გასამხნევებელი მასალის დაწერა ევალებოდა. აგრეთვე სამაგალითოდ ხელმძღვანელობდა საჯარო მსახურებას.
1942 წლის თებერვალში ძმა ბერი სრული დროით მსახურზე დაქორწინდა. წლების მანძილზე მისი მოსიყვარულე ცოლი, მელბა, ლოიდის მხარდამხარ ერთგულად მსახურობდა დედამიწის მრავალ კუთხეში. უცხო ქვეყნებში მსახურებისთვის მათ მნიშვნელოვანი ნაბიჯი გადადგეს და ამ მიზნით შეერთებულ შტატებში არსებული „საგუშაგო კოშკის“ ბიბლიური სკოლა „გალაადის“ მე-11 კლასი დაამთავრეს. მათ დანიშნულება მიიღეს, როგორც მრავალი იტყოდა, ‘ქვეყნის კიდეში’ — იაპონიაში. როდესაც 1949 წლის ნოემბერში იქ ჩავიდნენ, მისიონერული მსახურება საპორტო ქალაქ კობეში დაიწყეს. იმ პერიოდში იაპონიაში მხოლოდ 12 ადამიანი ქადაგებდა კეთილ ცნობას. ძმა ბერიმ იაპონური ენა ისწავლა და ახალი ქვეყნის კულტურას შეეთვისა; მას ძალიან შეუყვარდა იაპონელი ხალხი, რომელთანაც მომდევნო 25 წლის განმავლობაში მსახურობდა. იაპონიაში მზარდი ქრისტიანთა საძმოს მიერ შეუმჩნეველი არ დარჩენილა, რომ ძმა ბერი ‘საუკუნო სიცოცხლისათვის განწესებულთა მიმართ’ სიყვარულს ავლენდა. ისინი მას დაეხმარნენ, რომ ათწლეულების მანძილზე ეფექტურად ეხელმძღვანელა იქაური ფილიალისთვის.
1975 წლის შუა პერიოდში, როცა იაპონიაში დაახლოებით 30 000 მოწმე იყო, ბერის ოჯახი ბრუკლინში (ნიუ-იორკი) გადაიყვანეს. ძმა ბერიმ, როგორც სულითცხებულმა ქრისტიანმა, იეჰოვას მოწმეთა ხელმძღვანელი საბჭოს წევრად მსახურების დანიშნულება მიიღო (რომაელთა 8:16, 17). სამწერლო გამოცდილება ძალიან გამოადგა თავისი ახალი დანიშნულების შესრულებისას, კერძოდ სამწერლო განყოფილებაში მუშაობისას. ხოლო ფილიალებსა და უცხო ქვეყნებში მსახურების შედეგად მიღებული მდიდარი გამოცდილებით მას, როგორც ხელმძღვანელი საბჭოს საგამომცემლო კომიტეტის წევრს, დიდი წვლილი მიუძღვის.
წლების მანძილზე ძმა ბერის არ განელებია სიყვარული აღმოსავლეთისა და იქ მცხოვრები ხალხის მიმართ. გალაადის სკოლის სტუდენტები და ბეთელის ოჯახის წევრები ყოველთვის ელოდნენ, რომ თავის მოხსენებებსა თუ კომენტარებში მრავალი მისიონერის გულში ჩამწვდომ შემთხვევებს აღნიშნავდა. „ქვეყნის კიდემდე“ სამეფოს შესახებ ცნობის ქადაგება, მართლაც, თვალწინ იშლებოდა, როცა ძმა ბერი მთელი ენთუზიაზმით ყვებოდა საკუთარ შემთხვევებს. მისი მსახურების ზოგი შემთხვევა მოხსენიებულია მის მიერ მოყოლილ ამბავში, რომელიც 1960 წლის 15 სექტემბრის ჟურნალ „საგუშაგო კოშკში“ გამოქვეყნდა (ინგლ.).
ჩვენ დარწმუნებულები ვართ, რომ ძმა ბერი, როგორც ‘ქრისტეს თანამემკვიდრე’, კვლავაც გამოავლენს ინტერესს მათ მიმართ, „ვინც საუკუნო სიცოცხლისათვის არის განწესებული“. რა თქმა უნდა, ის ძალიან მოაკლდება ყველას, ვინც იცნობდა მას — სულიერ, იეჰოვაზე სრულიად მიძღვნილ პიროვნებას, რომელსაც მთელი გულით უყვარდა ღვთის ხალხი. მიუხედავად ამ სამწუხარო ფაქტისა, ჩვენ ვხარობთ, რომ ძმა ბერიმ პირნათლად განვლო თავისი მიწიერი ცხოვრების გზა (გამოცხადება 2:10).
[სურათი 16 გვერდზე]
ლოიდ ბერი და ჯონ ბარი 1988 წელს ბიბლიური ცნობარის (Insight on the Scriptures) გამოცემის დროს.
[სურათი 16 გვერდზე]
სკოლა „გალაადის“ მე-11 კლასის კურსდამთავრებულები (შეხვედრა იაპონიაში 40 წლის შემდეგ).